Romanos 13 - Dios Iwene

Jesúsnö ösödadöma La'aka luwedö wetji̧ ja̧bö tjö̧jo jö̧ba̧lö Pablo yöawina wene

¹ Chömöledö, la'aka luwedö wetji̧ ja̧bö kwö̧jaduwo, Diosda jobadönö kabebö ujuninobetjö̧. Jau chömöledö, Diosda inesö la'aka luwo̧ma, ja̧danö jo̧bada okobe deinö böjȩ luwedönö kabebö junina.

² Ja̧danö, Diosda jobadönö kabebö ujuninobetjö̧, luwedö wetji̧ ja̧bökönö dö̧jitjö̧ma, Dios wei̧da ja̧bökönö dö̧jena ichejekwa, Diosda luwedönö ujuninobetjö̧. Ja̧danö lȩekwa jo̧be, la'aka luwedö wetji̧ a̧ja̧kwöködönöma.

³ Jau chömöledö, otiwanö ja̧bö ju̧kwadöma yebaböködö luwedönöma, sule sulabenö ja̧bö ju̧kwadöda yebabidö, wetji̧danö ja̧bö tjö̧jokobetjö̧. Ja̧danö, luwedönö yebabökönö kwö̧jaduwobö jö̧ka̧laduwitjö̧ma, otiwanö ja̧bö kwö̧jaduwo. Ja̧danö, otiwanö ja̧bö kwö̧jaduwitjö̧ma, luwedöma ökwödönö tjösödena, otiwanö ja̧badöja jö̧ba̧lö.

⁴ Jau chömöledö, Diosma luwedönö ujuninobe, ökwödönö pjatjato jö̧ba̧lö. Ja̧danö, otiwanö ja̧bö kwö̧jaduwitjö̧ma, luwedönö yekabiduwoböma jwia. Jo̧kwaijayonö, sulabenö ja̧bö kwö̧jaduwitjö̧ma, yekabiduwoböma jo̧be, isabenö lȩtjebobö juluwadötjobetjö̧. Jau chömöledö, Diosma luwedönö ujuninobe iteda ömöayedö batjibanö, sulabenö ja̧badönö lȩtjebo jö̧ba̧lö.

⁵ Jo̧kwajabetjö̧, luwedö wetji̧ ja̧bö kwö̧jaduwo, Dios lȩebapji jö̧ba̧lö. Ja̧danö, ju'wibi chömöledö. Kwomajadeduwinö, Aaa, bite wei̧ ja̧bö chö̧joböma webo̧ Diosma, jö̧ba̧lö kwöwaisaduwobetjö̧, luwedö wetji̧ ja̧bö kwö̧jaduwo chömöledö.

⁶ Ju'wibi chömöledö, Diosda jobadönö ujuninobetjö̧, luwedö atjebi̧ balada, impuesto ötjabi̧ balada wetji̧danö kwimidaduwobö jo̧be. Kwimidaduwobö jo̧be chömöledö, luwedöma Dios wei̧ ja̧bö ju̧kwadötjobetjö̧, Dios ujuninadanö.

⁷ Jau chömöledö, okobe jwiinö impuesto jawa balada kwimidaduwo, wetji̧danö. Ja̧danö ju'wibi, kwuluwedönö kwöpöjödaduwoko chömöledö. Diosda bidönö juninama jö̧ba̧lö, jobadönö kwösödaduwo, otiwanö kwomukwataduwo luwedönöma.

Kwömöledö Jesúsnö ösödadönö kwösödaduwo jö̧ba̧lö Pablo yöawina wene

⁸ Chömöledö, okobe jwiinö kwumusidaduwi̧ma kwimidaduwo, musidöködö bakibaduwanö. Biya̧da kwumusidaduwo chömöledö, kwömöledöduwinö bakwo̧nökwena kwösödaduwo jö̧ba̧lö. Baikwö wanedö yötawa: Diosma weinobe, kabatökönö dömöledönö dösödobö, ¿jö̧tö? Jo̧kwajabetjö̧, ju'wi jaye dumusidököjayonö, ina dumusidena ichejekwa, ju'wedönö dösödo jö̧ba̧lö. Jau chömöledö, ja̧da kwumusidaduwo, kwömöledöduwinö bakwo̧nökwena kabatökönö kwösödaduwo jö̧ba̧lö. Ja̧danö, ju'wedönö ösödö ju̧kwadöma, okobe jwiinö ju'wi Dios weina jawabi ja̧bö ju̧kwadö chömöledö.

^9-10 Biya̧ wene labebö lobö yötawa chömöledö. Damötjö Diosma Israel jojodönö weinobe, ¿jö̧tö? Baikwö laebobe Dios iwene, Israel jojodönö weinama: Kwilekwobökujukwöbi sulabenöma ja̧köbaduwa. Kwilekwebö̧kö̧kwöbi sulabenö ja̧köbaduwa. Jelo̧nöbi kwabö loköbaduwoko. Kwönaukwaduwa. Kwömöledöso̧ iteama ö'wiabinö kwedaduwa, jö̧ba̧lö weinobe Israel jojodönöma. Ja̧danö, ja̧ Dios weina jawa abe'dodanö weinama jelobe laeba, baikwö laebobe Dios iwene: Ökwöda kwösödakwawi̧danö, kwömöledönö kwösödo, jö̧ba̧lö laebobe Dios iwene. Ja̧danö, ökwöda kwösödakwawi̧danö ju'wedönö ösödö kwö̧jitjö̧ma, okobe jwiinö yötawaja̧ Dios weina jawabi, ju'wi Dios weina jawabi ja̧bö kwö̧jena, ¿jö̧tö? Bakwo̧nö kwösöditjö̧ma, ¿jo̧banö suli̧ waedö ja̧köbenaji̧? Ja̧köbökena, ¿jö̧tö? Jo̧kwajabetjö̧, tjömöledönö ösödö ju̧kwadöma, okobe jwiinö ju'wi Dios weina jawabi ja̧bö ju̧kwadö.

¹¹ Ju'wibi yötawaduwakwö chömöledö. Kwöwaisaduwa, Dios ökwödönö dö̧jibinö ja̧akwa̧ möle ökwödönö böjȩtjö emakwa̧ mölema ida̧ökö yöneawachiba, jo̧kwajabetjö̧ ökwödönö yötawaja̧danö ja̧bö kwö̧jaduwo. Jau chömöledö, ajayi Jesúsnö dösödenama, ja'yubenö lekwijatö, ökwödönö iteda i̧tji̧munö emakwa̧ mölema, jo̧kwaijayonö ida̧ökö yöneawachiba dö̧jibakwa̧ mölema. Ja̧danö, wanedö yötawa chömöledö: Wilubaduwi,

¹² yö̧te böjȩnö dö̧ji̧ma juluwanö 'dö̧iba, dewachakwa̧ Dios ökwödönö emakwa̧ma yöneawachiba ida̧ökö. Jo̧kwajabetjö̧, yö̧te jawa kabatibö lodaduwo, yȩa'wo okwa jojodö ja̧tji̧ jawa, Dios öpöjödi̧ jawama. Ja̧danö, wanedö yötawa: Mölesado̧da 'dudawaduwo chömöledö, Dios ösödi̧ jawama. Ja̧ma tjöekwado̧danö ji̧, döpöjojo ökwödökwö ölakwabikwawobetjö̧.

¹³ Ja̧danö, sule möle jawada ja̧bö dö̧jobö jo̧be chömöledö, Dios ösödi̧ jawada, Dios öpöjödi̧ jawamaökö. Owa̧lö, 'dukwachawö̧ baibanöma kwö̧jaduwoko, ja̧danö kwi̧lȩkwa̧muböködökwö sulabenö alewö kwö̧jaduwoko. Böjȩ jojodö sulabenö tjalewi̧danöma, kwalewaduwoko, ja̧danö sulabenö tjösödi̧danöma kwösödaduwoko. Ö'wiabinö edöma dameakwabinöma kwö̧jaduwoko, ja̧danö kwölakwabikwawaduwoko chömöledö.

¹⁴ Wainö ja̧bö kwö̧jaduwo chömöledö. Baikwö wanedö yötawa: Duluwo̧ Jesucristo jawa 'dukawaduwo chömöledö, ja̧danö Dios ösödi̧ jawada ja̧köbaduwobö kwisakwaduwo. Ja̧danö, sulabenö dösödi̧ jawama, böjȩ jojodö sulabenö dösödi̧ jawa ja̧köbaduwoböma kwisakwaduwoko chömöledö.