Romanos 10 - Dios Iwene

¹ Chömöledö, jwiinö chösödobe ötjöda chömöledö Israel jojodö tjö̧jibobö. Ja̧danö, tjö̧jibobö chösödobetjö̧, Diosnö atebobe jobadönöma.

² Jweinö yötawaduwakwö chömöledö, isabenö isakwadö Israel jojodöma Dios ösödinö ja̧tjo jö̧ba̧lö. Jo̧kwaijayonö, Dios ösödi̧danö ja̧tjotö jö̧ba̧lö tjisakwijayonö, wajwibö isakwadö chömöledö.

³ Jau chömöledö, Dios öba a'otjö sulabe jwibadö batjibobö tjisakwijayonö, Dios ja̧i̧ma wajwibadö, jojodö sulabe jwibadö batjibobö ja̧i̧ma. Ja̧danö, ja̧ wajwibö, Dioskwö tjichibobö isakwadö, idöda ja̧tji̧da, idöda tjujulunöda. Ja̧danö, idöda tjujulunöda ja̧bö tjisakwobema, Dios jojodö sulabe jwibadö batjibobö ja̧i̧ma tjöpöjödobe chömöledö.

⁴ Jau chömöledö, Cristoda okobe jwiinö Dios Moisésnö weina ja̧bina, ¿jö̧tö? Jo̧kwaijayonö, Cristoda okobe jwiinö ja̧inajayonö, Cristonö ösödadönöbi jö̧ba̧lo̧ Diosma, Bidöma sulabe jwibadö, jö̧ba̧lö. Ja̧danö, Cristoma Moisés iwȩyudinama söbebö loinobedanö ichejekwa chömöledö, Dios Moisésnö weina ja̧bökönö sulabe jwibadö badibobetjö̧.

Okobe deinö tjö̧jibobö jo̧be jö̧ba̧lö Pablo yöawina wene

⁵ Biya̧ wene labebö lobö yötawa chömöledö. Moisésma baikwö iwȩyudinobe: Bakwo̧ okobe jwiinö Dios weina jawa ja'yubebi junibökönö ja̧itjö̧da, ja̧kwawa ujuna̧lakwo̧, okobe jwiinö Dios weina ja̧obetjö̧, jö̧ba̧lö iwȩyudinobe Moisésma.

^6-7 Jo̧kwaijayonö, jejenömaökö Jesúsnö tjösödiökwe Dios, Bidöma sulabe jwibadö, jö̧a̧lawö̧nöma. Okobe jwiinö Dios weina ja̧böda ichiböködö, ja̧danö nöinö Dioskwö tjichibobö isakwöködö. Baikwö laebobe Dios wanedö yöawinama: Omukwatökönuwi, ¿tijö mölejȩbe isakwö i̧'yakwo̧ma, Cristonö öbibö böjȩkwö ichejebakwo̧ma? jö̧ba̧lö. Ja̧danö, ju'wibi omukwatökönuwi, ¿tijö wobajadö tjuju̧kwemi isakwö i̧'yakwo̧ma, Cristonö woawatjö tjeachajinö ja̧akwo̧ma? jö̧ba̧lö yöawinobe Diosma, Ji̧kwa wenema ödöokobe, ödöma kwisakwaduwoko, jö̧ba̧lö.

⁸ Jau chömöledö, wainö weobe Dios iwene, kwomukwataduwobö. Baikwö laebobe: Ji̧kwa wenema ödöokobe ökwödötjöma, isakwö kwi̧'yaduwobö, ida̧ökö ökwödökwö jo̧betjö̧. Ja̧danö, ida̧ökö kwinenenöbi, kwomajadenöbi jo̧be ichejekwa, ji̧kwa wenema, ödöokobe, jö̧ba̧lö laebobe Dios iwene. Jau chömöledö, ja̧ ji̧kwa wenema, ökwödönö yötawi̧ weneda.

⁹ Ja̧ wenema biya̧ chömöledö: La'aka luwo̧ma Jesúsda yöba̧lö, kwomajadenö isabenö Diosma Jesúsnö tjeachajinö ja̧inobe, jö̧ba̧lö kwomukwatitjö̧ma kwö̧jibakwo̧ja, jö̧ba̧lö laebobe.

¹⁰ Jau chömöledö, Jesúsnö ösödö, dö̧jibinö pjabato̧, jö̧ba̧lö dösödiökwe, Diosma ökwödönö yöbawo̧, Bidöma sulabe jwibadö, jö̧ba̧lö. Ja̧danö, Jesúsda la'aka luwo̧ yöba̧lö, dö̧jibobe.

¹¹ Jau chömöledö, Dios iwene baikwö laebobe Jesúsnö ösödadönöma: Bakwo̧ jo̧banö ösöditjö̧ma, waekwökena, isabenö ö̧jibakwo̧, jö̧ba̧lö laebobe.

¹² Jau chömöledö, bakweminö jo̧be, judío jojodönöbi, judío jojodöböködönöbi, okobe deinö jo̧banö ösödadöma tjö̧jibakwedö chömöledö. Jau chömöledö, judío jojodöbi, judío jojodöböködöbi tjuluwo̧ Diosma bakwo̧da. Ja̧danö okobe deinö jo̧banö abebadönöma otiwanö pjabato̧ Diosma.

¹³ Baikwö laebobe Dios iwenema: Okobe deinö Diosnö pjaatobö abebadöma, tjö̧jibakwedö, jö̧ba̧lö laebobe. Ja̧danö jejenö laebobetjö̧, bakwaiobe judío jojodönöbi, judío jojodöböködönöbi, okobe deinö Jesúsnö ösödö tjö̧jibobö jo̧be.

¹⁴ Chömöledö, ¿dakwö atjebobö jojodö, Diosnöma, jo̧banö tjösödokobema? Ja̧danö, ¿dakwö Diosnö tjösödobö chömöledö, ina jo̧banö wajwitjobema, ina jo̧banö tja̧ja̧kwokobema? Ja̧danö, ¿dakwö tja̧ja̧kwobö chömöledö, Diosnö yöbawo̧ deobema?

¹⁵ Ja̧danö, ¿dakwö yöawobö yöbawo̧ma, jo̧banö, Yöbawaji, jö̧ba̧lö wetjokobema? Waekwena, ¿jö̧tö? Dios iwene baikwö laebobe Dios iwene yöbawadönöma: Otiwa jawa wene yötjawakwedö tjichi̧ma jwiinö otiwobe, jö̧ba̧lö laebobe.

^16-17 Jau chömöledö, otiwa jawa wene ösödadöma, otiwa jawa wene tja̧ja̧kwobetjö̧, ösödadö. Ja̧danö, otiwa jawa Cristo jawa wene yöbawadö yötjawobetjö̧, a̧ja̧kwö ösödadö jobadöma. Jo̧kwaijayonö, otiwa jawa wene a̧ja̧kwajadötjöma, ba̧jekwadö tjöpöjödobe chömöledö. Dios iwene wȩyudina Isaíasma baikwö iwȩyudinobe: Chuluwo̧ Dios, bidönö yödawijayonö, tjöpöjödobe yödawi̧ma, jö̧ba̧lö iwȩyudinobe Isaíasma.

¹⁸ Chömöledö, Israel jojodöma otiwa jawa wene tjöpöjödinobe, ¿jö̧tö? ¿Tajawedö tjöpöjödinada chömöledö? ¿Tja̧ja̧kwokobetjö̧ tjöpöjödinaji̧? Ja̧maökö chömöledö, isabenö tja̧ja̧kwinobe otiwa jawa wenema. Dios iwene baikwö laebobe: Otiwa jawa wene yötjawobe ökwöi̧ma böjȩ bakwameachibanö jojodönö ökwöinobe, ja̧danö böjȩ ö'öbönö ju̧kwadöbi tja̧ja̧kwinobe, jö̧ba̧lö laebobe.

¹⁹ Ja̧danö chömöledö, Israel jojodöma tja̧ja̧kwinobe otiwa jawa wenema. Ja̧danö, tja̧ja̧kwinajayonö, ¿otiwanö tja̧ja̧kwinökiji̧? Otiwanö tja̧ja̧kwinobe chömöledö, ja̧danö otiwa jawa wene tjösödo jö̧tja̧linobe, otiwanö tja̧ja̧kwinobetjö̧. Sule öpöjödöda tjöpöjödinobe. Ja̧danö, Israel jojodö jejenö tjöpöjödiökwe Diosma damötjö yöawinobe Israel jojodöböködönö pjaatakwa̧ma. Dios iwene wȩyudina Moisésma baikwö iwȩyudinobe, Dios Israel jojodönö yöawina, ju'wedö Israel jojodöböködönö pjaatakwa̧ wenema: Ju'wedönö Israel jojodöböködönö pjatatobetjö̧, ö'wiabinö kwedaduwakwedöja, ökwödö Israel jojodöma. Ja̧danö, wajwibadönö Israel jojodöböködönö pjabatö otiwa jawa chiyobetjö̧, ökwödö Israel jojodöma kwödameakwaduwakwedöja, jö̧ba̧lö laebobe.

²⁰ Ja̧danö, Dios iwene wȩyudina Isaíasbi biya̧ wene yebabökönö iwȩyudinobe, Dios Israel jojodöböködönö yöawi̧ma. Baikwö laebobe Isaías iwȩyudinama: Ötjönö Diosnö isakwöködöma, tjisakwököjayonö, ötjönö tjöbadekwajinobe. Ja̧danö, ötjönö isakwö abebinöködöma, jobadönö chi̧sekwijatö, ötjönö tjedobö, jö̧ba̧lö laebobe Dios Israel jojodöböködönö yöawinama.

²¹ Ja̧danö, Israel jojodönöbi iwȩyudinobe Isaíasma. Dios jobadönö yöawinama baikwö iwȩyudinobe: Möle baledibanö cha̧debijatö weti̧ a̧ja̧kwöködönö, ötjönö öpöjödadönöma tjö̧jibobö, jö̧ba̧lö yöawinobe Diosma, Israel jojodönöma.