Romanos 1 - Dios Iwene

Pablo Roma jojodönö kwialusöja iwȩyudina wene

¹ Ötjö Pablo mikwo̧sa, Cristo Jesús ömöayo̧sa, Cristo Jesús webawo̧sa. Ötjöma Dios 'da̧batö ujuninökwesa, otiwa jawa Dios jawa wene yötawobö weinökwesa.

² Ja̧ otiwa jawa baledakwa̧ wene tjiwȩyudinobe, damötjö Dios yöawi̧ yöbawadöma, Dios yöawi̧ tjiwȩyudenama.

³ Ja̧ otiwa jawa wenema, Dios itji̧ Jesucristo jawa wene. Jo̧ba Jesucristo, Davidmine itji̧ tupadanö jojo baibanö öbötjachinobe, jojo baibanö.

⁴ Jojo baibanö jeminökwenöma, Diosma iteda ujulunö i̧sebinobe, Bitema ötjöda chitji̧, jö̧ba̧lö. Baikwö i̧sebinobe chömöledö: Yemidanö woawatjö tjeachajinö ja̧böda i̧sebinobe, Jesúsma ötjöda chitji̧, jö̧ba̧lö. Jau chömöledö, ökwödö Duluwo̧ Jesucristonöda tjeachajinö ja̧inobe Diosma: Bitema ötjöda chitji̧, jö̧ba̧lö.

⁵ Ja̧danö, ju'wibi yötawa, Diosma Jesucristonö weachinobe, Jesucristoda ötjö Pablonö 'da̧batö ujunobö, Jesucristo webawo̧ batibanö. Ja̧ Dios weinama jwiinö chösödobe chömöledö, Diosma otiwa jawa ötjönö weinobe, jö̧ba̧lö. Ja̧danö, inesö otiwa jawa wene böjȩ bakwameachibanö judío jojodöböködönö yötawobö weinobe ötjönöma, jobadöbi Jesucristonö tjösödo jö̧ba̧lö. Ja̧danö, jobadötjö ösödadöma, Jesucristo wei̧ ja̧tjo jö̧ba̧lö, yötawobö weinobe.

^6-7 Ja̧danö, ökwödö Romanö ju̧kwadönöbi weinobe Diosma, Jesucristonö kwösödaduwo jö̧ba̧lö, jo̧ba wei̧ ja̧köbaduwo jö̧ba̧lö. Chömöledö, Jesucristo ömöledö bakibaduwanö omudawö ujuninobe ökwödö Romanö ju̧kwadönöma, ja̧danö jwiinö ösödobe ökwödönöma chömöledö. Jau, ökwödö Romanö ju̧kwadönöbi jwöinobe Diosma, Jesucristo ömöledö bakibaduwobö. Chömöledö, ökwödönöma Dabe'do Diosbi, Duluwo̧ Jesucristobi lȩlö̧jinö tjedobö chösöda ötjöma chömöledö, kwo̧'wo̧ luwo̧duwi ösöwachibanö tupakwö kwö̧jaduwobö.

Pablo Roma jojodönö Diosnö aebina wene

⁸ Chömöledö, ökwödönö nöinö yötawakwa̧ abönö, yötawaduwakwö chömöledö: Böjȩnö ju̧kwadö okobe deinö yötja̧lobe ökwödönöma, Roma jojodöbi Jesucristonö ösödadö, jö̧ba̧lö. Jejenö yötja̧li̧ a̧ja̧kwö, ötjöma jwiinö cho̧'wo̧ ösöwanö cha̧ja̧kwobe. Ja̧danö ösödö, Diosnö yöta̧lobe, Jesucristo midawö woinobetjö̧, ökwödönö Romanö ju̧kwadönö jwiinö otiwanö pjaatinobe, jö̧ba̧lö, yöta̧lobe Diosnöma chömöledö.

⁹ Jau chömöledö, ba̧kwȩlö̧jatebö ökwödönö omukwatö Diosnö atebobe. Isabenö abebo̧sa ökwödönöma, omöna yöta̧lökö. Diosda atebobe waiso̧, jo̧bada a̧ja̧kwobetjö̧. Jau chömöledö, ötjö chuluwo̧ma Diosda, jwaikwöda otiwa jawa wene, Dios itji̧ jawa wene yöbawö kwebacho̧sa jo̧ba wei̧danö. Jo̧ba chuluwo̧ Diosma ökwödönö atebobe a̧ja̧kwo̧.

¹⁰ Atebi̧ma, kabatökönö Diosnö atebobe, jo̧ba ösöditjö̧ma, bajaliyanö ökwödönö edö chichoböma weo jö̧ba̧lö.

¹¹ Jau chömöledö, isabenö ökwödönö pjatatobö chösödobetjö̧, ökwödönö edö chichobö jö̧ta̧la. Ja̧danö, O̧'wo̧ Luwo̧ Dios pjaatakobetjö̧ ökwödönö Dios iwene yöbawö pjatatobö jö̧ta̧la, kwo̧'wo̧ luwo̧duwi ujuluwachibanö tupakwö kwa̧ja̧kwaduwobö.

¹² Chömöledö, ökwödönö cheditjö̧ma isabenö otiwena. Baikwö yötawa: Ökwödö Jesúsnö kwösödaduwobe cheditjö̧ma bakwainöda ötjö cho̧'wo̧ luwo̧ ujuluwachibena tupakwö. Ja̧danö, ökwödö Jesúsnö chösödobe kwedaduwitjö̧ma, bakwainö tupakwö ujuluwachibena kwo̧'wo̧ luwo̧duwima. Ja̧danö, pjadatakwawena do̧'wo̧ luwo̧ bakwainö ujuluwachibanö tupakwö.

¹³ Kwöwaisachibaduwobö yötawaduwakwö chömöledö, lekwe möleda jobe chichoböma chomukwa̧lajabe, ökwödönö edö Romanö ju̧kwadönöma. Ökwödönöbi pjatatobö jö̧ta̧la Jesúsnö kwösödaduwobö, ju'wedö judío jojodöböködönö pjatatinadanö. Ökwödönö pjatatotö jö̧ba̧lö jobe chi̧'yo jö̧ta̧lemi waekwobe ichejekwa chömöledö. Diosma ina weökö ökwödönö jobe Romanö ju̧kwadönö edö chichoböma chömöledö.

¹⁴ Isabenö yötawaduwakwö, okobe deinö böjȩnö ju̧kwadöma Dios iwene tja̧ja̧kwobö jo̧be chömöledö. Ja̧danö, griego jojodönöbi, griego jojodöböködönöbi, waisadö ötjabiwö̧nöbi, wajwibadö ötjabiwö̧nöbi chumusidobe ichejekwökwesa chömöledö. Ja̧ chumusidobe ichejekwi̧ma, ina Dios iwene tja̧ja̧kwokobetjö̧, chumusidobe ichejekwa, jobadönöbi Dios iwene yötawo jö̧ba̧lö.

¹⁵ Ja̧danö, ökwödönö Roma jojodönöbi otiwa jawa wene Dios iwene yötawobö jö̧ta̧la.

Jesúsnö ösödadöda tjö̧jibakwedö jö̧ba̧lö Pablo yöawina wene

¹⁶ Jau chömöledö, tabada̧lökönö yöbawo̧sa otiwa jawa wenema, jo̧kwajabetjö̧ isabenö ökwödönöbi yötawobö jö̧ta̧la. Jau chömöledö, tabada̧lökönö yöbawo̧sa. ¿Tajawedö chötabada̧lobö chömöledö? Ja̧ weneda inesö mikwawi̧ wene, ju'wima jwiobe yelösöda, jojodö tjö̧jibobö chömöledö. Okobe deinö ja̧ otiwa jawa wene ösödadönöma, tjö̧jibinö ja̧akwo̧ Diosma, abönö a̧ja̧kwinadö judío jojodönöbi, judío jojodöböködönöbi. Ja̧danö, ja̧ weneda ji̧kwa weneobetjö̧, tabada̧lökönö yöbawo̧sa ötjöma chömöledö. Jau, ja̧ wene isabenö juluwi̧ ji̧.

¹⁷ Jau chömöledö, ja̧ wenema isabenö Dios ujulu ji̧ wene. Baikwö yötawa: Ja̧ wenema wajuwanö labebö lobö yöawobe, Dios jojodö suli̧ jwibadö batjibanö ja̧i̧ma, Dios iwene laebi̧danö. Baikwö laebobe Dios iwenema: Dios bidöma suli̧ jwibadö jö̧a̧lawö̧ma, Dios yöawi̧ tjösödobetjö̧da ja̧kwawa juna̧ladö, jö̧ba̧lö laebobe. Ja̧danö, la'akatjöda Dios yöawi̧ ösödadönöda suli̧ jwibadö batjibanö pjaatinobe Diosma, damötjö ju̧kwinadönöbi, babe ju̧kwadönöbi.

Pablo jojodö sulabenö ja̧tji̧ yöawina wene

¹⁸ Jau chömöledö, Dios yöawi̧ öpöjödadönö lȩbebo̧ mölejȩbe jo̧ Diosma. Okobe deinö sulabenö ja̧badö, ju'wedö Dios iwene tja̧ja̧kwapji jö̧ba̧lö sulabenö ja̧badönö lȩbebo̧ Diosma.

^19-20 Chömöledö, jojodö Diosnö tjedököjayonö jo̧banö tjöwaisachibo jö̧tja̧lobe, wajuwanö jobadönö öwawobetjö̧. Jau chömöledö, Diosnö tjedököjayonö Dios otidina edö jo̧banö tjöwaisachibobö jo̧be. Baikwö öwawobe chömöledö: La'akatjöda, Dios böjȩ otidinemi baikwöma, jo̧ba otidinama wajuwanö öwawobe edadönöma. Ja̧danö edö, Diosma isabenö jo̧, isabenö okobe jwiinö juluwo̧ jö̧ba̧lö, tjöwaisachibobö jo̧be. Jau chömöledö, Dios otidina edö jo̧banö tjöwaisachibobö jo̧be. Ja̧danö, jobadö Diosnö wajwitjitjö̧ma, ja̧ma idöda jawada chömöledö, wajuwanö jobadönö öwawobetjö̧. Jau chömöledö, Diosnö tjöwaisachibobö ji̧jayonö, öpöjödadö jojodöma. Ja̧danö, tjöpöjödobetjö̧, jobadönö lȩebakwo̧ Diosma chömöledö.

²¹ Jobadö, Diosnö öpöjödadönöma yötawaduwakwö chömöledö: Diosnö tjöwaisijayonö jo̧banö ösödöködö, ökwöma Duluwo̧ Dios, jö̧ba̧lö. Ju'wibi, Diosma jobadönö otiwanö pjaatijayonö, pjaataja̧ yelösöda omukwatöködö. Jemi tupakwö, Diosnö omukwatökönö, sulabe jawada, böjȩ jawada omukwatadö. Ja̧danö, okobe jwiinö tjomukwati̧ma, sulabenö omukwatadöda babibadö.

²² Ökwödöma waisadösa jö̧ba̧lö yötja̧lijayonö, jobadöma yelösöda wajwibadöda babibadö chömöledö.

²³ Ja̧danö, ba̧kwȩlö̧jatebö jo̧ Diosnö tjo̧'wo̧ wana̧lökönö, tjotidajawö̧nöda tjo̧'wo̧ wana̧ladö. Woba jojo o̧'wo̧ jawabi, tebo luwa o̧'wo̧ jawabi, pjiyuwa o̧'wo̧ jawabi, nijinö töbawo̧ o̧'wo̧ jawabi, jobadö tjo̧'wo̧ jawa tjotidajawö̧nöda tjo̧'wo̧ wana̧ladö.

^24-25 Jau chömöledö, Diosnöda, La'aka Okobe Jwiinö Otidinanöda tjösödo jö̧tja̧lajabe böjȩ jojodöma. Jo̧kwaijayonö, okobe jwiinö otidina Diosnö ösödökönö, Dios otidina jawada ösödö ju̧kwadö, ju'wedö yötja̧li̧ a̧ja̧kwö chömöledö. Jejenö sulabenö ja̧tjiökwe, jobadönöma kaatibobe Diosma, wainö idöda tjomukwati̧da ja̧bö ju̧kwadö, jö̧ba̧lö. Ja̧danö, idödada sulabenö tjomukwati̧da ja̧bö tjö̧jobema, jwiinö taba lö̧ji̧ jawabi sulabenö ja̧bö ju̧kwadö chömöledö.

²⁶ Jo̧kwajabetjö̧ Diosma jobadönö kaatibobe, Wainö idöda sulabenö tjomukwati̧da ja̧bö ju̧kwadö, jö̧ba̧lö chömöledö. Ja̧danö, ju'wibi yötawaduwakwö chömöledö, jwiinö sulabenö ja̧bö tjuju̧kwobe, jojodö edajitjökö jawa ja̧bö. Ja̧danö ya̧döma, ömadökwö 'da̧'da̧akwawa öpöjödö, isuju isujukwöda sulabenö ja̧bö ju̧kwadö.

²⁷ Ja̧danö ömadöbi, ya̧dönö 'da̧'da̧akwawa öpöjödö, iso̧ iso̧kwöda sulabenö 'da̧'da̧bakwawö ja̧bö ju̧kwadö. Isabenö yötawaduwakwö chömöledö, jejenö sulabenö ja̧bö tjuju̧kwobetjö̧, Diosma jobadönö lȩebenama, ja̧tjaja̧ mikwada lȩebobe.

²⁸ Chömöledö, bidöma, Diosnö tjomukwatoböma tjöpöjödobe. Ja̧danö, sulabeda tjomukwatiökwe jobadönö kaatibobe Diosma, Wainö sulabenö tjomukwati̧da ja̧bö ju̧kwadö, jö̧ba̧lö. Jo̧kwajabetjö̧, taba lö̧ji̧ jojodö ja̧awökö jawada i̧sebö ju̧kwadö.

²⁹ Jobadönöma baikwö yötawa: Okobe jwiinö Dios öpöjödi̧ jawada ja̧badö, ju'wedö tjitea ö'wiabinö omukwatadö, okobe jwiinö jojodö sulabenö ja̧tji̧bi ja̧bö ju̧kwadö. Ju'wedö tjitea ösödö, ö'wö 'yaabinö kwabö lobadö, ölakwabikwawabi jö̧ba̧ladö, omöna yöba̧ladö, ju'wedönö sulabenö ja̧tjotö jö̧ba̧lö omukwatadö. Ja̧danö, tjoma'apekwönö yöba̧lakwawadö,

³⁰ ju'wedönöma sulabenö omöna yöba̧ladö. Jobadöma Diosnö jwiinö öpöjödadö. Ja̧danö, ju'wedönö sulabenö yöba̧ladö, Ökwöma mikwawö̧kö̧ja, jö̧ba̧lö. Ja̧danö, Ötjöma juluwo̧sa, jö̧ba̧lö omukwatadö, ju'wedönöbi tjujulu i̧sebö yöbawadö, Ötjönö juluwo̧nö edi, jö̧ba̧lö. Ja̧danö, jemi tupakwö suli̧ tjöwaedotö jö̧ba̧lö omukwatadö, ja̧danö tjabe'donöbi, tjojo'donöbi a̧ja̧kwöködö.

³¹ Jobadöma ja'yubebi otiwanö omukwatöködö, yötja̧li̧danöma ja̧böködö. Ja̧danö, ju'wedönöma ösödöködö, ja'yubebi lȩlö̧jinöma edöködö jojodönöma.

³² Chömöledö, bidöma Dios jö̧a̧linama waisadö, Jejenö ja̧badöma wobalenöda tjimidawakwedö, jö̧ba̧lö. Ja̧ wene tjöwaisijayonö, jwaikwöda sulabenö ja̧bö ja̧kwawada ösödadö. Jemi tupakwöbi, ju'wedöbi sulabenö ja̧tjobö ösödadö.