Proverbios 13 - Dios Iwene

Salomón ju'wi jwebebö yöawakwawa jawanö wanekwachi̧ jawa

¹ Salomón ju'wi jwebebö yöawakwawa jawanö wanekwachi̧ jawa baikwö laebobe: Du̧ju̧tajanö, tjȩmunö wanedö yötawa, tjȩmu jweinö omukwato̧nöbi, tjȩmu obo̧nöbi. Tjemu jweinö omukwato̧ma abe'do jwebebö yöawenama ösödö a̧ja̧kwo̧. Jobekwö a̧ja̧kwokobe tjȩmu oböda obo̧ma. Tjemu oböda obo̧ma ösödokobe abe'do jwebebö yöawena. Jo̧bama abe'do jwebebö yöawena, ötjönö yöbawökönuwi, cha̧ja̧kwobö chöpöjöda, jö̧ba̧lö, a̧ja̧kwokobe.

² Ja̧danö, ju'wibi yötawa: Bakwo̧ jojodönö otiwanö omukwatö yöbawo̧ma, iteda otiwanö omukwatö yöawi̧ mikwa baibanö böjȩnö ja̧nö otiwanö ö̧jakwo̧. Ju'wibi yötawa: Jojodönö o̧'wo̧ sulinö edö omöna yöbawo̧ma ölakwabikwawö ö̧jobö isakwo̧.

³ Ja̧danö, ju'wibi yötawa: Yöa̧lakwa̧ abönö ö'wiyawakwawönö omukwato̧ma iteda otiwanö ö̧ji̧ te'ada̧lo̧danö te'ada̧lobe, lekwe ö̧jakobetjö̧. Jobekwö ö̧jokobe yöa̧lakwa̧ abönö omukwatö̧kö̧ma. Jo̧bama omukwatökönö nöinö yöa̧lobetjö̧ usulaso̧da ö̧ja̧kwo̧.

⁴ Ja̧danö, ju'wibi yötawa 'du̧wekwo̧nöbi dösökwö otido̧nöbi wanedöma: 'Du̧wekwo̧ma ju'wi jawabi ju'wi jawa emobö ösödijayonö emökakwo̧. Jobekwö ö̧jokobe dösölö̧jinö otido̧ma. Jo̧bama dösölö̧jinö otidobetjö̧ ösödi̧ jawa nöinö emakwo̧.

⁵ Ja̧danö, ju'wibi yötawa: Dios wei̧ a̧ja̧kwö jo̧ma omöna yöa̧lakwawa jwiinö öpöjödo̧. Ju'wibi yötawa: Sulabenö omukwato̧ma jwiinö taba̧lö̧jinöda i̧sekwö jo̧.

⁶ Ja̧danö, ju'wibi yötawa, du̧ju̧tajanö wanedöma, Dios wei̧ a̧ja̧kwo̧nöbi, sulabenö omukwato̧nöbi: Dios wei̧ a̧ja̧kwö jo̧ma itedada a̧ja̧kwö ö̧ji̧ma pjaatobe sulabenö baledi̧tjö ö̧jibanö. Isabenö, itedada Dios wei̧ a̧ja̧kwö ö̧ji̧ma tjöeba̧li̧danö jo̧be, jo̧banö tjöeba̧lö. Jobekwö baledokobe sulabenö omukwato̧ma. Jo̧ba sulabenö omukwatö ja̧i̧ma itenöda wene jwöebakobe.

⁷ Ja̧danö, ju'wibi yötawa: Ju'wikwenama jojodöma balada tju̧juna̧lakö̧, jwiakö̧ wajuwanö yöbawöködö. Omönada yöbawadö. Wanedö yötawa: Bakwo̧ balada jwibo̧da ö̧jijayonö ötjöma juna̧lo̧sa jö̧ba̧lö omöna yöbawo̧. Ja̧danö, jelo̧ balada nöinö juna̧lo̧ ö̧jijayonö ötjöma jwibo̧sa jö̧ba̧lö omöna yöbawo̧. Ömönada yöbawadö.

⁸ Ja̧danö, ju'wibi yötawa: Balada juna̧lo̧ma itenöda kwabö lotjobö isakwadönö imidobe kwabö lotjapji jö̧ba̧lö. Jobekwö baledokobe balada jwibo̧nöma. Balada jwibo̧ma balada jwiobetjö̧ jo̧banö kwabö lotjobö isakwadöma deobe.

⁹ Ja̧danö, ju'wibi yötawa, wanedö: Dios wei̧ a̧ja̧kwö ju̧kwadöma dȩju̧wa'yu dewinö salöi̧danö dewinö ja̧dö, la'akatjöda tiibököwö̧. Jobekwö tjö̧jokobe sulabenö omukwatadöma. Jobadö sulabenö omukwatadöma dȩju̧wa'yu tiiba'yudanö tiibakwawö̧.

¹⁰ Ja̧danö, ju'wibi yötawa: Ju'wedötjö bajalekwönönö waisadösa, jö̧ba̧lö, omukwatadöma ba̧kwȩlö̧jatebö ju'wedökwö wene tju̧juna̧lakwedö. Ju'wibi yötawa: Jweinö omukwatö ju̧kwadöma ju'wedö jwebebö yötjawi̧ma a̧ja̧kwö ösödadö, otiwa jö̧ba̧lö.

¹¹ Ja̧danö, ju'wibi yötawa, wanedö: Bakwo̧ sulabenö ja̧aja̧ tji̧midi̧ mikwa baladama juluwanö emijayonö juluwanö 'dö̧ibakwa̧. Ja̧danö, jelo̧ma otidaja̧ tji̧midi̧ mikwa baladama tjo̧'o̧manö, tjo̧'o̧manö nöachakobe, ju'wi mölȩ nöinö baibanö.

¹² Ja̧danö, ju'wibi yötawa: Jojodöma tjösödi̧ jawa lekwe tjȩmobö tjite'ada̧lijayonö la'akatjöda tjȩmökötjö̧ma jwiinö tjo̧'wo̧ tjo̧achena. Jo̧kwaijayonö, tjösödi̧ma tjȩmobö tjite'ada̧laja̧ ikena tjȩmaja̧ badekwachitjö̧ma tjo̧'wo̧ ösöwanö tjö̧jena.

¹³ Ja̧danö, ju'wibi yötawa: Bakwo̧ jo̧banö jwebebö yötjawi̧ öpöjödö a̧ja̧kwökötjö̧ma itedada wene jwöekwakwo̧. Ja̧danö, jelo̧ma, jwebebö yötjawi̧ ösödö a̧ja̧kwo̧ma otiwanö ö̧jakwo̧.

¹⁴ Ja̧danö, ju'wibi yötawa wanedö, jweinö omukwatadö yötjawi̧tjö jakwawa jawa welachobe, jö̧ba̧lö: Ja̧danö, jweinö omukwatadö yötjawi̧ma ojwese'do su̧'bȩ babibö welachi̧danö wanekwachobe. Ja̧danö, ojwese'do su̧'bȩ baibaja'dotjö ba̧jȩkwadö ichö owadö je'do welache'dotjö. Ja̧danö, je'dotjö ojwiyo welachi̧danö jweinö omukwatadö yötjawi̧tjö ja̧kwawa jawa welachobe. Ja̧ yötjawi̧ma pjaatobe a̧ja̧kwadönöma labi jawatjö tjö̧jibinö, debö tji̧'yökakobetjö̧.

¹⁵ Ja̧danö, ju'wibi yötawa: Jojodöma otiwanö omukwato̧nö ösödadö, waiso̧, jö̧ba̧lö. Ja̧danö, ju'wibi yötawa: Jojodö tjo̧ma'apekwönö omöna yöba̧lo̧ma itedada wene jwöekwakwo̧.

¹⁶ Ja̧danö, ju'wibi yötawa: Otiwanö omukwato̧ma ja̧akwa̧ abönö ö'wiyawakwawönö omukwato̧. Jobekwö omukwatö ö̧jokobe jweinö omukwatö̧kö̧ma. Jweinö omukwatö̧kö̧ma iteda okobe jwiinö ö̧ji̧ma öwawinö i̧sekwobe jweinö omukwatö̧kö̧sa jö̧ba̧lö.

¹⁷ Jadanö ju'wibi yötawa, wanedö: La'aka luwo̧ma ömöayo̧nö weobe ju'wedönö yöawobö, la'aka luwo̧ yöawi̧ma. Ja̧danö, ömöayo̧ma uluwo̧ yöawobö weaja̧danö jweinö yöawökötjö̧ma yöawajawö̧ma wene tju̧juna̧lakwedö. Jobekwö baledokobe ömöayo̧ma uluwo̧ yöawaja̧danö jweinö yöawitjö̧ma. Uluwo̧ yöawaja̧danö jweinö yöawitjö̧ma otiwanö pjaatobe, ja̧danö yöawajawö̧ma wene jwiinö tjö̧jakwedö.

¹⁸ Ja̧danö, ju'wibi yötawa: Isabenö, bakwo̧ jwebebö yötjawi̧ öpöjödö a̧ja̧kwö̧kö̧ma usulaso̧da ö̧jakwo̧, ja̧danö, tabalö̧jinö tjedökwe ö̧jakwo̧. Jobekwö ö̧jökakobe jwebebö yötjawi̧ a̧ja̧kwo̧ma. Jojodöma jwebebö yötjawi̧ ösödö a̧ja̧kwo̧nöma otiwanö tjedökwe, otiwanö a̧ja̧kwo̧, jö̧ba̧lö.

¹⁹ Ja̧danö, ju'wibi yötawa: Jojodö tjȩmobö tjösödi̧ tjȩmitjö̧ma tjo̧'wo̧ ösöwanö tjö̧jobe. Ju'wibi yötawa: Jweinö omukwatöködöma sulabenö omukwatö tjö̧ji̧ katjatiboböma öpöjödadö.

²⁰ Ju'wibi yötawa: Bakwo̧ ba̧kwȩlö̧jatebö jweinö omukwatadökwö ko̧ko̧kwö ö̧jitjö̧ma jo̧babi jweinö omukwato̧ ö̧jakwo̧. Jobekwö ö̧jokobe omukwatöködökwö ko̧ko̧kwö jo̧ma. Omukwatöködö ba̧kwȩlö̧jatebö ko̧ko̧kwö jo̧ma usula emawö ö̧jakwo̧.

²¹ Ja̧danö, ju'wibi yötawa: Dios wei̧ a̧ja̧kwadöma okobe jwiinö kwetjachiteniama otiwanöda baledawö̧. Jobekwö otiwanö baledokobe sulabenö omukwatadönöma. Jobadö sulabenö omukwatadöma okobe jwiinö kwetjachiteniama wene juna̧lakwawöda kwebachadö.

²² Ja̧danö, ju'wibi yötawa: Otiwanö omukwato̧ma debö i̧'yakwa̧ abönö balada ujunibakwa̧ yöbawo̧, ö'dö̧dö tjȩmakwa̧ baladama. Jobekwömakö sulabenö omukwato̧ baladama. Sulabenö omukwato̧ma debö i̧'yaja̧ ikena jo̧ba u̧kwa baladama Dios wei̧ a̧ja̧kwadöda emibadö.

²³ Ja̧danö, ju'wibi yötawa: Ju'wikwenama usulaso̧ öbatjonö nöinö wa̧jobe, otiwanö. Jo̧kwaijayonö ja̧ wa̧ji̧ma sulabedöma tjö̧naukwobe.

²⁴ Ja̧danö, ju'wibi yötawa: Isabenö, bakwo̧ma itji̧nö jwiinö ile nibebo̧ma kwabö jwebebö yöbawo̧. Abe'doma itji̧ sulabenö ja̧ena kwabö jwebebö yöawökötjö̧ma ile niebokobe itji̧nöma.

²⁵ Ja̧danö, ju'wibi yötawa: Dios wei̧ a̧ja̧kwadöma kwakwawa tjo̧meawachi̧banö kwadö. Jobekwö tjukwokobe sulabenö omukwatadöma. Jobadö sulabenö omukwatadöma tju̧kwa kwakwawa tjö'yapiyunö a̧jibökönöda kwadö.