Proverbios 4 - Dios Iwene

Salomón ju'wi yöawina jawa, ötjö yötawi̧danö jwebebö yökawaduwo kwi̧tji̧mu̧duwinö, möayedönö, jö̧ba̧lö

¹ Baikwö laebobe Salomón iteda i̧tji̧mu̧nö möayedönö jwebebö yöawinama: —Chitji̧mu̧ ö'wiyawakwawönö kwa̧ja̧kwaduwobö jo̧be ökwödönö jwebebö yötawi̧ma. Ja̧ yötawi̧ma ökwödönö öibakobe kwöwaisachibaduwobö, di̧ya sulojobö jö̧ba̧lö, di̧ya otiwojobö jö̧ba̧lö.

² Ötjö yötawi̧ma ökwödönö otiwanö öbibö yötawobetjö̧ kakatibaduwoko, kwösödaduwo, otiwa, jö̧ba̧lö.

³ Chi̧tji̧mu̧ ötjöbi ökwödödanö chabe'donö juna̧linasa̧, jo̧ba chabe'doda jö̧ba̧lö yöawinökwesa. Ja̧danö, chojo'do ile nijebinökwesa, iteakwo̧da ji̧tji̧chobetjö̧. Ja̧danö, ina tjȩmu̧bayo̧, chö̧jayima

⁴ ötjönö chabe'do baikwö yöbawiaijatö ötjönöma: —Chitji̧, ötjö yötawi̧ma kwomajadenö kwanawo kwomukwatakobetjö̧. Ja̧danö, jwebebö yötawi̧ma a̧ja̧kwö kwö̧jo lekwe mölȩ kwö̧jakobetjö̧ kwo̧'wo ösöwanö.

⁵ Ja̧danö chitji̧, ötjö jwebebö yötawi̧ma kwo̧'wo̧ jwikiboko, ja̧danö, kakatiboko. Ja̧danö, jweinö omukwatö kwö̧jobö yötawi̧ma do̧batö kwöwaisachibo chitji̧. Ja̧danö, di̧ya sulojobö jö̧ba̧lö, di̧ya otiwojobö jö̧ba̧lö yötawi̧ma do̧batö kwöwaisachibo chitji̧— jobekwö yöawijatö ötjö chabe'doma ötjönöma.

⁶ Ja̧danö, ju'wi jawabi jwebebö yöawijatö chabe'doma ötjönöma, baikwö: —Chitji̧, jweinö omukwatö kwö̧jo, jwaikwöda. Ja̧ kwö̧ji̧ma kakatiboko otiwanö kwö̧jakobetjö̧. Wanedö yötawakwö: Jobekwö jweinö omukwatö kwö̧ji̧ma isuju te'ada̧lujudanö ji̧. Jobuju jweinö omukwatö kwö̧ji̧ wanekwachujunö a̧ja̧kwö kakatibökötjö̧ma otiwanö jite'ada̧lobe ökwönöma otiwanö kwö̧jobö. Ja̧danö, tjöbeba̧lö jite'ada̧lobe ökwönöma jobujunö kwösöditjö̧ma, jweinö omukwatö kwö̧ji̧ wanekwachujunöma. Jobekwö jö̧ba̧löma ökwö jweinö omukwatö kwö̧ji̧ma ökwönö te'ada̧lobe, jö̧ba̧lö wanekwachobe— yöawijatö chabe'doma ötjönöma.

⁷ Ja̧danö, ju'wi jawabi jwebebö yöawijatö chabe'doma ötjönö baikwö: —Chitji̧ okobe jwiinö kwöwaisi̧tjö̧ bajalekwönönö mikwawobe jweinö omukwatö kwö̧jobö kwöwaisi̧ma. Jo̧kwaobetjö̧ yötawakwö: Jweinö omukwatö kwö̧jobö yötawi̧ma do̧batö kwöwaisachibobö jo̧be chitji̧. Ja̧danö, ju'wibi okobe jwiinö kwöwaisi̧tjö̧ bajalekwönönö mikwawobe chitji̧. Ötjö yötawi̧, di̧ya sulojobö jö̧ba̧lö, di̧ya otiwojobö jö̧ba̧lö yötawi̧ma do̧batö kwöwaisachibobö jo̧be chitji̧. Nöinö kwöwaisena chitji̧ ju'wi jawabi ju'wi jawa. Ja̧ kwöwaisitjö bajalekwönönö pjaatakobe, di̧ya sulojobö jö̧ba̧lö, di̧ya otiwojobö jö̧ba̧lö kwöwaisi̧ma— jobekwö yöawijatö chabe'doma ötjönöma.

⁸ Ja̧danö, ju'wi jawabi yöawijatö: —Chitji̧ jobekwö, jweinö omukwatö kwö̧joböda kwösödo jwiinö mikwawobetjö̧. Jobekwö jweinö omukwatö kwö̧jitjö̧ma jojodöma ökwönö luwo̧danö tjedena, jweinö omukwato̧, jö̧ba̧lö. Ja̧danö, wanedö yötawa chi̧tji̧: Jweinö omukwatö kwö̧ji̧ma kwösödobö jo̧be, kwilekwonö wo̧batö kwösödi̧danö. Jobekwö jweinö omukwatö kwö̧jitjö̧ma jojodöma ökwönö otiwanö omukwatö tjedena, luwo̧ jö̧ba̧lö— jobekwö yöawijatö ötjö chabe'doma ötjönöma.

⁹ Ja̧danö, ju'wi jawabi yöawijatö, wanedö: —Chitji̧, ökwö jweinö omukwatö kwö̧ji̧ma jojodönö öwawobe. Kwuunö muchekwado̧ otiwado̧ öwawi̧danö, ja̧danö butjawaka otiwaka kwuunö kwubutjawaka öwawi̧danö öwawobe ökwö kwö̧ji̧, jweinö omukwatö kwö̧ji̧ma. Otiwanö öwawobe ökwö kwö̧ji̧ma jojodö ökwönö tjösödinö, bitema jweinö omukwatö jo̧, jö̧ba̧lö̧—. Chi̧tji̧mu̧, jobekwö yöawijatö chabe'doma ötjönöma. Jobekwö laebobe Salomón yöawina jawama.

Salomón iteda itji̧nö möayo̧nö ju'wi jwebebö yöawina jawa

¹⁰ Baikwö laebobe Salomón iteda itji̧nö möayo̧nö jwebebö yöawina jawama: Chitji̧, yötawakwö: Ökwönö jwebebö yötawi̧ma ösödö kwa̧ja̧kwobö jo̧be. Ja̧ yötawi̧ kwa̧ja̧kwitjö̧ma lekwe mölȩ kwö̧jakwo̧ja.

¹¹ Chitji̧, ökwönö jweinö kwomukwatobö öbibö yöbawo̧sa, bö̧jenö ja̧nö otiwanö omukwatö jweamanö kwi̧'yobö.

¹² Jobekwö jweinö omukwatö jweamanö kwi̧'yobetjö̧ jwaikwöda kwi̧'yakwo̧ja, waekwökönö. Ja̧danö, jweinö omukwatö jweamanö kwi̧'yobetjö̧ ju'wedöma kwi̧'yobe edinö tjötjeba̧lökakobe. Jwaikwöda kwi̧'yakwo̧ja. Ö'öbakwawö kwi̧'yenabi kwömasapa töbökönö kwi̧'yakwo̧ja jweinö omukwatö kwi̧'yobetjö̧.

¹³ Ja̧danö, yemidanö yötawakwö chitji̧: Ötjö jwebebö yötawi̧ma a̧ja̧kwö kwö̧jo. Ja̧ yötawi̧ma, 'diinö do̧tja̧li̧danö do̧ka̧lo, kabatibökönö. Kwo̧'wo̧ jwibibökönö ba̧kwȩlö̧jatebö kwomukato ja̧ yötawi̧ma, otiwanö kwö̧jobö öbibö yötawobetjö̧.

¹⁴ Chitji̧, ju'wibi jwebebö yötawakwö: Sulabenö omukwatadö tjö̧ji̧danöma kwö̧joko. Wanedö yötawakwö: Sulabenö omukwatadöma idöda kwetjachamanö kwebachadö, suli̧ jawada tjöwaedobö. Chitji̧, jamanö kwi'yobö kwomukwatoko, jobadö sulabenö omukwatadö kwetjachamanö.

¹⁵ Ja̧manö ja̧töbi kwö̧jatoko, jelobekwö la̧manöda kwi̧'yobö kwöbaledo.

¹⁶ Chi̧tji̧, jobadö sulabenö omukwatadöma möle baledinö sulabenö ja̧tjoböda omukwatö isakwadö. Yelösöda, jobadöma tjo̧wi̧ yȩatibajabe jö̧ba̧lö suli̧ jawa ina sulabenö ja̧tjo jö̧tja̧laja̧ badekwachokobetjö̧ aböbi aböködö. Ja̧danö, jobadö sulabenö omukwatadöma jojodönö wene jwöbebadö. Isabenö, jobadöma tjo̧wi̧ yeatibajabe jö̧ba̧lö ina ju'wedönö wene jwötjebo jö̧tja̧laja̧ badekwachokobetjö̧ aböbi aböködö. Chitji̧, jobadö sulabenö omukwatadö kwetjachamanö kwi̧'yoko.

¹⁷ Chitji̧ jobadö sulabenö omukwatadönö wanedö yötawakwö: Jobadöma sulabenö ja̧badö. Ja̧danö, sulabenö ja̧tji̧ma idöda tju̧kwa kwakwawa tjukwi̧danö ji̧. Ja̧danö, jobadöma ölakwabikwawö ja̧dö. Ja̧danö, ölakwabikwawö tjö̧ji̧ma idöda tjowi̧danö ji̧. Isabenö, jobadö tjö̧ji̧ma sulabenöda omukwatö ja̧dö.

¹⁸ Jobekwömaökö Dios wei̧ a̧ja̧kwadö tjö̧ji̧ma. Dios wei̧ a̧ja̧kwadöma sulabenö omukwatadö tjö̧ji̧danö jö̧kö̧dö. Wanedö yötawakwö chitji̧: Dewachenama, i̧ya̧nö deapjo dewachobe tjo̧'o̧manö, ja̧wo̧ laebaja̧ tupakwö jwiinö dewobe jweinö öjenanö. Jobekwö Dios wei̧ a̧ja̧kwadö kwetjachamanö dewinö dejatobe, ajayinö dejatemitjö̧ tupakwö jwiinö dewinö dejatobe, otiwanö edö, salöamanöda tji̧'yobö.

¹⁹ Ja̧danö, jobekwö 'yö̧kö̧dö sulabenö omukwatadöma. Jobadöma yȩa'wo okwa kwetjachi̧danö kwebachadö, edökönö. Ja̧danö, mebabinöda kwebachadö, tjöbajale tjewawadödanö.

²⁰ Chitji̧, ötjö yötawi̧ma otiwanö kwa̧ja̧kwo, ja̧danö ö'wöyawakwawönö kwomukwato.

²¹ Ja̧ yötawi̧ma kabatibökönö kwomukwato, ba̧kwȩlö̧jatebö. Ja̧danö, kwomajadenö kwanawo ba̧kwȩlö̧jatebö kwomukwatakobetjö̧.

²² Jao chitji̧, ja̧ yötawi̧ma kabatibökönö kwösödo otiwanö omukwatö kwö̧jakobetjö̧. Ja̧danö, yötawi̧ma jowobu tjowi̧danö pjaatakobe ökwönöma, kwujuluwachibanö kwö̧jobö 'dö̧bachökönö.

²³ Ja̧danö, ju'wibi yötawakwö chitji̧: Kwomajadenö kwomukwati̧ma ö'wiyawakwawönö kwite'ada̧lakwawo sulabenö kwomukwatapji jö̧ba̧lö. Chitji̧, kwomajadenö otiwanö kwomukwatitjö̧ma otiwanö kwö̧jakwo̧ja. Jo̧kwaijayonö kwomajadenö sulabenö kwomukwatitjö̧ma sulabenö omukwatö kwö̧jakwo̧ja. Isabenö chitji̧, kwomajadenö kwomukwataja̧ma kwite'ada̧lobö jo̧be, otiwanö jweinö kwomukwatakobetjö̧.

²⁴ Ja̧danö, ju'wibi yötawakwö chitji̧: Yöka̧lenama ö'öbönö yöka̧loko jojodönö, jelobekwö tjo̧mukwatobö. Ja̧danö, omöna yöka̧lobö kwomukwatoko. Jweinöda yöka̧lo.

²⁵ Ja̧danö, ju'wibi yötawakwö chitji̧, wanedö: Ökwö kwö̧ji̧ma mananö kwi̧'yi̧danö ji̧. Kwi̧’yenama jweinöda eda̧lö kwi̧’yo chitji̧. Pjeakwöma kwedoko, jweinöda eda̧lö kwi̧’yo.

²⁶ Ja̧danö, kwi̧'yenama ö'wiyawakwawönö omukwatö kwi̧'yobö jo̧be. Jobekwö ö'wiyawakwawönö kwomukwatitjö̧ma jweinöda eda̧lö kwi̧'yena.

²⁷ Chitji̧, pjeakwö, kwöwaisobekwöbi wajwiköbobekwöbi kwi̧'yoböma kwomukwatoko, jweinöda kwi̧'yo. Jobekwö jö̧ba̧lö, baikwö wanekwachobe: Otiwanöda, jweinöda omukwatö kwö̧jo, jelobekwö, sulabe ja̧tjobekwö edökönö.