Proverbios 18 - Dios Iwene

Salomón ju'wi jwebebö yöawakwawa jawanö wanekwachi̧ jawa

¹ Salomón ju'wi jwebebö yöawakwawa jawanö wanekwachi̧ jawa baikwö laebobe: Isabenö yötawa: Bakwo̧ma, jojodötjö 'da̧bachibö, jo̧dawa'ye ö̧jobö ösödo̧ma otiwanö omukwatökönö jo̧. Jobekwö omukwatö jo̧ma iteda ösödi̧ omukwatö jo̧. Ju'wedö, jweinö omukwatadö jo̧banö jwebebö yötjawena jwiinö öpöjödö, ölakwabikwawöda ö̧jobe.

² Ja̧danö, ju'wibi yötawa: Jweinö omukwatö̧kö̧ma ¿di̧ya sulojobö jö̧ba̧lö, di̧ya otiwojobö jö̧ba̧lö öwaisoböma isakwö̧kö̧. Iteda omukwati̧da yöawobö ösödo̧.

³ Ja̧danö, ju'wibi yötawa: Jojodöma jwiinö tjöpöjödobe sulabenö ja̧bö jo̧nöma, sulabenö omukwatö jo̧ jö̧ba̧lö. Yelösöda taba̧lö̧jinö jo̧. Ja̧danö, jojodöma jo̧banö edö, tabakwo̧, jö̧ba̧lö jwiinö tjöpöjödökwe.

⁴ Ja̧danö, ju'wibi yötawa: Jweinö omukwato̧ yöawi̧ma 'dö̧ibajökönö nöobe. Wanedö yötawa: Ojwe da̧kwödö öibajöködanö jweinö omukwato̧ yöawi̧ma 'dö̧ibajökönö nöobe. Isabenö, ojwese'do welachi̧danö welachobe jweinö omukwato̧ yöawi̧ma, jojodönö pjaatakobetjö̧.

⁵ Ja̧danö, ju'wibi yötawa wanedö, du̧ju̧tajanö, sulabenö ja̧binanöbi, sulabenö ja̧binö̧kö̧nöbi. Ja̧danö, lȩekwa yöbawo̧ma lȩekwama jweinö yöawökötjö̧ma sulabenö ja̧obe. Wanedö yötawa: Sulabenö ja̧binanö edö jo̧banö lȩebobö jo̧be. Jao, lȩebobö jijayonö, lȩekwa yöbawo̧ma, lȩtebökökwe jö̧ba̧lö yöawitjö̧ma sulabenö omukwatö yöawena. Ja̧danö jelo̧nö, sulabenö ja̧binö̧kö̧nö edö, lȩebobö jwiijayonö, lȩekwa yöbawo̧ma lȩtebakwo̧ jö̧ba̧lö yöawitjö̧ma sulabenö omukwatö yöawena lȩekwa yöbawo̧ma. Isabenö, jweinöda yöawobö jo̧be lȩekwa yöbawo̧ma.

⁶ Ja̧danö, ju'wibi yötawa: Jweinö omukwatö̧kö̧ma yöa̧lena yöa̧lawö̧ma jo̧bakwö nöinö wene tju̧juna̧lobe. Yelösöda, ölakwabikwawö, ja̧danö jo̧banö jwöbeba̧lö tjöpöjödobe, sulabenö yöba̧lo̧, jö̧ba̧lö. Isabenö, jo̧ba jweinö omukwatö̧kö̧ma sulabenö yöa̧lobetjö̧ itedada wene jwöbekwo̧. Yöa̧lawö̧ma jwiinö öpöjödö tjo̧'wo̧ sulachibobetjö̧ kwakwatjobö aeba̧li̧danö itedada AEKWOBEDANÖ abeba̧lo̧, jweinö omukwatö̧kö̧ma.

⁷ Ja̧danö, ju'wibi yötawa: Isabenö, jweinö omukwatökönö yöba̧lo̧ma itedada wene jwöbekwo̧ omukwatökönö yöa̧lobetjö̧. Isabenö, itedada 'daliwa önaja̧nö ö̧libakwo̧, jweinö omukwatökönö yöa̧lobetjö̧.

⁸ Ja̧danö, ju'wibi yötawa: Jojodöma, tja̧ja̧kwokonö sewoba̧lö sulabenö yötja̧li̧ a̧ja̧kwö jwiinö ösödadö, a̧ja̧kwaduwi jö̧ba̧lö. Isabenö, söi̧ kwakwawa tjukwi̧danö ösödadö. Jao, söi̧ kwakwawa tjö̧kati̧danö tjö̧katobe tja̧ja̧kwokonö sewoba̧lö sulabenö yötja̧li̧ma.

⁹ Ja̧danö, ju'wibi yötawa, du̧ju̧tajanö wanedö, bakwainö sulabenö omukwatadönö. Bakwo̧ iteda otidawa otidökönö 'du̧wekwo̧ma. Jelo̧, okobe jwiinö söbebö lobo̧. Isabenö yötawa: 'du̧weko̧bi, söbebö lobo̧bi ba̧kwainö sulabenö omukwatadö.

¹⁰ Ja̧danö, ju'wibi yötawa: Isabenö Jo̧ma jo̧banö tjo̧'wo̧ wa̧na̧ladönöma te'ada̧lo̧. Wanedö yötawa: Isabenö Jo̧ma o̧do möeju, 'diinö otikwejudanö wanekwacho̧. Jo̧banö tjo̧'wo̧ wa̧na̧ladöma labi̧ jawa ichena jeju jo̧bekwö juluwanö ö'öbakwawö tetjachi̧danö tjö̧jibobö tebachadö.

¹¹ Ja̧danö, ju'wibi yötawa, wanedö: Isabenö, balada juna̧lo̧ma labi̧ jawa baledena usula emawokobe. Jo̧ba balada juna̧lo̧ma omukwata, a̧a̧a̧ chu̧kwa baladama tjöekwa mösaka tjöeba̧li̧danö te'ada̧lobe ötjönöma, usula chemawapji jö̧ba̧lö.

¹² Ja̧danö, ju'wibi yötawa: Bakwo̧ itedada omukwatena, ötjödasa ju'wedötjö o̧penönö waiso̧ma, jö̧ba̧lö. Isabenö yötawa: Ötjödasa waiso̧ma, jö̧ba̧lö, omukwato̧nöma Dios lȩebakwo̧, labi̧ jawa baledinö jo̧banöma. Ja̧danö, jelo̧nö yötawa: Bakwo̧ itedada baikwökönö jo̧sa jö̧ba̧lö omukwato̧nöma, jojodö otiwanö tjedakwo̧, otiwanö omukwatö jo̧ jö̧ba̧lö.

¹³ Ja̧danö, ju'wibi yötawa, wanedö: Bakwo̧ ina jwaikwöda yöa̧lonö yöa̧lökwema juluwanö atadobe yöba̧lo̧nöma, yöba̧lo̧ma ina okobe jwiinö yöa̧li̧ma kaatakwawököjayonö. Isabenö, jobekwö atado̧ma jweinö omukwatö̧kö̧, ja̧danö ju'wedöma sulabenö tjedökwe, omukwatö̧kö̧ jö̧ba̧lö.

¹⁴ Ja̧danö, ju'wibi yötawa: Bakwo̧ 'dö̧bacho̧ma, ötjöma chö̧bibajakwo̧sa jö̧ba̧lö omukwatitjö̧ma ö̧bibajobö jo̧be. Jo̧kwaijayonö 'dö̧bacho̧ma jobekwö omukwatö kabatibö, ayö chö̧bibajoböma jwiya, jö̧ba̧lö ubudekwitjö̧ma, o̧'wo̧ tjo̧achena, ja̧danö ö̧bibajökena.

¹⁵ Ja̧danö, ju'wibi yötawa: Waisanö omukwato̧ma iteda ida̧ökö öwaisi̧tjö bajalekwönönö öwaisachibakwo̧. Jao, jo̧ba jweinö omukwato̧ma ba̧kwȩlö̧jatebö jemi bajalekwönönö öwaisachibobö isakwo̧.

¹⁶ Ja̧danö, ju'wibi yötawa: Bakwo̧, la'aka luwo̧ ö̧bobekwö tebachö jo̧banö aebobö jö̧a̧litjö̧ma ju'wi jaye iyawama e'ewobö jo̧be, la'aka luwo̧nö iyö. Isabenö, jobe ichö iyawa ujuna̧litjö̧ma la'aka luwo̧ma ömöayo̧nö weena icho̧nöma ö̧bobekwö teatobö.

¹⁷ Ja̧danö, ju'wibi yötawa, wanedö: Dujutaja wene juna̧lakwawadöma lȩekwa yöbawo̧ ö̧jobekwö yöba̧lö tetjachenama bakwo̧nökwena yötjawobö jo̧be, wenema bi̧ya̧da, jö̧ba̧lö. Ja̧danö, lȩekwa yöbawo̧ma, ajayinö yöbawo̧ yöawi̧ a̧ja̧kwö omukwatena, jweinö yöbawo̧ ichejekwa, jö̧ba̧lö. Jemi ikenama jelo̧ abebö a̧ja̧kwo̧ma ajayinö yöbawo̧nö abebö a̧ja̧kwobe ju'wi jawabi ju'wi jawa. Jobekwö abebö a̧ja̧kwonö öwawobe, omöna yöbawo̧, jö̧ba̧lö, jelobekwö atada̧lobetjö̧.

¹⁸ Ja̧danö, ju'wibi yötawa, wanedö: Du̧ju̧taja la'aka luwedö wene juna̧lö jwöjwötja̧kwawena, diteda jweinö yöbawo̧ma jö̧ba̧lö waiyobe. Jo̧kwaobetjö̧ inawiya ikwawö tjedobö jo̧be jweinö yöawojobö, omöna yöawojobö, jö̧ba̧lö tjöwaisachibobö.

¹⁹ Ja̧danö, ju'wibi yötawa: Bakwo̧ ömöledöso̧nö sulabenö ja̧itjö̧ma ja̧inökwema jo̧banö öpöjödö 'da̧bachibo̧, yemidanö ösödökönö. Yelösöda waiyobe jo̧bakwö yemidanö pjabachibö ö̧jo jö̧ba̧lö. Ja̧danö, wanedö yötawa: Bakwena ju̧kwadöma tjöekwemi 'diemi otidadö tjöpöjojodö ölakwabikwawö ichö tjöekwemi 'dobö lotjapji jö̧ba̧lö ¿jö̧tö̧? Waiyobe ja̧ tjöekwemi 'dobö lotjoböma. Isabenö yötawa: Tjöekwemi 'diemi 'dobö loTJobö waiyi̧danö ömöledöso̧ sulabenö ja̧inökwema yemidanö jo̧banö ja̧binakwö pjabachibö ö̧joböma waiyobe. Ja̧danö, ju'wibi yötawa: Du̧ju̧taja tjö̧möledö idödada wene ju̧na̧lakwawadöma, ölakwabikwawö tjö̧jobetjö̧ 'da̧bachakwadöda tjö̧jobe. Wanedö yötawa: Jobadötjö bakwo̧ma ömöledöso̧ jo̧bakwö wene juna̧lo̧ eju a̧petube ichibobe. Ja̧danö, a̧petube ichibö tjöekwemi apetubekwöchobe ji̧bo̧danö jo̧, ömöledöso̧ jo̧banö öpöjödö teachobö weokobetjö̧. Jobekwö 'da̧bachiböda ju̧kwadö, wene juna̧lö ölakwabikwawö ja̧döma.

²⁰ Ja̧danö, ju'wibi yötawa: Jojodöma otiwanö omukwatö yöbawo̧ yöawi̧ tja̧ja̧kwena jwiinö tjösödobe. Kwakwawa jwiinö söi̧ jawa tjukwena tjösödi̧danö tjösödobe. Isabenö, tjo̧'wo̧ ösöwanö tjö̧jobe otiwanö omukwatö yöbawo̧ yöawi̧ tja̧ja̧kwena.

²¹ Ja̧danö, ju'wibi yötawa: Jojo yöa̧li̧ma juluwobe, ju'wedönö kwabö loi̧danöbi, tjö̧jibinö pjaati̧danöbi. Jo̧kwaobetjö̧ nöinö yöba̧lo̧ma baikwö omukwatobö jo̧be: Nöinö yöta̧li̧tjö jelo̧nö niatibitjö̧ma ötjöda jawa, jö̧ba̧lö.

²² Ja̧danö, ju'wibi yötawa, ömAdönöma: Kwilekwo otiwanö omukwatujunö kweminatjö̧ma jwiinö otiwanö kwemena. Jobekwö kwemina wajuwanö i̧sebobe, Isabenö Jo̧ma otiwanö pjaatinobe ötjönöma, jö̧ba̧lö.

²³ Ja̧danö, ju'wibi yötawa: Jwibadöma juna̧ladönö pjatjatobö atjebena tjo̧'o̧manö otiwanö atjebobö jo̧be. Jobekwö tjatadokobe juna̧ladöma jwibadönöma. Juna̧ladöma labinö, sulabenö tjatadobe jwibadö abebadönöma.

²⁴ Ja̧danö, ju'wibi yötawa: Bakwo̧ma yö̧a̧lena ökwönö, chömöledöso̧, jö̧ba̧lö. Jobekwö yöa̧lijayonö omöna yöba̧lo̧, isabenö kwömöledöso̧bö̧kö̧. Jo̧kwaijayonö jelo̧ma isabenö kwömöledöso̧ ö̧jobe. Jo̧ba isabenö kwömöledöso̧ma yö̧ne kwömöledö pjatjati̧tjö bajalekwönönö pjabato̧ ökwönöma ba̧kwȩlö̧jatebö.