Proverbios 5 - Dios Iwene

Salomón möayo̧nö jwebebö yöawina jawa, sulabenö omukwatö obujunö kwösödoko jö̧ba̧lö

¹ Baikwö laebobe Salomón iteda itji̧nö möayo̧nö jwebebö yöawinama: Chitji̧, ötjö jweinö omukwatö ja̧kwawa yötawi̧ma ö'wiyawakwawönö a̧ja̧kwi. Ja̧danö, di̧ya sulojobö jö̧ba̧lö̧, di̧ya otiwojobö jö̧ba̧lö chöwaisobetjö̧, ötjö jwebebö yötawi̧ma ö'wiyawakwawönö a̧ja̧kwi.

² Jobekwö ötjö yötawi̧ a̧ja̧kwö kwö̧jobetjö̧ ajayinö kwo̧'wo̧ junö kwomukwatinama badekwachinö kwö̧jakwo̧ja. Ja̧danö, jweinö yöka̧lakwo̧ja chitji̧ ötjö yötawi̧ a̧ja̧kwö kwö̧jobetjö̧.

³ Chi̧tji̧, ju'wibi yötawakwö: Jelo̧ ilekwoma ökwökwö jö̧jotö jö̧ba̧lö jichena, ökwönö ösödö. Wanedö yötawakwö: Jobuju obö jö̧ja̧li̧ma wa̧yo̧ o̧ti̧danö o̧tinö yöba̧lö ichuju̧. Ja̧danö, oliva o̧tesobu jwiinö otiwobu, sayuwobudanö, sayuwinö yöba̧lö ichuju. Ja̧ wanekwachi̧ma, ökwökwö jö̧jobö jwiinö ösödö yöba̧luju, jö̧ba̧lö, wanekwachobe.

⁴ Jao chitji̧, jejenö ösödö yöja̧lijayonö, ju'winö ökwönö usula kwemawinöda jwöjebakwuju. Wanedö yötawakwö: Jobujuma niatakwawobudanö sulabenö ja̧buju. Ja̧danö, i̧sa̧pi̧ bakwachekwadanö sȩapi̧nö titjati̧danö tibatuju jobujuma.

⁵ Chitji̧, jobujuma ökwönö öbibö 'yuju, wobale ichikwa mananö.

⁶ Ja̧kwawa mananö, Diosnö ösödö 'yö̧kuju jobujuma. Isudada wajwibö le'dedakwawö 'yuju.

⁷ Jo̧kwaobetjö̧ chitji̧, yötawi̧ma kabatibökönö ¡a̧ja̧kwi!

⁸ Chitji̧, jobuju jö̧jelöma ödöda kwö̧jo, jeju apjude yö̧nebi kwi̧'yiboko.

⁹ Isabenö yötawa chitji̧: Jobujukwö kwö̧jitjö̧ma jojodö ajayinö ökwönö otiwanö omukwatinadöma ökwönö sulabenö tjo̧mukwatakwo̧ja. Ja̧danö, jobuju jömöledöma ökwönö lȩ lö̧jökönö edö kwabö lotjena ökwönöma, okobe jwiinö kwujuna̧li̧ baladabi, kwiteabi emö.

¹⁰ Ja̧o chitji̧, jobujukwö kwö̧jitjö̧ma usula emawö kwö̧jakwo̧ja. Ja̧danö, jobuju jömöledö, wajwiköbawö̧ma ökwö lekwe otidö emiaköbina kwu̧kwa baladabi, kwiteabi, jobadöda otiwanö tjö̧jobö tju̧juna̧lakwedö.

¹¹ Chitji̧, jobujukwö kwö̧jitjö̧ma debö kwi̧'yena, jobujutjö kwönekwobetjö̧. Ja̧danö, ju'winö, debö kwi̧'yakwa̧ abönö jwiinö niiökwe labinö kwubudekwabikobe, okobe jwiinö kwitebiyama 'dolobö tjoduwobetjö̧.

¹² Ja̧ möle baledena jöka̧lakobe: —Jojodöma ötjönö pjatjatobö jwebebö yötjawijayonö cha̧ja̧kwijökötö. Nöinö chöpöjödijatö jwebebö yötjawi̧ma—jö̧ka̧lakobe—.

¹³ ¿Tajawedö jwebebö yötjawi̧ cha̧ja̧kwinököjö? Ja̧danö ¿tajawedö ö'wiyakwawönö chomukwatinököjö?—yöka̧lakobe—.

¹⁴ Tjo̧wi̧, sulabenö baledajabetjö̧ wainö usula emawö jo̧sa. Okobe deinö ko̧ko̧kwö ja̧nö ötjö sulabenö ja̧tina tjöwaisakwedö, ayö jwiinö tabalö̧jinö jo̧, jö̧ba̧lö— Jobekwö jöka̧lakobe chitji̧, jobujukwö kwö̧jaja̧ usula kwemawenama.

¹⁵ Chitji̧, jobujukwö kwö̧joko. Wanedö yötawakwö: ¿Ju'wedö tjeju a̧petu ojwese'dotjö kwowobö jo̧beji̧? Jwiobe. Ökwö kweju a̧petu ojwese'dotjöda kwowobö jo̧be. Ja̧ wanekwachi̧ma, kwilekwokwöda kwö̧jo, jelujukwömaökö, jö̧ba̧lö wanekwachobe.

¹⁶ Jao chitji̧ bakwuju, kwilekwokwöda kwö̧jo. Ju'wi wanedö yötawa: Bakwa'do ojwese'dotjö ya̧dö ba̧jekwadö ojwiyo tjowobö wabö tji̧'ye'do. Ökwöma ja'dodanö kwö̧joko chitji̧, ba̧jȩkwadö ya̧dö watje'dodanöma kwö̧joko. Ja̧ wanekwachi̧ma jeluju, jelujunöma ökwökwö jö̧joböma jwiobe jö̧ba̧lö wanekwachobe.

¹⁷ Kwilekwoda ökwökwö jö̧jakwuju, ju'wedömaökö.

¹⁸ Chitji̧, kwilekwokwö, ina möayo̧köbayi kweminokokwöda kwö̧jo, kwo̧'wo̧ ösöwanö. Jobujunöda ösödö kwö̧jo, otiwuju, jwiinö chösödoko, jö̧ba̧lö. Ba̧kwȩlö̧jatebö kwo̧'wo̧ ösöwanö kwö̧jo jobujukwöda.

¹⁹ Kwilekwoma jwiinö otiwuju, ja̧danö ejeanö kwebachuju. Jo̧do'bi̧ ba̧kwȩlö̧jatebö jotiwiökwe kwösödojö. Ja̧danö, jobujukwö bakobe kwö̧jobö jwiinö kwösödo chitji̧.

²⁰ Chitji̧ ¿jeluju, jelo̧kwö jelo̧kwö jö̧jobö obujunö kwösödobö jo̧beji̧, jo̧do'bi̧ wo̧ba̧lö ösödö? Jwiobe. ¡Kwösödoko!

²¹ Isabenö Jo̧ma okobe jwiinö ja̧dobema edo̧. Ja̧danö, di̧'yobema edö waiso̧, chitji̧.

²² Ju'wibi yötawakwö chitji̧, wanedö: Bakwo̧ ö̧jobe ba̧kwȩlö̧jatebö sulabenö omukwatö ja̧baibo̧ma. Ja̧danö, jo̧ba sulabenö ja̧inama jo̧banö do̧tja̧li̧danö do̧a̧lobe jo̧banöma. Ja̧danö, a̧la̧chi'bonö tjunu'yajökwedanö bo̧, ejachibö dilachibökönö, sulabenö ja̧inobetjö̧.

²³ Jo̧bama debö i̧'yakwo̧ sulabenö ja̧obö ösödi̧ma kaatibokobetjö̧. Jelobekwö omukwatö debö i'ya̧kwo̧ jweinö omukwatökönö jwiinö sulabenö ja̧obetjö̧.