Proverbios 3 - Dios Iwene

Salomón ju'wi yöawina jawa, ötjö yötawi̧danö jwebebö yökawaduwo kwi̧tji̧mu̧duwinö, möayedönö, jö̧ba̧lö

¹ Baikwö laebobe Salomón iteda itji̧nö möayo̧nö jwebebö yöawinama: Chitji̧ yötawakwö: Ötjö jwebebö yötawi̧ma kwo̧’wo̧ jwikiboko. Ja̧danö, weti̧ma kwomajadenö kwanawo, jwiinö mikwawobe jö̧ba̧lö.

² Ja̧ yötawi̧bi, weti̧bi kwa̧ja̧kwitjö̧ma lekwe mölȩ kwö̧jakwo̧ja, kwo̧'wo̧ ösöwanö.

³ Ja̧danö, ju'wibi jwebebö yötawakwö: Chitji̧ ba̧kwȩlö̧jatebö jojodökwö otiwanö ösödö kwö̧jo, ba̧kwȩlö̧jatebö pjabatö. Ja̧danö, ba̧kwȩlö̧jatebö jojodönö ajayinö yöbawö kwujuninadanö badekwachinö i̧sebö kwö̧jo. Wanedö yötawakwö: La̧wo̧sopja jwiinö otiwopja kwölawobe otiwanö öwawi̧danö ökwö jojodökwö otiwanö kwö̧ji̧ma otiwanö öwawakobe. Chitji̧, jobekwö kwö̧ji̧ma ba̧kwȩlö̧jatebö omukwatö kwö̧jo. Wanedö yötawakwö: Ösöjanö wȩyudö lödawadanö kwomajadenö wȩyudö kwödawo kwo̧'wo̧ jwikibökakobetjö̧, jojodökwö otiwanö chö̧jobö jo̧be jö̧ba̧lö.

⁴ Jobekwö kwö̧jitjö̧ma, Diosbi, jojodöbi ökwö kwö̧jobe edinö tjösödakobe kwö̧ji̧ma, otiwanö omukwatö jo̧ jö̧ba̧lö.

⁵ Ja̧danö, ju'wibi jwebebö yötawakwö: Chitji̧, Isabenö Jo̧nöda kwo̧'wo̧ wa̧na̧lö kwö̧jo. Okobe jwiinö kwomajadenö jo̧banöda kwo̧'wo̧ wa̧na̧lö kwö̧jo. Ökwö jojo kwomukwati̧damaökö chitji̧, Isabenö Jo̧nöda kwo̧'wo̧ wa̧na̧lö kwö̧jo.

⁶ Okobe jwiinö kwi̧'yenabi Isabenö Jo̧nö kwo̧'wo̧ wa̧na̧lö kwö̧jo, jo̧ba ökwönö öiboböda kwösödo. Jobekwö Isabenö Jo̧nöda kwo̧'wo̧ wa̧na̧lö kwö̧jitjö̧ma jweinö kwi̧'yobö, jwei̧ mananöda öibakwo̧.

⁷ Ju'wibi yötawakwö chitji̧: Kwomukwatoko, ötjöma jwiinö waiso̧sa, jö̧ba̧lö. Jobekwödanömaökö chitji̧. Isabenö Jo̧nö yebabinö omukwatö kwö̧jo. Ja̧danö, suli̧ jawa öpöjödö kwö̧jo.

⁸ Jobekwö Isabenö Jo̧nö yebabinö omukwatö, suli̧ ja̧bökönö kwö̧jitjö̧ma otiwanö, kwujulunö kwö̧jakwo̧ja. Wanedö yötawakwö chitji̧: Jobekwö omukwatö kwö̧jitjö̧ma jowobu tjowi̧danö pjaatakobe ökwönö, kwujuluwachibanö, kwo̧'wo̧ ösöwanö kwö̧jobö.

⁹ Ja̧danö ju'wibi jwebebö yötawakwö: Chitji̧, kwujuna̧li̧tjö Isabenö Jo̧nö kwiyo, ökwöda jwiinö mikwawo̧ja, jö̧ba̧lö. Ja̧danö, kwöbatjonö ajayinö wa̧ji̧tjö̧ Isabenö Jo̧nö kwiyo, ökwöda, jö̧ba̧lö.

¹⁰ Jobekwö omukwatö kwiyitjö̧ma kwöbatjonö ajayinö wa̧jenatjö bajalekwönönö wa̧jakobe. Ja̧danö, nöinö kwödakobe lödaweju okwa, 'su̧'bȩ baibanö, Isabenö Jo̧nö ajayinö wa̧ji̧tjö̧ kwiyinobetjö̧. Ja̧danö, ubasobu pe'awa o'dijubi su̧'bȩ baibanö kwipe'akwo̧ja, ubasobu welachibanö, Isabenö Jo̧nö ajayinö waji̧tjö̧ kwiyinobetjö̧.

¹¹ Ja̧danö, ju'wibi jwebebö yötawakwö: Chitji̧, Isabenö Jo̧ ökwönö lȩebitjö̧ma kwöpöjödoko. Ja̧danö, Isabenö Jo̧ ökwönö jwebebö yöawi̧bi kwa̧ja̧kwo, otiwa jö̧ba̧lö.

¹² ¿Wajwiköbiji̧? Isabenö Jo̧ma ile niebökwenöda jwebebö yöbawo̧ öwaisachibobö, jwiinö ösödobetjö̧. Bakwo̧ iteda itji̧nö, ösödökwenö jwebebö yöawi̧danö jwebebö yöbawo̧ Isabenö Jo̧ma ökwönö, iteda ile niebökwenöma.

¹³ Ja̧danö, ju'wibi yötawakwö chitji̧, wanedö: Bakwo̧ma jweinö omukwatö ja̧kwawama ¿di̧yajö? jö̧ba̧lö, öwaisachibobö isakwobe. Isakwemi badekwajo̧ma jweinö omukwatö ö̧jobetjö̧ o̧'wo̧ ösöwanö jo̧. Ja̧danö, jo̧ba jweinö omukwatö jo̧ma, ju'wi jawabi ju'wi jawa omukwatö, di̧ya sulojobö jö̧ba̧lö, di̧ya otiwojobö jö̧ba̧lö waisachibo̧. Jobekwö öwaisobetjö̧ o̧'wo̧ ösöwanö jo̧.

¹⁴ Jao chitji̧, jweinö omukwatö ja̧kwawama jwiinö mikwawobe. Plata, oro mikwawi̧tjö̧ bajalekwönönö mikwawobe jweinö omukwatö kwö̧ji̧ma. Isabenö, plata, oro kwiyi̧tjö̧ma balada nöinö kwemena, nöinö mikwawobetjö̧, ¿jö̧tö̧? Jo̧kwaijayonö, ökwö jweinö omukwatö kwö̧ji̧ma plata, oro mikwawi̧tjö̧ bajalekwönönö mikwawobe.

¹⁵ Isabenö yötawa chitji̧: Jweinö omukwatö kwö̧ji̧ma isabenö mikwawobe. Inawiya jwiinö mikwawi̧ jawa öwiyatjö bajalekwönönö mikwawobe jweinö omukwatö kwö̧ji̧ma. Chitji̧, ju'wi kwemobö kwösödi̧ma ¿jweinö omukwatö kwö̧ji̧ bajalekwönönö mikwawobeji̧? Jwiyobe chitji̧.

¹⁶ Ja̧danö, ju'wibi yötawa chitji̧, wanedö: Jweinö omukwatö ja̧kwawa wanekwachujuma te'ada̧lujudanö ökwönö te'ada̧luju. Ja̧danö, jobujuma ökwönö ju'wi jawa ju'wi jawabi iyuju. Ja̧danö chitji̧, jobujuma jöwaisamunö lekwe ja̧kwawa do̧ba̧luju ökwönö jiyobö, lekwe mölȩ kwö̧jobö. Ja̧danö, wajwijamunö ju’wi jawabi ju’wi jawa tea, balada do̧ba̧luju, ökwönö jiyobö. Ja̧danö, ja̧ tea, balada kwujuna̧lobetjö̧, jojodöma ökwönö otiwanö edinö, tea luwo̧, jö̧ba̧lö, tjöwaisachibakobe.

¹⁷ Jao chitji̧, jobujuma, jweinö omukwatö ja̧kwawa wanekwachujuma ökwönö öjibi̧danö öbibuju okobe jwiinö kwi̧'yenama kwo̧'wo̧ ösöwanö kwi̧'yobö.

¹⁸ Chitji̧, jweinö omukwatö ja̧kwawa wanekwachujuma jojodönö lekwe tjö̧ji̧ iyuju, yöjawi̧ ösödö a̧ja̧kwadönöma. Jao chitji̧, jobuju yöjawi̧ 'diinö do̧ba̧lö kwö̧jitjö̧ma kwo̧'wo̧ ösöwanö kwö̧jakwo̧ja.

¹⁹ Ju'wibi yötawakwö chitji̧, Isabenö Jo̧ ajayinö ö̧jina jawama: Isabenö Jo̧ma jweinö omukwatö Jo̧. Ja̧danö, jweinö omukwatö Jo̧obetjö̧ böjȩma otidinobe. Ja̧danö, mölȩjȩnö lö̧jadönöbi öninobe, isabenö mikwawadö, jö̧ba̧lö waiso̧obetjö̧.

²⁰ Ja̧danö, jo̧bama waiso̧obetjö̧ jwai balawa niji teebetjö laebi̧danö dötewanö loobö weinobe. Ja̧danö, weinobe ojwiyo'wotjö ojwiyo o̧bobö. Okobe jwiinö waiso̧ Isabenö Jo̧ma.

²¹ Ja̧danö, ju'wibi jwebebö yötawakwö chitji̧: Ba̧kwȩlö̧jatebö jweinö omukwatö kwö̧jo. Ja̧danö, ba̧kwȩlö̧jatebö ajayinö otiwanö kwomukwato jweinö kwomukwatina badekwachinö.

²² Ja̧danö, jobekwö kwö̧jitjö̧ma kwo̧'wo̧ ösöwanö lekwe kwö̧jakwo̧ja. Wanedö yötawakwö: La̧wo̧sopja jwiinö otiwopja kwölawobe otiwanö öwawi̧danö ökwö jweinö omukwatö kwö̧ji̧ma öwawinö kwö̧jakwo̧ja, jweinö omukwatö jo̧ jö̧ba̧lö.

²³ Jao chitji̧, jobekwö jweinö omukwatö kwö̧jitjö̧ma jwaikwöda kwi̧'yakwo̧ja yebabökönö. Jao chitji̧, jwaikwöda kwi̧'yakwo̧ja bakwo̧ ömasapanö töbökönö i'yi̧danö, mebökönö.

²⁴ Jao chitji̧, jweinö omukwatö kwö̧jitjö̧ma yö̧tema yebabökönö kwabakwo̧ja.

²⁵ Ju'wibi yötawakwö chitji̧: Yeabikwawa jawa ichenama yekaboko. Ja̧danö, sulabenö omukwatadönö söbebö loawa jawa, labi̧ jawama ichena yekaboko.

²⁶ Isabenö Jo̧da ite'ada̧lakobe ökwönö chitji̧, jo̧kwaobetjö̧ yekaboko. Jo̧bada ite'ada̧lakobe ökwönöma jweinö kwi̧'yobö, 'daliwanö kwö̧libapji jö̧ba̧lö.

²⁷ Ju'wibi jwebebö yötawakwö chitji̧: Bakwo̧ jwiinö usulaso̧ma ökwönö ichö pjabatitjö, jö̧ba̧lö aebitjö̧ma pjakatonö, öpöjödökönö. Jwiinö usulaso̧obetjö̧ pjakatobö jo̧be chitji̧. Jao, ökwö pjakatobö ji̧tjö̧ma pjakatonö.

²⁸ Ju'wibi jwebebö yötawakwö chitji̧, jelo̧nö kwipjeanö jo̧nöma: Kwipjeanö jo̧ma ökwönö aebena, pjabatitjö, jö̧ba̧lö. Aebena kwujuna̧litjö̧ma pjakatonö. Isabenö yötawa: Kwiyobö kwujuna̧lijayonö, maköda kwicho, itekwayida kwicho pjatatena, jö̧ba̧lö kwataditjö̧ma sulena. Jobekwö kwatadoko jo̧banö chitji̧. Jo̧banö pjakatobö kwujuna̧litjö̧ma tupakwöda iyinö pjakatonö.

²⁹ Ja̧danö, ju'wibi jwebebö yötawakwö chitji̧: Kwipjeanö jo̧nöma suli̧ ja̧köbakwa̧ kwomukwatoko. Jo̧bama ökwönö otiwanö omukwatobe, ja̧danö la'akatjöda omukwatokobe sulabenö ja̧köbakwa̧ kwomukwatobema jo̧banöma. Jo̧banö sulabenö ja̧köboböma jwiyobe chitji̧.

³⁰ Ju'wibi jwebebö yötawakwö: Bakwo̧ ökwönö suli̧ öwaedokobetjö̧ ölakwabikwawönö jwökeba̧loko jo̧banöma. Jo̧banö jwökeba̧lobö jwiya chitji̧, ökwönö sulabenö öwaedokobetjö̧.

³¹ Ju'wibi jwebebö yötawakwö chitji̧: Jelo̧ labo̧nö, sulabenö ja̧bö eminatjö̧ nöinö juna̧lo̧nöma ö'wiabinö kwedoböma jwiyobe. Jo̧banö edö, ite ujuna̧li̧danö chujuna̧lowe, jö̧ba̧lö kwedoko. Chitji̧, jo̧ba ujuna̧li̧ma sulabenö ja̧böda eminobetjö̧ ö'wiabinö kwedoko jo̧banöma. Ja̧danö, jo̧ba labo̧ ö̧ji̧danöma kwö̧joböma jwiyobe.

³² Chitji̧, Isabenö Jo̧ma jwiinö öpöjödobe jelobekwö sulabenö omukwatö jo̧nöma. Jo̧kwaijayonö Isabenö Jo̧ma, iteda wei̧ a̧ja̧kwö jo̧nöma nöinö ösödo̧, yö̧ne ötjö chömöledöso̧, jö̧ba̧lö.

³³ Ja̧danö, ju'wibi yötawakwö chitji̧: Isabenö Jo̧ma sulabenö omukwatö jo̧nöbi, jo̧ba ömöledönöbi, lȩtebocha, jö̧ba̧lö, yöbawö juno̧. Jo̧kwaijayonö Isabenö Jo̧ma jelo̧nö, iteda wei̧ a̧ja̧kwö jo̧nöma jwiinö ösödo̧. Ja̧danö, jo̧ba ömöledönöbi ösödo̧ Isabenö Jo̧ma, Pjatatocha, jö̧ba̧lö.

³⁴ Ja̧danö, ju'wibi yötawakwö chitji̧: Isabenö Jo̧ma sulabenö omukwatö obadönöma öpöjödö obo̧. Jo̧kwaijayonö öpöjödokobe Isabenö Jo̧ma baikwönönö ja̧dösa, jö̧ba̧lö omukwatadönöma. Jobadö baikwönönö ja̧dösa jö̧ba̧lö omukwatadönöma ösödö pjabato̧ Isabenö Jo̧ma.

³⁵ Ja̧danö, ju'wibi yötawakwö chitji̧: Jojodöma jweinö omukwatö ju̧kwadönöma ösödö otiwanö yötja̧lobe, Otiwanö omukwatadö, jö̧ba̧lö. Jo̧kwaijayonö jobekwö tjo̧mukwatokobe jojodöma jweinö omukwatökönö ju̧kwadönöma. Jojodöma jweinö omukwatökönö ju̧kwadönöma öpöjödö yötja̧lobe, taba̧lö̧jinö ju̧kwadö jö̧ba̧lö.