Proverbios 31 - Dios Iwene

Inesö la'aka luwo̧ Lemuel mikwo̧ jweinö omukwatö yöawina jawa

¹ Bemi tupakwö laebakwa̧ma inesö la'aka luwo̧ Lemuel mikwo̧ yöawina jawa, iteda ojodo jo̧banö yöjawinama. Lemuel ojo'do jo̧banö yöjawinama, Dios jobujunö jo̧'wo̧ luwo̧nö yöawina jawa. Baikwö yöjawinobe Lemuel ojo'doma jitji̧nö, Lemuelnö:

² — Chitji̧, ökwöma ötjö chitji̧ja, 'yatebinökweja. Dios iyinökwema ökwöda, Dios iyobö atebinökweja— jö̧ba̧lö—.

³ Chitji̧, jwebebö yötawakwö: Kwujuluma iyö loköboko kwilekwobökujunö, jobujukwö 'da̧bawö. Isabenö yötawa: Inesö la'aka luwedötjö ba̧jȩkwadö söbekwö lobinadöma tjö̧jobe, ya̧dökwö 'da̧bawö tjösödobetjö̧.

⁴ Ju'wi jawabi jwebebö yötawakwö chitji̧: Ökwöma inesö la'aka luwo̧ja. Ja̧danö, inesö la'aka luwedöma ubasobu o̧'do̧bu nöinöma, 'dukwachinö tjowobö jwiobe. Ja̧danö, ju'wibi ju'wi o̧'do̧bu tjowobö ba̧kwȩlöjatebö isakwakwawama jwiinö sulobe chitji̧.

⁵ Inesö la'aka luwedöma nöinö tjowa̧loböma sulobe. Nöinö tjowitjö̧ma tju̧junina weawama tjo̧'wo̧ jwitjibakwedö. Ja̧danö, usulasedönö pjatjatobö tju̧junina weawama tjo̧mukwatökakwedö nöinö 'dukwachinö tjowa̧litjö̧ma.

⁶ Jobekwö inesö la'aka luwedöma tjowobö jwiijayonö ju'wedö, 'dö̧bachadöbi, tjo̧'wo̧ tjo̧bekwö ju̧kwadöbi tjowoböma jo̧be. Ö'wöchadö, tjo̧wi̧ ö'wö batjibakwa̧ yö̧neawachibena o̧'do̧bu̧ tjowobö jo̧be, jobadönö pjaatakobetjö. Ja̧danö, tjo̧'wo̧ tjo̧bekwö ju̧kwadöbi tjowoböma jo̧be.

⁷ Jobadö, 'dö̧bachadöbi, tjo̧'wo̧ tjo̧bekwö ju̧kwadöbi o̧'do̧bu tjowitjö̧ma okobe jwiinö usula tjȩmawi̧ma tjo'wo̧ jwitjibena, ja̧danö tjo̧'wo̧ tjo̧bekwö tjö̧ji̧ma tjo̧mukwatökena.

⁸ Ja̧danö, ju'wibi jwebebö yötawakwö chitji̧: Jwibadönö, nöinö usula emawadönöma lȩekwa yöbawo̧nö yötjawobö wetjitjö̧ma ökwöda tjöbeba̧lönö pjakatodönö. Jao chitji̧, ökwöda tjökeba̧lodönö, sulabenö baledapji jö̧ba̧lö jobadönöma. Jobadöma lȩekwa yöbawo̧nö jweinö yötjawoböma wajwibadö jo̧kwadabedötjobetjö̧.

⁹ Jao, jobadönö pjabatö yökawo lȩekwa yöbawo̧nöma, jobadönö jweinö yöawobö— jobekwö yöjawinobe Lemuel ojo'doma jo̧banöma. Jobuju yöjawina yöbawö iwȩyudinobe Lemuelma.

Jilekwenö juna̧luju ¿dakwö omukwatö jö̧jobeda? jö̧ba̧lö yöawina jawa

¹⁰ Bemi tupakwö laebakwa̧ma jilekwenö juna̧luju jö̧jina jawa laebobe, jilekwenö juna̧luju ¿dakwö omukwatö jö̧jobeda? jö̧ba̧lö: Iso̧ma ilekwo̧nö, otiwanö omukwatujunö, ja̧danö ju'wi jawabi ju'wi jawa jotidobö waisujunöma öbadekwajobö waiyobe. Isabenö, jobekwö omukwatö waisanö jujuma jwiinö mikwawuju, inawiya nöinö mikwawi̧ öwiya mikwawi̧tjö̧ bajalekwönönö mikwawuju.

¹¹ Jobuju jilekwema, ilekwonö omukwato̧, Chilekwoma isabenö otiwanöda omukwatö juju, jö̧ba̧lö. Ja̧danö, jobujuma otiwanö waisö jotidobetjö̧ jilekwema okobe jwiinö iteda ösödi̧ma juna̧lo̧.

¹² Ja̧danö, jobujuma jilekwenö otiwanö pjabatöda pjajatobe ba̧kwȩlö̧jatebö 'yaja̧lenanö kabatö.

¹³ Ja̧danö, jobujuma tjiyabemi 'yanö kamisi jotidakwa̧ o̧bȩja̧dö tjöwö'yebi, ju'wi jawa lino mikwi̧bi isakwö emuju. Isabenö, jobujuma dösölö̧jinö jo̧'wo̧ ösöwanö otiduju, opjiya dölö, dölawa bukwö, kamisi je'dakwa̧ma.

¹⁴ Ja̧danö, wanedö yötawa: Jobujuma isowi nöowi, ödötjö kwakwawa ichejebowidanö wanekwachuju, ödötjö ichejebö kwakwawa emö ji̧'yobetjö̧.

¹⁵ Otiwanö te'ada̧luju jömöledönöbi, jömayedönöbi otiwanö tjukwobö. Dewachakwa̧ abönö wilubö otiduju jömöledö tjukwakwa̧bi, jömöayedö ya̧dö tjukwakwa̧bi.

¹⁶ Ikenama, niji tjiyemima 'ya̧nö eduju. Ja̧danö, jemima edö, otiwemi, jö̧ba̧lö jösöditjö̧ma mido jemena. Jemima jujunobö midö emuju isuda jotidaja̧ tjiyina mikwa baladanö. Ja̧danö, jemima jöbatjonöma uba jujunakwuju.

¹⁷ Isabenö juluwuju, ba̧kwȩlö̧jatebö dösölö̧jinö, labinö otiduju. Jöjabiyabi juluwuju ba̧kwȩlö̧jatebö labinö jotidobetjö̧.

¹⁸ Ja̧danö, jobujuma jotidina mikwama jöwaisobe, biya̧ chotidawa nöinö mikwawobe, jö̧ba̧lö. Nöinö jotidobe, yö̧te ja'ö baibanö.

¹⁹ Jobujuma jömamunö bakwachekwadanö do̧ba̧lö döluju kamisi jotidobö.

²⁰ Ja̧danö, a'dȩlökönö pjabatö iyuju jwibadönö.

²¹ Ja̧danö, jobujuma o̧ba ichobe tiyuwenama waisuju, ötjö chömöledöma otiwanö 'dutjawakobe, kamisi bu̧jwa̧tjö̧ dölawa chotidobetjö̧.

²² Ja̧danö, kamapjo muchekwado̧bi otiduju. Ja̧danö, isuda jökamisima jwiinö otiwi̧ jawa, nöinö mikwawi̧ jawa lino mikwi̧tjö bukwö 'dubawuju, ö'du̧wado̧.

²³ Ja̧danö, jobuju jilekwema jobe la'aka luwedökwö ko̧ko̧kwö bo̧. Ja̧danö, la'aka luwedöma otiwanö tjedobe jilekwenöma, bite ilekwoma otiwanö omukwatö, dösölö̧jinö otiduju, jö̧ba̧lö.

²⁴ Ja̧danö, jobujuma lino mikwi̧tjö jotidina kamisima mikwanö iyuju. Ja̧danö, di̧atakwawa o'bijubi balekwö mikwanö iyuju iyadönöma.

²⁵ Ja̧danö ju'wedöma jobujunö, otiwanö omukwatuju, jö̧ba̧lö tjösödoko. Ja̧danö, jobujuma yebabökuju ju'winö baledakwa̧.

²⁶ Ja̧danö, jobujuma yöja̧lena jweinö omukwatö yöba̧luju. Ja̧danö, jwebebö yöjawena tjo̧'o̧manö tiyuwanöda yöbawuju.

²⁷ Jömöledönö otiwanö te'ada̧luju okobe jwiinö tju̧juna̧lobö. Ja̧danö la'akatjöda 'du̧wekwö̧kö̧ju.

²⁸ Ji̧tji̧mu̧ma jobujunö jwiinö ösödö, dojo'doma jwiinö otiwanö omukwatuju, jö̧ba̧lö, yötja̧loko. Ja̧danö, jilekwebi jobujunö ösödö, otiwanö omukwatuju chilekwoma, jö̧ba̧lö, yöa̧loko.

²⁹ Ja̧danö, jilekwema jobujunö yöa̧lobe: —Chilekwo, isabenö ju'wedö ya̧döma jwiinö otiwanö omukwatö, waisanö otidö tju̧ju̧kwijayonö ökwöma jobadö otiwanö tjö̧ji̧tjö̧ o̧pekwönönö otiwanö omukwatö, waisanö otidö kwö̧jobe— jobekwö yöa̧lobe jobuju jilekwema jobujunöma. Jobekwö yöjawinobe Lemuel ojo'doma jo̧banöma. Ja̧danö, ju'wibi yöjawinobe:

³⁰ —Chitji̧, baikwö yötawa: Isabenö, bakwuju isujunö edö, jwiinö otiwuju, jö̧ba̧lö kwomukwatena. Jobekwö kwomukwatijayonö jobuju otiwujuma jomajade okwanö otiwanö omukwatökena. Wamenöda i̧sekwujuena, okwanö i̧sekwökönö. Jobekwö wamenöda i̧sekwujuma jelobekwö kwomukwatobö öbibuju, okwanö jomukwati̧ma kwöwaisachibapji jö̧ba̧lö— yöjawinobe—. Ja̧danö, ju'wibi yötawa: Babema otiwuju jichejekwijayonö ba̧kwȩlö̧jatebö jobekwö jichejekwökakobe, puo jöwaekwenama. Isabenö yötawa, inesö ji̧ jawa baikwö kwomukwatobö jo̧be: Isabenö Jo̧nö yebabinö omukwatujunö, Isabenö bisuda inesö otiwuju, jö̧ba̧lö, kwomukwatobö jo̧be.

³¹ Ja̧danö, Isabenö Jo̧nö yebabinö omukwatujunö jojodö tjö'da̧de ja̧nö otiwanö edö yöka̧lo, okobe deinö tja̧ja̧kwonö, bisuma otiwanö omukwatö, dösölö̧jinö otidö juju, jö̧ba̧lö— jobekwö yöjawinobe Lemuel ojo'doma jo̧banöma, jwebebö yöbawö.