Mateo 18 - Dios Iwene

Dios la'aka luwo̧ ö̧jena ju̧kwadötjö luwedönö Jesús yöawina wene

¹ Jemi ikenama, Jesús öba̧ja̧di̧ waisachadöma ichö Jesúsnö abebö tja̧ja̧kwinobe: —Dios la'aka luwo̧ ö̧jena ju̧kwadötjö, ¿tidaja̧ ju'wedötjö bajalekwönönö bo̧ma?— jö̧ba̧lö.

² Atjebökwe, Jesúsma tjemunö ichobö jwöinobe, ja̧danö tjö'da̧de ujuninobe.

³ Jejenö junajo̧, jojodönö yöawinobe: —Isabenö yötawaduwakwö, kwomukwataduwi̧ balewachö, bidö tjemu tjomukwati̧danö omukwatadö bakibaduwökötjö̧ma, la'akatjöda Dios la'aka luwo̧ ö̧jakwa̧ tekachaduwökena.

⁴ Jau chömöledö, bite tjemu omukwati̧danö ötjöma ju'wedötjö bajalekwönönö otiwö̧kö̧sa jö̧ba̧lö omukwatadöda Dios la'aka luwo̧ ö̧jena ju̧kwadötjö inesö otiwadöma— jö̧ba̧lö yöawinobe Jesúsma.

Ju'wedö sulabenö ja̧tjobö isakwadönö Jesús yöawina wene

⁵ Tupakwö yöawinobe Jesúsma: —Chömöledö, okobe deinö bite tjemudanöbedönö bidöma Jesús ömöledö jö̧ba̧lö tjichobe ösödadöma, isabenö ötjö chichobe ösödadö.

⁶ Jo̧kwaijayonö bakwo̧ bidö ötjönö ösödadö tjemunö sulabenö ja̧tjobö weitjö̧ma, isabenö Dios lȩebakwo̧ jo̧bama. Jau chömöledö, wanedö yötawa: Jojo u̧lume'anö inawa ömökawa di̧batibö, ojwe okwa o̧ibobö ikwö lotjitjö̧ma, nöinö usula emawena, ¿jö̧tö? Jo̧kwaijayonö, ja̧tjö bajalekwönönö yelösöda nöinö usula tjemawakwedö tjemunö suli̧ waedadöma chömöledö, Diosma isabenö labinö lȩebakobe.

⁷ Jau chömöledö, böjȩ jojodöma isabenö Dios lȩebakwa̧ tjemakwedö, jojodö sulabenö ja̧tjobö wetjobetjö̧. Isabenö yötawaduwakwö chömöledö, jojodö sulabenö ja̧tjobö wetji̧ma isabenö baledakobe, jo̧kwaijayonö ju'wedö sulabenö ja̧tjobö webo̧ma, isabenö nöinö usula emawakwo̧— jö̧ba̧lö.

⁸ Tupakwö yöawinobe Jesúsma: —Jau chömöledö, sulabenö ja̧köbaduwobö ja̧awatjö 'da̧bachibaduwi. Baikwö wanedö yötawa: Kwömamubi, kwömasapabi Dios weökö jawa ja̧köbobö weitjö̧ma, 'wibekwö loköbaduwo. Jau chömöledö, o̧penönö otiwena, kwömamubi 'wibekwo̧, kwömasapabi 'wibekwo̧ Dioskwö ja̧kwawa kwujuna̧laduwobö, kwömamiju domulataja juna̧lo̧, ja̧danö kwömasapiya döpalataja juna̧lo̧ ökwöla nöolabe ba̧kwȩlö̧jatebö ubakwolabe tekachapji jö̧ba̧lö.

⁹ Ja̧danö, kwöbajale Dios weökö jawa ja̧köbobö weitjö̧ma, kwöbajale kelekwö loköbaduwo. Jau chömöledö o̧penönö otiwena, bakwale jwibo̧ Dioskwö ja̧kwawa kwujuna̧laduwobö, kwöbajale dölelataja juna̧lo̧ ökwöla nöolabe tekachapji jö̧ba̧lö.

^10-11 Jau chömöledö, omukwatönö kwö̧jaduwo, bidö tjemunö mikwawöködö jö̧ba̧lö kwöpöjödaduwapji jö̧ba̧lö. Jau chömöledö, isabenö yötawaduwakwö, bidö tjemunö te'ada̧ladö ángelesdöma tjö̧jobe, ja̧danö jobadöma ba̧kwȩlö̧jatebö mölejȩbe Chabe'do öba a'o tjuju̧kwobe— jö̧ba̧lö yöawinobe Jesúsma.

Obeja le'dewinanö Jesús wanedö yöawina wene

¹² Tupakwö yöawinobe Jesúsma: —Baikwö wanedö yötawa chömöledö: Bakwo̧ cien o̧bȩja̧dönö ujuna̧linobe, ja̧danö jobadö cienbedötjö bakwo̧ ile'dewinobe. Kwedaduwemi, ¿dakwö ja̧obeda chömöledö? Ju'wedö noventa nuevebedönö junibö, le'dewajo̧nö isakwena, ¿jö̧tö?

¹³ Ja̧danö, le'dewajo̧nö obejanö öbadekwajenama, jwiinö o̧'wo̧ ösöwachibena, ¿jö̧tö? Jau chömöledö, ju'wedö le'dewajöködö noventa nuevebedönö o̧'wo̧ ösöwi̧tjö bajalekwönönö le'dewajo̧nö badekwajö o̧'wo̧ ösöwachibanö ö̧jena, ¿jö̧tö?

¹⁴ Mölejȩbe jo̧ Kwabe'doduwibi ja̧danö chömöledö, jo̧bama jwiinö öpöjödobe, bidö tjemu pjebadötjö bakwo̧bi debö i̧'yapji jö̧ba̧lö— yöawinobe Jesúsma.

Tjömöledönö sulabenö ja̧badönö otiwanö jweekwa Jesús yöawina wene

¹⁵ Tupakwö yöawinobe Jesúsma: —Chömöledö, Dios ömöledötjö bakwo̧ kwömöledöso̧ ökwönö sulabenö ja̧itjö̧ma, jo̧dawa'ye jo̧ba ö̧jobekwö 'ya̧wi, ja̧danö sulabenö ja̧aja̧ yökawonö. Ja̧danö, yökawi̧ a̧ja̧kwitjö̧ma, otiwena, kwömöledöso̧ yemidanö a̧laibobö pjakatobetjö̧.

¹⁶ Jo̧kwaijayonö yökawi̧ a̧ja̧kwobö öpöjöditjö̧ma, ju'wedö kwömöledötjö bakwo̧nöö̧kö̧, du̧ju̧tajanöö̧kö̧ öbibö yemidanö 'ya̧wi, Dios damötjö weinadanö du̧ju̧tajaena, wa̧medukwaena ja̧i̧ edajadö, jo̧banö isabenö yöka̧li̧ wene jweinö yötjawakobetjö̧.

¹⁷ Ja̧danö, jobadönöbi a̧ja̧kwobö öpöjöditjö̧ma, Dios ömöledö ko̧ko̧kwö ba̧ja̧dö tjöba a'otjö yökawo. Jemi ikenama, ina okobe deinö Dios ömöledö yötjawi̧ öpöjöditjö̧ma, jo̧batjö 'da̧bachibö kwö̧jaduwo, bitema Diosnö öpöjödo̧danö ichejekwo̧, ja̧danö luwedö tjitea impuesto jawa balada emadödanö ichejekwo̧, jö̧ba̧lö.

¹⁸ Ja̧danö, isabenö yötawaduwakwö chömöledö, böjȩtjö kwunu'yaduwi̧ma, mölejȩbetjöbi bakwayiakobe ja̧danö böjȩtjö kwejataduwi̧ma, mölejȩbetjöbi bakwayiakobe.

¹⁹ Ja̧danö ju'wibi yötawaduwakwö chömöledö. Ökwödö ötjönö ösödadötjö du̧ju̧taja bakwainö omukwatö Diosnö akebaduwitjö̧ma, mölejȩbe jo̧ Chabe'doma akebaduwi̧danö ja̧akobe.

²⁰ Jau chömöledö, ötjönö tjösödobetjö̧ du̧ju̧tajaena wa̧medukwaena tjoko̧ko̧kwenama, ötjöbi jobadökwö jo̧sa— jö̧ba̧lö Jesús yöawinobe.

Jojodö ökwödönö sulabenö ja̧tji̧ma omukwatökönö kwösödaduwonö, jö̧ba̧lö Jesús yöawina wene

²¹ Jemi ikenama Pedroma ichö, Jesúsnö abebö a̧ja̧kwinobe: —Chuluwo̧, Dios ömöledötjö chömöledöso̧ ötjönö sulabenö ja̧itjö̧ma, sulabenö ja̧aja̧ omukwatökönö jo̧banö chösödobö jo̧be. Jo̧kwaijayonö yemidanö, yemidanö ötjönö sulabenö ja̧itjö̧ma, ¿dokwa nöinö yemidanö jo̧banö chösödobö jo̧beda? ¿Jelemutjö dötölatajanö yemidanö jo̧banö chösödobö jo̧beji̧?— jö̧ba̧lö abebö a̧ja̧kwinobe.

²² Aebökwe, Jesúsma atadinobe: —Sule jelemutjö dötölatajanödamaökö. Kabatökönö, cuatro ciento noventanö baibanö yemidanö jo̧ba sulabenö ja̧aja̧ omukwatökönö kwösödobö jo̧be.

²³ Jau chömöledö, baikwö wanedö yötawa Dios la'aka luwo̧ ö̧jakwa̧ jawama: Bakwo̧ la'aka luwo̧ ö̧jinobe, ja̧danö ju'wi möle iteda ömöayedötjö jo̧banö musidadö tjumusidi̧ tjimidobö weinobe.

²⁴ Ja̧danö, tjumusidi̧ jamatö ko̧ko̧dö ba̧ja̧dö edenama, jo̧ba ömöayedötjö bakwo̧ nöinö musido̧nö tjichejebinobe, ba̧ja̧dökenanö nöinö musido̧nö.

²⁵ Jo̧bama umusidi̧ imidobö jwiinobe, jo̧kwajabetjö̧ la'aka luwo̧ma weinobe, jo̧banöbi, ilekwonöbi, i̧tji̧munöbi ju'wedö tjömöayedö batjibanö mikwanö iyö lotjobö, ja̧danö okobe jwiinö tjujuna̧li̧ iyö lotjobö, ja̧ baladanö tjumusidaja̧ma tjimidawobö.

²⁶ Jejenö weiökwe, jo̧ba musido̧ma u̧yu̧ko̧nö bȩbachibö uluwo̧nö aebinobe: Lȩlö̧jinö edö kwo̧'wo̧ 'dibachibö kwite'ada̧litjö̧ma, okobe jwiinö chimidocha, jö̧ba̧lö.

²⁷ Jejenö aebökwe, la'aka luwo̧ma musido̧nö o̧'wo̧ tjo̧achö lȩlö̧jinö edinobe, ja̧danö umusidi̧ söbebö lobö, jo̧banö ejatinobe.

²⁸ Ikenama, umusidi̧ söbebö loajökwema uluwo̧ ö̧jelö labebajo̧, iteda uluwo̧ ömöayedötjö jelo̧nö edinobe, umusidi̧ söbebö loajökwenö ja'yubeda balada musido̧nö. Jo̧banö edö, do̧atinobe, ja̧danö u̧lume'anö do̧batö, Babeda ötjönö kwumusidi̧ miditjö, jö̧ba̧lö weinobe uluwo̧ umusidi̧ söbebö loajökwema.

²⁹ Jejenö weökwe, nijinö öbamatinobe la'aka luwo̧ ömöayo̧ma, ja̧danö aebinobe: Lȩlö̧jinö edö kwo̧'wo̧ 'dibachibö kwite'ada̧litjö̧ma, okobe jwiinö chimidocha, jö̧ba̧lö aebinobe.

³⁰ Jejenö aebijayonö, öpöjödinobe, ja̧danö lȩlö̧jinö edökönö, jo̧banö ka̧lena tjödobö weinobe, okobe jwiinö imidenanö kabatö.

³¹ Jejenö baledobe edö, ju'wedö la'aka luwo̧ ömöayedöma tjo̧'wo̧ tjo̧achinobe, ja̧danö la'aka luwo̧nö yötjawinobe, Umusidi̧ söbebö loköbajökwema, jelo̧nö lȩlö̧jinöma edokobe, jö̧ba̧lö.

³² Yötjawökwe, la'aka luwo̧ma ömöayo̧nö jwöinobe, ichobö. Ichajo̧nö la'aka luwo̧ma yöawinobe: ¡Ökwöma isabenö chömöayedötjö mikwawö̧kö̧ja! jö̧ba̧lö. Ötjönö akebobetjö̧, okobe jwiinö kwumusidina söbebö lotatö,

³³ ja̧danö ökwöma bakwainö ökwönö musido̧nö lȩlö̧jinö kwedo jö̧ka̧lajabe, ökwönö lȩlö̧jinö chedaja̧danö.

³⁴ Ja̧danö, jwiinö dameakwö, la'aka luwo̧ma jo̧ba ömöayo̧bajo̧nö weinobe, ka̧lena ö̧bobö, okobe jwiinö umusidi̧ imidenanö kabatö— jö̧ba̧lö wanedö yöawinobe Jesúsma.

³⁵ Tupakwö yöawinobe Jesúsma: —Mölejȩbe jo̧ Chabe'dobi ja̧danö chömöledö. Ökwödöma kwöjawo̧ sulabenö ja̧aja̧ omukwatökönö isabenö jo̧banö kwösödökötjö̧ma, Diosma ökwödö sulabenö ja̧köbaduwaja̧bi söbebö loökena— jö̧ba̧lö yöawinobe.