Proverbios 12 - Dios Iwene

Salomón ju'wi jwebebö yöawakwawa jawanö wanekwachi̧ jawa

¹ Salomónma ju'wi jawa, ju'wi jawabi jwebebö yöawakwawa jawanö wanekwachi̧ma baikwö laebobe: Isabenö yötawa: Bakwo̧ jweinö omukwatö ö̧jobö isakwo̧ma jwebebö yötjawi̧ma ösödo̧. Ja̧danö, jwebebö yötjawi̧ öpöjödo̧ma jweinö omukwatokobe.

² Ja̧danö, ju'wibi yötawa: Isabenö Jo̧ma jwiinö ösödobe otiwanö omukwatadönöma. Jo̧kwaijayonö ösödokobe sulabenö omukwatadönöma. Jao, Isabenö Jo̧ma jwiinö öpöjödobe sulabenö omukwatadönö, ju'wedönö sulabenö tjöwaedakwa̧ jawa omukwatö tjo̧'wo̧ junadönöma. Isabenö Jo̧ma lȩtebocha jö̧ba̧lö jwiinö öpöjödobe jobadönöma.

³ Ja̧danö, ju'wibi yötawa, wanedö: Dios wei̧ a̧ja̧kwö jo̧ma 'diinö ö̧jobe, yebabökönö. Jo̧bama towi bö'diya niji teebe okwa dötewowidanö jo̧, 'diinö ja̧nö, 'yeawaöködanö. Ja̧danö, sulabenö omukwatö jo̧ma jobekwö, 'diinö ö̧jokobe. Jo̧bama sulabenöda omukwatö ö̧jobetjö̧ yebabinö, o̧'wo̧ tjo̧bekwö jo̧.

⁴ Ja̧danö, ju'wibi yötawa: Bakwuju, otiwanö omukwatö jujuma jilekwenö pjabatuju. Ja̧danö, jobekwö jilekwenö pjabatö jö̧jobetjö̧ ju'wedöma jilekwenö otiwanö tjedobe, jwiinö luwo̧, jö̧ba̧lö. Jo̧bekwö pjajatokobe jeluju, jilekwenö, taba̧löjinö jujuma. Jobujuma taba̧lö̧jinöda jö̧jobetjö̧ jilekwema, ayö chilekwoda kwabö lojökwesa, jö̧ba̧lö. Jo̧bama, ilekwo jawatjöda tjiwe'iju pjolowachi̧danö usula emawo̧.

⁵ Ja̧danö, ju'wibi yötawa: Dios wei̧ a̧ja̧kwö ju̧kwadöma jojodönö otiwanö, bakwemiinö edö omukwatadö. Jo̧bekwö tjo̧mukwatokobe sulabenö omukwatadöma. Jobadö sulabenö omukwatö ju̧kwadöma jojodönö omöna yöba̧lö, suli̧ tjöwaedoböda omukwatadö.

⁶ Ja̧danö, ju'wibi yötawa: Sulabenö omukwatadö yötjawi̧ma jojodönö kwabö lotji̧danö sulobe. Wanedö yötawa: Sulabenö omukwatadöma mana ö'öbö jukwawö te'ada̧ladö jojodö tjöbaledena mebibö kwabö lotjobö. Jobekwö wanekwachobe sulabenö omukwatadö yötjawi̧ma, jojodönö sulabenö baledobö yötjawobetjö̧. Jobekwö yötjawokobe Dios wei̧ a̧ja̧kwadöma. Jobadö, Dios wei̧ a̧ja̧kwadö yötjawi̧ma jojodönö pjatjati̧danö ji̧, sulabenö omukwatö yöbawadötjö tjö̧jibobö.

⁷ Ju'wibi yötawa: Diosma iteda wei̧ a̧ja̧kwö ju̧kwadönöma lekwe tjö̧jobö pjabato̧. Ja̧danö jobadötjö tupadanö jojodöma ba̧jȩkwadö tjö̧jakwedö. Jobekwö tjö̧jokobe sulabenö omukwatadöma. Jobadö sulabenö omukwatödöma lekwe tjö̧jökakwedö. Diosma jobadönöma söbebö loakwo̧, jobadötjö tupadanö jojodö tjö̧ba̧jȩkwachökakobetjö̧.

⁸ Ju'wibi yötawa: Jojodöma ö'wiyawakwawönö omukwato̧nö otiwanö tjedökwe, otiwanö omukwato̧, jö̧ba̧lö. Jobekwö tjedokobe jelobekwö sulabenö omukwato̧nö. Jo̧banö jwiinö tjöpöjödobe, sulabenö omukwato̧, jö̧ba̧lö.

⁹ Ju'wibi yötawa, du̧ju̧tajanö wanedö: Bakwo̧, luwo̧maö̧kö̧ baikwönönö omukwato̧ma ömöayo̧nö bakwo̧nöda ujuna̧lobe. Isabenö, jo̧bama nöinö ujuna̧lököjayonö o̧'wo̧ ösöwanö ö̧jobe. Ja̧danö, jelo̧ma luwo̧bö̧kö̧jayonö jojodönö omöna yöba̧lo̧, luwo̧sa, jö̧ba̧lö jo̧banö tjo̧mukwatobö, luwo̧, jö̧ba̧lö. Jo̧bama luwo̧sa, jö̧ba̧lö yöa̧lijayonö jwibo̧, kwakwawabi jwibo̧. Jobadötjö ¿diteda otiwanö ö̧jobeda? Isabenö yötawa: Baikwönönö omukwato̧ ö̧ji̧ma omöna yöba̧lo̧, kwakwabi jwibo̧ ö̧ji̧tjö̧ bajalekwönönö otiwanö ö̧jobe.

¹⁰ Ju'wibi yötawa: Dios wei̧ a̧ja̧kwö jo̧ma lȩ lö̧jinö edö otiwanö ite'ada̧lobe a̧jwi̧mu̧nöma. Jobekwö ite'ada̧lokobe sulabenö omukwato̧ma. Sulabenö omukwato̧ma a̧jwi̧mu̧nöma lȩ lö̧jökönö edo̧, te'ada̧lökönö.

¹¹ Ju'wibi yötawa: Batjo dösölö̧jinö otido̧ma ukwakwa̧ma juna̧lo̧, a̧wi̧chi̧ tjöbökönö jo̧. Jobekwö ujuna̧lokobe dösölö̧jinö otidö̧kö̧ma. Jo̧bama ju'wi jawabi, ju'wi jawa omukwatö jo̧ma. Jobekwö ju'wi jawa omukwatö, chotidobö jo̧be, jö̧ba̧lö omukwatokobetjö̧ jwiakwo̧.

¹² Ju'wibi yötawa: Naukwabidöma ju'wedö naukwabidö tjö̧naukwinatjö̧ dönaukwaduwo, jö̧ba̧lö isakwadö, idödada tju̧juna̧lobö. Jobekwö tjö̧jokobe Dios wei̧ a̧ja̧kwö ju̧kwadöma. Dios wei̧ a̧ja̧kwö ju̧kwadöma idöda tjotidinatjö̧da juna̧ladö. Idöda tju̧juna̧lobö dösölöjinö tjotidobetjö̧ juna̧ladö.

¹³ Ju'wibi yötawa: Sulabenö omukwato̧ma sulabenö yöa̧lobetjö̧ iteda wene jwöbekwo̧. 'Daliwanö tjö̧libi̧danö li̧bo̧ wene jwöebi̧tjö̧ ji̧bökönö. Jobekwö baledökökwe Dios wei̧ a̧ja̧kwö jo̧nöma. Dios wei̧ a̧ja̧kwö jo̧ma wenetjö ji̧bo̧, 'daliwatjö tjö̧jibi̧danö, li̧bö̧kö̧.

¹⁴ Ja̧danö, ju'wibi yötawa: Bakwo̧ jojodönö otiwanö omukwatö yöbawo̧ma, iteda otiwanö omukwatö yöawi̧ mikwa baibanö böjȩnö ja̧nö otiwanö juna̧lo̧. Ja̧danö, dösölö̧jinö otido̧ma iteda dösölö̧jinö otidi̧ mikwa baibanö böjȩnö ja̧nö otiwanö juna̧lo̧.

¹⁵ Ja̧danö, ju'wibi yötawa: Jweinö omukwatö̧kö̧ma ju'wedö jwebebö yötjawi̧ma a̧ja̧kwö̧kö̧, ötjödasa waiso̧ma, otiwanö ja̧bo̧sa jö̧ba̧lö. Jobekwö jöa̧lijayonö jelobekwö omukwatö yöba̧lo̧. Ju'wibi yötawa, jweinö omukwatö jo̧nöma: Jweinö omukwatö jo̧ma ju'wedö jwebebö yötjawi̧ a̧ja̧kwo̧, otiwa, jö̧ba̧lö.

¹⁶ Ja̧danö, ju'wibi yötawa: Jweinö omukwatö̧kö̧ma juluwanö dameakwo̧, ödameakwi̧ma tjöbeba̧lökönö. Jobekwö i̧sekwokobe ö'wiyawakwawönö omukwato̧ma. Ö'wiyawakwawönö omukwato̧ma jelo̧ jo̧banö sulabenö jö̧a̧lena öpöjödijayonö 'wiinöda atadökönö jo̧.

¹⁷ Ja̧danö, ju'wibi yötawa: Lȩekwa yöbawo̧ öba a'o ja̧nö jweinö yöba̧lo̧ma baledina edi̧ma jweinö yöawobe. Jobekwö yöawokobe omöna yöba̧lo̧ma, omönada yöbawo̧ lȩekwa yöbawo̧nö.

¹⁸ Ju'wibi yötawa: Ba̧kwo̧ma ömöledöso̧nö öpöjödö labinö yöa̧litjö̧ma niatakwawadanö jena ömöledöso̧nöma. Isabenö, labinö öpöjödö yötja̧li̧ma i̧sapi̧nö titjati̧danö nii̧. Jobekwömaökö jweinö omukwato̧ ösödö yöa̧li̧ma. Jweinö omukwato̧ma ösödö yöba̧lo̧, yöa̧lökwenö pjabatö. Isabenö, jo̧ba ösödö yöa̧li̧ma otiwanö, jowobu tjowi̧danö seachobe yöa̧lökwenöma, o̧'wo̧ söawinö.

¹⁹ Ja̧danö, ju'wibi yötawa: Jweinö yöawakwawama la'akatjöda balewachokobe, ba̧kwelöjatebö jweinö ji̧. Jo̧kwaijayonö omöna yöawakwawama ba̧kwȩlö̧jatebö jö̧kö̧. Jojodöma omöna yötjawi̧ a̧ja̧kwö juluwanö tjöwaisachibakwedö, omönada yötjawa jö̧ba̧lö. Ja̧danö, juluwanö tjöwaisachibobetjö̧ omöna yöawakwawama lekwökö ji̧, ja̧danö ba̧kwȩlö̧jatebö jö̧kö̧.

²⁰ Ja̧danö, ju'wibi yötawa: Jojodönö suli̧ tjöwaedobö tjo̧'wo̧ junö omukwatadöma ba̧kwȩlö̧jatebö idöda omöna yötjawakwa̧ omukwatadö. Jobekwö tjo̧mukwatokobe jojodönö otiwanö pjatjatobö omukwatadöma. Jobadöma otiwanö pjatjatakwa̧ jawa tjo̧'wo̧ junö omukwatadöma. Jobekwö tjo̧mukwatobetjö̧ tjo̧'wo̧ ösöwanöda ju̧kwadö.

²¹ Ja̧danö, ju'wibi yötawa: Dios wei̧ a̧ja̧kwadönöma sulabenö baledökakwawö̧. Jobekwö baledokobe sulabenö omukwatadönö. Sulabenö omukwatadönö ba̧kwȩlö̧jatebö weneda tju̧juna̧lakwedö.

²² Ja̧danö, ju'wibi yötawa: Isabenö Jo̧ma jwiinö ösödobe yöbawö tju̧juninadanö badekwachinö i̧sebadönöma. Jobekwö ösödokobe Isabenö Jo̧ma omöna yöba̧ladönöma. Jobadönö jwiinö öpöjödobe Isabenö Jo̧ma.

²³ Ja̧danö, ju'wibi yötawa: Bakwo̧, ö'wöyawakwawönö omukwato̧ma ju'wi jawabi ju'wi jawa nöinö öwaisijayonö öwaisi̧ma nöinöma yöba̧lö̧kö̧. Jobekwödanöbo̧maö̧kö̧ jweinö omukwatö̧kö̧ma. Jweinö omukwatö̧kö̧ma nöinö öwaisököjayonö nöinö yöba̧lo̧ omöna jawa. Jobekwö nöinö yöa̧lobetjö̧ iteda wajwii̧ öwawinö i̧sekwobe jojodö tjöwaisachibanö, itema wajwibo̧ jö̧ba̧lö.

²⁴ Ja̧danö, ju'wibi yötawa: Dösölö̧jinö otidadöma tjuluwedö tjuju̧kwakwedö. Jobekwö baledokobe 'du̧wekwadönöma. 'Du̧wekwadöma ju'wedö wetjawö̧da otidö tjuju̧kwakwedö.

²⁵ Ja̧danö, ju'wibi yötawa: O̧'wo̧ tjo̧bekwö jo̧ma ime'dawachobe. Ja̧danö, o̧'wo̧ tjo̧bekwö ime'dawachijayonö ömöledöma pjabatö yötja̧lena jo̧banö o̧'wo̧ tjo̧bekwö ö̧jelö o̧'wo ösöwachibanö pjatjatobe.

²⁶ Ja̧danö, ju'wibi yötawa: Dios wei̧ a̧ja̧kwadöma tjö̧möledönö jwebebö yöbawö pjabatadö. Jobekwö pjatjatokobe sulabenö omukwatadöma. Jobadö sulabenö omukwatadöma tjö̧möledönö pjabatökönö, jelobekwöda tji̧'yobö öbibadö.

²⁷ Ja̧danö, ju'wibi yötawa: Bakwo̧ma tebo luwo̧nö kwaajökwenö toobö ö'du̧wekwitjö̧ma a̧wi̧chi̧nöda ö̧jena. Jobekwö baledokobe dösökwo̧nöma. Dösökwo̧ma nöinö ujuna̧lakwo̧, tjukwa kwawawabi, tjiteabi.

²⁸ Ja̧danö, ju'wibi yötawa: Dios wei̧ a̧ja̧kwö ju̧kwadöma ja̧kwawa mananö 'ya̧jadö, lekwe tjö̧jakwedö. Ja̧danö, jobadö ja̧kwawa mananö 'ya̧jadöma, ina möayedö tjö̧jayi̧ debö 'yö̧ködö.