Mateo 19 - Dios Iwene

Tji̧lȩkwa̧munö kaatibakwawama sula, jö̧ba̧lö Jesús yöawina wene

¹ Ja̧ jawa yöbawajo̧, Galilea nijitjö labebö, Jordán mikwödö tupakwö i̧'yinobe, Judea nijibe.

² Ba̧jekwadö jojodö jo̧bakwö lutja̧linobe, ja̧danö okobe deinö jobadötjö ö'wöchadönö otidö loinobe Jesúsma.

³ Ikenama, fariseo jojodötjö ju'wedöma ichö, 'daliwa tjujunotö jö̧ba̧lö Jesúsnö abebö tja̧ja̧kwinobe: —Jesús, ökwödö judío jojodönö weawa Moisés iwȩyudina laebi̧ma, Bakwo̧ iteda ösödi̧danö ilekwonö kaatibobö jo̧be, jö̧ba̧lö ¿laebobeji̧?— jö̧ba̧lö.

⁴ Atjebökwe, Jesúsma atadinobe: —¿Ökwödöma Dios iwene yöka̧linaduwökiji̧, Dios jojodönö iso̧nöbi, isujunöbi otidina wene laebi̧ma?

⁵ Baikwö laebobe Dios yöawinama: Jo̧kwaobetjö̧ bakwo̧ abe'dotjöbi ojo'dotjöbi labebö 'da̧bachibö ilekwokwöda ö̧jo jö̧ba̧lö. Ja̧danö, jobadö du̧ju̧tajama bakwo̧da babibadö, jö̧ba̧lö laebobe.

⁶ Ja̧danö bakwo̧da batjibanö Dios ja̧inobetjö̧, du̧ju̧tajaböködö jobadöma. Bakwo̧dabedö, ¿jö̧tö? Jo̧kwajabetjö̧, Diosda du̧ju̧tajatjö bakwo̧da baibanö Dios ja̧inawö̧nöma, jojodö 'da̧batö tjujunoko— jö̧ba̧lö atadinobe.

⁷ Atadawö̧, fariseo jojodöma Jesúsnö abebö tja̧ja̧kwinobe: —Jejenö jojodö 'da̧batö tjujunobö jwiitjö̧ma, ¿tajawedö weinada Moisésma: Bakwo̧ iteda ilekwonö kaatibobö ösöditjö̧ma, kaatibakwa̧söja abönö wȩyudö lödö, Da̧ji, jö̧ba̧lö weena jö̧ba̧lö, tajawedö iwȩyudinada?— jö̧ba̧lö abebö tja̧ja̧kwinobe.

⁸ Atjebökwe, Jesús atadinobe: —Ökwödö Israel jojodöma Dios yöawi̧ kwöpöjödaduwiökwe, ja̧ weawa iyinobe, jo̧kwaijayonö Dios jojodönö otidinenama, jejenö ji̧nokobe.

⁹ Jo̧kwajabetjö̧ bakwo̧ ilekwo jelo̧nö ja̧jököjayonö jobujunö kabatibö, jelujunö emitjö̧ma, ilekwobökujunö ö̧jobe— jö̧ba̧lö yöawinobe.

¹⁰ Jejenö yöa̧liawö̧, Jesús öba̧ja̧di̧ waisachadöma jo̧banö yötja̧linobe: —Tji̧lȩkwa̧mu jawa jejenö ji̧tjö̧ma, bajalekwönönö otiwo jö̧a̧lena, tji̧lȩkwa̧munö emökönö tjö̧jo— jö̧ba̧lö yötja̧linobe.

¹¹ Yötja̧lökwe, Jesúsma atadinobe: —Ja̧ tji̧lȩkwa̧munö emawa Dios yöawi̧ma, okobe deinö jawamaökö, sule tji̧lȩkwa̧munö tjemobö Dios iyinawö̧ jawada. Baikwö yötawa:

¹² Okobe deinö tji̧lȩkwa̧munö tjemo jö̧ba̧lö weinokobe Diosma, chömöledö, ömadötjö ju'wedöma tjöla'yapiyu jwibadönö tjojo'do jeminobe, ja̧danö ju'wedönö jojodö 'wibebö lotjinobetjö̧ tjöla'yapiyu jwibadö tjö̧jobe, ja̧danö ju'wedöma jwaikwöda mölejȩbe jo̧ yöbawö weena jawa tjotidobetjö̧, idöda tjöla'yapiyu jwibadödanö tji̧lȩkwa̧munö emökönö tjö̧jobe. Jau chömöledö, Diosma wainökwena iyo̧ jojodönö. Ju'wedönö tji̧lȩkwa̧munö tjemobö iyobe, ja̧danö ju'wedönö tjemokobö iyobe, jo̧kwajabetjö̧ yötawaja̧ iyinawö̧ma, ja̧ tjösödobö jo̧be— jö̧ba̧lö yöawinobe Jesúsma.

Jesús tjemunö Diosnö aebina wene

¹³ Ju'wedö jojodöma tji̧tji̧munö tjichejebinobe Jesús ö̧jobekwö, ömamu 'bibeba̧lö, Diosnö aebobö, jo̧kwaijayonö Jesús öba̧ja̧di̧ waisachadöma jojodönö wetjinobe: —Kwi̧tji̧muduwinö ichejebökönaduwi— jö̧ba̧lö.

¹⁴ Jejenö wetjiökwe, Jesúsma öpöjödinobe, ja̧danö weinobe: —¡Tjökeba̧laduwa! Tjemuma wainö chö̧jobekwö tjichakwedö. Jau chömöledö, tjemu tjomukwati̧danö omukwatadöda Dios la'aka luwo̧ ö̧jena tjö̧jakwedö, jo̧kwajabetjö̧ tjichoko jö̧ba̧lö webökönaduwi— jö̧ba̧lö.

¹⁵ Ja̧danö, Jesúsma tjemunö ömamu 'bibeba̧lö, Diosnö aebinobe jobadönö. Ikenama, jobetjö laebinobe Jesúsma.

Balada nöinö juna̧lo̧ Jesúsnö abebö a̧ja̧kwina wene

¹⁶ Ikenama, jelo̧ Jesúsnö ichö abebö a̧ja̧kwinobe: —Ba̧ja̧dakwawa luwo̧, ¿diya̧ otiwanö ja̧awa ja̧takwa̧da, ba̧kwȩlö̧jatebö ja̧kwawa chujuna̧lakobetjö̧?— jö̧ba̧lö.

¹⁷ Aebökwe, Jesúsma atadinobe: —¿Tajawedö ötjönö otiwanö ja̧awama diya̧da jö̧ba̧lö akebobeda? Kwöwaisa. Otiwo̧ma, bakwo̧da, Diosda, jo̧kwajabetjö̧ ba̧kwȩlö̧jatebö ja̧kwawa kwujuna̧lobö jö̧ka̧litjö̧ma, Dios wei̧ ja̧bö kwö̧jo— jö̧ba̧lö.

¹⁸ Yöawökwe: —¿Dios weinatjö diya̧ ja̧bö chö̧jobö?— jö̧ba̧lö aebökwe, Jesúsma atadinobe: —Jojodönö kwabö lobökönaduwi Dios weinabi, kwilekwobökujukwö ja̧bökönaduwi Dios weinabi, naukwökönaduwi Dios weinabi, jojodö ja̧tji̧ omöna yöbawökönaduwi Dios weinabi,

¹⁹ kwabe'donöbi, kwojo'donöbi otiwanö omukwataduwi Dios weinabi, ökwödada kwösödakwawi̧danö kwipjeanö ju̧kwadö kwömöledöduwinö ösödaduwi Dios weinabi. Ja̧ Dios weinadanö ja̧bö kwö̧jo— jö̧ba̧lö yöawinobe Jesúsma.

²⁰ Yöawökwe, jo̧ba möayo̧ Jesúsnö abebajo̧ma atadinobe: —Ja̧ jawa ba̧kwȩlö̧jatebö ja̧bajichobe ida̧ökö. Ja̧tjö bajalekwönönö ¿taji jwiobeda ja̧tobö, ba̧kwȩlö̧jatebö ja̧kwawa chujuna̧lakobetjö̧?— jö̧ba̧lö.

²¹ Aebökwe Jesúsma jo̧banö yöa̧linobe: —Bakwainö otiwanö bakibobö jö̧ka̧litjö̧ma, okobe jwiinö kwujuna̧li̧ iyö lobö, jwibadönö ja̧ balada kwiyo, mölejȩbetjö nöinö mikwawi̧ jawa mölejȩbetjö kwujuna̧lakobetjö̧. Ikenama, jejenö iyö lobajo̧, chökömanö kwicho chöba̧ja̧di̧ waisacho̧ baibanö— jö̧ba̧lö yöawinobe.

²² Jejenö yöawiökwe, möayo̧ma o̧'wo̧ tjo̧achö Jesús ö̧jelö laebinobe, nöinö ujuna̧li̧ ösödobetjö̧.

²³ Ikenama Jesúsma iteda öba̧ja̧di̧ waisachadönö yöawinobe: —Isabenö yötawaduwakwö, yelösöda waiya, balada nöinö juna̧ladö Dios la'aka luwo̧ ö̧jena tetjachoböma.

²⁴ Yemidanö wanedö yötawa: Kameyu makeösö'i isaju öbaledoböma isabenö jwiinö waiyena, ¿jö̧tö? Jo̧kwaijayonö ja̧ waiyi̧tjö bajalekwönönö isabenö waiyawö̧, nöinö juna̧ladö Dios la'aka luwo̧ ö̧jena tetjachoböma— jö̧ba̧lö.

²⁵ Jejenö yöawiawö̧ Jesús öba̧ja̧di̧ waisachadöma tjöbajale jalaka baibanö tja̧ja̧kwinobe, nöinö juna̧ladöma isabenö Dios ömöledötjena jö̧ba̧lö omukwatajitjobetjö̧, ja̧danö Jesúsnö abebö tja̧ja̧kwinobe: —Jobadö nöinö juna̧ladönö waiyitjö̧ma, ¿ju'wedöja? ¿Bakwo̧bi ö̧jibobö jo̧beji̧?— jö̧ba̧lö abebö tja̧ja̧kwinobe.

²⁶ Atjebökwe, jobadönö edö Jesúsma atadinobe: —Jojodö tjujulunö tjö̧jiboböma jwiobe. Jo̧kwaijayonö okobe jwiinö ja̧obö juluwo̧ Diosma, ja̧danö Dios pjaatitjö̧ma ji̧kwa jo̧be— jö̧ba̧lö atadinobe Jesúsma.

²⁷ Ikenama Pedroma abebö a̧ja̧kwinobe: —Ökwödö kwöba̧ja̧di̧ waisachadöma okobe jwiinö dujuna̧lina junibö ökwökwö lubibö dichajabe, ¿jö̧tö? Jejenö ja̧diökwe, ¿taji iyakwa̧daja̧ Diosma ökwödönöma?— jö̧ba̧lö.

²⁸ Aebökwe, Jesúsma atadinobe: —Isabenö yötawaduwakwö chömöledö, okobe jwiinö 'yayinö Dios otidena, ja̧danö ötjö jojo baibanö jeminökwe salöinö dewaka teakanö, inesö la'aka luwo̧ iteakanö chö̧wenama, ökwödö chökömanö lubibajadöbi a̧li̧nösamutjö dökalatajanö kwö̧waduwakobe, Israel jojodötjö a̧li̧nösamutjö du̧ju̧tajasaso jojodö tjuluwedö bakibaduwanö.

²⁹ Ja̧danö, ötjönö tjösödobetjö̧ tjeju junibadö, ja̧danö tjöjawujudö ya̧dönöbi, tjö̧ja̧wo̧dö ömadönöbi, tjabe'donöbi, tjojo'donöbi, tji̧tji̧munöbi yöne tjömöledönöbi junibadö, ja̧danö tjöbatjiju junibadöma, ötjönö ösödö tjujunibobetjö̧ isabenö tjujunibinatjö yelösöda bajalekwönönö balekwa iyakwo̧ Diosma, ja̧danö ju'wibi ba̧kwȩlö̧jatebö ja̧kwawa jobadönö iyakwo̧.

³⁰ Jo̧kwaijayonö babe bidöma ju'wedötjö bajalekwönönö mikwawadö jö̧tja̧lawö̧ma, ja̧ möle mikwawöködö tjö̧jakobe, ja̧danö babe mikwawöködö jö̧tja̧lawö̧ma, ja̧ möle ju'wedötjö bajalekwönönö mikwawadö tjö̧jakobe— jö̧ba̧lö yöawinobe Jesúsma.