Mateo 17 - Dios Iwene

Jesús iteda ujulu mö'ösa'otjö i̧sebina wene

¹ Jemi ikenama, jelemutjö bakwöta möle baledibajenama, Jesúsma Pedronöbi, Jacobonöbi, Jacobo öjawo̧ Juannöbi öbibö, mö'ösa'o möa'o önöchinobe jobadökwöda.

² Ja̧danö, jobe ja̧nö tjedemi, Jesús öbalewachobe tjedinobe. Jo̧ba öbama jawo̧ idejati̧danö dejatinobe, ja̧danö ökamijido̧ma salöinö dewinobe.

³ Ikenama Dios yöawi̧ yöbawinadö damötjö ji̧nadö Moisésnöbi, Elíasnöbi, tjedinobe, öwawachö Jesúskwö yötja̧lakwawobema.

⁴ Jejenö edö, Pedroma Jesúsnö yöa̧linobe: —Duluwo̧, isabenö otiwa, ökwödö kwöba̧ja̧di̧ waisachadö bena ökwödökwö dö̧jobö. Kwösöditjö̧ma löwötebiya wa̧pötekwa chotidena, ökwö bakwöte, Elías bakwöte, Moisés bakwöte kwölöwötebiyaduwi— jö̧ba̧lö.

⁵ Pedro ina jejenö yöa̧lonö, ojwiyo'wo dewinö dejata'wo jobadö tjöwamenö öwawachinobe, ja̧danö ja'wotjö̧ iwene ökwöinobe baikwö ökwöi̧ma: —Bitema ötjöda chösödökwe chitji̧, cho̧'wo̧ ösöwanö chedobe jo̧banö. Jo̧banö kwa̧ja̧kwaduwo— jö̧ba̧lö iwene ökwöinobe.

⁶ Ja̧ iwene ökwöi̧ a̧ja̧kwö, jobadö wa̧medukwa Jesús öba̧ja̧di̧ waisachadöma yetjaibinobe yelösöda, ja̧danö yebabinö tjöba nijakwö tjöbamatinobe nijinö.

⁷ Ikenama Jesúsma ichö jobadönö mabö yöa̧linobe: —A̧laibaduwi, yebabökönaduwi— jö̧ba̧lö.

⁸ Ja̧danö, möakwö tjedenama, Jesúsnöda tjedinobe, ju'wedö detjinobe.

⁹ Jemi ikenama, mö'ösa'obetjö yututjajenama, Jesúsma jobadönö weinobe: —Ja̧ kwedaduwaja̧ma, ju'wedönö yöbawökönaduwi, ötjö jojo baibanö jeminökwema wobajaletjö tjetachajenanö kabatö— jö̧ba̧lö.

¹⁰ Ikenama, Jesús öba̧ja̧di̧ waisachadöma jo̧banö abebö tja̧ja̧kwinobe: —Moisés iwȩyudina ba̧ja̧dadöma yötjawobe, Dios weakwo̧ jö̧a̧linökwe ichakwa̧ abönö, Elíasma abönö ichakwo̧ jö̧ba̧lö. Jejenö yötjawi̧ma, ¿tajawedö yötjawobeda?— jö̧ba̧lö abebö tja̧ja̧kwinobe.

¹¹ Atjebökwe, Jesúsma atadinobe: —Isabenö yötjawi̧danö Elías abönö ichobö jo̧be, okobe jwiinö Dios weakwo̧ ichakwa̧ jawa otidobö.

¹² Jo̧kwaijayonö, baikwö yötawaduwakwö chömöledö: Jo̧ba Elíasma ida̧ökö ichinobe, jo̧kwaijayonö jojodöma jo̧banö wajwitjinobe, ja̧danö idöda tjösödi̧danö jo̧banö sulabenö ja̧tjinobe. Ja̧danö jo̧banö sulabenö ja̧tjinadanö, ötjö jojo baibanö jeminökwenö sulabenö ja̧tjakwedö— jö̧ba̧lö atadinobe Jesúsma.

¹³ Jejenö yöawiawö̧, Jesús öba̧ja̧di̧ waisachadöma tjöwaisachibinobe, Elíasma ida̧ökö ichinobe jö̧a̧laja̧ badekwachi̧ma, Juan Ojwenö Bu̧dato̧ ötjabökwenö badekwachinobe, jö̧ba̧lö.

Jesús tjemu o̧'wo̧ luwo̧nö sulabo̧ ö̧jökwenö otidö loina wene

¹⁴ Jesúsma iteda öba̧ja̧di̧ waisachadökwö mö'ösa'otjö ȩwa̧jö, jojodö tjö̧jobe tjichibenama, bakwo̧ Jesús öba a'o ichibö bȩbachibö Jesúsnö aebinobe:

¹⁵ —Chuluwo̧, chitji̧nö lȩlö̧jinö edö pjabati. Jo̧bama nöinö mebö bulukanö 'dö̧bachibö usula emawo̧, ja̧danö ju'wikwenama ökwölanöbi mebo̧, ja̧danö ju'wikwena ojwe okwa mebo̧ chitji̧ma.

¹⁶ Jejenö ö'wöchobetjö̧ jo̧banö ichejebö, kwöba̧ja̧di̧ waisachadönö pjatjatobö atebijayonö, waekwatö, jo̧banö pjatjatoböma tjujuluwökötö. ¿Ökwöma pjakatakwa̧ji̧?— jö̧ba̧lö aebinobe Jesúsnö.

¹⁷ Jejenö yöa̧lökwe, Jesúsma yöa̧linobe: —Ökwödö babe möle ju̧kwadöma sulabenö omukwatadöja, ja̧danö Dios ujulu otiwanö ösödöködöja. ¿Dokwa lekwe ökwödökwö chö̧jakwa̧jö, otiwanö jweinö kwomukwataduwenanö kabatöma?— jö̧ba̧lö. Ikenama Jesúsma weinobe: —Tjemunö baikwö ichejebinö— jö̧ba̧lö.

¹⁸ Ikenama, Jesúsma tjemu o̧'wo̧ luwo̧nö sulabo̧nö weinobe, tjemutjö laebobö, ja̧danö laebenama, juluwanö otiwanö baibinobe tjemuma.

¹⁹ Ikenama, ju'wedö tja̧ja̧kwokonö Jesús öba̧ja̧di̧ waisachadöma ichö Jesúsnö abebö tja̧ja̧kwinobe: —Ökwödö o̧'wo̧ luwo̧nö sulabo̧nö a'dewö lodobö jö̧da̧laja̧ma, ¿tajawedö waekwaja̧da?— jö̧ba̧lö.

^20-21 Atjebökwe: —Ökwödöma otiwanö Dios ujulu kwösödaduwokobetjö̧ waekwadöja. Isabenö yötawaduwakwö, atebi̧danö ja̧obö isabenö juluwo̧ Diosma jö̧ba̧lö isabenö Dios ujulu kwösödaduwitjö̧ma, kwösödaduwi̧ ja'yuwijayonö, wanedö yötawa, mostazasade ja'yuwi̧danö kwösödaduwi̧ ja'yuwijayonö, jwaikwöda Dios yöawi̧ ösödö weköbaduwenama baibakobe. Ja̧danö, wanedö yötawa, bi'o mö'ösa'o weköbaduwena, yaikwö pjolachibi jö̧ba̧lö, ja̧danö pjolachibena. Jau chömöledö, isabenö atebi̧danö ja̧obö juluwo̧ Diosma jö̧ba̧lö otiwanö Dios ujulu kwösödaduwitjö̧ma, okobe jwiinö ja̧köbaduwobö kwujuluwaduwena— jö̧ba̧lö yöawinobe Jesúsma.

Jesús ö'wö baibakwa̧ yöawina wene

²² Jemi ikenama, Galilea nijinö ja̧nö tjoko̧ko̧kwenama, Jesúsma iteda öba̧ja̧di̧ waisachadönö yöawinobe: —Ötjö jojo baibanö jeminökwenö iyö lotjakobe,

²³ ötjönö kwabö lotjobö, jo̧kwaijayonö ötjönö kwabö lotjaja̧ ikenama, wa̧pötakwa möle baledibajenama, 'yabibajö wobajaletjö tjetachajakwo̧sa— jö̧ba̧lö. Jejenö ö'wö baibakwa̧ yöawawö̧, Jesús öba̧ja̧di̧ waisachadöma nöinö tjo̧'wo̧ tjo̧achinobe.

Dios eju balada jawa tjimidina wene

²⁴ Jobadö Capernaúm nijibe tjichibenama, Dios eju jawa impuesto ötjabi̧ balada emadöma Pedronö ichö abebö tja̧ja̧kwinobe: —Ökwödönö ba̧ja̧do̧ Jesúsma ¿Dios eju jawa balada imidökenaji̧?— jö̧ba̧lö.

²⁵ Atjebökwe: —Jau, jo̧babi ja̧ balada mido̧— jö̧ba̧lö atadinobe Pedroma. Ikenama, Pedro ejube ichibenama, Pedro ja̧ jawa yöa̧lakwa̧ abönö Jesúsma Pedronö abebö a̧ja̧kwinobe: —Simón, ¿dakwö kwomukwata? Böjȩtjö la'aka luwedöma, impuesto midawa wetjenama, ¿didönö wetjobeda, impuesto jawa baladabi, ju'wi jawa baladabi tjimidobö? ¿Idöda tji̧tji̧munö wetjiji̧? ¿Ju'wedönöda wetjiji̧?— jö̧ba̧lö.

²⁶ Aebökwe: —Idöda tji̧tji̧munö weböködö. Ju'wedönöda tjimidobö webadö— jö̧ba̧lö atadinobe Pedroma. Yöa̧lökwe Jesúsma jö̧a̧linobe: —Jau, jejenö jo̧betjö̧, la'aka luwedö tji̧tji̧muma midöködö, ¿jö̧tö? Ja̧danö Dios itji̧chobetjö̧, ötjöbi ja̧ Chabe'do Dios eju jawa balada chimidobö jwibo̧sa, jo̧ba itji̧chobetjö.

²⁷ Jo̧kwaijayonö bidö jojodö ökwödönö tjöpöjödapji jö̧ba̧lö, o̧pesobube 'ya̧nö, ba̧i̧ lö̧'a̧waji. Ja̧danö, abönö do̧katajökwe ba̧i̧so̧ aa kwalebenama, baladasapi̧ kwöbadekwajakobe. Ja̧ baladasapi̧nö Dios eju jawa impuesto kwimido, ökwöbi, ötjöbi dimido jö̧da̧li̧ma— jö̧ba̧lö jö̧a̧linobe Jesúsma, Pedronö.