Mateo 28 - Dios Iwene

Jesús wobajaletjö tjeachajina wene

¹ Judío jojodö tjotidökö möle jelemutjö bakwöta möle baledibajena, domingo yȩayi dewachenama, María Magdalena mikwujubi, jeluju María mikwujubi Jesúsnö tjödinȩdo̧ i̧lȩdo̧ edö tji̧'yinobe.

² Ja̧danö juluwanö niji labinö tjö̧awinobe, Duluwo̧ weajökwe ángelma mölejȩbetjö jwibachajo̧, inaba i̧lȩdo̧ teachakwemi tumatakwawaba bu̧lȩdö loinobetjö̧, ja̧danö bu̧lȩdö lobajo̧, jabanö öwamatinobe ángelma.

³ Jo̧ba ángel öbama böba idejati̧danö salöinö dejatinobe, ja̧danö ökamijido̧ma jwiinö dewinobe.

⁴ Jo̧banö edö, Jesúsnö tjödinȩdo̧ te'ada̧ladö guardia jojodöma yebabinö tjö̧tjawinobe, ja̧danö jwiinö yetjabobetjö 'dö̧bachibö metjinobe.

⁵ Jo̧ba ángelma ya̧dö ichajadönö yöawinobe: —Yebabökönaduwi. Chöwaisa, towisa'onö bȩtjinökwe Jesúsnö edö kwichaduwajabe,

⁶ jo̧kwaijayonö dea baima. Ökwödönö yöawinadanö wobajaletjö tjeachajajabe ida̧ökö. Ichö edaduwi, ajayinö i̧lȩdo̧nö ö̧binemima— jö̧ba̧lö.

⁷ Ikenama jobadönö weinobe: —Juluwanö Jesús öba̧ja̧di̧ waisachadönö yöbawaduwaji, Diosma Jesúsnö wobajaletjö tjeachajinö ja̧ajabe, ja̧danö kwabönöduwi Galilea nijibe i̧'yakwo̧. Jobetjö jo̧banö kwedaduwakwedöja— jö̧ba̧lö yötjawobö weinobe ángelma.

⁸ Jejenö a̧ja̧kwö, jobadö ya̧dö yetjaibijayonö, jwiinö tjo̧'wo̧ ösöwachibanö tja̧ja̧kwinobe, ja̧danö jobetjö juluwanö labeibö, Jesús öba̧ja̧di̧ waisachadö tjö̧jobekwö juluwanö ö'ötjakwawinobe jobadönö yötjawobö.

⁹ Ikenama, tji̧'yemi ja'ötjö, Jesúsma juluwanö jobadönö öbadekwajinobe, ja̧danö jobadönö: —¿Dokwa?— jö̧ba̧lö abebö a̧ja̧kwinobe. Yöa̧liawö̧, Jesús ö̧jobekwö ichö bamatö Jesús ömasapiya wo̧batö Jesúsnö tjösödinobe.

¹⁰ Ikenama Jesúsma jobadönö yöawinobe: —Yekabiduwa chömöledö. Chö̧ja̧wo̧dönö yöbawaduwi, Galilea nijibe tji̧'yobö, ja̧danö jobetjö ötjönö tjedakwedö, jö̧ba̧lö yökawaduwodönö— jö̧ba̧lö yöawinobe Jesúsma.

Guardia jojodö baledaja̧ yötjawina wene

¹¹ Jobadö ya̧dö Jesús öba̧ja̧di̧ waisachadönö yötjawobö labebö tji̧'yonö, Jesúsnö tjödinȩdo̧ te'ada̧ladö guardia jojodötjö ju'wedöma comunidadbe 'ya̧nö, Diostjö jojodötjö ö'weje pjabatadö la'aka tjuluwedönö yötjawinobe okobe jwiinö baledaja̧ma.

¹² Jo̧kwajabetjö̧ ö'weje pjabatadö la'aka tjuluwedöbi, jojodötjö damöbi ko̧ko̧kwö omukwatö tjujuninobe ja̧tjakwa̧ma. Omukwatö junajadö, nöinö balada midö wetjinobe guardia jojodönö,

¹³ baikwö: —Ökwödönö dimidakobe. Baikwö jo̧da baledaja̧ omöna yökawaduwo jojodönö: Yö̧te dabonö, Jesús öba̧ja̧di̧ waisachadöma ichö jo̧ba iteba'o tjönaukwinobe, jö̧ba̧lö.

¹⁴ Ja̧danö, ja̧ omöna yöka̧laduwi̧ gobernador a̧ja̧kwitjö̧ma, ja̧danö a̧ja̧kwö: Tjite'ada̧lobö wetijayonö sulabenö abekwinadö jö̧ba̧lö ökwödönö ölabitjö̧ma, ökwödönö pjabatö jo̧banö yöda̧lakobe, ökwödönö lȩebapji jö̧ba̧lö— wetjinobe.

¹⁵ Jejenö wetjiawö̧, guardia jojodöma balada emibö jojodönö omöna yötja̧linobe: Dabonö Jesús iteba'o tjönaukwinobe jö̧ba̧lö. Ja̧danö jejenö omöna yötja̧linobetjö̧, judío jojodötjö ina ba̧jekwadö jejenö yöba̧ladö.

Jesús iteda ömöayedönö weina wene

¹⁶ Jesús öba̧ja̧di̧ waisachadö a̧li̧nösamutjö bakwo̧bedöma Galilea nijibe tji̧'yinobe, ja̧danö 'ya̧jadö, Jesús yöawina'o mö'ösa'obe tji̧'yinobe.

¹⁷ Jobe ichibajadö Jesúsnö edö tjösödinobe, jo̧kwaijayonö jobadötjö ju'wedöma, Isabenö Jesúsdaökena, jö̧ba̧lö tjomukwatinobe.

¹⁸ Ikenama Jesúsma jobadö tjö̧jobekwö ichö yöawinobe: —Mölejȩtjöbi, böjȩtjöbi okobe deinö la'aka tjuluwo̧ batibanö ja̧ajabe Diosma,

¹⁹ jo̧kwajabetjö̧ baikwö wetaduwakwö: Böjȩ bakwameachibanö tjitebokwena jojodönö yöbawö, ösödadönö chöba̧ja̧di̧ waisachadö batjibanö yöbawaduwi. Ja̧danö, Chabe'do Diosbi, ötjö Dios Itji̧bi, Dios O̧'wo̧ Luwo̧bi ökwödönö wedobetjö̧, diminö jobadönö ojwenö bu̧dataduwi.

²⁰ Ja̧danö, jobadö 'yabayedö chöba̧ja̧di̧ waisachadönö ba̧ja̧daduwi, okobe jwiinö ökwödönö wetinama, jobadöbi ja̧bö tjö̧jakobetjö̧. Ja̧danö chömöledö, isabenö ökwödökwö chö̧jakwo̧sa, böjȩ 'dö̧ibenanö kabatö— jö̧ba̧lö weinobe Jesúsma.