Proverbios 28 - Dios Iwene

Ju'wi Salomón jwebebö yöawakwawa jawanö wanekwachi̧ jawa

¹ Bemi tupakwö laebakwa̧ma inesö la'aka luwo̧ Ezequías ömöayedöma ju'wi Salomón iwȩyudina eda̧lö tjiwȩyudina, Salomón woinobe okobe lekwinemi. Ja̧ tjiwȩyudinama baikwö laebobe, Salomón yöawina: Isabenö yötawa: Sulabenö ja̧bö ju̧kwadöma yebabinö döbibajadö, ökwödönö do̧batö tjicha, jö̧ba̧lö. Jobadönö do̧tjatobö ichadö deijayonö, tjicha döbibajo, jö̧ba̧lö yebabinö döbibajadö. Jobekwö yetjabokobe Dios wei̧ a̧ja̧kwadöma. Yebaböködö. Didiba möayo̧ juluwo̧ didibadanö yebaböködö.

² Ja̧danö, ju'wibi yötawa: Bakwena ju̧kwadöma sulabenö omukwatadö ba̧jȩkwadö tjö̧jitjö̧ma tjuluwo̧ inesö la'aka luwo̧nö katjatibotö jö̧ba̧lö ölakwabikwawö tjö̧jena. Jobekwö baledena ba̧kwȩlö̧jatebö jelo̧bi jelo̧bi tjuluwo̧ baibanö öwamatobe. Jobekwö baledokobe jobe inesö la'aka luwo̧ma, jweinö omukwato̧ma yöbawö weena. Jweinö omukwato̧ma yöbawö weitjö̧ma jobe ju̧kwadöma wene jwiinö, ölakwabikwawökönö tjö̧jakwedö. Jobe tjiteboma lekwe mölȩ otiwanö, ölakwabikwawökönö ja̧kwemi.

³ Ja̧danö, ju'wibi yötawa: Bakwo̧ balada jwibo̧ma ju'wedö balada jwibadönö usula tjȩmawobö ja̧itjö̧ma jwiinö sulena. Wanedö yötawa: Ojwiyoma lekwe labinö o̧bitjö̧ma batjonö tju̧junina söbebö loena ¿jö̧tö̧? Sulobe yelösöda jobekwö baledena. Isabenö yötawa: Ja̧ suli̧danö sulobe balada jwibo̧ma ju'wedö jwibadönö usula tjȩmawobö ja̧i̧ma.

⁴ Ja̧danö, ju'wibi yötawa: Dios wei̧ a̧ja̧kwöködöma sulabenö omukwatadönö ösödö yöba̧ladö, otiwanö omukwatadö, jö̧ba̧lö. Jobekwö tjo̧mukwatokobe Dios wei̧ a̧ja̧kwadöma. Dios wei̧ a̧ja̧kwadöma sulabenö omukwatadönö jwiinö tjöpöjödobe, ja̧danö jobadökwö ba̧kwȩlö̧jatebö wene tju̧juna̧lakwawobe.

⁵ Ja̧danö, ju'wibi yötawa: Sulabenö omukwatadöma jojodökwö otiwanö tjö̧joböma wajwibadö, jweinöda yöba̧lö. Jo̧kwaijayonö Dios wei̧ tja̧ja̧kwobö ösödadöma jojodökwö otiwanö tjö̧joböma jwiinö waisadö. Otiwanö, jweinöda yöba̧lö ju̧kwadö.

⁶ Ja̧danö, ju'wibi yötawa, du̧ju̧tajanö wanedö: Bakwo̧ma ö̧jobe otiwanö omukwatö ö̧jobö isakwo̧. Jo̧bama nöinö balada, itea jwibo̧ijayonö o̧'wo̧ ösöwanö jo̧, otiwanö ja̧bö ö̧jobö isakwobetjö̧. Ja̧danö, jelo̧ma ö̧jobe balada nöinö juna̧lo̧ma. Jo̧bama sulabenö omukwatö omöna yöba̧lö jo̧. Ja̧danö, ¿dite otiwanö ö̧jobeda? Isabenö yötawa: Balada, itea jwibo̧ma balada juna̧lo̧, sulabenö omukwato̧ ö̧ji̧tjö̧ bajalekwönönö otiwanö ö̧jobe, balada itea jwiijayonö.

⁷ Ja̧danö, ju'wibi yötawa, du̧ju̧taja möayedönö wanedöma: Bakwo̧ möayo̧, Dios wei̧ a̧ja̧kwo̧ma jweinö omukwatö jo̧. Ja̧danö, jelo̧ möayo̧ma jweinö omukwatöködökwö pjabacha̧lö kwebacho̧. Jo̧bama jweinö omukwatöködökwö pjabacha̧lö kweachobetjö̧ abe'donö ojo'donö taba lö̧jinö tjö̧jobö ja̧bo̧.

⁸ Ju'wibi yötawa, wanedö: Bakwo̧ balada balewo̧ma, öbalewajawö̧nöma bajalekwönönö tjebatö tji̧midobö aebobe. Jobekwö aebobetjö̧ nöinö balada emobe, balada luwo̧ baibanö. Isabenö yötawa: Ju'winö jo̧ba u̧kwa baladama jelo̧ ujuna̧lakobe, balada jwibadönö lȩ lö̧jinö edö pjabato̧da.

⁹ Ja̧danö, ju'wibi yötawa: Bakwo̧ Dios wei̧ a̧ja̧kwökötjö̧ma Diosnö aeba̧li̧bi jwiinö öpöjödobe Diosma, omewi̧ jö̧ba̧lö.

¹⁰ Ja̧danö, ju'wibi yötawa, wanedö: Sulabenö omukwatadöma otiwanö omukwatadönö sulabenö ötjibobe jelobekwö omukwatö sulabenö ja̧tjobö. Isabenö yötawa: Jobekwö sulabenö öbibadöma idönöda wene jwötjebakwedö. Jobadöma 'daliwa tjö̧naja̧nöda tjö̧li̧bakwedö, idönöda sulabenö badekwachawö̧ jö̧ba̧lö. Jobekwö badekwachokobe jweinö yöba̧lö otiwanö omukwatadönöma. Jobadö otiwanö omukwatadönöma otiwanö badekwachawö̧.

¹¹ Ja̧danö, ju'wibi yötawa: Balada luwo̧ma itedada, ötjöma jweinö omukwato̧sa, jö̧ba̧lö, omukwatobe. Jobekwö omukwatijayonö jelo̧, balada jwibo̧ma, di̧ya sulojobö jö̧ba̧lö, di̧ya otiwojobö jö̧ba̧lö waiso̧ma balada luwo̧nö öwaisachibökwe. Balada jwibo̧ma balada luwo̧nö edö omajade okwanö öwaisachibökwe, jweinö omukwatoböma wajwibo̧, jö̧ba̧lö.

¹² Ja̧danö, ju'wibi yötawa: Dios wei̧ a̧ja̧kwö ju̧kwadöma tjuluwedö baibanö tjö̧jenama tjitebonö ju̧kwadöma okobe deinö tjo̧'wo̧ ösöwanö tjö̧jobe, otiwa, jö̧ba̧lö. Duluwedöma Dios wei̧ a̧ja̧kwadö, jö̧ba̧lö, tjösödobe. Jobekwö tjösödokobe sulabenö omukwatadö tjuluwedö baibanö tjö̧jenama. Jobadö sulabenö omukwatadö tjuluwedö baibanö tjöjena tjitebonö ju̧kwadöma yebabinö tjuju̧kwawobö isakwadö, sulabenö omukwatadö jobe tjitebonö wetjobetjö̧.

¹³ Ja̧danö, ju'wibi yötawa: Ökwödö jojodöma, sulabenö ja̧daja̧ma Diosnö yöbawö lodobö jo̧be. Bakwo̧, suli̧ ja̧aja̧ yöbawö loökötjö̧ma bö̧jȩnö ja̧nö otidawama sulabenö baledakwo̧. Jobekwö baledokobe suli̧ ja̧aja̧ yöbawö lobo̧nöma. Jo̧ba̧nö Diosma lȩ lö̧jinö edö pjaatakwo̧, sulabenö ja̧aja̧ yöbawö lobö, kabatibö öbalewachobetjö̧.

¹⁴ Ja̧danö, ju'wibi yötawa: Isabenö Jo̧nö ba̧kwȩlöjatebö yebabinö omukwato̧ma o̧'wo̧ ösöwanö jo̧. Jobekwö ö̧jokobe bakwo̧, omajade 'dibo̧ma. Jo̧ba omajade 'dibo̧nöma suli̧ jawada baledakobe.

¹⁵ Ja̧danö, ju'wibi yötawa: Inesö la̧'aka luwo̧ o̧'wo̧ sulinö edo̧ma usulasedönö jwiinö labo̧, jobadönö usula tjȩmawinö webo̧. Wanedö yötawa: Jo̧ba inesö la'aka luwo̧ o̧'wo̧ sulinö edo̧ma didiba tulubö labo̧danö labo̧. Ja̧danö, nöbo̧ waya jojodönö wo̧atotö jö̧ba̧lö juluwanö ö'öbakwawö icho̧danö labo̧, inesö la'aka luwo̧ usulasedönö o̧'wo̧ sulinö edo̧ma. Yelösöda, jobadönö usula tjȩmawobö labo̧.

¹⁶ Ja̧danö, ju'wibi yötawa: Inesö la'aka luwo̧, di̧ya sulojobö jö̧ba̧lö, di̧ya otiwojobö jö̧ba̧lö wajwibo̧ma sulabenö omukwatö webo̧. Jo̧bama itebonö ju̧kwadönö lȩ lö̧jökönö edö webo̧ tju̧kwa jawatjö, tjiteatjöbi ichejebö tjiyobö. Jobekwö weokobe inesö la'aka luwo̧ otiwanö omukwato̧ma. Jo̧ba otiwanö omukwato̧ma jobe ju̧kwadötjö, tju̧kwa jawatjö, tjiteatjö emawama jwiinö öpöjödo̧, sula, chemokobe jö̧ba̧lö. Jobekwö öpöjödö otiwanö omukwatobetjö̧ jo̧ba inesö la'aka luwo̧ma lekwe yöbawö webö ö̧jakwo̧.

¹⁷ Ja̧danö, ju'wibi yötawa: Bakwo̧ jelo̧nö kwabö lobinama otiwanö jö̧kö̧, ba̧kwȩlö̧jatebö o̧'wo̧ tjo̧bekwöda jo̧, jelo̧ jojonö kwabö loinobetjö̧. Isabenö, jo̧bama döbiabinöda döbiabo̧ okobe jwiinö ö̧ji̧ma, debö i̧'yenanö baibanö. Jo̧banö jelobe döibajoböma pjakatokonö.

¹⁸ Ja̧danö, ju'wibi yötawa: Otiwanö omukwatö, jweinö yöba̧lö jo̧nöma labi̧ baledi̧tjö ö̧jibinö pjatjatökwe. Jobekwö baledokobe sulabenö omukwatö jo̧nö. Sulabenö omukwatö jo̧nöma ö̧jibi̧ jwibo̧, juluwanö söbebö lotjakwo̧.

¹⁹ Ja̧danö, ju'wibi yötawa: Batjo otiwanö otido̧ma ukwakwa̧ma juna̧lo̧, a̧wi̧chi̧ lö̧könö. Jobekwö ujuna̧lökakwo̧ jelo̧, ju'wi jawabi, ju'wi jawa omukwatö o̧'wo̧ tjö̧dekwö jo̧ma. Jo̧bama ujuna̧lobö otidokobetjö̧ kwakwawabi, baladabi jwibo̧da ö̧jakwo̧.

²⁰ Ja̧danö, ju'wibi yötawa: Ba̧kwȩlö̧jatebö yöbawö ujuninadanö badekwachinö i̧sebo̧nö Diosma pjaatakwo̧. Jo̧kwaijayonö Diosma pjaatokobe balada juluwanö emotö jö̧ba̧lö isakwo̧nöma. Diosma balada juluwanö emotö jö̧ba̧lö isakwo̧nöma isabenö lȩebakwo̧.

²¹ Ja̧danö, ju'wibi yötawa: Lȩekwa yöbawo̧ma du̧ju̧taja wene juna̧lakwawadö yötjawi̧ a̧ja̧kwö, bakwemiinö edobö jo̧be. Jelo̧nö ösödö, jelo̧nö öpöjödö edobö jwiyobe. Bakwemiinö edö lȩebakwa̧ma jweinö yöawobö jo̧be. Jobekwö jweinöda yöawobö ji̧jayonö, lȩekwa yöbawadötjö ju'wedöma sulabenö omukwatadö. Jobadöma ju'wedö mikwanö tji̧yitjö emadö omöna yötjawobö, ja'yube mikwanö tjiyitjö̧bi.

²² Ja̧danö, ju'wibi yötawa: Balada nöinö emotö jö̧ba̧lö isakwo̧ma juluwanö emobö isakwo̧. Jo̧bama wajwiobe jo̧banö ju'winö baledakwa̧, iteda balada jwibo̧ baibanö badekwachakwa̧ma.

²³ Ja̧danö, ju'wibi yötawa wanedö, du̧ju̧tajanö wanedöma. Bakwo̧, ömöledöso̧nö pjabatö jwebebö yöawobe, o̧'wo̧nö nii̧ jawa. Ja̧danö, jelo̧ma ömöledöso̧nö wamenö ösödöda yöawobe jwebebökönö, jwebebö yötawitjö̧ma o̧'wo̧ tjo̧achapji jö̧ba̧lö. Ja̧danö, kwomukwatobö abebö cha̧ja̧kwakwö: Ömöledöso̧nö mikwawinö yöbawö pjabatinama ¿ditedaja̧? O̧'wo̧nö nii̧ jawa jwebebö yöbawinakö̧, ja̧danö ösödö jwebebökönö yöbawinakö̧ ¿ditedaja̧? Ja̧danö, yötjawökwema ¿dite yöawina ösödakwa̧da? Isabenö yötawa: O̧'wo̧ nii̧ jawa jwebebö yöbawo̧nöda ösödakobe, otiwanö pjabatö jweebinobetjö̧. Jelo̧ yöbawo̧ma ösödöda yöawijayonö yöawina pjaatinokobe, sule ösödö yöbawöda yöawinobe.

²⁴ Ja̧danö, ju'wibi yötawa: Bakwo̧ itji̧ma iteda abe'do ojo'do tjitea önaukwaja̧ ikena omukwatena ¿dakwö sulobö? Sulökö, jö̧ba̧lö. Isabenö, jobekwö omukwato̧ma sulabenö omukwato̧. Jo̧bama okobe deinö naukwabidödanö sulabenö naukwabo̧.

²⁵ Ja̧danö, ju'wibi yötawa: Ju'wi jawabi, ju'wi jawa emotö jö̧ba̧lö ba̧kwȩlö̧jatebö omukwatö isakwo̧ma ju'wedökwö wene tju̧juna̧lakwawobö jwöbebo̧. Jobekwö ö̧jokobe Isabenö Jo̧nö o̧'wo̧ wa̧na̧lö ö̧jobö isakwo̧ma. Isabenö Jo̧nö o̧'wo̧ wa̧na̧lö ö̧jobö isakwo̧ma ju'wi jawabi ju'wi jawa ujuna̧lakwo̧.

²⁶ Ju'wibi yötawa: Bakwo̧ma itedada omukwati̧ma ba̧kwȩlö̧jatebö ösöditjö̧ma, otiwa, jweinöda omukwato̧sa jö̧ba̧lö, jweinö omukwatokobe. Ja̧danö, ju'wibi yötawa: Jweinö omukwatö jo̧ma labi̧ jawa baledi̧tjö ö̧jibakwo̧.

²⁷ Ja̧danö, ju'wi jawabi yötawa: Jwibadönö iyö pjabato̧ma ba̧kwȩlö̧jatebö ujuna̧lakwo̧, okobe jwiinö u̧kwa̧, iteama. Jobekwö baledökakobe jwibadönö edökönö öpöjödö pjabatö̧kö̧nöma. Ba̧jȩkwadö jojodöma jo̧banö sulabenö baledobö wetjachakwedö.

²⁸ Ja̧danö, ju'wibi yötawa: Sulabenö omukwatadö tjuluwedö baibanö tjöjena tjitebonö ju̧kwadöma yebabinö tjuju̧kwawobö isakwadö, sulabenö omukwatadö jobe tjitebonö wetjobetjö̧. Jo̧kwaijayonö jobadö sulabenö omukwatadö tjuluwedö yöbawö wetji̧ 'dö̧jibajena otiwanö omukwatadö yöbawö webö tjö̧jakwedö.