Romanos 12 - Dios Iwene

Jesúsnö ösödadö otiwanö ja̧bö tjö̧ji̧ Pablo yöawina wene

¹ Chömöledö, Diosma ökwödönö lȩlö̧jinö edinobetjö̧, yötawaduwakwö, Diosnö kwiyawaduwo, Diosnö iyawadö, ina 'yaba̧ladö iyawadö bakibaduwanö. Jejenö kwiyawaduwobö chösöda chömöledö. Ja̧danö, Diosnö iyawadö kwö̧jaduwobema, jo̧ba wei̧da jwaikwöda ja̧bö kwö̧jaduwo chömöledö, Dios ösödi̧danö. Jejenö Diosnö kwösödaduwobö otiwa chömöledö.

² Ja̧danö, ju'wedö böjȩ jojodö ja̧bö tjö̧ji̧danöma ja̧bö kwö̧jaduwoko chömöledö. Diosma kwomukwataduwi̧ balewachinö ja̧obö ösödo̧, ja̧danö balewachinö ja̧obö weköbaduwo, 'yayi̧ jawada omukwatadö bakibaduwanö. Ja̧danö, Dios ökwödö kwomukwataduwi̧ balewachinö ja̧itjö̧ma, Dios ösödi̧ jawa kwöwaisaduwena, inesö otiwa jawa, sulabe jwii̧ jawama.

³ Jau chömöledö, Diosma otiwa jawa iyö, ötjönö weinobe ökwödönö yötawobö. Jejenö weinobetjö̧, ökwödönö bakwo̧nökwena weta, Omukwatökönaduwi, ökwödöma otiwadösa, jö̧ba̧lö. Jau chömöledö, Diosda ökwödönö bakwo̧nökwena pjabatinama, Jesúsnö kwösödaduwobö, ¿jö̧tö? Jo̧kwajabetjö̧ otiwo̧sa jö̧ba̧löma kwomukwataduwa chömöledö, bakwo̧nökwena, Dios pjaatinökwesa, jö̧ba̧lö kwomukwataduwo.

⁴ Jau chömöledö, isabenö, Otiwo̧sa, ju'wedötjö bajalekwönönö bo̧sa, jö̧ba̧lö kwomukwataduwoko. Baikwö wanedö yötawa diteba'o jawa chömöledö: Jojo bakwo̧ iteba'oma, nöinö ujuna̧lobe, ¿jö̧tö? Bakwo̧dajayonö, nöinö ujuna̧lobe iteba'o jawama. Ja̧danö, okobe jwiinö ujuna̧li̧ma bakwainöma ja̧okobe, ¿jö̧tö?

⁵ Ja̧danö, ökwödö Cristonö ösödadöma ba̧jekwadö dö̧jijayonö, bakwo̧ iteba'obedösa, Jesúskwö a̧jö ju̧kwadöma. Ja̧danö, bakwo̧ iteba'o jawadanö dötewinö duju̧kwobe dömöledökwö chömöledö.

⁶ Ja̧danö, bakwo̧ iteba'obedö dö̧jobema, bakwo̧nökwena Dios ökwödönö wainökwena iyinadanö ja̧bö dö̧jo chömöledö. Baikwö yötawa chömöledö: Dios bakwo̧nö Dios iwene yöawo jö̧ba̧lö iyinatjö̧ma, Aaa, biya̧ma Dios yöawi̧, yötawobö webo̧ Diosma, jö̧ba̧lö öwaisi̧danö yöawobö jo̧be.

⁷ Ju'wedönö pjaato jö̧ba̧lö iyinatjö̧ma, ju'wedönö pjaatobö jo̧be. Ju'wedönö öba̧ja̧do jö̧ba̧lö iyinatjö̧ma, ju'wedönö öba̧ja̧dobö jo̧be,

⁸ ju'wedönö tjujuluwachibanö yöawo jö̧ba̧lö iyinatjö̧ma, tjujuluwachibanö yöawobö jo̧be. Ja̧danö, ju'wedönö iyo jö̧ba̧lö iyinatjö̧ma, a̧'dȩlökönö iyobö jo̧be, luwo̧ jawa otidö ö̧jo jö̧ba̧lö iyinatjö̧ma, otiwanö te'ada̧lönö luwo̧ jawa otidobö jo̧be, ju'wedönö lȩlö̧jinö edo jö̧ba̧lö iyinatjö̧ma, o̧'wo̧ ösöwanö lȩlö̧jinö edobö jo̧be.

⁹ Ju'wedönö isabenö kwösödaduwo, wamedama kwösödaduwoko, okwanö kwösödaduwo. Jau chömöledö, sulabe jawa Dios öpöjödi̧ jawama kwöpöjödaduwo. Ja̧danö wanedö yötawa: Otiwa jawa 'diinö do̧ka̧laduwo, ja̧da kwösödaduwo.

¹⁰ Ja̧danö, kwömöledö Jesúsnö ösödadönö kwösödaduwo, ökwöda kwöjawo̧danö, ja̧danö kwömöledöduwinö otiwanö kwomukwataduwo, ökwödada kwomukwatakwawemi o̧penönö jobadö kwömöledöduwinö otiwanö kwomukwataduwo, jobadönö ösödö.

¹¹ Kwotidaduwi̧ma otiwanö kwotidaduwo, nuwelö̧jachibökönö, ja̧danö jwaikwöda Duluwo̧ Dios wei̧ ja̧bö kwö̧jaduwo, kwomajadeduwinö Diosnö ösödö.

¹² Diosnö kwo̧'wo̧ wana̧lö, kwo̧'wo̧ luwo̧ ösöwanö omukwata̧lö kwö̧jaduwo, Diosma jö̧a̧li̧danö ja̧akwo̧ jö̧ba̧lö. Ja̧danö, wene baibenama, me'dawachibökönö kwö̧jaduwo. Ja̧danö, kabatökönö Diosnö abebö kwö̧jaduwo chömöledö.

¹³ Kwömöledöduwi Cristonö ösödadö jwibö tjö̧jenama, pjakataduwo, ja̧danö jelobetjö ichajadö tjichibenama, öpöjödabökönö te'ada̧lö pjakataduwo.

¹⁴ Ju'wedö usula kwemawaduwinö sulabenö ja̧tjenama, Diosnö akebaduwo jobadönöma, jobadönö pjaatobö akebaduwo. Jau chömöledö, pjaatobö akebaduwo, lȩeboböma akebaduwoko, ökwödönö sulabenö ja̧badönöma.

¹⁵ Ja̧danö ju'wedö tjo̧'wo̧ ösöwanö tjö̧jenama, jobadökwö kwo̧'wo̧ ösöwanö ösödö kwö̧jaduwo, ja̧danö ju'wedö o̧'wo̧ tjo̧achö tjubudekwenama, jobadökwö kwubudekwaduwo.

¹⁶ Okobe deinö kwömöledöduwinö bakweminö dösölö̧jinö ja̧bö kwö̧jaduwo. Ja̧danö, Otiwadösa, jö̧ba̧löma kwomukwataduwoko, ja̧danö ju'wedönöma, Mikwawöködö, jö̧ba̧löma kwomukwataduwoko, jo̧kwadabedönöma. Okobe deinö kwömöledöduwinöma bakweminö ösödö kwomukwataduwo, ja̧danö, Aaa, waisadösa, jö̧ba̧löma kwomukwataduwoko.

¹⁷ Bakwo̧ ökwönö sulabenö ja̧itjö̧ma, balekwa mikwa sulabenöma ja̧bökönaduwi chömöledö, jwaikwöda otiwanö ja̧böda kwö̧jaduwo okobe deinö, Aaa, biya̧ma otiwanö ja̧awa, jö̧ba̧lö tjöwaisinö.

¹⁸ Ja̧danö ju'wedökwö wene jwiinö kwö̧jaduwobö ji̧tjö̧ma, wene jwiinö kwö̧jaduwo chömöledö.

¹⁹ Chömöledö, ju'wedö ökwödönö sulabenö ja̧tjenama, balekwa mikwa yelösöda ja̧bökönaduwi sulabenöma. Diosda sulabenö ja̧badönö lȩbebo̧ chömöledö, ökwödömaökö. Baikwö laebobe Dios iwenema: Duluwo̧ma baikwö yöawobe: Ötjödasa balekwa mikwa lȩbebo̧ma, ötjöda lȩtebocha jojodö sulabenö ja̧tji̧ mikwa, jö̧ba̧lö laebobe Dios iwenema.

²⁰ Jau chömöledö, Dios iwene wei̧danö ja̧köbaduwo. Baikwö weobe Dios iwenema: Kwöpöjojonö a̧wi̧chi̧ tjöitjö̧ma, jo̧banö kwakwawa kwiyo, ja̧danö ojwiyo o̧ti̧ tjöitjö̧ma, ojwiyo kwiyo. Jejenö ja̧köbitjö̧ma, taba lö̧jökwe ö̧jakwo̧ kwöpöjojoma, jö̧ba̧lö laebobe Dios iwenema.

²¹ Jau chömöledö, wanedö yötawa: Suli̧ ökwödönö juluwo jö̧ba̧löma webökönaduwi, ökwödöda otiwanö ja̧bö ja̧nö kwujuluwaduwo suli̧tjöma.