Proverbios 23 - Dios Iwene

Salomón treintanö jweinö omukwatadö yötjawina jawatjö wȩyudö yöawina jawa

¹ Salomón jweinö omukwatadö yötjawina jawa wȩyudö yöawinama ina baikwö laebobe: Inesö la'aka luwo̧ma ökwönö jo̧bakwö ba̧nö kwukwobö a̧debitjö̧ma, jo̧bakwö kwanö kwö̧bena ö'wöyawakwawönö kwö̧jobö jo̧be, bitema inesö la'aka luwo̧ jö̧ba̧lö, ja̧danö otiwanö chö̧jobö jo̧be jö̧ba̧lö.

-6-

² Ja̧danö, jobema kwakwawa nöinö jobetjö̧ nöinö kwukwobö kwösödijayonö jwebebö yötawakwö: Nöinöma kwukwoko, ja'yubeda kukwo.

³ Söa, nöinö chukwowe, jö̧ba̧lö, kwomukwatoko, la'aka luwo̧ma ökwönö edo̧obetjö̧, otiwanö kwomukwatojobö, sulabenö kwomukwatojobö, jö̧ba̧lö.

-7-

⁴ Jemi ikena jweinö omukwatadö yötjawinama baikwö laebobe: Isabenö yötawakwö: Balada nöinö kwemobö kwösödobetjö̧ nöinö, ö'wachökönö kwotidena ¿jö̧tö̧? Jwebebö yötawakwö: Jobekwö balada nöinö kwujuna̧lobö ö'wachökönö kwotidoko kwime'dawachibapji jö̧ba̧lö. Jweinö kwomukwato, ö'wachökönö kwotidoböma kakatibo.

⁵ Isabenö yötawa: Ja̧ baladama juluwanö 'dö̧ibaji̧ jawa. Wanedö yötawakwö: Kwu̧kwa̧ baladama, pjiyuwa köa̧li̧danö o̧wa̧ja̧pa̧ juluwanö pokwibö jelobekwö köa̧li̧. Jao, juluwanö 'dö̧ibaji jawa. Ja̧danö, kwujuna̧li̧ baladadama juluwanö 'dö̧ibaji̧ jawaobetjö̧ kwemobö ö'wachökönö kwotidoko.

-8-

^6-7 Jemi ikena jweinö omukwatadö yötjawinama baikwö laebobe: Wanedö yötawa: Bakwo̧, ökwönö ejube kwanö kwi̧'yobö a̧debobe. Ja̧danö, ejube 'ya̧nö tebachajo̧ kwö̧bena, kwidi, owi jö̧ba̧lö, ökwönö yöa̧lobe jo̧ba a̧debo̧ma. Jobekwö weijayonö kwedemi, bitema omöna yöa̧lobe, a'dȩlobe ichejekwa, omajade okwanö öpöjödobe ichejekwa, jö̧ba̧lö kwomukwatobe. Jao, kwedemi, ju'wida omukwato̧, bi̧ya kwakwawama nöinö mikwawobe, jö̧ba̧lö, dakwö chiyoböjö, jö̧ba̧lö. Jo̧kwaobetjö̧ baikwö jwebebö yötawakwö: Jobekwö baleditjö̧ma jo̧ba u̧kwa kwakwawa nöinöma kwukwoko. Ja̧danö kwakwawama, söa nöinö chukwowe, jö̧ba̧löma kwomukwatoko. Jo̧bama isabenö ökwönö iyoböma öpöjödobetjö̧ u̧kwa kwakwawama kwukwoko nöinöma.

⁸ Ja̧danö, ajayinöma jo̧ba a̧'dȩlo̧ ejube ichibö otiwanö yöka̧lajabe, otiwanö ösödö kwa̧debajabe ötjönöma, jö̧ba̧lö. Jemi ikenama, ajayinö otiwanö yöka̧laja̧ma omöna yöka̧lobe ichejekwa, jo̧bama ökwönö iyobö a̧'delö öpöjödobetjö̧. Ja̧danö, jo̧ba omajade okwa omukwati̧ kwöwaisachibobetjö̧ kwetekwawobö jö̧ka̧lena ite u̧kwa kwakwawama.

-9-

⁹ Jemi ikena jweinö omukwatadö yötjawinama baikwö laebobe: Isabenö kwöwaisobe, jweinö omukwatö̧kö̧ma a̧ja̧kwokobe jweinö omukwatadö yötjawi̧ma. Jo̧kwaobetjö̧ jo̧banö jweinö yökawoböma mikwawökakobe öpöjödobetjö̧. Yökawokonö.

-10-

¹⁰ Jemi ikena jweinö omukwatadö yötjawinama baikwö laebobe: Ökwö kwömöledö tjitea niji tjötjebinemi i̧sekwi̧ jawama kwopjolatoko, ajayinö ji̧nadö tju̧juninemima. Jobekwö tjitea niji kwönaukwotö jö̧ba̧lö kwopjolatoko niji tjötjebinemi i̧sekwi̧ jawama. Ja̧danö, ju'wibi jwebebö yötawakwö: Kwemoko tjabe'do tjojo'do debadö tju̧kwa nijima ökwö kwu̧kwa niji baibanö.

¹¹ Juluwo̧ Diosma jobadönö tjöbeba̧lö te'ada̧lo̧. Jo̧kwaobetjö̧ jobadönö sulabenö ja̧köbitjö̧ma Diosma ökwönö yöawobe, sulabenö omukwatö ja̧bo̧, jö̧ba̧lö. Juluwo̧ Diosma, tjöbeba̧lo̧ tjöeba̧li̧danö pjaatobe tjabe'do tjojo'do debadönö tjöbeba̧lö.

-11-

¹² Jemi ikena jweinö omukwatadö yötjawinama baikwö laebobe: Jweinö omukwatadö jwebebö yötjawi̧ma ö'wiyawakwawönö kwa̧ja̧kwo, chöwaisachibobö jo̧be jö̧ba̧lö. Ju'wi jawabi ju'wi jawa waisadötjobetjö jobadö jweinö omukwatadö yötjawi kwa̧ja̧kwobö jo̧be.

-12-

¹³ Jemi ikena jweinö omukwatadö yötjawinama baikwö laebobe: Tjemuma sulabenö omukwatö ja̧tjenama kwomukwatoko, jwebebö kwabö yötawökena. Isabenö, tjöwaisachibobö jwebebö kwabö yökawobö jo̧be. Jwebebö yötawa tjȩmu̧nö juna̧ladönö: Kwi̧tji̧mu̧duwinö jwebebö kwabö yökawaduwitjö̧ma ¿ö'wö batjibakwa̧ji̧, kwaköbaduwitjö? Ö'wö babiböködö.

¹⁴ Isabenö, jobekwö jwebebö kwabö yökawaduwitjö̧ma tjöwaisachibakwedö. Ja̧danö, jwebebö kwabö yökawaduwitjö̧ma kwi̧tji̧mu̧duwi tjö̧jibanö pjakataduwakwedöja, ju'winö ö'wö batjibokobö.

-13-

¹⁵ Jemi ikena jweinö omukwatadö yötjawinama baikwö laebobe, bakwo̧ iteda itji̧nö yöawi̧danö: Chitji̧, ökwöma jweinö omukwatö kwö̧jitjö̧ma cho̧'wo̧ jwiinö ösöwanö chö̧jakwo̧sa.

¹⁶ Isabenö, ökwö jweinö omukwatö yökawi̧ a̧ja̧kwö cho̧'wo̧ jwiinö ösöwachibanö chö̧jakwo̧sa, chitji̧ma jweinö omukwato̧, jö̧ba̧lö.

-14-

¹⁷ Jemi ikena jweinö omukwatadö yötjawina, bakwo̧ iteda itji̧nö yöawinadanö baikwö laebobe: Chitji̧, sulabenö ja̧badöma nöinö tju̧juna̧lena, sulabenö ja̧tji̧tjö tjȩminama ¿jö̧tö̧? Chitji̧, jobadönö edö ö'wöyabinö kwedoko, otiwanö tjö̧jobe, ötjöbi jobekwö chö̧jobö jö̧ta̧la, jö̧ba̧lö. Jobekwö omukwatö kwedoko jobadö sulabenö ja̧badönöma. Isabenö Jo̧nöda yebabinö kwomukwato chitji̧, ba̧kwȩlö̧jatebö.

¹⁸ Jobekwö kwö̧jitjö̧ma isabenö, kwo̧'wo̧ ösöwanö kwö̧jakwo̧ja okobe jwiinö kwö̧ji̧ma, 'yaka̧lemi baibanö. Ja̧danö, Isabenö Jo̧nö yebabinö omukwatö kwö̧jobetjö̧ jo̧ba ju'wi mölȩ pjaatakwa̧, kwite'ada̧li̧ pjaatakwa̧ma isabenö baledakobe.

-15-

¹⁹ Jemi ikena jweinö omukwatadö yötjawinama baikwö laebobe, bakwo̧ iteda itji̧nö yöawinadanö: Chitji̧, ötjö jwebebö yötawi̧ma ö'wöyawakwawönö a̧ja̧kwi̧ jweinö omukwatö kwö̧jobö. Böjȩnö ja̧nö, kwi̧'yakwa̧ma ö'wöyakwawönö kwomukwato otiwanö, jwaikwöda kwi̧'yobö.

²⁰ Ju'wi jawabi jwebebö yötawakwö chitji̧: Owa̧ladökwö pjakacha̧loko. Ja̧danö, yemidanö yemidanöbi nöinö kwakwawa kwadökwöbi pjakacha̧loko.

²¹ Isabenö, jobadödanö ja̧döma, owa̧ladöbi, nöinö kwakwawa kwadöbi aba̧löda tjaba̧lobetjö̧ jwibadöda tjö̧jobe, kamisibi kȩlȩbö'ye 'dölachi̧da 'dubawö. Jo̧kwaobetjö̧ jwebebö yötawakwö: Jobadökwö pjakacha̧loko.

-16-

²² Jemi ikena jweinö omukwatadö yötjawinama baikwö laebobe, bakwo̧ itji̧nö yöawina: Chitji̧ ötjödasa ökwö inesö kwabe'doma. Ötjödasa kwöbötjachibobö iyinama. Jo̧kwaobetjö̧, ötjö yötawi̧ ö'wöyawakwawönö omukwatö a̧ja̧kwi chitji̧. Ja̧danö, wetakwö: Kwojo'donö otiwanö kwite'ada̧lo ida̧ökö pöo jwöjachenama.

²³ Chitji̧, kwö̧jima baikwö kwö̧jo: Omöna yötjawi̧ jawa a̧ja̧kwökönö isabenö ji̧ jawa yötjawi̧ma ösödö kwomajadenö kwanawo. Ja̧danö, jweinö omukwatö ja̧kwawa yötjawi̧ ösödö kwomajadenö kwanawo. Ja̧danö, jwebebö yötjawi̧ ösödö kwomajadönö kwanawo, jobekwöda chö̧jobö jo̧be jö̧ba̧lö. Ja̧danö, di̧ya sulojobö jö̧ba̧lö, di̧ya otiwojobö jö̧ba̧lö waisakwawama ösödö kwomajadenö kwanawo. Jobekwö omukwatö kwö̧jo chitji̧, ja̧ waisakwawa la'akatjöda kakatiboko.

²⁴ Isabenö yötawakwö: Bakwo̧ iteda itji̧ma Dios wei̧ a̧ja̧kwö ö̧jitjö̧ma abe'doma jwiinö o̧'wo ösöwanö jo̧. Jao, itji̧ jweinö omukwatö ö̧jobetjö̧ jwiinö o̧'wo̧ ösöwanö jo̧ abe'doma.

²⁵ Jo̧kwaobetjö̧ chitji̧, otiwanö omukwatö kwö̧jo, ötjö kwabe'do, ja̧danö kwojo'do do̧'wo̧ ösöwanö dö̧jakobetjö̧. Jao, ökwönö eminujuma jwiinö jo̧'wo̧ ösöwanö jö̧jakwuju otiwanö omukwatö kwö̧jobetjö̧.

-17-

²⁶ Jemi ikena jweinö omukwatadö yötjawinama baikwö laebobe, bakwo̧ iteda itji̧nö yöawi̧danö: Chitji̧, ötjö yötawi̧ma ö'wöyawakwawönö omukwatö kwö̧jo. Ja̧danö, ötjö chö̧ji̧ edö kwösödo, ötjöbi chabe'do ö̧ji̧danö chö̧jo, jö̧ba̧lö.

²⁷ Isabenö jwebebö yötawakwö chitji̧, ya̧dönö, ökwökwö tjö̧jobö isakwadönöma. Isuju ömadökwö jelo̧kwöbi jelo̧kwöbi 'da̧'da̧bakwawujuma ökwönö obö ajebena, ötjökwö kwö̧jo, jö̧ba̧lö. Ja̧danö jelujubi, jelo̧ ilekwoma ökwönö obö ajebena, ötjökwö kwö̧jo, jö̧ba̧lö. Chitji̧ jwebebö yötawi̧ma a̧ja̧kwi: Jobadödanöbedönöma kwösödoko ökwönö suli tjöwaedobö isakwadötjobetjö̧. Wanedö yötawa: Jobadö ya̧döma laju da̧kwajudanöbedö, ökwönö ja̧junö meköbobö öbibadö.

²⁸ Ja̧danö, jobadö ya̧döma 'naukwabidö 'dötjebobö tjite'ada̧li̧danö ömadönö te'ada̧ladö ötjibobö tjilekwobö̧kö̧jukwö sulabenö tjö̧jobö. Chitji̧, jobadönö kwösödoko.

18

²⁹ Jemi ikena jweinö omukwatadö yötjawinama baikwö laebobe, bakwo̧ iteda itji̧nö jwebebö yöawi̧danö: Chitji̧, abebö chaja̧kwakwö kwomukwatobö: ¿Didöda ba̧kwȩlö̧jatebö ¡ayö! jö̧ba̧lö, budekwadöma? Ja̧danö ¿didöda ba̧kwȩlö̧jatebö ¡ökwödöwe! jö̧ba̧lö, budekwadöma? Yötawakwö: Owa̧ladönöda wanekwachobe. Ja̧danö ¿didöda ba̧kwȩlö̧jatebö wene juna̧ladöma? Ja̧danö ¿didöda ba̧kwȩlö̧jatebö öpöjödö jwöbeba̧ladöma? Yötawakwö: Owa̧ladönöda wanekwachobe. Ja̧danö ¿didöda ba̧kwȩlö̧jatebö ölakwabikwawö kwakwatjajawö̧ma, kwakwatjaja̧ omukwatöködö? Ja̧danö, ¿didöda tjöbajale duwa'denö ja̧döma?

³⁰ Yotawakwö chitji̧: Owa̧ladönöda wanekwachobe chitji̧. Jobadödanöbedö, ubasobu o̧'do̧bubi, nio ojwiyobi tjowobö isakwadöma.

³¹ Chitji̧, ja̧ ubasobu o̧'do̧bu, deja'do̧nö toekwama otiwanö salöanö öwawobe. Ja̧danö, jobu uatakwawama otiwanö sayuwanö meobu. Jobu edö chowowe, jö̧ba̧lö, kwowobö kwösödijayonö kwowoko chitji̧.

³² Kwowoko ja̧ isobuma chitji̧ kwowaja̧ tupakwö ökwönö sulabenö baledapji jö̧ba̧lö. Yelösöda, kwowaja̧ tupakwöma, ju'wi dewachöma niakobe ökwönöma, a̧ko'danö öpödöwajo̧ inia tjöi̧danö.

³³ Ja̧danö, ju'wibi yötawa, 'dukwachökwenöma: Isabenö, 'dukwachökwema tjöeba̧lokobe edo̧ ju'wi jawabi ju'wi jawa jwiijayonö. Ja̧danö omukwatöbi omukwatö̧kö̧, jweinö yöba̧lö̧bi yöba̧lö̧kö̧.

³⁴ Yelösöda 'dukwachökwema isowi ojwenö lo̧wi jwale'epjo doibajabe bölebö li̧danö jö̧kwe. Ja̧danö, isowi jelobekwö jelobekwö pjaekwabidanö pjaekwabiökwe aböködanö jo̧ 'dukwachökwema.

³⁵ Ja̧danö, 'dukwachökwema wilubö wajwibo̧ itenöda baledaja̧ma. Wajwibö yöba̧lo̧, jelo̧ ötjönö kwakwaajabe ichejekwijayonö, ja̧danö ötjönö 'do'doajabe ichejekwijayonö omukwatökösa, jö̧ba̧lö. Otiwanö chomukwatibanö yemidanö o̧'do̧bu chowobö isakwö chi̧'ya, jö̧ba̧lo̧ 'yo̧. Jobekwö wilubö yöba̧lo̧ 'dukwachökwema. Chitji̧, jwebebö yötawakwö: ¡'Dukwachawö̧ tjowa̧li̧danöma kwowoko!