Romanos 11 - Dios Iwene

Israel jojodötjö ba̧jekwadö tjöpöjödinajayonö, ja'yubenö tjö̧jibinö ja̧inobe Diosma jö̧ba̧lö Pablo yöawina wene

¹ Chiwȩyudaja̧ yöba̧lö, ¿dakwö kwomukwataduwa chömöledö? Diosma iteda ömöledö, Israel jojodö ötjabiwö̧nö ¿kaatibinaji̧? Ja̧maökö chömöledö, kaatibinokobe. Ötjöbi Israel jojosa chömöledö, ja̧danö Abraham itji̧ tupadanö jojosa, ja̧danö Jacob itji̧ Benjamín itji̧ tupadanö jojosa.

² Diosma iteda ömöledönöma kaatibinokobe, damötjö 'da̧batö ujuninawö̧nöma. ¿Ina Elías ö̧jina wene kwomukwataduwiji̧, Elías Diosnö yöawina wenema? Baikwö laebobe Dios iwene, Elías Diosnö yöawinama:

³ Chuluwo̧ Dios, okobe deinö kwiwene yöbawadönö kwabö lotjinobe Israel jojodöma. Ja̧danö ökwönö kwabö juwö tjiyemibi okobe jwiinö 'dobö lotjinobe. Kwiwene yöbawadötjö ötjöda chö̧jibajabe, ja̧danö babema ötjönöbi kwabö lotjobö tjisakwobe Israel jojodöma, jö̧ba̧lö laebobe Elías Diosnö yöawina, Ökwönö ösödadöma deobe, ötjödasa, jö̧ba̧lö.

⁴ Jejenö yöawiökwe, ¿dakwö atadinada Diosma chömöledö? Baikwö laebobe Dios Elíasnö atadinama: Ökwödamaökö Elías, ju'wedöbi tjuju̧kwobe chiwene yöbawadöma. Ötjöma ömadö siete milnö 'da̧batö chujunijatö, chömöayedönöma. Jobadöma jojodö tjösödökwe o̧'wo̧ jawa Baal mikwo̧nö, bȩbachibö ösödöködö, jö̧ba̧lö laebobe Dios Elíasnö atadinama.

⁵ Babe mölebi ja̧danö tjuju̧kwobe chömöledö. Ba̧jekwadö tjöpöjödijayonö, Israel jojodötjö ina ja'yubenö tjuju̧kwobe, Dios omudawö ujuninawö̧ma. Jobadönö Diosma mikwa jwiinö otiwa jawa iyö, iteda ömöledö batjibanö ja̧inobe.

⁶ Jau chömöledö, jojodöma idöda otiwanö ja̧bö ichiböködö, ¿jö̧tö? Idöda otiwanö ja̧bö tjichibobö ji̧natjö̧ma, Dios mikwa jwiinö otiwa jawa iyi̧ma mikwawoko jö̧a̧lena, ida̧ökö idöda tjujulunö ja̧kwawa tjujuna̧lobetjö̧. Jo̧kwaijayonö, idöda ja̧bö ichiböködö jojodöma. Ja̧danö Diosda lȩlö̧jinö edo̧obetjö̧, jo̧bada mikwa jwiinö otiwa jawa iyö jobadönö ja̧obe, iteda ömöledö batjibanö.

⁷ Chömöledö, judío jojodötjö sule ja'yubenöda ösödadö tjuju̧kwobema, ¿dakwö domukwatobö jo̧beda? Baikwö labebö lobö yötawa chömöledö: Israel jojodöma sulabe jwibadö batjibobö tjisakwinobe, ¿jö̧tö? Jejenö tjisakwobema, ¿sulabe jwibadö batjibinaji̧? Batjibinokobe chömöledö. Sule Dios iteda ömöledö batjibanö 'da̧batö ujuninawö̧da sulabe jwibadö batjibinobe, ja̧danö ju'wedöma sule tjuu 'dibadöda batjibinobe chömöledö.

⁸ Dios iwene laebi̧danö baibinobe chömöledö. Baikwö laebobe Dios iwenema: Diosma jobadönö ja̧inobe wajwibadö batjibanö. Ja̧danö babe mölebi tjöbajale tjewawawö̧danö, tjölakiyu jwibadödanö a̧ja̧kwöködö tjuju̧kwobe, jö̧ba̧lö laebobe Dios iwenema.

⁹ Ja̧danö, Dios iwene wȩyudina Davidbi biya̧ wene iwȩyudinobe. Baikwö laebobe Dios iwene, David Diosnö aebinama: Dios, ökwönö ateba, bidönö lȩkebobö. Pjiesta tjujunenama, tju̧kwa pjiesta 'daliwa baibanö ja̧bidönö, metjobö ja̧bidönö,

¹⁰ ja̧danö tjöbajalebiya tjewawawö̧ baibanö ja̧bidönö, wene tjujuna̧lobö ja̧bidönö, usula tjemawinö jö̧ba̧lö laebobe, David Diosnö aebina, öpöjödadönöma. Ja̧danö ja̧ David iwȩyudinadanö baledinobe judío jojodötjö öpöjödadönöma.

Israel jojodöböködö tjö̧jibobö Dios pjaatina wene

¹¹ Wanedö yötawa chömöledö: Chiwȩyudaja̧ omukwatö, Israel jojodöma töbö metjinobe ichejekwa, ¿jö̧tö? Jejenö metjinobema, kabatökönö nijinöda a̧laibökönö tjö̧bo jö̧ba̧lö ¿metjinaji̧? Ja̧maökö chömöledö, baikwö yötawa: Israel jojodö tjöpöjödiökwe, Diosma Israel jojodöböködö tjö̧jibobö pjaatinobe. Jau chömöledö, Israel jojodöböködö tjö̧jibinö pjaatinobe Diosma, Israel jojodö edö, ö'wiabinö tjedo jö̧ba̧lö.

¹² Chömöledö, Israel jojodöma sulabenö tjöpöjödinobe otiwa jawa wenema, ¿jö̧tö? Ja̧danö, jejenö tjöpöjödi̧ma, otiwa jawa baibinobe ökwödö Israel jojodöböködönöma, ¿jö̧tö? Jau chömöledö, tjöpöjödi̧ma ökwödönö otiwa jawa baibinobe. Ja̧danö baikwö yötawaduwakwö: Israel jojodö sulabenö ja̧tji̧ma ökwödönö otiwa jawa baibinatjö̧ma, otiwanö ja̧tji̧ma ja̧tjö o̧penönö isabenö otiwa jawa baibakobe ökwödönö. Jau chömöledö, Israel jojodöbi otiwa jawa wene tjösödenama ja̧tjö bajalekwönönö isabenö jwiinö otiwa jawa baibakobe ökwödö Israel jojodöböködönöma.

¹³ Jau chömöledö, ökwödö Israel jojodöböködönö yötawa. Diosma ötjönö 'da̧batö ujuninobe, Jesús webawo̧ Israel jojodöböködönö yöbawo̧ batibanö. Ja̧danö, Diosma otiwa jawa weinobe, jö̧ba̧lö, jwaikwöda ökwödö Israel jojodöböködönö yötawa.

¹⁴ Ja̧danö, ötjöma ötjöda chömöledönö pjatato jö̧ba̧lö jwaikwöda ökwödö Israel jojodöböködönö yötawa, ötjöda chömöledö Israel jojodöma ökwödönö edö ö'wiabinö tjedo jö̧ba̧lö. Ja̧danö, jobadö ökwödönö ö'wiabinö tjeditjö̧ma, jobadöbi Diosnö ösödö tjö̧jibena.

¹⁵ Jau chömöledö, Diosma Israel jojodönö kaatibinobe ichejekwa, ja̧danö jejenö kaatibenama, Israel jojodöböködönö Dios ömöledö batjibanö ja̧inobe. Jejenö ja̧inobema, otiwinobe ökwödönö Israel jojodöböködönöma, ¿jö̧tö? Jo̧kwaijayonö, ja̧ otiwinajayonö, tupakwö jwiinö otiwakobe Israel jojodöbi yemidanö Dios ömöledö batjibenama chömöledö, wobajadö woawatjö yemidanö tjebachajadödanö ichejekwakobe.

¹⁶ Chömöledö, wanedö yötawa: Bakwo̧ pan otidenama, ajayisapja̧da 'da̧batö ujunena, Diosnö iyawa baibanö, ¿jö̧tö? Jo̧kwaijayonö, ajayisapja̧da iyijayonö, ja̧ pan okobe jwiinö Dios u̧kwada baibobe. Ja̧danö, ju'wi wanedö yötawa: Bakwo̧ towi bö'dia Diosnö iyitjö̧ma, jowi towi okobe jwiinö Dios u̧kwa towi baibobe. Jau chömöledö, la'aka jawa Dios u̧kwaobetjö̧, dötewinö ji̧ jawabi Dios u̧kwa jo̧be.

¹⁷ Ja̧danö, towi wanedö yötawa, olivo towi jawa wanedö yötawa: Abraham i̧tji̧mu tupadanö jojodöma, otiwowi batjonö jo̧wi olivo towi öjabiyadanö ju̧kwadö. Ja̧danö, ökwödö Israel jojodöböködöma, sulabowi tebonö jo̧wi olivo towi öjabiyadanö ju̧kwadöja. Ja̧danö, Diosma batjonö jo̧wi olivo towi öjabiya tjebö loinobe ichejekwa. Ja̧danö, tjebö lobajo̧ ajayi tjö̧jinemi, ökwödö tebonö jo̧wi olivo towi öjabiya ujuninobe, otiwowi olivo towi öjabiya baibanö pokwö kwö̧jaduwo jö̧ba̧lö. Ja̧danö, otiwowi bö'dia dötewinö kwö̧jaduwobe babema, wanedö yötawa chömöledö. Ja̧danö, jelowi tebonö jo̧wi olivo towi öjabiya kwö̧jinaduwijayonö, babema batjonö jo̧wi olivo towi bö'diatjö otiwa jawa kwemaduwobe kwujuluwachibaduwanö chömöledö, wanedö yötawa.

¹⁸ Jo̧kwaijayonö, omukwatökönaduwi, Aaa, Dios tjebö loinawö̧nötjö o̧penönö otiwadösa, jö̧ba̧lö. Aaa, otiwadösa, jö̧ba̧lö kwomukwataduwoböma jwia chömöledö. Baikwö wanedö yötawa: Towi bö'diama, towi öjabiyatjö i̧dȩlu̧ emokobe, ¿jö̧tö? Sule towi öjabiyada towi bö'diatjö i̧dȩlu̧ emobe, ¿jö̧tö? Ja̧danö, ökwödöma towi öjabiyadanö ichejekwadöja, towi bö'diadanömaökö. Jo̧kwajabetjö̧, Aaa, otiwadösa, jö̧ka̧laduwoböma jwia chömöledö.

¹⁹ Kwomukwataduwena, Aaa, Israel jojodönö tjebö loinobe, babema ökwödö Israel jojodöböködöda jobadö tjö̧jinemi dö̧jo, jö̧ba̧lö.

²⁰ Chömöledö, isabenö jobadönö tjebö loinobe, ja̧danö ajayi tjö̧jinemitjö balekwedönö ökwödönö ujuninobe. Biya̧ yötawa chömöledö: Dios iwene tjöpöjödiökwe, jobadönö tjebö loinobe, ja̧danö Dios iwene kwösödaduwobetjö̧, tjö̧jinemi kwö̧jaduwobe. Ja̧danö, Aaa, otiwadösa, jö̧ba̧lö kwomukwataduwoko chömöledö. Wainö kwomukwataduwo chömöledö, Isabenö Diosma iteda iwene öpöjödadönöma lȩbebo̧, jö̧ba̧lö kwomukwataduwo chömöledö.

²¹ Jau chömöledö, Israel jojodöma batjonö jo̧wi olivo towi öjabiyadanö tjö̧jinobe, ¿jö̧tö? Jo̧kwaijayonö, tjöpöjödiökwe, jobadönö tjebö loinobe. Jejenö batjonö jo̧wi olivo towi öjabiyadanöbedönö tjebö loinobema, ökwödö Israel jojodöböködöbi kwöpöjödaduwitjö̧ma, ¿ökwödö batjonö jo̧wi olivo towi öjabiyadanöböködönö tjebö loökenaji̧?

²² Jau chömöledö, Dios ja̧i̧ kwomukwataduwo, Diosma lȩbeböbi lȩbebo̧, ja̧danö lȩlö̧jinö edöbi lȩlö̧jinö edo̧. Mebinadö Israel jojodönöma, lȩbebo̧ Diosma, jo̧kwaijayonö ökwödö Israel jojodöböködönöma lȩlö̧jinö edo̧. Jo̧kwajabetjö̧, ökwödö Israel jojodöböködöma Dios yöawi̧ kwösödaduwo ina ökwödönö lȩlö̧jinö edobö, ja̧danö ökwödönöbi tjebö loapji jö̧ba̧lö.

²³ Ja̧danö ju'wibi chömöledö wanedö yötawa: Israel jojodöma Diosnö tjösöditjö̧ma, jobadönöbi batjo jawa olivo towinö ujunakwo̧. Jau chömöledö, Diosma juluwo̧, yemidanö ajayinö tjö̧jinemi Israel jojodönö ujuno jö̧ba̧lö.

²⁴ Jau chömöledö, wanedö yötawa: Tebonö jo̧wi olivo towi öjabiyama, batjonö jo̧wi olivo towinö pokwökö, ¿jö̧tö? Jo̧kwaijayonö, ökwödö Israel jojodöböködöma, jelowi öjabiyadanö kwö̧jinaduwijayonö, Diosma ökwödönö otiwanö pjaatinobe, batjonö jo̧wi olivo towinö pokwö kwö̧jaduwinö, ¿jö̧tö? Ja̧danö, Israel jojodöma batjonö jo̧wi olivo towi öjabiyadanöbedö, ¿jö̧tö? Ja̧danö, Diosma jelowi öjabiya ujunobö öwaisitjö̧ma, ¿iya̧da towi öjabiya yemidanö ujunoböma wajwienaji̧? Waiso̧ chömöledö, wayökökwe ja̧ma.

'Dö̧ibajakwa̧ möle Israel jojodö tjö̧jibakwa̧ Pablo yöawina wene

²⁵ Jau chömöledö, biya̧ wene yötawaduwakwö, jojodö ajayinö wajwitjina wenema, Aaa, waisadösa, jö̧ba̧lö kwomukwataduwapji jö̧ba̧lö. Israel jojodötjö, ba̧jekwadö tjuu 'dibadö ja̧nö Diosnö tjöpöjödijayonö, ba̧kwȩlöjatebödama tjöpöjödökena, ju'winö tjösödakwedö chömöledö. Ja̧danö, Israel jojodöböködötjö, Diosnö tjösödakwedö tjuju̧kwobe. Jobadö Israel jojodöböködötjö tjösödakwedö okobe deinö tjösödenanö baibanö, tjöpöjödakwedö Israel jojodöma.

²⁶ Ja̧danö, jemi ikenama Israel jojodöbi tjö̧jibakwedö chömöledö. Baikwö laebobe Dios iwene, Israel jojodö tjö̧jibakwa̧ma: Jojodö tjö̧jibinö ja̧bo̧ma Jerusaléntjö ichakwo̧, ja̧danö okobe deinö Jacob i̧tji̧mu tupadanö jojodö sulabenö ja̧tjina söbebö loakwo̧.

²⁷ Ja̧danö, sulabe tjujuna̧li̧ söbebö lotenama, jobadönö isabenö pjatatakwa̧ wene yöbawö chujunocha, jö̧ba̧lö laebobe Dios iwene, Dios Israel jojodö tjö̧jibinö ja̧akwa̧ma.

²⁸ Chömöledö, Israel jojodöma otiwa jawa wene tjöpöjödobetjö̧, Dios öpöjojodö tjuju̧kwobe. Ja̧danö öpöjojodö tjuju̧kwiökwe, lȩlö̧jinö edo̧ Diosma, ökwödö Israel jojodöböködönöma. Jo̧kwaijayonö ina ösödo̧ Diosma, Israel jojodönöma, jobadö tja'dödöminenö omudawö ujuninobetjö̧.

²⁹ Jau chömöledö, Diosma, Chiyocha jö̧a̧litjö̧ma jö̧a̧li̧danö iyo̧. Ja̧danö, Omudawö chujuna jö̧a̧litjö̧ma, omudawö juno̧, jö̧a̧li̧danö ja̧bo̧ Diosma.

³⁰ Jau chömöledö, ajayima, Dios iwene kwa̧ja̧kwinaduwokobe ökwödö Israel jojodöböködöma, ¿jö̧tö? Jo̧kwaijayonö, Israel jojodö tja̧ja̧kwiökökwe, ökwödönö lȩlö̧jinö edinobe Diosma.

³¹ Ja̧danö, ajayinö Diosnö kwa̧ja̧kwinaduwöködanö, babema bidö Israel jojodöbi tja̧ja̧kwokobe Diosnöma. Jo̧kwaijayonö, Dios ökwödönö ajayinö a̧ja̧kwinöködönö lȩlö̧jinö edinadanö, bidö a̧ja̧kwöködö Israel jojodönöbi lȩlö̧jinö edakwo̧ Diosma.

³² Jau chömöledö, okobe deinö böjȩ jojodöma bakweminö Diosnö da̧ja̧kwokobetjö̧, Diosma ja̧inobe bakweminö okobe deinö ka̧lena dö̧bobedanö dö̧bobö. Jejenö ja̧inobe Diosma, bakweminö ka̧lena ba̧ja̧dadönöma bakweminö lȩlö̧jinö edobö chömöledö

³³ Diosma isabenö otiwanö lȩlö̧jinö edo̧ chömöledö, otiwa jawa mikwa jwiinö iyö. Isabenö okobe jwiinö waiso̧ Diosma, ja̧danö okobe jwiinö ja̧i̧ma, waisanö ja̧bo̧. Bakwo̧bi deobe okobe jwiinö Dios omukwati̧ waiso̧ma, jweinö labebö lobö yöawo jö̧ba̧lö. Ja̧danö, bakwo̧bi deobe Dios ja̧i̧ waiso̧ma chömöledö.

³⁴ Dios iwene laebi̧danö jo̧be chömöledö, baikwö laebobe Dios iwenema: Dios omukwati̧ waiso̧ma deobe, ja̧danö Diosnö webo̧bi deobe, baikwö baikwö ja̧köbo jö̧ba̧lö webo̧ma.

³⁵ Bakwo̧bi deobe, Diosnö iyo̧ma, Diosma musido̧ baibanö. jö̧ba̧lö laebobe Dios iwenema.

³⁶ Jau chömöledö, Diosda okobe deinöbi, okobe jwiinöbi otidina. Ja̧danö okobe jwiinöbi okobe deinöbi iteda ujulunöda dö̧jobe böjȩnöma, Dios ösödi̧ ja̧bö dö̧jo jö̧ba̧lö. Jo̧banöda dösödo ba̧kwȩlö̧jatebö chömöledö, Otiwo̧ja, juluwo̧ja, jö̧ba̧lö. Jo̧banöda dösödoböma chösöda chömöledö.