Proverbios 7 - Dios Iwene

Salomón ju'wi yöawina jawa, ötjö yötawi̧danö jwebebö yökawaduwo kwi̧tji̧duwinö, möayedönönö, jö̧ba̧lö

¹ Baikwö laebobe Salomón iteda itji̧nö möayo̧nö jwebebö yöawinama: Chitji̧, ökwönö weti̧ma a̧ja̧kwö kwö̧jo. Ja̧danö, ötjö jwebebö yötawi̧ma kwomajadenö anawö kwö̧jo, jwiinö mikwawobe, jö̧ba̧lö.

² Ötjö weti̧ a̧ja̧kwö kwö̧jo lekwe kwö̧jakobetjö̧ kwo̧'wo ösöwanö. Ja̧danö, jwebebö yötawi̧ma, jwiinö mikwawobe, jö̧ba̧lö, kwite'ada̧lakwawo. Chitji̧, wanedö yötawakwö: Kwöbajale kwite'ada̧lakwawi̧ ji̧danö kwite'ada̧lakwawo ötjö yötawi̧ma, jwiinö mikwawobetjö̧.

³ Ja̧danö, ju'wibi yötawakwö, wanedö: Tjötö'asa̧ko̧ tjötjö'anö tjö̧nawi̧danö ötjö yötawi̧ öwawinö kwötö'anö kwönawo. Ja̧ kwönawi̧ edö ötjö yötawi̧ma kwomukwatakwo̧ja. Ja̧danö, ju'wi wanedö yötawakwö: Yötawi̧ma kwomajadenö kwöwano, ösöja wȩyukwöja̧ ji̧danö, kwo̧'wo jwikibökakobetjö̧.

⁴ Jao chitji̧, jweinö omukwatö kwö̧jobö yötawi̧ma ösödö kwomukwato. Kwö̧jawujunö ile nikebi̧danö ösödö kwomukwato ötjö jweinö omukwatö yötawi̧ma. Ja̧danö chitji̧, ju'wibi yötawakwö: Ötjö yötawi̧ a̧ja̧kwö, ö'wiyawakwawönö kwa̧ja̧kwobetjö̧ kwöwaisakobe, di̧ya sulojobö jö̧ba̧lö, di̧ya otiwojobö jö̧ba̧lö. Wanedö yötawa: Ja̧ kwöwaisi̧, di̧ya sulojobö jö̧ba̧lö, di̧ya otiwojobö jö̧ba̧lö kwöwaisi̧ma jwiinö mikwawobe chitji̧, ja̧danö yö̧ne kwömöledönö kwösödi̧danö kwösödo ja̧ kwöwaisi̧ma.

⁵ Ja̧danö, ju'wibi yötawakwö chitji̧: Ötjö jwebebö yötawi̧ a̧ja̧kwö kwö̧jobetjö̧ ja̧ yötawi̧ma sulabenö obuju ökwökwö bakobe jö̧jobö ichujutjö kwö̧jibinö pjaatakobe. Isabenö, ötjö yötawi̧ a̧ja̧kwö kwö̧jobetjö̧ jobujuma ökwönö ösödö ötjökwö kwö̧jo ichi, jö̧ba̧lö, yöja̧lijayonö kwa̧ja̧kwökakobe.

⁶ Chitji̧, baikwö ötjö ediachina yötawakwö: Bena cheju okwa ja̧nö ventana'donö po̧bebö a̧petubekwö eda̧liachijatö.

⁷ Ja̧danö, chedemi möayedö ömadö tjö̧jinobe, waisanö tjo̧mukwatobö wajwibadöma. Ja̧danö, jobadötjö bakwo̧ jwiinö omukwatö̧kö̧ ö̧jinobe.

⁸ Jo̧ba möayo̧ omukwatö̧kö̧ma mana pebibö i̧'yinobe, sulabenö obuju jejubekwö 'ya̧nö.

⁹ Ida̧ö̧kö̧ jawo̧ meajobe yȩatibena i̧'yinobe sulabenö obuju jejubekwö.

¹⁰ Jo̧ba möayo̧ omukwatö̧kö̧ma sulabenö obuju jejube ichibena jobujuma, ichajo̧nö sulabenö öjibotö jö̧ba̧lö jejutjö lajebinobe jo̧banö jöbadekwajobö. Jobujuma yelösöda jelo̧nö jelo̧nö 'da̧'da̧bakwawujudanö 'dubawuju, möayo̧ma jobujukwö sulabenö bakwobe ö̧jobö ösödakobetjö̧.

¹¹ Ja̧danö, ju'wibi yötawakwö jobujunö: Jobujuma labinö yöba̧luju, ja̧danö, isudada sulabenö omukwatö jösödi̧ma ja̧bö kwebachuju, jejunödama jö̧kuju.

¹² Ja̧danö, jobujuma jojodö tjuju̧kwemi ö'weje mananö kwebachuju, ja̧danö, jojodö ko̧ko̧kwö yötja̧lakwawemibi kwebachuju jelobebi jelobe ba̧kwȩlö̧jatebö isakwö te'ada̧luju iso̧nö ösödö ajebobö, ötjökwö kwö̧jo, jö̧ba̧lö.

¹³ Ja̧danö, jobujuma möayo̧ jeju ichajo̧nö wo̧ba̧lö du̧du̧buju. Ikenama, taba̧lökönö möayo̧nö öbajalenö jweinö edö yöja̧linobe jobujuma möayo̧nöma:

¹⁴ —Jo̧da Isabenö Jo̧nö ösödö chiyatö, diyobö weinadanö, jo̧bakwö wene jwiinö chö̧jobö. Ja̧danö, chiyajökwe itebiyatjö u'yukwaja̧ cheju okwa chujuna̧lobe, ökwödö dukwakwa̧ma.

¹⁵ Ja̧danö, babema chejutjö latebemi ökwönö chöbadekwajatö. Jao, iso̧nö isakwö latebemi ökwöda bena kwö̧ja—yöbawuju—

¹⁶ Ja̧danö, sabana'wiju duwa'wo, ö'dö̧wa'wo, Egiptotjö tjichejebina o'wiju chu̧kwa kamapjo wame debatö chumuchebajabe, jwiinö otiwi̧ jawa o'wiju, linotjö tji̧ti̧lina o'wijuma.

¹⁷ Ja̧danö, söinö 'dö̧ekwobu lilichatö chukwa kamapjonö, mirra mikwa'betjö, aloe mikwa'betjö, canela mikwa'betjö tjotidinobu.

¹⁸ Ötjökwö ichi, dewachena baibanö bakwobe dö̧jo, do̧'wo̧ ösöwanö 'da̧'dabakwawo—yöbawuju—.

^19-20 Chilekwema deobe, lekwe kwebachö i̧'yajabe. Balada nöinö tuda'wonö anö e'ewö i̧'yajabetjö chöwaisa, lekwe deakobe jö̧ba̧lö. Bite jawo̧ duwabanö ölena ichakwo̧— ösödö obö yöja̧linobe möayo̧nö.

²¹ Ja̧danö, jobekwö obö yöja̧liökwe, ötjökwö ichi kwö̧jo, jö̧ba̧lö, möayo̧ma chi̧'yo, jö̧ba̧lö, omukwatinobe. Ja̧danö, ösödö yöja̧liökwe jo̧ba möayo̧ma jobujukwö i̧'yobö ösödinobe.

^22-23 Jobekwö obö ösödö yöja̧liökwe omönanö, te'ada̧lökönö i̧'yinobe sulabuju jökömanö. Wajwibo̧ jobujukwö chi̧'yitjö̧ma debö chi̧'yena, jö̧ba̧lö. Wanedö yötawakwö chitji̧: Pakayama, kwatjobö tje'ewökwema wajwibo̧ kwatjobö tje'ewijayonö. Ja̧danö, ya̧mama, laju meobö sotjajuma wajwibo̧ kwatjoböda sotjajabe lajuma, nayunu 'böenanö baibanö, okwejewa welachajinö. Ja̧danö, pjiyuwama upja'be tjupjajama wajwibo̧ ötjönö kwatjobö tjupjajabe, jö̧ba̧lö. Ja̧danö jo̧ba möayo̧ma wajwibo̧ jobujukwö i̧'yobetjö̧ debö i̧'yakwo̧.

²⁴ Jo̧kwaobetjö̧ chitji̧ a̧ja̧kwitjö. Ötjö jwebebö yötawi̧ma ö'wiawakwawönö a̧ja̧kwi.

²⁵ Jelobekwö omukwatö kwomajadenö kwösödoko, jobujukwö chi̧'yowe, jö̧ba̧lö. Jobuju jökömanö kwi̧'yoko.

²⁶ Jobujuma ba̧jȩkwadö ömadönö sulabenö jöwaedoböda isakwuju, jobujukwö ja̧dönöma. Isabenö, jobujuma ba̧jȩkwadönö kwabö loböbi kwabö lojinobe.

²⁷ Chitji̧, jobuju jejube 'ya̧kwawama wobalenöda badekwachobe. Jobujukwö kwi̧'yoko chitji̧.