Proverbios 8 - Dios Iwene

Salomón yöawina, Jweinö omukwatö ja̧kwawanö wanekwachuju jwöbö yöjawina jawa

¹ Baikwö laebobe Salomón wanedö yöawina jawa, jweinö omukwatö ja̧kwawanö wanekwachujuma jojodönö yöbawö jwöbuju, jö̧ba̧lö: Jweinö omukwatö ja̧kwawa wanekwachujuma jojodönö jwöbö yöbawuju a̧ja̧kwaduwitjö, jö̧ba̧lö. Jobuju, di̧ya sulojobö jö̧ba̧lö̧, di̧ya otiwojobö jö̧ba̧lö waisujuma jojodönö jwöbuju, yötawi̧ma a̧ja̧kwaduwitjö, jö̧ba̧lö.

² Ja̧danö, jweinö omukwatö ja̧kwawa wanekwachujuma jojodö kwetjachamanö ö'öbö möakwöchobe ja̧nö jwöbö yöbawuju. Ja̧danö, maniya 'dalape ja̧nöbi yöbawuju, a̧ja̧kwaduwi, jö̧ba̧lö.

³ Ja̧danö, comunidad teachakwawena ö'öbö ja̧nö jojodönöma, a̧ja̧kwaduwi, jö̧ba̧lö, jwöbuju.

⁴ Baikwö yöbawuju, jweinö omukwatö ja̧kwawanö wanekwachujuma: — Okobe deinö böjȩnö ju̧kwadönö yöbawö jwöbujusa ¡a̧ja̧kwaduwi!

⁵ Ökwödötjö ju'wedöma ö'wiyawakwawönö kwomukwatakwawaduwobö ina wajwiköbaduwobe. Ökwödö wajwibadönö yötawa: Ö'wiyawakwawönö kwomukwataduwobö kwöwaisachibaduwakobetjö̧ a̧ja̧kwaduwitjö. Ja̧danö, ökwödö jweinö omukwatöködönö yötawa: Di̧ya sulojobö jö̧ba̧lö, di̧ya otiwojobö jö̧ba̧lö kwöwaisachibaduwakobetjö̧ ¡a̧ja̧kwaduwitjö!

⁶ Ötjö yötawi̧ma jwiinö mikwawobetjö̧ ¡a̧ja̧kwaduwitjö! Jweinöda yöbawujusa.

⁷ Ja̧danö, ötjö yötawi̧ma isabenö ji̧ jawada yöbawujusa. Omöna yöa̧lakwawama jwiinö öpöjödujusa. Omönama la'akatjöda yöbawökujusa.

⁸ Ja̧danö, okobe jwiinö yötawi̧ma wajuwanö yöbawujusa. Jojodönö ö'öbönöma yöba̧lö̧kujusa jelobekwö ötibobö.

⁹ Ja̧danö, bakwo̧ di̧ya sulojobö jö̧ba̧lö, di̧ya otiwojobö jö̧ba̧lo̧ waiso̧ma, ötjö yötawi̧ a̧ja̧kwö yöa̧lobe, bisu yöjawi̧ma wajuwanö yöbawuju jö̧ba̧lö öwaisachibobe— jobekwö yöbawuju jweinö omukwatö ja̧kwawa wanekwachujuma.

¹⁰ Ina yöbawuju: —Wanedö yötawa: Dötölataja jawatjö kwemaduwobö jo̧be, ötjö jwebebö yötawi̧tjö̧kö̧, ja̧danö platatjö̧kö̧ ¿di̧atjö̧ kwemaduwakwa̧jö̧? jö̧ba̧lö. Yötawaduwakwö: ¡Jwebebö yötawi̧tjöda kwemaduwo! Ja̧danö, ju'wi jawabi ju'wi jawa kwöwaisi̧tjö̧kö̧, ja̧danö orotjökö̧ ¿di̧atjö̧ kwemaduwakwa̧jö̧? Yötawaduwakwö: ¡Ju'wi jawabi ju'wi jawa kwöwaisi̧tjö kwemaduwo!

¹¹ Isabenö, jweinö omukwatö kwö̧jaduwi̧ma jwiinö mikwawobe. Inawiya jwiinö mikwawi̧ öwiyatjö bajalekwönönö mikwawobe jweinö omukwatö kwö̧jaduwi̧ma. Ju'wi kwemaduwobö kwomukwataduwi̧ma ¿jweinö omukwatö kwö̧jaduwi̧tjö̧ bajalekwönönö mikwawobeji̧? Jwiyobe— jobekwö yöbawuju jweinö omukwatö ja̧kwawa wanekwachujuma.

Salomón yöawina jawa, Jweinö omukwatö ja̧kwawa wanekwachujuma, baikwö yöjawobe isudada, jö̧ba̧lö

¹² Jweinö omukwatö ja̧kwawa wanekwachujuma isudada yöbawuju baikwö: —Ötjöma jweinö omukwatö ja̧kwawa wanekwachujusa. Ja̧danö, chömöledöso̧kwö dötewinö jujusa, ö'wiyawakwawönö omukwatö ja̧kwawa wanekwacho̧kwö. Ökwödö dujutajama ba̧kwȩlö̧jatebö dötewinö ja̧dösa—yöbawuju. Ja̧danö, jobekwö yöjawi̧ma, jweinö omukwatö ja̧kwawabi, ö'wiawakwawö omukwatö ja̧kwawabi wanekwachuju, jö̧ba̧lö wanekwachobe. Ju'wibi yöbawuju isudada: —Ötjö, jweinö omukwatö ja̧kwawa wanekwachujuma okobe jwiinö waisujusa. Ja̧danö, ötjö ja̧takwa̧ma waisanö cho̧'wo̧ junö omukwatujusa— yöbawuju jweinö omukwatö ja̧kwawa wanekwachujuma.

¹³ Ju'wibi yöbawuju: —Chömöledö, Isabenö Jo̧nö yebabinö omukwatö kwö̧jaduwobö jö̧ka̧laduwitjö̧ma suli̧ jawa kwöpöjödaduwobö jo̧be. Ötjöma suli̧ jawa öpöjödujusa, jojodö sulabenö tjo̧mukwati̧ma. Baikwö jojodö sulabenö tjo̧mukwati̧ jwiinö chöpöjödobe: Bakwo̧, ötjödasa waiso̧ma, jö̧ba̧lö omukwato̧nöma jwiinö chöpöjödobe. Ja̧danö, ju'wibi jojodö tjo̧mukwati̧ma jwiinö chöpöjödobe: Bakwo̧ ju'wedönötjö o̧penönö inesö luwo̧ jo̧sa, jö̧ba̧lö, omukwato̧nöma jwiinö chöpöjödobe. Ja̧danö ju'wi jawabi ju'wi jawa chöpöjödobe: Sulabenöda omukwatö jo̧nö jwiinö chöpöjödobe. Ja̧danö, jelo̧nöbi jwiinö chöpöjödobe, jojodönö jelobekwö tjo̧mukwatobö ö'öbönö yöba̧lo̧nöma. Ja̧ jawa jwiinö chöpöjödobe— yöbawuju, jweinö omukwatö ja̧kwawa wanekwachujuma, isudada.

¹⁴ Ju'wibi yöbawuju, isudada: —Ötjö, jweinö omukwatö ja̧kwawa wanekwachujuma jojodönö pjabatö jwebebö yöbawujusa. Ja̧danö, ötjöma jojodönö jweinö omukwatö otiwanö tjö̧jobö öbibujusa. Ja̧danö, ötjöma di̧ya sulojobö jö̧ba̧lö, di̧ya otiwojobö jö̧ba̧lö waisujusa. Ja̧danö, jwiinö juluwujusa ötjöma— yöbawuju jweinö omukwatö ja̧kwawa wanekwachujuma isudada.

¹⁵ Ju'wibi yöbawuju: —Ja̧danö, ötjö, jweinö omukwatö ja̧kwawa wanekwachujuma inesö la'aka luwedönö öbibujusa, jweinö omukwatö wetjobö. Ja̧danö, inesö la'aka luwedöma jweinö omukwatö tjö̧jitjö̧ma jweinö wetjena tjitebotenia ju̧kwadönöma. Ja̧danö, jweinö omukwatö tjö̧jitjö̧ma weawa jawa yöbawö tju̧juni̧ma jweinöda omukwatö tju̧junena— yöbawuju—.

¹⁶ Jao, ötjö, jweinö omukwatö ja̧kwawa wanekwachujuma jojodö tjuluwedönö öbibujusa jweinö wetjobö. Ja̧danö tjo̧'wo̧ junö wetjakwa̧ jawa jweinö tjo̧mukwatoböbi jobadönö öbibujusa— yöbawuju, jweinö omukwatö ja̧kwawa wanekwachujuma, isudada.

¹⁷ Ju'wibi yöbawuju: Ötjö, jweinö omukwatö ja̧kwawa wanekwachujuma ötjönö ösödadönö ösödujusa. Ja̧danö, ötjönö isakwadöma isabenö ötjönö tjöbadekwajakwedö.

¹⁸ Ja̧danö, ju'wibi yötawa: Ötjöma jojodö balada tju̧juna̧lobö pjabatujusa. Ja̧danö, jojodöma bakwo̧nö edö, jwiinö luwo̧ jö̧ba̧lö tjedoböma pjabatujusa ötjöma. Ja̧danö jojodöma tjitea jwiinö mikwawi̧ jawa 'dö̧ibajökönö tju̧juna̧lobö pjabatujusa ötjöma. Ja̧danö, okobe jwiinö jojodö tjotidi̧ma waekwökönö otiwanö baledobö pjabatujusa— yöbawuju, jweinö omukwatö ja̧kwawa wanekwachujuma isudada.

¹⁹ Ju'wibi yöbawuju: Ötjö jojodönö pjabatö chiyi̧ jawama jwiinö mikwawobe. Oro bakwai̧ ji̧tjö bajalekwönönö mikwawobe, ja̧danö plata bakwai̧ ji̧tjö bajalekwönönö mikwawobe ötjö jojodönö pjabatö chiyi̧ jawama.

²⁰ Ötjöma Dios wei̧ a̧ja̧kwö, ja̧danö, jweinöda omukwatö ja̧bö jujusa.

²¹ Ötjönö ösödö ju̧kwadönöma pjabatujusa balada nöinö tju̧juna̧lobö, tjeju okwa jwiinö mikwawi̧ jawa su̧'bȩnö— jobekwö jweinö omukwatö ja̧kwawa wanekwachuju yöjawinobe.

Jweinö omukwatö ja̧kwawa wanekwachuju yöjawina jawa, Isabenö Jo̧kwö ajayinö ji̧nujusa, jö̧ba̧lö

²² Jweinö omukwatö ja̧kwawa wanekwachujuma isuda ajayinö jö̧jina baikwö yöbawuju: — Damötjö̧ Isabenö Jo̧ma ina böjȩbi mölejebi jwiyayi ötjönö 'yata̧lobö ujuninokosa. Isabenö Jo̧ma okobe jwiinö otidakwa̧ abönö ötjönö 'yata̧lobö ujuninokosa.

²³ Ajayinöma Isabenö Jo̧ 'yata̧lobö ujuninokosa, böjȩ otidakwa̧ abönö.

²⁴ Ötjö, jweinö omukwatö ja̧kwawa wanekwachujuma jwai balawa ina jwiyayi ida̧ökö Isabenö Jo̧ ötjönö 'yata̧lobö ujuninokosa. Ja̧danö, ojwese'diju, ojwiyo okwati̧ e'dijubi, ina jwiyayi ida̧ökö Isabenö Jo̧ 'yata̧lobö ujuninokosa ötjönöma.

²⁵ Ja̧danö, ötjöma Isabenö Jo̧ mö'ösa'iju otidakwa̧ abönö ida̧ökö Isabenö Jo̧ ötjönö 'yata̧lobö ujuninokosa.

²⁶ Ja̧danö, Isabenö Jo̧ bö̧jȩbi, mȩjȩbi, ja̧danö nijiso̧pja̧bi otidakwa̧ abönö ida̧ökö ötjönö 'yata̧lobö ujuninokosa— yöbawuju isudada, jweinö omukwatö ja̧kwawa wanekwachujuma, ötjöma la'akatjöda ji̧nujusa, jö̧ba̧lö.

²⁷ Ina yöbawuju: —Ja̧danö Isabenö Jo̧, mölȩjȩ önena ötjöma jobe chö̧jijatö. Jao, mölȩjȩma jwai balawa ichibinö isȩbö ö̧nena jobe chö̧jijatö ötjöma.

²⁸ Ja̧danö, chö̧jijatö Isabenö Jo̧ ojwiyo'wiju ö̧nena, bö̧jȩ möakwö nönö. Ja̧danö, bö̧jȩ okwa ojwiyoma 'diinö lo̧obö weena jobe chö̧jijatö ötjöma.

²⁹ Isabenö Jo̧ma jwai balawa lo̧obö weena, jo̧ba wei̧danö li̧nobe, tupakwö baledökönö. Jobekwö weenama jobe chö̧jijatö. Ja̧danö, ötjöma chö̧jijatö bö̧jȩ okwa la'aka ujunena— yöbawuju isudada, jweinö omukwatö ja̧kwawa wanekwachujuma.

³⁰ Ina yöbawuju: —Ötjöma Isabenö Jo̧kwö, jwiinö waisanö otido̧kwö ji̧abinujusa. Ju'wi mölȩkwena Isabenö Jo̧kwö chö̧jiökwe o̧'wo̧ ösöwanö ö̧jijatö Isabenö Jo̧ma. Ja̧danö ötjöma ba̧kwȩlö̧jatebö jo̧banö ösödö cho̧'wo̧ ösöwanö chö̧jijatö jo̧bakwö.

³¹ Böjȩnö Isabenö Jo̧ otidajöjȩ edö jwiinö chösödijatö, otiwa jö̧ba̧lö. Ja̧danö, Isabenö Jo̧ otidajawö̧nö jojodönöbi edö cho̧'wo ösöwanö chedijatö, otiwadö, jö̧ba̧lö— yöbawuju jweinö omukwatö ja̧kwawa wanekwachujuma.

³² Ina yöbawuju jweinö omukwatö ja̧kwawa wanekwachujuma, tjȩmu juna̧luju ji̧tji̧mu̧nö yöjawi̧danö. Baikwö yöbawuju: — Chitji̧mu̧, ajayitjöda jinujuchobetjö̧ ökwödönö yötawi̧ma kwa̧ja̧kwaduwobö jo̧be. ¡A̧ja̧kwaduwitjö! Yötawi̧ma a̧ja̧kwö kwö̧jaduwitjö̧ma kwo̧'wo̧ ösöwanö kwö̧jaduwakwedöja.

³³ Jwebebö yötawi̧ma ö'wiyawakwawönö a̧ja̧kwaduwi, jweinö omukwatö ja̧kwawama kwöwaisachibaduwobö. Ja̧ yötawi̧ma kwöpöjödaduwoko.

³⁴ Bakwo̧, ju'wi mölȩkwena ötjö yötawi̧ a̧ja̧kwobö chejube ichö, apjude ö'öbönö ja̧nö te'ada̧lo̧nöma, labebö yötawakwujusa. Jo̧bama o̧'wo̧ ösöwanö jo̧ ötjö yötawi̧ a̧ja̧kwö ösödobetjö̧.

³⁵ Isabenö yötawaduwakwö: Ötjönö badekwajo̧ma lekwe mölȩ ö̧jakwo̧. Ja̧danö, ötjönö badekwajo̧nöma Isabenö Jo̧ma ösödö pjaatakwo̧.

³⁶ Jo̧kwaijayonö jelobekwö omukwatö 'yo̧ma, ötjönö öpöjödö itedada söbekwö loakwo̧. Isabenö, ötjönö öpöjödo̧ma woawa ösödöda jo̧— jobekwö yöbawuju isudada jweinö omukwatö ja̧kwawa wanekwachujuma.