Proverbios 21 - Dios Iwene

Salomón ju'wi jwebebö yöawakwawa jawanö wanekwachi̧ jawa

¹ Ju'wi Salomón jwebebö yöawakwawa jawanö wanekwachi̧ jawa baikwö laebobe: ¿Tida ojwe isuwobö webo̧ma? Isabenö Jo̧da ojwe isuwobö webo̧ma, iteda isuwobö ösödi̧danö. Waiyökökwe, ojwe isuwobö ja̧i̧ma. Ja̧danö, bakwemiinö, Isabenö Jo̧ma inesö la'aka luwo̧nö omajade okwa omukwati̧ öiboböma waiyökökwe. Isabenö, iteda wei̧ a̧ja̧kwinö öbibo̧ Isabenö Jo̧ma inesö la'aka luwo̧nöma.

² Ja̧danö, ju'wibi yötawa: Ökwödö jojodöma baikwö omukwatadösa: Ba̧kwȩlö̧jatebö otiwanö omukwatö ja̧badösa, jö̧ba̧lö. Jobekwö domukwatijayonö isabenö jelobekwöda omukwatadösa, okwa domukwati̧ma öwawinö i̧sekwökönö. Isabenö yötawa: Okwa domukwati̧ di̧sekwököjayonö Isabenö Jo̧ma ökwödönö okobe jwiinö waiso̧, domajade okwanö domukwati̧bi. Jo̧bama ökwödö domajade okwanö domukwati̧ma otiwanö domukwatojobö jö̧ba̧lö, sulabenö domukwatojobö jö̧ba̧lö edö waiso̧ Isabenö Jo̧ma.

³ Ja̧danö, ju'wibi yötawa: Isabenö Jo̧ma ökwödö dö̧joböma baikwö ösödo̧: Iteda wei̧ a̧ja̧kwö dö̧jobö ösödo̧. Ja̧danö, otiwanö ja̧bö dö̧jobö ösödo̧ Isabenö Jo̧ma. Isabenö, jojodö jo̧banö juwö tjiyi̧tjö̧ bajalekwönönö ösödo̧ Isabenö Jo̧ma iteda wei̧ a̧ja̧kwö, ja̧danö, otiwanö ja̧bö dö̧joböma. Ja̧ dö̧ji̧ma isabenö mikwawobe.

⁴ Ja̧danö, ju'wibi yötawa, wanedö: Bakwo̧ma ju'wedönö edö, mikwawöködö jö̧ba̧lö omukwatobe. Ja̧danö, itedada ötjödasa otiwanö jo̧ma, jö̧ba̧lö omukwato̧. Isabenö yötawa: Jobekwö omukwato̧ma sulabenö omukwato̧. Ja̧danö, ja̧ omukwatö ö̧ji̧ma öwawinö i̧sekwobe, sulabenö omukwatö jo̧, jö̧ba̧lö.

⁵ Ja̧danö, ju'wibi yötawa: Isabenö, dösölö̧jinö otido̧ma ajayinöma otidakwa̧ma omukwato̧, o̧'wo̧ junö, baikwö badekwachinö chotidocha, jö̧ba̧lö. Jobekwö omukwatö junö, dösölö̧jinö otidobetjö̧ isabenö nöinö ujuna̧lakwo̧. Jobekwö baledokobe juluwanö balada emoböda omukwatö otido̧nöma. Jo̧bama balada juluwanö emoböda omukwatobetjö̧ ajayinöma o̧'wo̧ junö omukwatokobe otidakwa̧ma. Ja̧danö, juluwanö, omukwatökönö otidobetjö̧ waekwobe. Jobekwö waekwobetjö̧ jo̧bama jwibo̧da ö̧jakwo̧.

⁶ Ja̧danö, ju'wibi yötawa, wanedö: Bakwo̧ sulabenö omukwato̧ma omöna yöawi̧tjö̧ balada emobe, juluwanö. Jao, balada juluwanö emijayonö ja̧ baladama juluwanö 'dö̧ibajobetjö jwiakobe. Ja̧danö, wanedö yötawa: Ojwiyo imiyu'wo omönanö lamatibö ikenama juluwanö jwiyobe ¿jö̧tö̧? Ja̧ jwiya'wo jwiyi̧danö sulabenö omukwato̧ omöna yöbawö emi̧ baladama juluwanö 'dö̧ibajobetjö̧ jwiakobe. Ja̧danö, ju'wibi yötawa: Jo̧bama omöna yöawi̧tjö balada emobetjö̧ lekwokobetjö debö i̧'yakwo̧.

⁷ Ja̧danö, ju'wibi yötawa: Sulabenö omukwatö ja̧badöma ju'wedönö tjo̧'wo̧ sulinö edö labidö. Jobadöma sulabenö ja̧bö tjö̧ji̧ ösödadö, ja̧danö ja̧ sulabenö ja̧tji̧ kabatibö otiwanö omukwatö tjöbalewachoböma jwiinö öpöjödadö. Jobekwö tjöpöjödobetjö̧ ju'winö ja̧ labö tjö̧jobetjö̧ idödada söbekwö lotjakwedö.

⁸ Ja̧danö, ju'wibi yötawa, wanedö: Mana wi̧so̧ama sulabenö ja̧badö tjö̧ji̧ wanekwachobe, jweinödamaö̧kö̧ kwetjachi̧ma. Ja̧danö, bakwo̧ sulabenö omukwatö ja̧bo̧ma ja̧ma wi̧so̧ama ji̧danö kwebacho̧, sulabenöda omukwatö. Jobekwö kweachokobe Dios wei̧ a̧ja̧kwö, otiwanö omukwatö jo̧ma. Jo̧bama ba̧kwȩlö̧jatebö mana jweamanö ji̧danö kwebacho̧, otiwanöda ja̧bö.

⁹ Ja̧danö, ju'wibi yötawa: Bakwo̧, ilekwo ba̧kwȩlö̧jatebö jwöbeba̧lu̧jukwö ö̧ji̧ma waiyobe ¿jö̧tö̧? Baikwö omukwatena: Bisukwö chö̧jenama bakwȩlö̧jatebö jwöbeba̧luju. Jo̧kwaobetjö̧ o̧do mö jo̧dawa'ye 'do̧'do̧kwobe chö̧jitjö̧ma otiwena jobuju jö̧jelöma ödökwönönö.

¹⁰ Ja̧danö, ju'wibi yötawa: Sulabenö omukwatö jo̧ma omajadenö ba̧kwȩlö̧jatebö suli̧da ja̧obö omukwato̧. Jo̧ba ö̧jena ju̧kwadönö lȩ lö̧jökönö edö sulabenö omukwatö ja̧bo̧.

¹¹ Ja̧danö, ju'wibi yötawa: Sulabenö obo̧nö kwakwabö lȩtjebobe edö wajwibo̧ma jo̧banö edinö öwaisachibena, jobekwö sulabenö omukwatö otoböma jwiobe, jö̧ba̧lö. Ju'wibi yötawa: Jweinö omukwato̧ma, ju'wedö jweinö omukwatadö yötjawi̧ a̧ja̧kwö waisachibo̧. Jobekwö öwaisachibobetjö̧ ajayinö öwaisinatjö bajalekwönönö waiso̧ ö̧jakwo̧.

¹² Ja̧danö, ju'wibi yötawa: Suli̧ Jwibo̧ Diosma okobe jwiinö edo̧ ¿jö̧tö̧? Ja̧danö, sulabenö ja̧badö tjeju okwa baledi̧bi edö waiso̧ Diosma. Jobadö sulabenö ja̧badönö lȩebakwo̧, jwiinö labi̧ jawa jobadönö baledobö weakwo̧.

¹³ Ja̧danö, ju'wibi yötawa: Isabenö, ökwödö ja̧di̧tjö̧ balekwa mikwa baledena ökwödönöma. Wanedö yötawa: Jwibo̧ma, pjabatitjö, jö̧ba̧lö, aeba̧lobe jelo̧nöma. Ja̧danö, jo̧ba aeba̧lökwema jwibo̧ aeba̧li̧ a̧ja̧kwö öpöjödobe, pjatatökö, jö̧ba̧lö. Isabenö, ju'winöma jo̧ba pjabatö̧kö̧ma jwibo̧danö ö̧jakwo̧, ja̧danö iteda aeba̧lakwo̧, pjabatitjö̧ jö̧ba̧lö. Ja̧ mölȩma bakwo̧bi deakobe jo̧banö pjabato̧ma. Jao, jo̧bama jwibo̧nö pjaatinokobetjö̧ jo̧banö pjaatakwo̧ma deobe, balekwa mikwa baibanö.

¹⁴ Ja̧danö, ju'wibi yötawa: Isabenö, ökwönö o̧'wo̧ sulinö edo̧nöma jojodö tjedokonö kwiyitjö̧ma o̧'wo̧ otiwachibena.

¹⁵ Ja̧danö, ju'wibi yötawa: Lȩekwa yöbawo̧ma sulabenö ja̧binanö lȩtjebobö weobetjö̧ Dios wei̧ a̧ja̧kwadöma tjo̧'wo̧ ösöwanö tjö̧jobe. Jobekwö tjö̧jokobe ju'wedö sulabenö ja̧badöma. Jobadöma jwiinö yebabidö, ayö ökwödöwe, ökwödönöbi lȩtjebena, jö̧ba̧lö.

¹⁶ Ja̧danö, ju'wibi yötawa: Bakwo̧ ajayinöma otiwanö omukwatö ji̧nama, otiwanö omukwati̧ kabatibö jelobekwö sulabenö omukwatitjö̧ma wobinadö tjö̧jobe ichibakwo̧.

¹⁷ Ja̧danö, ju'wibi yötawa, wanedö: Bakwo̧ma iteda ösödi̧ jawa, o̧'wo̧ ösöwanö ösödi̧ ju'wi jawa ju'wi jawabi ba̧kwȩlö̧jatebö midö emobe. Isabenö, jo̧bama ju'winö balada jwibo̧da ö̧jakwo̧, ba̧kwȩlö̧jatebö ösödi̧ jawa midö emobetjö̧. Ja̧danö, bakwȩmiinö bakwo̧ ubasobu o'do̧bubi, ja̧danö nöinö mikwawi̧ kwakwawabi emö 'dö̧bekwo̧ma la'akatjöda balada luwo̧ma ö̧jö̧kakwo̧.

¹⁸ Ja̧danö, ju'wibi yötawa: Sulabenö ja̧bo̧ma Dios wei̧ a̧ja̧kwo̧nö usula emawobö isakwo̧. Jobekwö isakwijayonö itedada usula emawakwo̧, balekwa mikwa baibanö. Jao, Diosnö öpöjödo̧ma otiwanö omukwato̧nö usula emawobö isakwijayonö itedada usula emawakwo̧, balekwa mikwa baibanö.

¹⁹ Ja̧danö, ju'wibi yötawa: Bakwo̧, ilekwo ba̧kwȩlö̧jatebö jwöbeba̧lu̧jukwö ö̧ji̧ma waiyobe ¿jö̧tö̧? Baikwö omukwatena: Bisukwö chö̧jenama bakwȩlö̧jatebö jwöbeba̧luju. Jo̧kwaobetjö̧ jo̧dawa'ye jojodö deobe chö̧jitjö̧ma otiwena jobuju jö̧jelöma ödökwönönö.

²⁰ Ja̧danö, ju'wibi yötawa: Jweinö omukwato̧ma itea jwiinö mikwawi̧ jawa, ja̧danö o̧tesobubi jwiinö mikwawobu eju okwa wa̧nö te'ada̧lo̧. Jobekwödanö ite'ada̧lokobe jweinö omukwatö̧kö̧ma. Jo̧ba jweinö omukwatö̧kö̧ma okobe jwiinö ujuna̧li̧ma, iteabi, kwakwawabi juluwanö 'dö̧ibajökwe.

²¹ Ja̧danö, ju'wibi yötawa, wanedö: Bakwo̧ma Dios wei̧ a̧ja̧kwobö isakwobe, ja̧danö jojodönö lȩ lö̧jinö edö pjaatobö isakwobe. Isabenö, jo̧ba omukwati̧danö omukwatö jo̧ma lekwe öja̧kwo̧, otiwanö. Ja̧danö, Dios wei̧ a̧ja̧kwobö ö̧jakwo̧. Ja̧danö, jojodöma jo̧banö otiwanö edinö tjöwaisachibakwedö, otiwanö omukwatö jo̧, jö̧ba̧lö.

²² Ja̧danö, ju'wibi yötawa: Isabenö, guardia jojodö tjuluwo̧, jweinö omukwato̧ma otiwanö tjölakwabikwawobö öbibo̧ ömöayedönöma tjöpöjojodönö, jwiinö juluwadönöma tjujuluwobö. Wanedö yötawa: Jo̧ba tjuluwo̧ma tjöpöjojodö tjitebo tjöekwemi ichajadö tjö̧nöchobö webo̧ ömöayedönö. Ja̧danö, tjöpöjojodöma, dö̧jibinö ja̧dösa, tjöekwemima möobe, ichajadöma tjö̧nöchokobe, jö̧ba̧lö tjo̧mukwatijayonö guardia tjuluwo̧ ömöayedöma nöchadö jemi tebachö tjöpöjojodönö juluwadö.

²³ Ja̧danö, ju'wibi yötawa: Bakwo̧ yöa̧lakwa̧ abönö ö'wiyawakwawönö omukwato̧ma ju'wedökwö wene jwiinö ö̧jakwo̧.

²⁴ Ja̧danö, ju'wibi yötawa, wanedö: Bakwo̧ okobe jwiinö otiwi̧ jawa öpöjödö obo̧ma ö̧jobe. Jo̧bama ju'wedönö nijakwönönö edö jo̧, ötjödasa, jö̧ba̧lö. Ba̧kwȩlö̧jatebö iteda ösödi̧ ja̧bo̧, ju'wedönö pjabatökönö.

²⁵ Ja̧danö, ju'wibi yötawa: 'Du̧wȩkwo̧ma otidokobetjö̧ ¿taji ujuna̧lakwa̧da ukwakwa̧ma? Jwiakwo̧. Ju'wi jawabi ju'wi jawa ujuna̧lobö jö̧a̧lijayonö jwibo̧, ja̧danö a̧wi̧chi̧tjö debö i̧'yakwo̧.

²⁶ Isabenö, jo̧ba 'du̧wȩkwo̧ma ba̧kwȩlö̧jatebö ju'wi jawabi ju'wi jawa emö ujuna̧lobö omukwatijayonö jwibo̧. Jobekwö omukwatokobe Dios wei̧ a̧ja̧kwo̧ma. Jo̧bama ujuna̧li̧tjö iyobö omukwato̧. Jao, ujuna̧li̧tjö ju'wedönö omukwatö a̧'dȩlökönö pjabatö iyo̧ Dios wei̧ a̧ja̧kwo̧ma.

²⁷ Ja̧danö, ju'wibi yötawa: Sulabenö omukwato̧ Isabenö Jo̧nö juwö iyi̧ma öpöjödobe Isabenö Jo̧ma. Ja̧danö, ju'wibi öpöjödobe: Jo̧ba sulabenö omukwato̧ma omajadenö omukwatena, juwö chiyitjö̧ma Isabenö Jo̧ma ötjönö pjaatena sulabenö ja̧temitjö̧ balekwa mikwa ötjönö baledokobö. Ja̧ omukwati̧ma jwiinö öpöjödobe Isabenö Jo̧ma. Sulabenö omukwato̧ juwö iyi̧tjö bajalekwönönö öpöjödobe Isabenö Jo̧ma ja̧ omukwati̧ma.

²⁸ Ja̧danö, ju'wibi yötawa: Bakwo̧, lȩekwa yöbawo̧nö iteda edina yöa̧lobö aebökwema omöna yöa̧litjö̧ma lȩekwa yöbawo̧ma jo̧banö kaatibena, yöba̧lökönuwi, omöna yöbawo̧ja, jö̧ba̧lö. Jobekwö baledokobe jweinö yöbawo̧nö. Abebö a̧ja̧kwökwema lȩekwa yöbawo̧nö iteda edina jweinö yöawitjö̧ma lȩekwa yöbawo̧ma ösödobe tupakwö yöba̧li̧, jö̧ba̧lö. Jweinö yöawobetjö̧ lȩekwa yöbawo̧ma jo̧ba yöawi̧ a̧ja̧kwö ösödo̧, jo̧banö yöawoböma kabatibökönö.

²⁹ Ja̧danö, ju'wibi yötawa: Sulabenö omukwato̧ma ju'wi jawabi ju'wi jawa chöwaisa, jö̧ba̧lö yöa̧lijayonö wajwibo̧. Wajwiijayonö omöna yöa̧lobe, chöwaisa jö̧ba̧lö. Wajwibo̧. Jobekwö omukwatokobe otiwanö omukwatö jweinö yöba̧lo̧ma. Jo̧bama ajayinö ö'wiyawakwawönö omukwatobe, baledakwa̧ öwaisakobetjö̧.

³⁰ Ja̧danö, ju'wibi yötawa: Isabenö Jo̧ma ökwödö domajadenö domukwati̧ma waiso̧. Ja̧danö, ökwödö jojodöma yöda̧lena, Ökwödöma jweinö omukwatadösa̧, ja̧danö, di̧ya sulojobö jö̧ba̧lö, di̧ya otiwojobö jö̧ba̧lö waisadösa, ja̧danö, baledakwa̧ma ajayinö omukwatadösa, jö̧ba̧lö. Jobekwö domukwatijayonö Isabenö Jo̧ma ökwödö domukwati̧ öpöjöditjö̧ma weena domukwati̧danö badekwachinö waekwobö. Isabenö ¿dakwö badekwachoböda ökwödö domukwati̧danö Isabenö Jo̧ma öpöjöditjö̧ma? Badekwachokobe.

³¹ Ja̧danö, ju'wibi yötawa: Isabenö Jo̧da ökwödönö pjabato̧ma, döpöjojodönö dujuluwobö. Isabenö ¿dakwö dujuluwobö Isabenö Jo̧ma ökwödökwö pjabatö ö̧jökötjö̧ma? Juluwöködösa. Wanedö yötawa: Guardia jojodöma tja̧jwi̧mu̧ ka̧ba̧yu̧dönö otidadö, tjöpöjojodö tjö̧jobekwö ölakwabikwawö tji̧'yakwa̧ abönö. Isabenö yötawa: Jobekwö ka̧ba̧yu̧dönö otidö, juluwadönö wa̧matö tji̧'yijayonö Isabenö Jo̧da tjujuluwobö pjabato̧ma.