Proverbios 2 - Dios Iwene

Salomón ju'wi yöawina jawa, ötjö yötawi̧danö jwebebö yökawaduwo kwi̧tji̧mu̧duwinö, möayedönö, jö̧ba̧lö

^1-5 Baikwö laebobe Salomón iteda itji̧nö möayo̧nö jwebebö yöawina jawa: Chitji̧, ökwönö weti̧ a̧ja̧kwö kwö̧jo. Ja̧danö, jwebebö yötawi̧ma kwomajadenö anawö kwö̧jo, jwiinö mikwawobe jö̧ba̧lö. Jobekwö ötjö jwebebö yötawi̧ a̧ja̧kwö kwö̧jitjö̧ma kwöwaisachibakobe, a̧a̧a̧, Isabenö Jo̧nö yebabinö chomukwatobö jo̧be, jö̧ba̧lö. Isabenö chitji̧, jobekwö ja̧nö kwöwaisachibakwo̧ja Diosnöma. Chitji̧, jweinö omukwatö kwö̧jobö yötawi̧ma ö'wiyawakwawönö omukwatö kwa̧ja̧kwo. Jao chitji̧, yötawi̧ma a̧ja̧kwö, kwöwaisobö kwisakwo, di̧ya sulojobö jö̧ba̧lö, di̧ya otiwojobö jö̧ba̧lö. Jobekwö ötjö jwebebö yötawi̧ a̧ja̧kwö kwö̧jitjö̧ma kwöwaisachibakobe, a̧a̧a̧ Isabenö Jo̧nö yebabinö chomukwatobö jo̧be, jö̧ba̧lö. Isabenö chitji̧, jobekwö ja̧nö kwöwaisachibakwo̧ja Diosnöma. Ju'wibi yötawakwö chitji̧: Diosnö akebo, pjabatitjö chöwaisachibobö di̧ya sulojobö jö̧ba̧lö, di̧ya otiwojobö jö̧ba̧lö. Jao chitji̧, Diosnö budekwö akebo, pjabatitjö jweinö omukwatö ja̧kwawama di̧yajö jö̧ba̧lö, chöwaisachibobö, jö̧ba̧lö. Jobekwö kwö̧jitjö̧ma kwöwaisachibakobe, a̧a̧a̧, Isabenö Jo̧nö yebabinö chomukwatobö jo̧be, jö̧ba̧lö. Isabenö chitji̧, jobekwö ja̧nö kwöwaisachibakwo̧ja Diosnöma. Jao chitji̧, jweinö omukwatö ja̧kwawa kwöwaisachibobö kwisakwo. Wanedö yötawakwö: Jwiinö mikwawi̧ jawa tjisakwi̧danö kwisakwobö jo̧be. Ja̧danö, jwiinö mikwawi̧ jawa niji okwabi sosobö tjisakwi̧danö kwisakwo kwöwaisachibobö ¿dakwöjö jweinö omukwatö chö̧joböma? Jobekwö jweinö omukwatö kwö̧jobö isakwö kwö̧jitjö̧ma kwöwaisachibakobe a̧a̧a̧, Isabenö Jo̧nö yebabinö chomukwatobö jo̧be, jö̧ba̧lö. Isabenö chitji̧, jobekwö ja̧nö kwöwaisachibakobe Diosnöma.

⁶ Jao chitji̧, Isabenö Jo̧da ökwönö jweinö kwomukwatobö pjabato̧ma. Jo̧bada ökwönö ju'wi jawabi ju'wi jawa kwöwaisobö pjabato̧ma. Ja̧danö, Isabenö Jo̧da ju'wi jawabi ju'wi jawa ¿di̧ya sulojobö jö̧ba̧lö, di̧ya otiwojobö jö̧ba̧lö kwöwaisachibobö pjabato̧ma.

⁷ Ja̧danö, Isabenö Jo̧ma otiwanö omukwatö, jweinö yöba̧lö ju̧kwadönöma jwebebö yöbawö öbibo̧, jweinö omukwatö tjö̧jobö. Ja̧danö, otiwanö ja̧bö ju̧kwadönö tjöbeba̧lönö te'ada̧lo̧ Isabenö Jo̧ma.

⁸ Ja̧danö, Isabenö Jo̧ma pjabatö te'ada̧lo̧ ju'wedökwö otiwanö ja̧nö, jweinöda omukwatö ja̧bö ju̧kwadönö. Jobadö tji̧'yobema tjöbeba̧lö öbibo̧ Isabenö Jo̧ma. Ja̧danö, Isabenö Jo̧ma jo̧banö ösödadönö tjöbeba̧lö te’ada̧lo̧.

⁹ Ju'wibi yötawakwö chitji̧: Ötjö jwebebö yötawi̧ a̧ja̧kwö kwö̧jitjö̧ma kwöwaisachibakwo̧ja, a̧a̧a̧ Dios wei̧ a̧ja̧kwö chö̧jobö jo̧be, jö̧ba̧lö. Ja̧danö, ju'wibi: Ötjö jwebebö yötawi̧ a̧ja̧kwö kwö̧jitjö̧ma kwöwaisachibakwo̧ja̧, a̧a̧a̧ jojodönö chömöledönöbi ju'wedönöbi jweinöda omukwatö ja̧bö chö̧jobö jo̧be, jö̧ba̧lö. Ja̧danö ju'wibi: Ötjö jwebebö yötawi̧ a̧ja̧kwö kwö̧jitjö̧ma kwöwaisachibakwo̧ja, a̧a̧a̧ chömöledökwö, ju'wedökwöbi otiwanö ja̧nö, jweinöda yöba̧lö chö̧jobö jo̧be, jö̧ba̧lö. Chitji̧ jobekwö, ötjö yötawi̧ a̧ja̧kwö kwö̧jitjö̧ma jwaikwöda kwi̧'yakwo̧ja, otiwanö omukwatö.

¹⁰ Jao chitji̧, jobekwö ötjö yötawi̧ a̧ja̧kwö otiwanö kwö̧jobetjö̧ kwomajade okwa kwöwaisakwo̧ja jweinö omukwatö kwö̧jobö. Ja̧danö, jobekwö jweinö omukwatö kwö̧jobetjö̧ kwo̧'wo̧ ösöwanö kwö̧jakwo̧ja.

¹¹ Juwibi yötawa chitji̧: Ötjö jwebebö yötawi̧ a̧ja̧kwö, jweinö omukwatö kwö̧jobetjö̧ kwö̧jakwa̧ jawa ajayinö kwo̧'wo̧nö kwomukwatakwo̧ja. Wanedö yötawakwö: Jobekwö kwö̧jakwa̧ jawa ajayinö kwo̧'wo̧nö kwomukwati̧ma isabenö ökwönö te'ada̧lo̧danö ja̧kobe, ökwönö te'ada̧lö, otiwanö kwö̧jobö. Ju'wibi yötawa chitji̧, wanedö: Ötjö jwebebö yötawi̧ a̧ja̧kwö jweinö omukwatö kwö̧jobetjö̧ otiwanö kwomukwatakwo̧ja, di̧ya sulojobö jö̧ba̧lö, di̧ya otiwojobö jö̧ba̧lö. Ja̧ kwomukwati̧ma tjöeba̧lobedanö suli̧ jawatjö ö̧jibanö tjöeba̧lobe.

¹² Ja̧danö chitji̧, jweinö omukwatö kwö̧jitjö̧ma, ökwö kwö̧ji̧ma ökwönö te'ada̧lö öibobedanö ja̧kobe. Jobekwö te'ada̧lö ökwö jweinö omukwatö kwö̧ji̧ma sulabenö öibadötjö kwö̧jibinö pjaatobedanö pjaatakobe, jobadökwö pjabacha̧lö kwi̧'yapji jö̧ba̧lö. Ja̧danö, jweinö omukwatö kwö̧jitjö̧ma ökwö kwö̧ji̧ma omöna yöba̧ladötjö kwö̧jibinö pjaati̧danö pjaatakobe kwöwaisobö, idöma sulabenö omönada yöba̧ladö jö̧ba̧lö.

¹³ Ja'yubeda yötawa, jobadö omöna yöba̧ladönöma. Jobadö omöna yöba̧ladöma otiwanö omukwatö tjö̧jajelöma kabatibö jelobekwö omukwatö ‘ya̧dö. Wanedö yötawa: Jobadöma yȩa'wo okwada kwebachadö, sulabenöda omukwatö.

¹⁴ Ja̧danö, jobadöma jobekwö sulabenö omukwatö tjö̧joböma jwiinö ösödadö. Isabenö, jwiinö ösödadö sulabenö ja̧bö tjö̧ji̧ma, otiwa jö̧ba̧lö.

¹⁵ Wanedö yötawa: Jobadöma mana jweamanöma ‘yö̧kö̧dö, jelobekwö, wi̧so̧inö la̧manöda kwebachadö. Isabenö, jobadöma jojodönö tjo̧’wo sulinö edö omöna yöba̧lö ju̧kwadö. Jwiinö sulabenö omukwatadö chitji̧. Ökwöma jweinö omukwatö kwö̧jitjö̧ma jobadö sulabenö tjo̧mukwati̧danöma kwomukwatökena— jobekwö Salomón iteda itji̧nö möayo̧nö jwebebö yöawina jawa.

Salomón ju'wi yöawina jawa, ötjö yötawi̧danö jwebebö yökawaduwo kwi̧tji̧mu̧duwinö, möayedönö, jö̧ba̧lö

¹⁶ Ina laebobe Salomón iteda itji̧nö möayo̧nö jwebebö yöawina, baikwö: —Chitji̧, jweinö omukwatö kwö̧jitjö̧ma, jelo̧kwö jelo̧kwö jalewobö ösödujutjöma kwö̧jibena. Jao chitji̧, jobuju sulabenö jalewobö, ötjökwö kwö̧jo ichi, jwöbeabujuma ökwönö jwiinö jösödijayonö jweinö omukwatö kwö̧jobetjö̧ jobujukwö kwi̧'yökakobe.

¹⁷ Jobujuma jilekwenö, möayujuja̧yi̧ jeminökwenö kabatibinuju. Ja̧danö, Diosnö yöbawö junö jemina jawa, bakwo̧kwöda ba̧kwȩlö̧jatebö jö̧jobö yöbawö jujunina jawa öpöjödö jilekwenö kabatibinuju.

¹⁸ Chitji̧ ¡jobujukwöma kwi̧’yoko! Jobuju jejube kwi̧'yakwa̧ma debö kwi̧'yobedanö ji̧. Chitji̧, jobuju jejube ‘ya̧kwawama wobalenöda badekwachobe.

¹⁹ Jobujukwö ja̧nö jo̧ma ajayinö ö̧jinadanöma ö̧jökakwo̧. Ja̧danö, jobujukwö ja̧nö jo̧ma ajayinö o̧’wo̧ ösöwanö ö̧jinadanöma jwibo̧.

²⁰ Jo̧kwaobetjö̧ chitji̧, otiwanö omukwatadö tji̧’yi̧danö kwi̧’yo. Jao chitji̧, Dios wei̧ a̧ja̧kwadö tji̧'yamanöda kwi̧’yo.

²¹ Jobekwö omukwatö kwö̧jo chitji̧. Isabenö yötawa: Otiwanö omukwatö, jweinö yöba̧lö ju̧kwadöma tjitebonö ja̧nö otiwanö tjö̧jakwedö, Dios pjaatakwawö̧. Ja̧danö, otiwanö ja̧bö ju̧kwadöma tjitebonö lekwe tjö̧jakwedö.

²² Jobekwö otiwanö tjö̧jokobe Dios wei̧ öpöjödadöma. Jobadö Dios wei̧ öpöjödadönöma Dios tjitebotjö a'dewö loakwawö̧. Ja̧danö, ju'wedönö omöna yöba̧lö, yöbawö tju̧juninadanö badekwachinö i̧seböködönöbi meje’ye ‘yetji̧danö tjitebotjö Diosma 'yebö loakwawö̧— jobekwö Salomón iteda itji̧nö möayo̧nö jwebebö yöawinama.