Romanos 14 - Dios Iwene

Ju'wedönö sulabenö omukwatökönaduwi jö̧ba̧lö Pablo yöawina wene

¹ Chömöledö, ju'wedö Jesúsnö ösödadöma, Jesúsnö tjösödijayonö, ina me'dawadö tjo̧'wo̧ luwo̧nöma ichejekwa chömöledö. Jejenö tjo̧'wo̧ luwo̧nö me'dawadönö kwöpöjödaduwoko chömöledö, ina kwösödaduwo jobadönö kwömöledöduwinö. Ja̧danö, jobadökwö jwöjwököbakwawaduwa chömöledö, tjomukwati̧ jawama.

² Baikwö labebö lobö yötawa chömöledö: Ökwödötjö ju'wedö tjomukwatena, Okobe jwiinö kwakwawama otiwa, suli̧ waedökö kwakwawama, wame jawa, jö̧ba̧lö tjomukwatena. Jejenö omukwatö, okobe jwiinö kwadö jobadöma. Jo̧kwaijayonö, ju'wedö ina tjo̧'wo̧ luwo̧nö me'dawadöma, wainö omukwatadö tjuju̧kwena, baikwö omukwatadö: Itebiya chukwitjö̧ma, suli̧ waedena, Dios öpöjödena jö̧ba̧lö tjomukwatena. Ja̧danö, jejenö omukwatö, sule batjo jawada kwadö jobadöma.

³ Chömöledö, okobe jwiinö kwadöma, kwöködönö tjomukwatoko, Bidöma wajwibadö, mikwawöködö, jö̧ba̧lö. Ja̧danö kwöködöma, kwadönö tjomukwatoko, Bidöma sulabedö, Dios öpöjödinö kwadö, jö̧ba̧lö. Jau chömöledö, Diosma ida̧ökö ökwödö Jesúsnö ösödadönö bakwo̧nökwena ida̧ökö yöawinobe, Bitema chösödökwe, bisuma chösödoko, jö̧ba̧lö. Jo̧kwajabetjö̧ ökwödö bidöma sulabedö, mikwawöködö kwomukwataduwoböma jwia yelösöda chömöledö, Diosda jobadönö ösödobetjö̧.

⁴ Baikwö wanedö yötawa: Ökwödöma, jelo̧ ömöayo̧nö, otiwanö otidojobö, sulabenö otidojobö jö̧ba̧lö ¿yöbawadököbaduwobeji̧? Yöbawöködöja, ¿jö̧tö? Sule uluwo̧da yöbawo̧, otiwanö otidojobö, sulabenö otidojobö, jo̧bada weobetjö̧. Ja̧danö, Diosda yöbawo̧, iteda ömöayedö otiwanö ja̧bö tjö̧jojobö, sulabenö ja̧bö tjö̧jojobö chömöledö. Ja̧danö, Diosda jobadönö pjaatakwo̧obetjö̧, otiwanö ja̧bö tjö̧jakwedö chömöledö.

⁵ Ja̧danö, möle jawa kwomukwataduwi̧ yötawa. Ju'wedö tjomukwatena, Bakwöta mölema wainö 'da̧batö chujunobö jo̧be, wainö chujunökötjö̧ma sulena, jö̧ba̧lö. Jejenö tjomukwatonö, ju'wedö tjomukwatena, Bakwainö jo̧be mölema, wainö 'da̧batö chujunoböma jwia, jö̧ba̧lö. Biya̧ jawa bakwo̧nökwena kwomukwataduwo chömöledö, Diosma ökwödönö weojobö, weokojobö jö̧ba̧lö, wainö 'da̧batö kwujunaduwoböma.

⁶ Jau chömöledö, bakwöta möle wainö 'da̧batö juno̧ma, Duluwo̧nö ösödotö jö̧ba̧lö wainö 'da̧batö juno̧. Ja̧danö, okobe jwiinö kwakwawa kwo̧ma, Diosda otiwanö chukwobö iyajabe, jö̧ba̧lö, duluwo̧nö ösödö kwo̧. Kwö̧kö̧bi ja̧danö chömöledö. Ju'wi jawa chukwobö webö̧kö̧, batjo jawada chukwobö otiwanö iyajabe Diosma, jö̧ba̧lö, Duluwo̧nö ösödö batjo jawada kwo̧. Bakwainö ösödadö Duluwo̧nöma, möle wainö 'da̧batö junadöbi, 'da̧batö junöködöbi, okobe jwiinö kwadöbi, okobe jwiinö kwöködöbi.

⁷ Jau chömöledö, dö̧ji̧ma, ökwödö dösödi̧da ja̧dobö jö̧ködösa, ja̧danö wodi̧ma, ökwödö dösödi̧da ja̧dobö woböködösa.

⁸ Ina 'yaba̧ladö dö̧jayi, Duluwo̧ ösödi̧da ja̧dobö ja̧dösa, ¿jö̧tö? Ja̧danö wodenama, Duluwo̧kwö ja̧nö duju̧kwakwedösa, ¿jö̧tö? Ja̧danö, dö̧jitjö̧bi, woditjö̧bi, duluwo̧ma bakwo̧da chömöledö.

⁹ Jau chömöledö, Cristoma woinobe, ¿jö̧tö? Ja̧danö, yemidanö tjeachajinobe woawatjöma, ¿jö̧tö? Jejenöobetjö̧, jo̧bada La'aka Luwo̧ma, wobinadö Tjuluwo̧bi, ina 'yaba̧ladö Tjuluwo̧bi chömöledö.

¹⁰ Jo̧kwajabetjö̧ baikwö yötawaduwakwö chömöledö: Kwö̧ja̧wo̧dönö omukwatökönaduwi, Aaa, bitema sulabo̧, ja̧danö omukwatökönaduwi, Aaa, bitema wajwibo̧, mikwawö̧kö̧, jö̧ba̧lö. Okobe deinö bakwo̧nökwena Dios öba a'otjö dö̧jakwedösa chömöledö, jo̧bada ja̧dina yöawobö, otiwojobö, sulojobö jö̧ba̧lö.

¹¹ Baikwö laebobe Dios iwene, jojodö Dios öba a'otjö tjö̧jakwa̧ma: Ötjö La'aka Luwo̧ Diosma isabenö yöbawö chujuna, jojodö ja̧tjakwa̧ma. Okobe deinö jojodöma chöba a'otjö ja̧nö, bȩbachibö yötjawakwedö, Biteda inesö La'aka Luwo̧ Dios, jö̧ba̧lö laebobe Dios iwenema.

¹² Ja̧danö, okobe deinö bakwo̧nökwena Dios öba a'otjö dö̧jakwedösa, jo̧bada ja̧dina yöawobö, otiwojobö, sulojobö jö̧ba̧lö. Jau chömöledö, dömöledönö yöbawöködösa, otiwadö tjö̧jojobö, sulabedö tjö̧jojobö jö̧ba̧lö, Duluwo̧ Diosda ja̧ yöbawo̧ma.

Otiwanö te'ada̧lönö kwomukwataduwo, kwömöledö Jesúsnö ösödadönö pjabatö jö̧ba̧lö Pablo yöawina wene

¹³ Jo̧kwajabetjö̧, jelo̧nö yödawoböma jwia, Bitema sulabo̧, jö̧ba̧lö, Diosda yöawakwo̧obetjö̧. Ju'wida domukwatobö jo̧be chömöledö. Baikwö wanedö yötawa: Bakwo̧nökwena domukwatobö jo̧be, Ju'wi jaye yelösöda ja̧tökena, chöjawo̧ töbö meakwemi baibanöma, jö̧ba̧lö.

¹⁴ Biya̧ wene labebö lobö yötawa chömöledö: Ötjöma, chuluwo̧ Jesúskwö ja̧nö chöwaisa, Okobe jwiinö kwakwawama, wame jawada, suli̧ waedökö, jö̧ba̧lö. Jejenö chöwaisijayonö, jelo̧ omukwatena, Aaa, biya̧ chukwoböma webö̧kö̧ Diosma, jö̧ba̧lö. Baikwö yötawaduwakwö chömöledö: Ja̧ kwakwawa sulököjayonö, jejenö omukwato̧nö suli̧ waedobedanö ichejekwa, Dios öpöjödi̧ jawa jö̧ba̧lö omukwatobetjö̧. Ja̧danö, jo̧ba ja̧ kwakwawa ukwoböma, sulena chömöledö.

¹⁵ Jau chömöledö, kwöjawo̧duwi omukwatena, Ju'wi kwakwawa sula, Dios weökö jawa, jö̧ba̧lö. Ja̧danö, jejenö omukwatijayonö ökwödö kwukwaduwitjö̧ma, jo̧banö suli̧ kwöwaedaduwena, sulabenö omukwatobö ja̧köbaduwobetjö̧. Ja̧danö, jejenö ja̧bö kwöjawo̧duwinö ösödökönö kwukwaduwena chömöledö. Jejenö suli̧ waedökönaduwi kwö̧ja̧wo̧dönöma chömöledö. Cristoma jobadönö ösödö midawö woinobe, ¿jö̧tö? Jo̧kwajabetjö̧ kwö̧ja̧wo̧dönöma suli̧ waedökönaduwi chömöledö.

¹⁶ Jau chömöledö, Aaa, biya̧ma otiwa sulökö, jö̧ba̧lö kwöwaisaduwijayonö, ja̧bökönaduwi, ju'wedö sulabenö yötja̧lapji jö̧ba̧lö.

¹⁷ Jau chömöledö, Dios ömöayedö dö̧ji̧ma kwakwawa jawamaökö, owawa jawamaökö. Ju'wida chömöledö, Dios ömöayedö dö̧ji̧ma. Dios O̧'wo̧ Luwo̧ma ökwödönö ja̧inobe, sulabe jwibadö badibanö, ja̧danö tupakwöbi pjaatobe ökwödönöma. Jau chömöledö Cristonö ösödadö dömöledökwö wene jwiinö dö̧jobö, do̧'wo̧ ösöwanö wene jwiinö dömöledökwö dö̧jobö pjabato̧ Dios O̧'wo̧ Luwo̧ma. Ja̧da Dios ömöayedö ja̧kwawama chömöledö.

¹⁸ Jau chömöledö, dö̧ja̧wo̧dö töbö metjapji jö̧ba̧lö te'ada̧lakwawö duju̧kwaduwo. Jejenö te'ada̧lakwawö ja̧nö Cristo wei̧ ja̧bö dö̧jitjö̧ma, Diosma ösödena, ja̧danö ju'wedöbi ökwödönö tjösödena, Otiwanö ja̧bö ju̧kwadö, jö̧ba̧lö.

¹⁹ Jo̧kwajabetjö̧ baikwö yötawaduwakwö chömöledö, kabatökönö wene jwii̧ jawa disakwaduwo, ja̧danö ju'wibi disakwaduwo chömöledö, dö̧ja̧wo̧dönö tjujuluwachibanö pjadato jö̧ba̧lö disakwaduwo.

²⁰ Chömöledö, Diosma pjaatobe tjo̧'wo̧ luwo̧nö me'dawadönöma, ¿jö̧tö? Jo̧kwaijayonö ökwödö ju'wedönö te'ada̧lökönö, Aaa, chösödi̧da ja̧bö chukwocha, jö̧ba̧lö dukwitjö̧ma, söbebö lodena ichejekwa Dios jobadönö pjaati̧ma. Jejenö söbebö lobökönaduwi, Dios pjaati̧ma chömöledö. Isabenö sulökö kwakwawama, okobe jwiinö otiwa chömöledö, jo̧kwaijayonö ökwödö dukwi̧ ju'wedö metjobö dukwitjö̧ma, dukwi̧ma suli̧ jawada baibobe chömöledö.

²¹ Kwöwaisaduwena, Aaa, biya̧ itebiya chukwitjö̧ma, biya̧ ubasobu chowitjö̧ma, chöjawo̧nö suli̧ chöwaedena, jö̧ba̧lö. Jejenö kwöwaisaduwitjö̧ma, yelösöda kwukwaduwoko, yelösöda kwowaduwoko, ja̧danö ju'wi jayebi yelösöda ja̧köbaduwoko, kwöjawo̧duwi töbö meapji jö̧ba̧lö.

²² Chömöledö, okobe jwiinö kwakwawama otiwa suli̧ waedökö ji̧ jö̧ba̧lö kwöwaisaduwena. Ja̧ kwöwaisi̧ma, Dios öba a'otjöda kwöwaisobö jo̧be chömöledö, jojodö tjöba a'otjö jwöjwököbakwawaduwoko ja̧ jawama. Ja̧danö kwomajadenö, Aaa, biya̧ma otiwa, suli̧ waedökö ji̧, jö̧ba̧lö kwöwaisitjö̧ma, kwo̧'wo̧ ösöwanö ja̧nö okobe jwiinö kwukwena, wene jwiinö.

²³ Jo̧kwaijayonö, Aaa, biya̧ma chukwitjö̧ma sulena, Dios öpöjödena, jö̧ba̧lö kwomukwatitjö̧ma, kwukwoko, ökwönö suli̧ jawa baibobetjö̧. Baikwö yötawa chömöledö: Ökwöma, Biya̧ma Dios öpöjödi̧ jawa, jö̧ba̧lö kwomukwatonö kwukwitjö̧ma, sula, ja̧danö, Dios weökö jawa chukwobe, jö̧ba̧lö kwukwiökwe Diosma ökwönö yöawena, Sulabenö kwo̧, jö̧ba̧lö. Jau chömöledö, Biya̧ma Dios weökö jawa, jö̧ba̧lö omukwatö kwukwobetjö̧, sulabenö Dios öpöjödinö kwukwena.