Proverbios 29 - Dios Iwene

Ju'wi Salomón jwebebö yöawakwawa jawanö wanekwachi̧ jawa

¹ Bemi tupakwö laebakwa̧ma inesö la'aka luwo̧ Ezequías ömöayedöma ju'wi Salomón iwȩyudina eda̧lö tjiwȩyudina, Salomón woinobe okobe lekwinemi. Ja̧ tjiwȩyudinama baikwö laebobe, Salomón yöawina: Isabenö yötawa: Bakwo̧nö ba̧kwȩlö̧jatebö jwebebö yötjawijayonö uu 'diobe a̧ja̧kwökötjö̧ma ju'winö juluwanö 'dö̧achakwo̧, ö̧bibajoböma jwiinö.

² Ja̧danö, ju'wibi yötawa: Dios wei̧ a̧ja̧kwö ju̧kwadöma tjuluwedö baibanö yöbawö weenama tjitebonö ju̧kwadöma okobe deinö tjo̧'wo̧ ösöwanö tjö̧jobe, otiwa, jö̧ba̧lö. Jobekwö baledokobe tjuluwedöma sulabenö omukwatadöda yöbawö wetjena. Tjuluwedö sulabenö omukwatö tjuluwedö baibanö yöbawö weena tjitebonö ju̧kwadöma o̧'wo̧ tjo̧achö budekwabinöda ju̧kwadö, ökwödöwe, jö̧ba̧lö.

³ Ja̧danö, ju'wibi yötawa: Bakwo̧ jweinö omukwatö ö̧jobö ösödö isakwitjö̧ma abe'do ojo'do tjo̧'wo̧ ösöwanö tjö̧jena, ditji̧ma otiwanö omukwatö jo̧, jö̧ba̧lö. Jobekwö otiwanö ö̧jokobe jelo̧, ya̧dö 'da'dabakwawadökwö ö̧jobö ösödo̧ma. sulabenö alewö, 'da̧'da̧bö ö̧jobetjö̧ okobe jwiinö u̧kwa baladama iyö lobo̧.

⁴ Ju'wibi yötawa: Inesö la'aka luwo̧ma jweinö yöbawö weitjö̧ma iteboma otiwanö, juluwemi jena, ja̧danö itebonö ju̧kwadöma otiwanö juluwadö tjö̧jena. Jobekwö baledokobe inesö la'aka luwo̧ balada emotö jö̧ba̧lö isakwöda omukwatitjö̧ma. Jo̧ba inesö la'aka luwo̧ma, balada emotö jö̧ba̧lö isakwö, sulabenö omukwatö itebonö ju̧kwadönö ba̧kwȩlö̧jatebö ichejebö tjiyobö webo̧. Jobekwö weobetjö̧ iteboma juluwökakwemi, sulamachibakwemi.

⁵ Ja̧danö, ju'wibi yötawa, wanedö: Bakwo̧ma ömöledöso̧nö o̧'wo̧ tjo̧achapji jö̧ba̧lö jo̧banöma jweinö yöbawökönö, otiwanöda yöa̧lobe. Ökwöma otiwo̧ja, otiwanö omukwato̧ja, jö̧ba̧lö yöa̧lobe, jweinöma yöbawökönö. Isabenö yötawa: Jobekwö yöa̧litjö̧ma yöa̧li̧ma omöna yöa̧li̧danö mikwawokobe. Ja̧danö, yöa̧li̧ma 'daliwa öni̧danö wanekwachobe, ömöledöso̧ma ö̧libobö jelobekwö omukwatö öbibö, jweinöda yöawokobetjö̧.

⁶ Ja̧danö, ju'wibi yötawa, wanedö: Sulabenö omukwato̧ma itedada sulabenö ja̧i̧ jawama 'daliwadanö ji̧, iteda ö̧libobö, ö̧jibobö jwiinö. Jobekwö baledokobe Dios wei̧ a̧ja̧kwo̧nöma. Dios wei̧ a̧ja̧kwo̧ma o̧'wo̧ ösöwanö lo̧bo̧.

⁷ Ju'wibi yötawa: Jweinö omukwato̧ma jwibadönö edö omukwatobe, idöbi wene tju̧juna̧lakwawitjö̧ma lȩekwa yöbawo̧nö yötjawobö jo̧be, balada jwiijayonö. Ju'wedönö, balada juna̧la̧dönö tjedi̧danö bakwemiinö tjedobö jo̧be. Jo̧kwaijayonö sulabenö omukwato̧ma jwibadönöma balada juna̧la̧dönö bakwemiinö omukwatokobe. Ja̧danö, jwibadöbi wene tju̧juna̧lakwawitjö̧ma lȩekwa yöbawo̧nö yötjawobö jo̧be jö̧ba̧lö la'akatjöda omukwatokobe.

⁸ Ja̧danö, ju'wibi yötawa: Okobe jwiinö otiwi̧ jawa öpöjödö obadöma, obö jwötjeba̧lobetjö̧ jobe ju̧kwadötjö ju'wedöma jobadöbi tjo̧majadenö öpöjödachibö jwiinö tjölakwabikwawobe. Jobekwö baledena jweinö ju̧kwadöma jojodö labidönö tjo̧'o̧manö yöba̧lö pjatjatakwedö tjölabi̧ma tjo̧'wo̧ sötjinö.

⁹ Ja̧danö, ju'wibi yötawa, wanedö: Bakwo̧ jweinö omukwato̧ma jelo̧nö jweinö omukwatö̧kö̧kwö wene ujuna̧lakwawobe. Ja̧danö, lȩekwa yöbawo̧nö yöbawö 'ya̧jadö jweinö omukwato̧ma yöawobe lȩekwa yöbawo̧nö, bitema sulabenö ja̧inobe ötjönöma, jö̧ba̧lö. Jobekwö yöawonö jweinö omukwatö̧kö̧ma sulabenö a̧ja̧kwökönö ö̧jobe, labinö jwöbeba̧lö, ja̧danö oböda obö, 'wiinö jö̧könö. Jo̧kwaobetjö̧ lȩekwa yöbawo̧ ¿dakwö otiwanö yöawoböda? Jwiobe.

¹⁰ Ja̧danö, ju'wibi yötawa: Jojodönö kwabö lobadöma tjo̧'wo̧ sulinö tjedobe otiwanö omukwatö jo̧nöma. Jo̧kwaijayonö Dios wei̧ a̧ja̧kwadöma otiwanö omukwatö jo̧nöma tjöbeba̧lö ö̧jibanö pjatjatobe.

¹¹ Ja̧danö, ju'wibi yötawa: Jweinö omukwatö̧kö̧ma juluwanö dameakwo̧, ödameakwi̧ma tjöbeba̧lökönö. Jo̧kwaijayonö, jweinö omukwato̧ma ödameakwi̧ma tjöbeba̧lö i̧sekwö̧kö̧, ödameakwi̧ o̧'wo̧ söawachenanö kabatö.

¹² Ja̧danö, ju'wibi yötawa, wanedö: Bakwo̧, inesö la'aka luwo̧ma, omöna yöba̧ladö jo̧banö yötjawi̧ a̧ja̧kwö ösödobe, otiwa jö̧ba̧lö. Jobekwö ösödobetjö̧ sulabenö webö ö̧jobe. Ja̧danö, sulabenö webö ö̧jobetjö̧ iteda yö̧ne ömöayedöbi sulabenö omukwatadö tjö̧jobe.

¹³ Ja̧danö, ju'wibi yötawa: Okobe deinö jojodönöma Isabenö Jo̧ ja̧kwawa iyinawö̧. Jwibadöbi, jwibadönö usula tjȩmawobö webadöbi bakwainö Isabenö Jo̧ jobadönö ja̧kwawa iyinawö̧.

¹⁴ Ja̧danö, ju'wibi yötawa: Inesö la'aka luwo̧ma jwibadö atjeba̧li̧ a̧ja̧kwö jweinö yöbawö ujunitjö̧ma lekwe yöbawö weena.

¹⁵ Ja̧danö, ju'wibi yötawa: Tjemu sulabenö omukwatö ja̧enama abe'do, ojo'do jwebebö, kwabö yötjawobö jo̧be. Jobekwö jwebebö kwabö yötjawitjö̧ma öwaisachibena, jweinö omukwatö ö̧jakwobetjö̧. Jobekwö baledökakobe tjȩmunö, abe'do ojo'do jwebebö kwabö yötja̧wökökwenöma. Tjemuma iteda ösödi̧da sulabenö omukwatö ja̧bo̧nö, abe'do, ojo'do jwebebö kwabö yötjawökötjö̧ma sulabenö omukwatö ö̧jakwo̧. Jobekwö ö̧jobetjö̧ ojo'doma jwiinö tabakwujuda jö̧jakwuju.

¹⁶ Ja̧danö, ju'wibi yötawa: Inesö la'aka luwo̧ sulabenö omukwato̧ma yöbawö weena itebonö ju̧kwadö sulabenö omukwatadöma, idöda sulabenö ja̧tji̧ jawa nöachobe. Jobekwö baledijayonö ju'winö jo̧ba inesö la'aka luwo̧ sulabenö omukwato̧, iteda yöbawö wei̧ma bajaliyanö 'dö̧ibajakobe. Ja̧ mölȩma Dios wei̧ a̧ja̧kwadöma tjo̧'wo̧ ösöwö tjö̧jakwedö, sulabenö omukwato̧ wei̧ma bajaliyanö 'dö̧ibajabe, jö̧ba̧lö.

¹⁷ Ju'wibi yötawa: Kwi̧tji̧nö ina tjȩmubaiyo̧nö jwebebö kwabö yökawo öwaisachibobö. Jobekwö jwebebö kwabö yökawitjö̧ma kwo̧'wo̧ tjo̧bekwökönö kwö̧jena, kwitji̧ma otiwanö omukwatö ö̧jobetjö̧. Ja̧danö, kwo̧'wo̧ ösöwanö kwö̧jena, kwitji̧ma otiwanö omukwatö ö̧jobetjö̧.

¹⁸ Ja̧danö, ju'wibi yötawa: Jojodö bakwena ju̧kwadöma Dios yöawi̧ a̧ja̧kwökönö, Dios jobadönö öibobö isakwökönö tjö̧jitjö̧ma jwiinö sulabenö tjö̧jena. Idöda sulabenö tjösödi̧ tjöbeba̧lökönö ja̧bö ju̧kwadö. Jobekwö tjö̧jokobe Dios wei̧ a̧ja̧kwadöma. Jobadöma Dios pjaatawö̧, tjo̧'wo̧ ösöwanö tjö̧jinö.

¹⁹ Ja̧danö, ju'wibi yötawa: La'aka luwo̧ma midö eminökwe, sulabenö omukwato̧nö jwebebö yöawijayonö a̧ja̧kwökakobe. Isabenö, sule jwebebö yöawi̧da öwaekwobe, sulabenö omukwato̧ midö eminökwe a̧ja̧kwoböma.

²⁰ Ja̧danö, ju'wibi yötawa: Waisanö omukwatö̧kö̧nöma Dios pjaatoböma jobe, 'diokobe. Jo̧kwaijayonö Dios pjaatoböma jwiyobe jelo̧nö, juluwanö omukwatökönö yöba̧lo̧nö. Jo̧banö, juluwanö omukwatökönö yöba̧lo̧nö Dios pjaatoböma jwiinö 'diobe. Isabenö, 'diobe juluwanö omukwatökönö yöba̧lo̧nö pjaati̧ma, waisanö omukwatö̧kö̧nö pjaatitjö̧ bajalekwönönö 'diobe.

²¹ Ja̧danö, ju'wibi yötawa, wanedö: Bakwo̧ tjuluwo̧ma tjȩmunö midö eminobe, iteda ömöayo̧ ö̧jobö. Ja̧danö, midö eminökwema tjȩmutjö̧ ja̧tebö okobe jwiinö uluwo̧nö aeba̧li̧ma uluwo̧ma ba̧kwȩlö̧jatebö iyinobe. Jobekwö ba̧kwȩlö̧jatebö aeba̧li̧ iyobetjö̧ ju'winö pöe ö̧jenama o̧'wo sulinö edö okobe jwiinö uluwo̧ iteama önaukwakwo̧.

²² Ja̧danö, ju'wibi yötawa: Bakwo̧ juluwanö dameakwö jo̧ma ju'wedökwö wene tjuna̧lobö isakwo̧. Ja̧danö, jo̧ba dameakwabo̧ma ju'wi jawabi ju'wi jawa sulabenö ja̧bö jo̧, ba̧kwȩlö̧jatebö.

²³ Ja̧danö, ju'wibi yötawa: Bakwo̧ ju'wedönötjö bajalekwönönö otiwanö jo̧sa, jö̧ba̧lö omukwato̧ma ju'wi mölȩ tabakwöda ö̧jakwo̧. Ja̧danö, jelo̧ma ju'wedönötjö baikwönönö jo̧sa, jö̧ba̧lö, ju'wi mölȩ tabakwökönö ö̧jakwo̧. Ja̧danö, jo̧ba baikwönönö jo̧sa jö̧ba̧lö omukwato̧nö edö jojodöma otiwanö tjöwaisachibakwo̧kwo̧, otiwanö omukwato̧, jö̧ba̧lö.

²⁴ Ja̧danö, ju'wibi yötawa: Naukwabidökwö pjabacha̧lo̧ma itedada nöinö wene jwöekwakwo̧, naukwabidökwö kweachobetjö̧. Ju'wi mölȩ lȩekwa yöbawo̧ öba a'o ja̧nö, tjö̧naukwina edina yöawobö aebakwo̧ jo̧banöma. Ja̧danö, jobe ja̧nö Diosnö yöbawö ujunobö jo̧be, jweinöda yötawocha, jö̧ba̧lö. Jo̧kwaobetjö̧ jobe ja̧nö, jo̧ba naukwabidökwö pjabacha̧lo̧ma 'wiinö yöa̧lokobe, naukwabidönö lȩekwa yöbawo̧ma lȩebapji jö̧ba̧lö. Jweinö yötawocha, jö̧ba̧lö Diosnö yöbawö ujunaja̧jayonö yöawokobetjö̧ Diosma jo̧ba naukwabidökwö pjabacha̧lo̧nöma lȩebakobe. Isabenö yötawa: Naukwabidökwö pjabacha̧lö kwekwachoko.

²⁵ Ja̧danö, ju'wibi yötawa: Jojodö ökwönö tjo̧mukwati̧ma kwomukwatoko, ayö dakwö tjo̧mukwatobejö̧ ötjönöma, jö̧ba̧lö. Jobekwö kwomukwataja̧ma ökwödada 'daliwanö tjö̧li̧bidanö kwö̧libobö wanekwachobe. Jobekwö omukwatökönö, Isabenö Jo̧nöda kwo̧'wo̧ wa̧na̧lö kwö̧jitjö̧ma yebabökönö otiwanö kwö̧jakwo̧ja.

²⁶ Ja̧danö, ju'wibi yötawa: Ba̧jȩkwadö jojodöma la'aka luwo̧nö abeba̧ladö, pjabatitjö, jö̧ba̧lö. Jo̧kwaijayonö, bö̧jȩnö la'aka luwo̧maö̧kö̧, Isabenö Jo̧da jweinö omukwatö webo̧, inesö pjabato̧ma.

²⁷ Ja̧danö, ju'wibi yötawa: Dios wei̧ a̧ja̧kwö ju̧kwadöma jwiinö tjöpöjödobe sulabenö omukwatö ja̧badönöma. Ja̧danö, sulabenö omukwatö ja̧badöma ja̧danö jwiinö tjöpöjödobe otiwanö omukwatö ja̧badönöma.