Proverbios 10 - Dios Iwene

Ju'wi Salomón jwebebö yöawakwawa jawanö wanekwachi̧ jawa

¹ Ju'wi Salomón jwebebö yöawina jawa baikwö laebobe: Isabenö yötawa: Tji̧tji̧mu̧ma jweinö omukwatö tjö̧jitjö̧ma tjabe'do tjojo'do tjo̧'wo̧ ösöwanö tjö̧jakwedö. Jo̧kwaijayonö tji̧tji̧mu̧ma jweinö omukwatökönö tjö̧jitjö̧ma tjabe'do tjojo'do tjo̧'wo̧ tjo̧bekwöda tjö̧jakwedö.

² Ja̧danö, ju'wibi jwebebö yötawa: Sulabenö ja̧badöma, sulabenö ja̧tjaja̧tjö̧ tji̧midi̧ baladama nöinö tju̧juna̧lijayonö isabenö ja̧ baladama pjaatokobe tjo̧'wo̧ luwo̧nö isabenö otiwanö tjö̧jobö. Jo̧kwaijayonö Dios wei̧ a̧ja̧kwadö otiwanö omukwatö tjö̧ji̧ma pjaatobe wobaletjöbi tjö̧jibinö.

³ Ja̧danö, ju'wibi yötawa: Isabenö Jo̧ma jo̧ba wei̧ a̧ja̧kwö ju̧kwadönö pjaatakwo̧ la'akatjöda a̧wi̧chi̧tjö tjötjokobö. Jobekwö pjaatökakwo̧ Isabenö Jo̧ma sulabenö omukwatadönöma. Jobadöma ju'wi jawabi ju'wi jawa tjȩmobö isakwadö, nöinö tju̧juna̧lobö. Jobekwö nöinö tju̧juna̧lobö tjisakwijayonö Isabenö Jo̧ma tju̧juna̧loböma tjöwaekwinö ja̧akwo̧.

⁴ Ja̧danö, ju'wibi yötawa: 'Du̧wekwadöma jwibadöda tjö̧jakwedö. Jo̧bekwö tjö̧jökakwedö ba̧kwȩlö̧jatebö dösökwadöma. Ba̧kwȩlö̧jatebö dösökwadöma dösölö̧jinö tjotidobetjö̧ juna̧la̧dö tjö̧jakwedö.

⁵ Ja̧danö, ju'wibi yötawa: Isabenö, dösökwo̧ma ö'wöyawakwawönö jo̧. Jo̧bama o̧ba baibena batjonö tju̧junina ajayinö wa̧ji̧ma te'ada̧lökönö 'wibebö 'yo̧. Jo̧bekwödanöbo̧maökö 'du̧wekwo̧ma. 'Du̧wekwo̧ma wa̧ji̧ 'wiebobö ji̧jayonö otidökönö, ejunö aba̧löda aba̧lo̧. Isabenö, jo̧banöma, 'du̧wekwo̧, otidö̧kö̧, jö̧ba̧lö, taba̧löjinöda tjedakwo̧ jojodöma.

⁶ Ja̧danö ju'wibi yötawa: Diosma otiwanö pjaatakwo̧ iteda wei̧ a̧ja̧kwö ju̧kwadönöma. Ja̧danö ju'wibi yötawa: Sulabenö omukwatö yöba̧ladöma tjo̧majadenö tjo̧mukwati̧ waapjima i̧seböködö. Jojodönö yöba̧lö, sulabenö tjo̧mukwatijayonö omönada jojodönö yötja̧lenama ösödö yöba̧ladö. Jao, sulabenö tjo̧mukwatijayonö ösödö yöba̧ladö, tjo̧'wo̧nö tjo̧mukwati̧ sulabenö ja̧tjakwa̧ jawa tjöwaisachibapji jö̧ba̧lö.

⁷ Ja̧danö, ju'wibi yötawa: Dios wei̧ a̧ja̧kwö ji̧abina debö i̧'yajabe okobe jojodöma tjo̧'wo̧nö omukwatabinö omukwatadö jo̧banöma, otiwanö ji̧abina, jö̧ba̧lö. Jobekwö tjo̧mukwatokobe sulabenö omukwatö ji̧abinanöma. Sulabenö omukwatö ji̧abina debö i̧'yajabe okobema jojodöma jo̧banöma tjo̧mukwatokobe, juluwanö tjo̧'wo̧ sötjibökwe.

⁸ Ja̧danö, ju'wibi yötawa: Jweinö omukwatö jo̧ma jo̧banö jwebebö yötjawi̧ma ösödo̧ otiwa jö̧ba̧lö. Jwebebö yötjawi̧danö a̧ja̧kwö ö̧jakwo̧. Jo̧kwaijwayonö, jweinö omukwatö̧kö̧ma jo̧banö jwebebö yötjawi̧ a̧ja̧kwökönö iteda omukwati̧ nöinö yöba̧lo̧. Jobekwö ö̧jobetjö̧ itedada wene jwöekwakwo̧.

⁹ Ja̧danö, ju'wibi yötawa: Otiwanö omukwatö jo̧ma jwaikwöda yebabökönö 'yo̧. Jo̧kwaijayonö sulabenö omukwato̧ma jobekwö jwaikwöda i̧'yokobe. Jo̧bama sulabenö öwaedotö jö̧ba̧lö i̧'yijayonö öwaekwakwo̧, jojodöma jo̧ba sulabenö tjo̧mukwati̧ tjöwaisachibobetjö̧.

¹⁰ Ja̧danö, ju'wibi yötawa wanedö: Bakwo̧ma jelo̧ sulabenö ja̧obe edijayonö sulabenö ja̧bo̧nö jweinö yöawokobe, sulabenö omukwatö ja̧köba jö̧ba̧lö. Isabenö yötawa: Jweinö yöawokobetjö̧ jo̧ba sulabenö ja̧bo̧ma usula emawakwo̧. Jobekwö baledökena sulabenö ja̧bo̧nö jweinö yöawitjö̧ma. Sulabenö ja̧bo̧nö jweinö yöawitjö̧ma pjaatakobe o̧'wo̧ tjo̧bekwökönö ö̧jakobetjö̧.

¹¹ Ja̧danö, ju'wibi yötawa: Dios wei̧ a̧ja̧kwo̧ yöawi̧ma yöawökwenö pjaatakobe otiwanö ö̧jobö. Wanedö yötawa: Dios wei̧ a̧ja̧kwo̧ yöawi̧ma ojwese'do su̧'bȩ babibö welache'dotjö tjowi̧danö wanekwachobe. Ja'dotjö ojwiyo welachojobuma pjaatobe jojodönöma, ojwiyo o̧ti̧lö̧jökönö tjö̧jobö. Ja̧ ji̧danö, Dios wei̧ a̧ja̧kwo̧ yöawi̧tjö ja̧akwawa jawa welachobe, yöawökwema otiwanö ö̧jobö. Isabenö, Dios wei̧ a̧ja̧kwo̧ yöawi̧ma jwiinö mikwawobe, ja̧kwawa jawa yöawobetjö̧. Jobekwö mikwawokobe sulabenö omukwato̧ yöawi̧ma. Jo̧bama, o̧'wo̧ sulinö edö omukwati̧ma öwawökönö omönada yöba̧lo̧ jojodö tjöwaisachibapji sulabenö omukwati̧ma. Isabenö, jo̧ba yöawi̧ma mikwawokobe.

¹² Ja̧danö, ju'wibi yötawa: Ökwödöma ju'wedönö do̧'wo̧ sulinö edö, jwiinö döpöjöditjö̧ma jo̧badökwö ölakwabikwawö duju̧kwakwedösa. Jobekwö baledokobe ju'wedönö ile nibebö dö̧jitjö̧ma. Ju'wedönö ile nibebö dö̧jitjö̧ma jobadö sulabenö ja̧tjina jawa söbekwanö lodobetjö̧ domukwatökakwedösa.

¹³ Ja̧danö, ju'wibi yötawa: Bakwo̧, di̧ya sulojobö jö̧ba̧lö, di̧ya otiwojobö jö̧ba̧lö waiso̧ma jweinö omukwatö yöbawo̧. Ja̧danö, ju'wibi yötawa: Jweinö omukwatökönö yöba̧lo̧nöma lȩtjȩbobö jo̧be.

¹⁴ Ja̧danö, ju'wibi yötawa: Jweinö omukwatö ju̧kwadöma tjöwaisi̧ma tjo̧majadenö anawadö tjo̧mukwatakobetjö̧. Ja̧danö, ju'wibi: Jweinö omukwatö̧kö̧ma nöinö omukwatökönö yöa̧lobetjö̧ wene jwöebakwo̧.

¹⁵ Ja̧danö, ju'wibi yötawa: Balada juna̧lo̧ma nöinö labi̧ jawa jo̧banö baledijayonö usula emawökakwo̧. Jo̧ba u̧kwa baladama tjöekwemi tjöeba̧li̧danö pjaatobe jo̧banöma, usula emawapji jö̧ba̧lö. Jobekwö baledokobe balada jwibo̧nöma. Balada jwibo̧nö labi̧ jawa baledena usula emawo̧, balada jwiobetjö̧.

¹⁶ Ja̧danö, ju'wibi yötawa, wanedö: Dios wei̧ a̧ja̧kwadöma idöda midö tjȩmi̧danö, otiwanö ja̧kwawa tjȩmakwedö. Jobekwö tjȩmokobe sulabenö omukwatadöma. Sulabenö omukwatadöma idöda midö tjȩmidanö suli̧da tjȩmakwedö. Yemidanö yemidanöbi ba̧kwȩlö̧jatebö sulabenöda ja̧bö tjö̧jakwedö.

¹⁷ Ja̧danö, ju'wibi yötawa, wanedö: Bakwo̧, jwebebö yötjawi̧ ösödö a̧ja̧kwo̧ma ja̧kwawa mananö i̧'yakwo̧, o̧'wo̧ ösöwanö. Jobekwö i̧'yokobe jwebebö yötjawi̧ öpöjödo̧ma. Jo̧ba jwebebö yötjawi̧ öpöjödo̧ma tjo̧'wo̧ ösöwanö ja̧kwawa mananö 'yö̧könö jelobekwö i̧'yakwo̧.

¹⁸ Ja̧danö, ju'wibi yötawa, wanedö: Bakwo̧ma jelo̧nö jwiinö öpöjödijayonö öpöjödi̧ i̧sebökönö omöna yöa̧lobe, Chösödökwe, jö̧ba̧lö. Isabenö, jobekwö yöba̧lo̧ma omönada yöba̧lo̧. Ja̧danö, ju'wibi yötawa, wanedö: Bakwo̧ma jojodönö omöna yöawobe ju'wedönöma. Sulabenö ja̧tja̧jabe, jö̧ba̧lö yöawobe sulabenö ja̧tjö̧köjayonö. Jobekwö omöna yöbawo̧ma isabenö jweinö omukwatö̧kö̧.

¹⁹ Ja̧danö, ju'wibi yötawa, wanedö: Bakwo̧, nöinö yöba̧lo̧ma, iteda yöa̧li̧tjö sulabe jawa laebena, nöinö yöa̧lobetjö̧. Isabenö yötawa: Jweinö omukwatö jo̧ma nöinöma yöba̧lö̧kö̧.

²⁰ Ja̧danö, ju'wibi yötawa: Dios wei̧ a̧ja̧kwadö yötjawi̧ma jwiinö mikwawobe, bakwai̧ plata jwiinö mikwawi̧danö. Jo̧kwaijayonö sulabenö omukwatadö yötjawi̧ma mikwawokobe.

²¹ Ja̧danö, ju'wibi yötawa, wanedö: Dios wei̧ a̧ja̧kwadö yötjawi̧ma jojodönö ba̧jȩkwadönö pjaatobe tjo̧'wo luwo̧ tjujuluwachibanö. Kwakwawa kwanö tjujuluwachibi̧danö tjo̧'wo̧ luwo̧ tjujuluwachibobe, Dios wei̧ a̧ja̧kwadö yötjawi̧ tja̧ja̧kwobetjö̧. Ja̧danö, ju'wibi yötawa: Jweinö omukwatöködöma omukwatökönö tjö̧jobetjö̧ debö tji̧'yakwedö.

²² Ja̧danö, ju'wibi yötawa: Isabenö Jo̧ma otiwanö edö pjaatobe jojodötjö ju'wedönöma, balada tju̧juna̧lobö. Idöda nöinö tjotidi̧ma pjaatokobe tju̧juna̧lobö. Isabenö Jo̧da tju̧juna̧lobö pjabato̧ma.

²³ Ja̧danö, ju'wibi yötawa: Jweinö omukwatökönö jo̧ma sulabenö ja̧obö isakwo̧, sulabenö ja̧awa jwiinö ösödobetjö̧. Jobekwö ösödokobe di̧ya sulojobö jö̧ba̧lö di̧ya otiwojobö jö̧ba̧lö waiso̧ma. Jo̧ba waiso̧ma jweinö omukwatö jo̧. Ja̧danö, jweinö omukwatö ö̧jobetjö̧ o̧'wo̧ ösöwanö jo̧.

²⁴ Ja̧danö, ju'wibi yötawa: Dios wei̧ a̧ja̧kwadöma otiwanö tjȩmakwedö, jobadö tjösödi̧ jawama. Jobekwö baledokobe sulabenö omukwatadönöma. Jobadöma, jwiinö yetjabi̧ jawada tjȩmakwedö.

²⁵ Ja̧danö, ju'wibi yötawa, wanedö: Bö̧jenö ja̧nö labi̧ jawa baledi̧ma jwa̧lȩ'ȩpjo dobibajö ichi̧danö wanekwachobe. Ja̧danö, jwa̧lȩ'epjo dobibajö ichena Dios wei̧ a̧ja̧kwadöma 'diinö tjö̧jobetjö̧ jwa̧lȩ'ȩpjo emibökakwawö̧. Jobekwö baledokobe sulabenö omukwatadönöma. Jobadö sulabenö omukwatadöma jwa̧lȩ'ȩpjo dobibajö ichena jwa̧lȩ'ȩpjo emibi̧danö emibakwawö̧.

²⁶ Ja̧danö, ju'wibi yötawa: La'aka luwo̧ma iteda ömöayo̧ 'du̧wekwo̧nö, dösölö̧jinö otidö̧kö̧nöma jwiinö öpöjödobe. Wanedö yötawa: Vinagre mikwobu dowitjö̧ma, ayö sula chaa ubibi̧, jö̧ba̧lö döpöjödobe ¿jö̧tö̧? Ja̧danö, ökwöla imiyu'woma döbajale lua, ayö sula luibi jö̧ba̧lö, döpöjödobe ¿jö̧tö̧? Ja̧ suli̧ jawa döpöjödi̧danö öpöjödobe la'aka luwo̧ma ömöayo̧ 'du̧wekwo̧nö.

²⁷ Ja̧danö, ju'wibi yötawa: Isabenö Jo̧nö yebabinö omukwatadöma lekwe tjö̧jakwedö, tjö̧ji̧ deatawö̧. Jobekwö tjö̧jokobe sulabenö omukwatadöma. Jobadö sulabenö omukwatadöma ina damö tjö̧japii debö tji̧'ya̧kwedö, tjö̧ji̧ peatawö̧.

²⁸ Ja̧danö, ju'wibi yötawa: Dios wei̧ a̧ja̧kwö ju̧kwadöma tjo̧'wo̧ ösöwanö te'ada̧ladö, isabenö döwaisa, ju'winö otiwanö baledakwawö̧sa, jö̧ba̧lö. Jobekwö baledokobe sulabenö omukwatadönöma. Jobadö sulabenö omukwatadöma otiwanö baledobö tjite'ada̧lijayonö waekwakobe, la'akatjöda badekwachökakwawö̧.

²⁹ Ja̧danö, ju'wibi yötawakwö: Isabenö Jo̧ma otiwanö omukwatö ju̧kwadönöma tjöbeba̧lönö te'ada̧lo̧. Jobekwö ite'ada̧lokobe sulabenö omukwatö ja̧badönöma. Isabenö Jo̧ma jobadö sulabenö omukwatö ja̧badönöma söbebö loakwo̧.

³⁰ Ja̧danö, ju'wibi yötawa: Dios wei̧ a̧ja̧kwö ju̧kwadönöma la'akatjöda tjujuluwökakwawö̧ tjitjebo 'dötjeboböma. Jo̧kwaijayonö sulabenö omukwatö ja̧badöma tjitebonö lekwema jö̧kö̧dö, tjitebotjö 'dötjebawö̧.

³¹ Ja̧danö, ju'wibi yötawa: Dios wei̧ a̧ja̧kwö ju̧kwadöma jweinö omukwatö yöbawadö. Ja̧danö, ju'wibi yötawa: Diosma jelobekwö omukwatö omöna yöba̧ladönö tjaa ipje'datakwawö̧, yötja̧lokobö.

³² Ja̧danö, ju'wibi yötawa: Dios wei̧ a̧ja̧kwö ju̧kwadöma pjabatö yötjawobö waisadö. Jobekwö yötjawokobe sulabenö omukwatadöma. Jobadö sulabenö omukwatadöma sulabenö, omönada yöba̧ladö, ba̧kwȩlö̧jatebö.