Proverbios 26 - Dios Iwene

Ju'wi Salomón jwebebö yöawakwawa jawanö wanekwachi̧ jawa

¹ Bemi tupakwö laebakwa̧ma ju'wi Salomón jwebebö yöawakwawa jawanö wanekwachi̧ jawama. Ja̧danö, Salomón woinobe okobe lekwinemi inesö la'aka luwo̧, Ezequías mikwo̧ma weinobe ömöayedönö Salomón iwȩyudinatjö̧ eda̧lö tjiwȩyudobö. Ja̧ tjiwȩyudinama baikwö laebobe: Isabenö, imiamenöma ba̧kwȩlö̧jatebö ojwiyo o̧boböma jwiyobe ¿jö̧tö̧? Ja̧danö, o̧banöma so̧biyapu öibajoböma jwiyobe, ¿jö̧tö̧? Ja̧ jwiyi̧danö, jweinö omukwatö̧kö̧nö edö, otiwanö jo̧, jö̧ba̧lö yöda̧loböma jwiobe, jweinö omukwatokobetjö̧.

² Ja̧danö, ju'wibi yötawa: Ökwönö suli̧ jawa wetjachijayonö sulabenö ja̧köbökötjö̧ma ja̧ suli̧ wetjachaja̧ma baledökena. Wanedö yötawa: Pjiyuwa köba̧löda köba̧lo̧ nijakwö jwibacha̧löködanö ökwönö suli̧ jawa wetjachijayonö ökwönö jwibacha̧löködanö baledökena, sulabenö ja̧köbokobetjö̧.

³ Ja̧danö, ju'wibi yötawa: Bakwo̧ iteda ajwi kabayunö wa̧nö 'yo̧ma jo̧ba kabayunö kwakwaba̧lö i̧'yo̧be jweinö i̧'yobö ösödobekwö. Ja̧danö, ajwi bulunö jweeba̧li̧ 'duatobe, jweinö i̧'yobö jweeba̧li̧ma. Ja̧ ji̧danö, jweinö omukwatö̧kö̧nö kwatjaba̧lobö jo̧be otiwanö omukwatö ja̧obö.

^4-5 Ju'wibi yötawa: Jweinö omukwatö̧kö̧ma ökwönö jelobekwö, omukwatökönö abebö a̧ja̧kwitjö̧ma jo̧banö ¿kwatadakwa̧kö̧? ¿kwatadökakwa̧kö̧? ¿Di̧yajö? Dötölataja jawa jo̧be, baikwö: Jweinö omukwatö̧kö̧ma ökwönö jelobekwö omukwatökönö abebö a̧ja̧kwitjö̧ma kwatadokonö, ökwöbi jo̧badanö kwichejekwapji jö̧ba̧lö, jweinö omukwatö̧kö̧danö. Ja̧danö, ju'wibi yötawa: Ju'wikwenama jo̧ba omukwatö̧kö̧nö kwatadena. Jo̧ba jweinö omukwatö̧kö̧nö kwataditjö̧ma jweinö kwatadonö öwaisachibobö, ayö jweinö omukwatö̧kö̧sa, jö̧ba̧lö.

⁶ Ja̧danö, ju'wibi yötawa: Bakwo̧ma iteda yöawi̧ jweinö omukwatö̧kö̧nö ju'wedönö yöbawö i'yobö weitjö̧ma sulena, omukwatö̧kö̧ma jweinö yöawökapji jö̧ba̧lö. Jao, jobekwö wei̧ma sulobe. Wanedö yötawa: Jobekwö wei̧ma, webo̧ iteda ömasapa bulatakwawö loi̧ suli̧danö, ja̧danö niekwasobu owi̧ suli̧danö sulobe, omukwatö̧kö̧nö bakwo̧ yöawi̧ yöawobö wei̧ma.

⁷ Ja̧danö, ju'wibi yötawa: Jweinö omukwatö̧kö̧ma jwebebö yöawakwawa jawanö wanekwachi̧ jawa yöawoböma waiyobe. Wanedö yötawa: I̧bȩjwi̧ya waabo̧ kweachobö waiyi̧danö waiyobe, jweinö omukwatö̧kö̧ma jwebebö yöawakwawa jawanö wanekwachi̧ jawa yöawoböma.

⁸ Ja̧danö, ju'wibi yötawa, wanedö: Bakwo̧ inawa isadonö anebobe, 'döobö. Ja̧danö, isado 'diinö di̧atitjö̧ma inawa 'döoböma waiyena ¿jö̧tö̧? Jao, jobekwö 'diinö di̧tjatoböma jwiyobe. Ja̧ ji̧danö, sulabenö omukwato̧nö edö, otiwanö omukwato̧, jö̧ba̧lö, yötja̧loböma jwiobe.

⁹ Ja̧danö, ju'wibi yötawa: 'Dukwachökwema omukwatökönö ba̧ja̧ ö'i̧ya̧ emibö wökwo̧ jojodönö kwakwaobö. Jobekwö kwakwaobö öwökwijayonö waekwobe, jojodöma kwabawajöködö. Ja̧ ji̧danö, jweinö omukwatö̧kö̧ma jwebebö yöawakwawa jawanö wanekwachi̧ jawa jojodönö yöawobö ösödijayonö waekwobe, jelobekwö yöawobetjö̧, jojodönö pjabatököknö.

¹⁰ Ja̧danö, ju'wibi yöawobe: Bakwo̧ luwo̧ma jweinö omukwatö̧kö̧nöma otidobö ujunitjö̧ma itedada jweinö omukwatokobe. Wanedö yötawa: Bakwo̧, mana pjeanö ja̧nö kwebachadönö 'böbawo̧ ö̧jobe. Isabenö jo̧bama jweinö omukwatö̧kö̧. Ja̧danö, jo̧ba omukwatö̧kö̧danö jweinö omukwatokobe luwo̧ma jweinö omukwatö̧kö̧nö otidobö ujunitjö̧ma.

¹¹ Ja̧danö, ju'wibi yötawa: Awilima etekwawaja̧ ikena yemidanö etekwawaja̧ma tjebatö kwo̧. Ja̧ ji̧danö jweinö omukwatö̧kö̧ma omukwatökönö ja̧aja̧ma yemidanöbi ja̧akwo̧.

¹² Ja̧danö, ju'wibi yötawa: Isabenö, jweinö omukwatö̧kö̧nö pjatjatoböma jo̧be, omukwati̧ öbalewachibanö. Jobekwö pjaatobö jwiyobe jelo̧nö, ötjöma waiso̧sa jö̧ba̧lö omukwato̧nöma. Jao, ötjöma waiso̧sa jö̧ba̧lö omukwato̧nö pjatjatoböma jwiyobe, ja̧danö, omukwati̧ma la'akatjöda öbalewachökakwo̧. Ja̧danö, jobadötjö dujutajama, jweinö omukwatö̧kö̧nöda pjatjatobö jo̧be, omukwati̧ öbalewachibanö.

¹³ Ja̧danö, juwibi yötawa 'du̧wekwo̧nö wanedö: 'Du̧wekwo̧ma otidö 'yö̧kö̧, ejunöda jo̧. U'du̧wekwobetjö̧ omöna yöba̧lo̧, didiba apetunö ichiba̧lobe ötjönö ukwobö, yetabi, latebökö, jö̧ba̧lö.

¹⁴ Ja̧danö, ju'wibi yötawa: 'Du̧wekwo̧ma kamapjonö ba̧nö peleböda bo̧, a̧la̧ibökönö. Ja̧danö, wanedö yötawa: Apjudema apetubekwöbi po̧biba̧lö, okwakwöbi tumacha̧lö jo̧be. Ja̧danö, jobekwö ji̧danö 'du̧wekwo̧ma kamapjonö ba̧nö peleböda bo̧.

¹⁵ Ja̧danö, ju'wibi yötawa: 'Du̧wekwo̧ma jwiinö u'du̧wekwobetjö̧ ukwakwa̧ kwakwawa dȩja̧pa̧tjö emö kaebobö ji̧jayonö waiyobe. Ömamuma dȩja̧pa̧nöda 'daweba̧lö bo̧, jwiinö u'du̧wekwobetjö̧.

¹⁶ Ja̧danö, ju'wibi yötawa: 'Du̧kwekwo̧ma itedada omukwatobe, ötjöma jweinö omukwato̧sa, jö̧ba̧lö. Isabenö, ötjöma waisanö omukwatö atadadötjö bajalekwönönö jweinö waiso̧sa, jö̧ba̧lö, omukwatobe.

¹⁷ Ja̧danö, ju'wibi yötawa: Bakwo̧ ju'wedö wene juna̧la̧dö jwötjeba̧lakwawena, iteda jawamaököjayonö jwöbeba̧lö teachitjö̧ma jweinö omukwatokobe. Jo̧ba jawamaököobetjö̧ ¿dakwö jwöbeba̧lö teachoböda? Jwiyobe, teachoböma. Wanedö yötawa: Jo̧ba wene juna̧ladö jwötjeba̧lemi tebacho̧ma yelösöda jweinö omukwatokobe. Bakwo̧ awilinö, mananö baledibo̧nö ölakiyunö bö'ödo̧ jweinö omukwatöködanö jweinö omukwatokobe.

^18-19 Ju'wibi yötawa, wanedö: Na̧yu̧nu̧ sȩanu̧, ubanu̧ jojodönö 'böbö loobö 'böbo̧ma o̧'wo̧ jwibo̧, yelösöda sulabenö omukwato̧. Ja̧ sulabenö omukwati̧ ji̧danö sulabenö omukwatobe baikwö obo̧ma: Bakwo̧ ömöledöso̧nö omöna jelobe omukwatobö yöa̧lijayonö yöa̧laja̧ ikena, omönada yöta̧la, jö̧ba̧lö obo̧. Isabenö, jo̧ba obo̧ma bakwemiinö, na̧yu̧nu̧ 'böbö loobö 'böbo̧ sulabenö omukwati̧danö sulabenö omukwato̧.

²⁰ Ja̧danö, ju'wibi yötawa: Ökwölama imi ubö 'dö̧ibajenama tiibi̧ ¿jö̧tö̧? Ja̧ ji̧danö jojodö tja̧ja̧kwokonö sewoba̧lö yöba̧lo̧ deitjö̧ma ökwöla imi ubö tiibi̧danö jojodö wene tju̧juna̧li̧ma tiibakobe.

²¹ Jao, ö̧kwö̧'i̧ya̧bi, imibi ökwölanö ubö bi̧danö, sulabenö omukwatö jwöbeba̧lo̧ma jojodö ölakwabikwawö jwötjeba̧lobö jwöbebo̧.

²² Ja̧danö, ju'wibi yötawa: Jojodöma bakwo̧ tja̧ja̧kwokonö sewoba̧lö yöawima a̧ja̧kwö jwiinö ösödadö. Isabenö, söi̧ kwakwawa tjukwi̧danö ösödadö. Jao, söi̧ kwakwawa tjö̧ka̧ti̧danö tjö̧katobe tja̧ja̧kwokonö sewoba̧lö yöawi̧ma.

Ju'wi Salomón jwebebö yöawakwawa jawanö wanekwachi̧ jawama, sulabenö omukwatadö tjö̧jina jawa

²³ Ju'wibi yötawa: Jojodötjö ju'wedöma otiwanö yötja̧lijayonö tjo̧majadenö sulabenö ja̧tjakwa̧da omukwatadö. Wanedö yötawa: Jobadöma pa̧la̧ka̧'do wamenö salöi̧danö sa̧lö̧awö̧. Jo̧kwaijayonö yȩa'dodanö tjo̧majade okwama ja̧wö̧.

²⁴ Ja̧danö, ju'wibi yötawa, wanedö: Bakwo̧ jelo̧nö jwiinö öpöjödijayonö öwawinö i̧sebökönö, wamenö, omöna ösödö yöba̧lo̧ jo̧banöma. Isabenö, o̧'wo̧ sulinö edö omöna yöba̧lo̧ öpöjödökwenö, jo̧banö sulabenö ja̧akwa̧ o̧'wo̧nö omukwatö junö.

²⁵ Isabenö yötawa: Jobekwö omukwato̧ ökwönö ösödö yöa̧litjö̧ma kwösödoko, omajade okwanö sulabenö omukwatö jo̧obetjö̧. Ja̧danö, omajade okwa jwiinö suli̧ jawa, Isabenö Jo̧ jwiinö öpöjödi̧ jawa a̧jobe nöinö.

²⁶ Jo̧bama jojodö tjedonö jwiinö öpöjödökwenö ösödö yöba̧lo̧, jojodöma edö tjo̧mukwatobö, öpöjödökökwe, jö̧ba̧lö. Jobekwö omajade okwa sulabenö omukwati̧ i̧sebököjayonö jojodöma jo̧banö tjöwaisachibakwedö. Ko̧ko̧kwö yötja̧lakwawena jo̧ba sulabenö ja̧ina yöba̧lakwawadö.

²⁷ Ja̧danö, ju'wibi yötawa, wanedö: Bakwo̧ laju soobe, öpöjödökwe meobö. Jobekwö meobö omukwatijayonö itedada mebo̧ soajaju okwa. Ju'wibi yötawa: Bakwo̧ öpöjödökwenö kwabö looböma inawa nöawa mö'ösa'o bajaletjö jibö döbebo̧, labinö böleinö. Jobekwö öpöjödökwenö kwabö loobö omukwatijayonö jawanöma itedada 'dabo̧.

²⁸ Ja̧danö, ju'wibi yötawa: Omöna yöba̧lo̧ma jwiinö öpöjödobe omöna yöa̧lawö̧nöma. Ju'wibi yötawa: Bakwo̧ ösödö yöa̧lonö omajadenö sulabenö omukwato̧ma yöa̧lawö̧nöma wene jwöebakwo̧.