Mateo 25 - Dios Iwene

Domulataja jojodö ya̧dö möayedönö Jesús wanedö yöawina wene

¹ Tupakwö yöawinobe Jesúsma: —Baikwö wanedö yötawa Mölejȩbe jo̧ yöbawö weena jawa: Bakwo̧ ilekwonö emajo̧, pjiesta ujuninobe. Pjiesta junö i̧'yakwa̧ abönö, jo̧bakwö pjiesta tjujunakwedö domulataja möayedö ya̧döma, tjitea dejuwa'yu̧ e'ewö jo̧ba ichakwa̧ te'ada̧lö latjebinobe.

² Jobadö domulatajabedö möayedötjö, bakwamubedö ya̧dö waisanö omukwatadö tjö̧jinobe, ja̧danö bakwamubedö ya̧dö waisanö omukwatöködö tjö̧jinobe.

³ Jobadötjö waisanö omukwatöködöma, dejewa'yu̧ tje'ewijayonö, dejewa'yu̧sobu tje'ewinokobe,

⁴ jo̧kwaijayonö waisanö omukwatadöma dejewa'yu̧bi, dejewa'yu̧sobu okwapja̧ isapja̧bi tje'ewinobe.

⁵ Ja̧danö, ilekwonö emajo̧ ichakwa̧ tjite'ada̧lijayonö, juluwanö ichinokobe, lekwamachinobe, jo̧kwajabetjö̧ jobadö te'ada̧ladöma bö̧ti̧löjachibawö̧ tjabibinobe.

⁶ Ikenama, ida̧ökö yö̧te ja'ö, bajalianö jelo̧ jwöinobe: ¡Ilekwonö emajo̧ma tjo̧wi̧ ichiba, jo̧banö edö ichaduwi! jö̧ba̧lö.

⁷ Jejenö jwöiawö̧, jobadö domulataja möayedö ya̧döma a̧laibö tjitea dejuwa'yu̧ tjotidinobe otiwanö dejatobö.

⁸ Jejenö ja̧tjenama, waisanö omukwatöködöma waisanö omukwatadönö atjebinobe: Ayö, dejuwa'yu̧sobu jwiobetjö̧ ditea'yu̧ tjo̧wi̧ tiibobe, dejuwa'yu̧sobu kwujuna̧laduwi̧tjö 'da̧batö iyaduwi ökwödönö, tiibapji jö̧ba̧lö, atjebinobe.

⁹ Atjebawö̧, waisanö omukwatadöma tjatadinobe: Diyökö. Ökwödönö diyitjö̧ma, ba̧jekwachökena, ja̧danö ditea'yu̧bi tiibena. Ökwödöma bodegabe 'ya̧duwi, ökwödö kwiteaduwa kwemaduwakobetjö̧, jö̧ba̧lö wetjinobe.

¹⁰ Jo̧kwajabetjö̧, jobadö waisanö omukwatöködöma dejuwa'yu̧sobu emö tji̧'yinobe, ja̧danö tji̧'yaja̧ okobe, ilekwonö emajo̧ma ichibinobe. Ichibenama, pjiesta junö teachinobe, ja̧danö möayedö tetjachobö te'ada̧ladöbi jo̧bakwö pjiesta junö tetjachinobe. Tetjachaja̧ ikenama, apjude tjipje'datinobe.

¹¹ Ikenama, ju'wedö dejuwa'yu̧sobu emö 'ya̧jadöbi tjichibinobe, ja̧danö ichibö, jwötjeba̧linobe: Duluwo̧, tedachobö apjude po̧bebi, jö̧ba̧lö.

¹² Jwötjeba̧lökwe, ilekwonö emajo̧ma atadinobe: Wajwitawö̧ja. Ökwödönö tetatökö, jö̧ba̧lö.

¹³ Jau chömöledö, ö'wiakwawönö te'ada̧lö ja̧nö kwite'ada̧laduwo, yemidanö chichakwa̧ möle, ja̧danö yemidanö chichakwa̧ hora wajwiköbaduwobetjö̧— jö̧ba̧lö yöawinobe Jesúsma.

La'aka luwo̧ ömöayedö wa̧medukwa jojodönö Jesús wanedö yöawina wene

¹⁴ Tupakwö yöawinobe Jesúsma: —Baikwö wanedö yötawa Dios la'aka luwo̧ ö̧jakwa̧ jawama: Bakwo̧ la'aka luwo̧ma, jelobe kwebachö i̧'yakwa̧ abönö, wa̧medukwanö iteda ömöayedönö jwöinobe, ja̧danö iteda itea tjite'ada̧lobö weinobe.

¹⁵ Jobadönö bakwo̧nökwena weinobe, tjotidobö tjöwaisi̧danö. Bakwo̧nö iteda emi̧ baladatjö oro ö̧pi̧biya cinco mil ö̧pi̧biya iyinobe, ite'ada̧lobö, ja̧danö jelo̧nö dos mil oro ö̧pi̧biya iyinobe, ja̧danö jelo̧nö mil oro ö̧pi̧biya iyinobe. Jejenö iyajo̧, jelobe kwebachö i̧'yinobe la'aka luwo̧ma.

¹⁶ Jo̧ba ömöayedötjö cinco mil iyajökwema, ja̧ baladanö otidö midö eminobe, ja̧danö mikwanö iyinobe. Waisanö ja̧ baladanö otidobetjö̧, cinco milda ajayinö ujuna̧linatjö, diez mil baibanö otidinobe.

¹⁷ Dos mil iyajökwebi ja̧danö, dos mil ujuna̧linatjö, waisanö otidobetjö̧ cuatro mil baibanö otidinobe.

¹⁸ Jo̧kwaijayonö, mil iyajökwema, jelobe 'ya̧nö, lajunö sobö tojö o̧tjinobe uluwo̧ itea baladama.

¹⁹ Ikenama, lekwajabetjö, bajalianö ȩwa̧jinobe la'aka luwo̧ma. Ȩwa̧jo̧, iteda ömöayedönö jwöinobe, ichö tjotidaja̧ jo̧banö yötjawobö.

²⁰ Ja̧danö, cinco mil oro ö̧pi̧biya iyinökwema, ichö yöawinobe: Chuluwo̧, cinco mil ö̧pi̧biya kwiyinobe, ja̧danö edi, cinco mil kwiyinatjö, diez mil baibanö chotidajabe, jö̧ba̧lö.

²¹ Jejenö yöawökwe, uluwo̧ma atadinobe: Otiwanö kwotidajabe, chömöayo̧ otiwo̧, ja̧danö kwotido jö̧ka̧li̧danö otido̧ja. Ja'yubeda ökwönö wetinama otiwanö kwotido jö̧ka̧li̧danö kwotidajabe, jo̧kwajabetjö̧ tupakwö nöi̧ jawa kwite'ada̧lobö chujunocha. Ötjökwö pjiesta junö tebachi, jö̧ba̧lö.

²² Ja̧danö dos mil iyinökwebi ichö uluwo̧nö yöawinobe: Chuluwo̧, dos mil oro ö̧pi̧biya kwiyinobe ötjönö, ja̧danö edi, dos milnö kwiyinatjö, cuatro mil baibanö chotidajabe, jö̧ba̧lö.

²³ Jejenö yöawökwe, uluwo̧ma atadinobe: Otiwanö kwotidajabe chömöayo̧, chömöayo̧ otiwo̧, ja̧danö kwotido jö̧ka̧li̧danö otido̧ja. Ja'yubeda ökwönö wetinama otiwanö kwotido jö̧ka̧li̧danö kwotidajabe, jo̧kwajabetjö̧ tupakwö nöi̧ jawa kwite'ada̧lobö chujunocha. Ötjökwö pjiesta junö tebachi, jö̧ba̧lö.

²⁴ Jemi ikenama mil iyinökwebi ichö, iteda uluwo̧nö yöawinobe: Chuluwo̧, ökwönö chöwaisijatö, isabenö labinö webo̧ja jö̧ba̧lö. Jau chuluwo̧, ökwönö chöwaisijatö, batjo kwotidinököyutjö, wa̧ji̧ emo̧ja jö̧ba̧lö, ja̧danö trigosade kwikwinököyutjö, trigo wa̧ji̧ emo̧ja jö̧ba̧lö chöwaisijatö.

²⁵ Ja̧danö, jejenö chöwaisobetjö̧, yetabijatö, jo̧kwajabetjö̧ kwiyina balada jwiapji jö̧ba̧lö, lajunö sobö cho̧tjijatö. Edi, kwitea balada mil ö̧pi̧biyama biya̧da, jö̧ba̧lö.

²⁶ Jö̧a̧lökwe, uluwo̧ atadinobe: Chömöayo̧ sulabo̧, ja̧danö 'dö̧wekwo̧ja. Ötjöma batjo chotidököyutjö wa̧ji̧ emo̧sa jö̧ba̧lö kwöwaisinatjö̧ma, ja̧danö trigosade chikwököyutjö wa̧ji̧ emo̧sa jö̧ba̧lö kwöwaisinatjö̧ma,

²⁷ ¿tajawedö chiyina baladanö kwotidinököda? Balada lödawejunö kwödo jö̧ka̧linobe, chȩwa̧jenama, ajayi chiyina baladakwö, balada lödawejutjö tjiyi̧ baladakwö chemakobetjö̧, jö̧ba̧lö atadinobe la'aka luwo̧ma.

²⁸ Ikenama, ju'wedö iteda ömöayedönö weinobe, jo̧ba sulabo̧tjö ja̧ mil ö̧pi̧biya 'döbebö, jelo̧ diez mil juna̧lo̧nö tjiyobö.

^29-30 Ja̧danö ömöayo̧ mikwawö̧kö̧nö a̧petube ikwö lotjobö weinobe, yȩa'wo okwa budekwabinö o'ye kikiso ja̧bö usula emawakobetjö̧. Jau chömöledö, okobe deinö juna̧ladönöma, ajayitjö bajalekwönönö nöinö tjujuna̧lobö tjiyakobe, welachibanö su̧'bȩ baibanö tjujuna̧lakobetjö̧, jo̧kwaijayonö jwibo̧ma, ja'yubeda ujuna̧li̧bi jo̧batjö 'dötjebakobe— jö̧ba̧lö yöawinobe Jesúsma.

O̧bȩja̧dönö, chi̧wo̧dönö Jesús wanedö yöawina wene

³¹ Tupakwö yöawinobe Jesúsma: —Ötjö jojo baibanö jeminökwema, yemidanö chichocha, ja̧danö chichenama, dejatinö chujulunö okobe deinö chömöayedö ángelesdökwö chichocha, inesö la'aka luwo̧ batibanö. Ja̧danö, wa̧kwawaka inesö salöinö dewakanö chöbamatocha,

³² ja̧danö okobe deinö tjitebotenia ju̧kwadönö chöba a'o ko̧ko̧kwö tjö̧jobö wetocha, ja̧danö jobadötjö otiwadönö sulabedötjö böjö 'da̧batö chujunocha, o̧bȩja̧dönö te'ada̧lo̧ o̧bȩja̧dönö chi̧wo̧dötjö böjö 'da̧batö ujuni̧danö.

³³ Jau chömöledö, o̧bȩja̧dö otiwadönöma chöwaisobekwöchobe chujunocha, ja̧danö chi̧wo̧dö sulabedönö wajwitobekwöchobe chujunocha.

³⁴ Ikenama ötjö la'aka luwo̧ma, chöwaisobekwöchobe ju̧kwadönö yötawocha: Ökwödöma kwo̧'wo̧ ösöwanö Chabe'do pjaatawö̧ja. Ina böjȩ otidapji, Dios la'aka luwo̧ ö̧jakwa̧ otidö ujuninobe, ökwödö jobe kwö̧jaduwobö, jo̧kwajabetjö̧ babema ichö tebachaduwi.

³⁵ Jau chömöledö, ökwödöma otiwanö ötjönö pjabatinadöja, a̧wi̧chi̧lö̧jökwe chö̧jenama, kwakwawa kwiyinaduwobe, ja̧danö ojwiyo o̧ti̧ tjötenama, chowobö kwiyinaduwobe, ja̧danö jelobetjö ichajo̧ chö̧jenama, kwejuduwinö te'ada̧lö tekatinaduwobe,

³⁶ ja̧danö kamijido̧ jwibö chö̧jenama, ötjönö kamijido̧ 'dukatinaduwobe, ja̧danö chö'wöchenama, ötjönö kwite'ada̧linaduwobe, ja̧danö ka̧lena chö̧benama, ötjönö edö kwichinaduwobe, jö̧ba̧lö.

³⁷ Jö̧ta̧lawö̧, otiwadöma tjatadakwedö: Duluwo̧, ¿dianö ökwönöma a̧wi̧chi̧lö̧jökwenö edö kwakwawa diyijakwö? Ja̧danö, ¿dianö ökwönöma ojwiyo o̧ti̧ tjököbobe edö kwowobö diyijakwö?

³⁸ Ja̧danö, ¿dianö ökwönöma jelobetjö ichajo̧nö edö, dejunö tedatijakwö? Ja̧danö, ¿dianö ökwönöma kamijido̧ jwibo̧nö edö kamijido̧ 'dudatijakwö?

³⁹ Ja̧danö, ¿dianö ökwönöma ö'wöcho̧nö dedijakwö, ja̧danö dianö ökwönöma ka̧lena bo̧nö edö, edö dichijakwö? jö̧ba̧lö.

⁴⁰ Atjebitjö̧, ötjö la'aka luwo̧ma chatadakwo̧sa: Isabenö yötawaduwakwö, bidö chömöledötjö ju'wedötjö nijakwönönö mikwawö̧kö̧nö jejenö pjakatinaduwenama, ötjönöda pjakatinaduwobe, jö̧ba̧lö.

⁴¹ Jemi ikenama wajwitobekwöchobe ju̧kwadönö yötawocha: Ökwödö sulabedöma chö̧jelö labebaduwi. Dios Awetjanöbi, iteda ömöayedönöbi lȩebobö Dios otidö ujuninola ökwöla nöolabe 'ya̧duwi, jobetjö Dios lȩebi̧tjö kwemaduwo jö̧ba̧lö.

⁴² Ökwödöma ötjönö pjabatinöködöja. A̧wi̧chi̧lö̧jökwe chö̧jenama, kwakwawa kwiyinaduwokobe, ja̧danö ojwiyo o̧ti̧ tjötenama, chowoböma kwiyinaduwokobe,

⁴³ ja̧danö jelobetjö chichenama, kwejuduwinö tekatinaduwokobe, ja̧danö kamijido̧ jwibö chö̧jenama, 'dukatinaduwokobe, ja̧danö chö'wöchenabi, ka̧lena chö̧benabi ötjönö kwite'ada̧linaduwokobe, jö̧ba̧lö.

⁴⁴ Jö̧ta̧lawö̧, tjatadakwedö: Duluwo̧, ¿dianö ökwönöma a̧wi̧chi̧lö̧jökwenö edöma pjadatinöködaja? Ja̧danö, ¿dianö ökwönöma ojwiyo o̧ti̧ tjököbobe edöma pjadatinöködaja? Ja̧danö, ¿dianö ökwönöma jelobetjö ichajo̧, ja̧danö kamijido̧ jwibo̧, ja̧danö ö'wöcho̧, ja̧danö ka̧lena bo̧nö edöma pjadatinöködaja? jö̧ba̧lö.

⁴⁵ Atjebitjö̧, jobadönö chatadocha: Isabenö yötawaduwakwö, bidö ötjönö ösödadötjö bakwo̧ ju'wedötjö nijakwönönö mikwawö̧kö̧nö pjakataduwobö kwöpöjödaduwinenama, ötjönöda pjakataduwobö kwöpöjödinaduwobe, jö̧ba̧lö.

⁴⁶ Ikenama, jobadö sulabedöma ökwöla nöolabe tji̧'yakwedö, jobetjö Dios lȩebi̧tjö ba̧kwȩlö̧jatebö usula tjemawobö, jo̧kwaijayonö otiwadöma ba̧kwȩlö̧jatebö ja̧kwawobe ja̧nö tji̧'yakwedö— jö̧ba̧lö yöawinobe Jesúsma.