Mateo 3 - Dios Iwene

Juan Ojwenö Bu̧dato̧ ötjabökwe yöawina wene

¹ Jemi tupakwö baikwö baledinobe, Juan Ojwenö Bu̧dato̧ ötjabökwema jojodö deobe kwebachö yöawinobe:

² —Sulabenö kwomukwataduwi̧ kabatibö balewachaduwi, Dios yöbawö weakwa̧ möle yöneawachibobe— jö̧ba̧lö.

³ Damötjö Dios yöawi̧ yöbawo̧ Isaías yöawinama jo̧ba Juannö badekwachinobe, baikwö laebi̧ma: Jojodö deobetjö bakwo̧ jwöeba̧lakobe, Duluwo̧ma juluwanö ichakwo̧. Jo̧ba ichakwa̧ma mana dotidaduwo, jweinö ichakobetjö̧, jö̧ba̧lö laebobe.

⁴ Jo̧ba Juanma ajwikwawedö kameyu ötjabiwö̧ tjöwö'yetjö otikwado̧ 'duawinobe, ja̧danö koleasö̧jȩ ajwikwawedö tji̧sȩdo̧tjö ötikwö̧jȩ u'dumawinobe. U̧kwama, ma̧la̧kayunö ukwinobe, ja̧danö tebotjö emawa wa̧yo̧ owinobe.

⁵ Ba̧jekwadö jojodö jo̧ba yöawi̧ a̧ja̧kwö tjichinobe, Judea niji bakwameachibanö jojodö tjichinobe, Jerusalén comunidadtjöbi, jelobetenia jojodöbi, ja̧danö okobe jwiinö Jordán mikwödö ö'öbö ju̧kwadötjöbi ba̧jekwadö jo̧ba yöawi̧ a̧ja̧kwö tjichinobe.

⁶ Ja̧danö, Juan yöawi̧ a̧ja̧kwadötjö ösödadönö, Juanma jödö Jordán ötjabödönö ubu̧datinobe, sulabedösa jö̧ba̧lö yötjawi̧ i̧sebö.

⁷ Israel jojodö tjuluwedö fariseo jojodö ötjabiwö̧tjöbi, saduceo jojodö ötjabiwö̧tjöbi ju'wedö tjichinobe, jobadönöbi Juan ojwenö ubu̧dato jö̧ba̧lö. Jo̧kwaijayonö, sulabenö tjomukwati̧ kabatibö balewachökönö ojwenö bu̧datakwawa abebö tjichiökwe, Juanma jobadönö yöawinobe: —Ökwödöma sulabedöja a̧ko̧'dö̧ nibadödanö, ja̧danö sulabenö kwomukwataduwi̧ balewachökönö, Dios lȩebakwa̧tjö kwö̧jibaduwobö omukwatadöja.

⁸ Isabenö sulabenö kwomukwataduwi̧ kabatibö kwöbalewachaduwitjö̧ma, otiwanö ja̧bö ja̧nö kwöbalewachaduwaja̧ wene kwi̧sebaduwo.

⁹ Omukwatökönaduwi, Aaa, Abraham i̧tji̧mu tupadanö jojodödobetjö̧, Dios lȩebököwö̧sa, jö̧ba̧lö. Abraham i̧tji̧mu tupadanö jojodö kwö̧jaduwi̧ma mikwawokobe, Dios lȩebi̧tjö kwö̧jibaduwoböma. Diosma isabenö Abraham i̧tji̧mu tupadanö jojodönö pjaatakobe, jo̧kwaijayonö ösöditjö̧ma, biwa inawiyatjö Abraham i̧tji̧mu tupadanö jojodönö otidena, jobadönö pjaatobö.

¹⁰ Dios lȩebakwa̧ma isabenö yöneawachibobe, baikwö wanedö yötawa: Sulabenö tjomukwati̧ kabatibö balewachöködöma, towi wa̧jokowidanö ichejekwadö, ja̧danö Dios lȩebakwa̧'a o̧to̧mö'ama, juluwanö wa̧jokowi la'aka jubö loakwa̧'a jo̧be. Ja̧danö, okobe jwiinö wa̧jokowibiyama, Diosma jubö lobö ökwölanö ujuwakobe— jö̧ba̧lö wanedö yöawinobe Juanma.

¹¹ Tupakwö yöawinobe Juanma, jojodönö: —Ötjöma sulabenö tjomukwati̧ kabatibö balewachajadönö ojwenö chubu̧datobe, sule ojwiyonöda. Jo̧kwaijayonö, chökömanö ichakwo̧ma, Dios O̧'wo̧ Luwo̧nö jobadönö ja̧akwo̧, ja̧danö ökwölanö jobadönö ja̧akwo̧. Jo̧ba ötjö chökömanö ichakwo̧ma, ötjötjö yelösöda bajalekwönönö mikwawo̧, baikwö wanedö yötawa: Luwedö 'dutjawatu sapatu e'ewadöma, sule tjömöayedötjö mikwawöködöda, ¿jö̧tö? Jo̧kwaijayonö, ötjöma jo̧ba ömöayo̧ 'duawatu e'ewo̧ ömöayo̧ chö̧joböma mikwawö̧kö̧sa.

¹² Jo̧bama sulabedönö otiwadötjö böjö 'da̧batö ujunakobe, batjo otidadö kwakwawa sula'wotjö böjö 'da̧batö kwakwawa lödawejunö tjödi̧danö. Ja̧danö, böjö 'da̧batö junajo̧, okobe deinö sula'wodanö ichejekwadö sulabedönö, sula'wo ko̧ko̧dö juwö lotji̧danö ökwöla tiibokolanö juwö loakobe— jö̧ba̧lö yöawinobe Juanma.

Jesúsnö Juan ojwenö ubu̧datina wene

¹³ Jemi ikenama, Jesúsma Galilea nijitjö ichinobe, Jordán ojwebe, ja̧danö Juannö aebinobe, jo̧banöbi ojwenö ubu̧datobö.

¹⁴ Jejenö aebökwe, Juan öpöjödinobe ajayinöma, ja̧danö baikwö abebö a̧ja̧kwinobe: —¿Tajawedö akebobeda ötjö mikwawö̧kö̧nö, ökwönö ojwenö chubu̧datoböma? Ötjöda ökwönö ojwenö bu̧datakwawa atebobö jo̧be— jö̧ba̧lö.

¹⁵ Jejenö aebökwe, Jesúsma atadinobe: —Diosma ötjönöbi ojwenö bu̧datakwawa weobe, jo̧kwajabetjö̧ ötjönöbi ojwenö kwubu̧datobö jo̧be, okobe jwiinö Dios wei̧danö ja̧dobö— jö̧ba̧lö atadinobe Jesúsma. Jejenö atadökwe, Jesúsnö ojwenö ubu̧datinobe Juanma.

¹⁶ Jesúsnö ojwenö ubu̧dataja̧ ikena, ojwetjö a̧laibinobe Jesúsma, ja̧danö a̧laibenama, möleje po̧ekwachibobe edinobe, ja̧danö mö köba̧lo̧ yunuku jwiachi̧danö Dios O̧'wo̧ Luwo̧ jwibachö Jesúsnö öjamatobe edinobe.

¹⁷ Ja̧danö, mölejȩbetjö Dios iwene ökwöinobe, baikwö ökwöi̧ma: —Bitema ötjöda chösödökwe chitji̧. Cho̧'wo̧ ösöwanö chedökwe bitema— jö̧ba̧lö ökwöinobe.