Mateo 16 - Dios Iwene

Fariseo jojodöbi, Moisés iwȩyudina ba̧ja̧dadöbi Jesús iteda ujulu i̧sebobö atjebina wene

¹ Jemi ikenama fariseo jojodötjöbi, saduceo jojodötjöbi ju'wedöma ichö Jesúsnö atjebinobe dakwö ja̧ojobö jö̧ba̧lö: —Ökwöma isabenö Dios weökweköbitjö̧ma, jojodö edajitjökö jawa ja̧bi, ökwönö döwaisachibakobetjö̧— jö̧ba̧lö.

² Atjebökwe, Jesúsma atadinobe: —Ökwödöma mölejȩ edö, ojwiyo o̧bakwa̧ waisadöja, ¿jö̧tö? Ja̧danö, yi̧benakwö mölejȩ duwitjö̧ma, Aaa, ojwiyo o̧bökena, jö̧ba̧lö kwöwaisaduwa, ¿jö̧tö?

³ Jo̧kwaijayonö yȩayi mölejȩ duwitjö̧ma, ja̧danö yȩitjö̧ma, Aaa, ojwiyo o̧bena, jö̧ba̧lö kwöwaisaduwena, ¿jö̧tö? Jau, mölejȩ edö, ojwiyo o̧bakwa̧ waisadöja, ja̧danö babe baledi̧ edö, ötjönö kwöwaisaduwobö jo̧be. Baikwö yötawa: Mölejȩ i̧sebi̧danö, kwöba a'oduwitjö chi̧sebi̧ jawama öwaetjöda i̧sebobe ötjönö kwöwaisachibaduwobö. Jo̧kwaijayonö babe chi̧sebi̧ jawa badekwachi̧ma öwaetjöda öwawijayonö waisachiböködöja.

⁴ Ökwödö babe möle ju̧kwadöma sulabedöja, ja̧danö Diosnö kabatibadö kwö̧jaduwobetjö̧, jojodö edajitjökö jawa i̧sekwa abebadöja. Jo̧kwaijayonö akebaduwi̧danöma chi̧sebökö. Dios weökwe chö̧ji̧ i̧seböma sule bakwöta jawada chi̧sebocha, Dios yöawi̧ yöbawo̧ Jonás mikwo̧nö baledinadanö. Jonas ba̧i̧so̧ ukwa'wo okwa a̧jina baledinadanö baledakwa̧da chi̧sebocha— jö̧ba̧lö yöawinobe Jesúsma. Ikenama, jejenö yöbawajo̧, jobadötjö 'da̧bachibö jelobe i̧'yinobe.

Pan ye'yeachi̧ jawa Jesús wanedö yöawina wene

⁵ Jesús öba̧ja̧di̧ waisachadö bakwachobube tji̧'yenama, pan tje'ewo jö̧tja̧lijayonö tjo̧'wo̧ jwitjibinobe, ja̧danö jwiinö tji̧'yinobe.

⁶ Ikenama Jesúsma jobadönö yöawinobe: —Tjöbeba̧löjönö edö kwö̧jaduwo chömöledö. Fariseo jojodöbi, saduceo jojodöbi tju̧kwa pan ye'yeachi̧ jawama labi̧— jö̧ba̧lö.

⁷ Jejenö yöawawö̧, Ja̧ma ¿tajawedö yöa̧laja̧da? jö̧ba̧lö yötja̧lakwawinobe idödada, ja̧danö tjomukwatinobe, Aaa, pan dichejebiökökwe yöa̧lajena, jö̧ba̧lö.

⁸ Jesúsma jobadö tjomukwati̧ öwaisinobe, jo̧kwajabetjö̧ jobadönö yöawinobe: —Ökwödöma ja'yubeda chujulu ösödadöja chömöledö. ¿Tajawedö pan jwiköbaduwi̧ yöka̧lakwawaduwobeda?

⁹ ¿Ina chujulu kwöwaisachibaduwökiji̧? ¿Bakwamu jawa ö̧pji̧yatjö cinco milbedönö kwakwawa chiyina kwomukwataduwökiji̧? Jejenö chiyenama, ji̧baja̧ ¿dokwa ba̧jekwayu̧ wi̧lȩyu̧bi̧ya kwoko̧ko̧daduwinada?

¹⁰ Ja̧danö jelemutjö döpja̧latajatjö cuatro milbedönö kwakwawa chiyenama, ¿dokwa ba̧jekwayu̧ ji̧baja̧ kwoko̧ko̧daduwinada?

¹¹ Ja̧ baledina waisö, ¿tajawedö kwöwaisaduwokobeda, yöta̧laja̧ma, pan jawa yöta̧lökö jö̧ba̧lö? Jau chömöledö, otiwanö kwite'ada̧laduwo, fariseo jojodöbi saduceo jojodöbi tju̧kwa ye'yeachi̧ jawa kwösödaduwapji jö̧ba̧lö— yöawinobe Jesúsma.

¹² Jejenö yöawawö̧, tjöwaisachibinobe, Aaa, pan ye'yeachi̧ jawa yöa̧laja̧ badekwachi̧ma, pan jawamaökö, fariseo jojodöbi, saduceo jojodöbi sulabenö yötjawi̧da badekwachobe, jö̧ba̧lö.

Pedro, Jesúsnö isabenö Dios weakwo̧ jö̧a̧linökweja, jö̧a̧lina wene

¹³ Cesarea de Filipo ötjabi̧ nijibe ichibajadö, Jesúsma iteda öba̧ja̧di̧ waisachadönö abebö a̧ja̧kwinobe: —Chömöledö, ¿dakwö yötja̧lobe jojodöma ötjö jojo baibanö jeminökwenö, tijö jö̧ba̧lö?—

¹⁴ Aebawö̧, tjatadinobe: —Ju'wedöma ökwönö yötja̧lobe, Juan Ojwenö Bu̧dato̧ena, ju'wedöma Dios yöawi̧ yöbawina Elías mikwo̧ena, ju'wedöma Dios yöawi̧ yöbawina Jeremías mikwo̧ena, ja̧danö ju'wedöma Dios yöawi̧ yöbawadötjö jelo̧ena, jö̧ba̧lö yötja̧lobe ökwönö— jö̧ba̧lö tjatadinobe.

¹⁵ Yötja̧lökwe, abebö a̧ja̧kwinobe: —¿Ökwödöja? ¿Kwedaduwemi tichobeda ötjöma?— jö̧ba̧lö.

¹⁶ Aebökwe Simón Pedroma atadinobe: —Ökwöma Dios weakwo̧ jö̧a̧linökweja, 'yaba̧lo̧ Dios itji̧ja— jö̧ba̧lö atadinobe.

¹⁷ Jejenö yöa̧lökwe Jesúsma Pedronö yöa̧linobe: —Isabenö kwo̧'wo̧ ösöwanö jo̧ja ökwö Jonás itji̧ Simón, Diosda ja̧ ökwönö öba̧ja̧dinobetjö̧. Jau chömöledöso̧, jojodödama ja̧ tjöba̧ja̧dinokobe ökwönö. Diosda ja̧ öba̧ja̧dinobe ökwönöma.

¹⁸ Ja̧danö baikwö yötawakwö: Ökwöma inawa jö̧ba̧lö Pedro mikwo̧ja, ja̧danö wanedö yötawa, ötjöma biwa inawa wame chejudanöbedö chömöledönö chujunocha. Ja̧danö, isabenö yötawakwö, chejudanöbedöma isabenö 'diinö tjö̧jakwedö, ja̧danö woawama jobadönö juluwökakobe.

¹⁹ Ja̧danö, ökwönö mölejȩbe jo̧ la'aka luwo̧ ö̧jena yawepi̧ chiyocha, ja̧danö böjȩtjö kwunu'yaja̧ma, mölejȩbetjöbi bakwainö kwunu'yaja̧ ja̧kobe, ja̧danö böjȩtjö kwejataja̧ma, mölejȩbetjöbi bakwainö kwejataja̧ ja̧kobe— jö̧ba̧lö.

²⁰ Jemi ikenama iteda öba̧ja̧di̧ waisachadönö jweinö weinobe: —Jojodönö yöbawökönaduwi, Dios weakwo̧ jö̧a̧linökwema Jesúsda jö̧ba̧löma—.

Jesúsma usula emawakwa̧bi, ö'wö baibakwa̧bi yöawina wene

²¹ Ja̧ möle jamatö, tupakwö bajalenö Jesúsma iteda öba̧ja̧di̧ waisachadönö jweinö yöawinobe: —Jerusalénbe chi̧'yobö jo̧be. Ja̧danö, jobetjö Israel jojodötjö damötjöbi, Diostjö jojodötjö ö'weje pjabatadö la'aka tjuluwedötjöbi, Moisés iwȩyudina ba̧ja̧dadötjöbi usula chemawobö ja̧kobe, ja̧danö ötjönö kwabö lotjobö ja̧kobe. Ja̧danö, jemi tupakwö wa̧pötakwa möle baledibajenama wobajaletjö tjetachajobö ja̧kobe— jö̧ba̧lö.

²² Jejenö yöawökwe, Pedroma jo̧banö do̧batö yöa̧linobe: —Chuluwo̧, sulabenö yöka̧la. Jejenöma la'akatjöda baledökena ökwönö, Dios weökena— jö̧ba̧lö.

²³ Yöa̧lökwe, Jesúsma jalachibö Pedronö yöa̧linobe: —¡'Da̧bachibö da̧ji Pedro!, sulabenö Awetja yöa̧li̧da yöka̧lobetjö̧, ja̧danö jweinö Dios ösödi̧danö chi̧'yapji jö̧ba̧lö tjökeba̧lobetjö̧. Jau Pedro, biya̧ kwomukwati̧ma Diostjö ichökö ji̧, jojodö tjo̧mukwatida— jö̧ba̧lö yöa̧linobe.

Chöba̧ja̧di̧ waisachadöma usula tjemawakwedö, jö̧ba̧lö Jesús yöawina wene

²⁴ Ikenama Jesúsma iteda öba̧ja̧di̧ waisachadönö yöawinobe: —Chömöledö, baikwö wanedö yötawa: Bakwo̧ ötjö chöba̧ja̧di̧ waisacho̧ baibobö ösöditjö̧ma, iteda ösödi̧ jawa junibö, iteda woakwa'o towisa'o kabebö, ötjö chökömanö ichobö jo̧be.

²⁵ Jau chömöledö, baikwö yötawa: Bakwo̧ iteda otiwanö ö̧jobö isakwitjö̧ma, waekwena, isabenö ja̧kwawama öbadekwajökena. Jo̧kwaijayonö ötjönö ösödobetjö̧ ö'wö babibo̧ma, jo̧bama isabenö ja̧kwawa öbadekwajakwo̧.

²⁶ Jau chömöledö, bakwo̧ okobe jwiinö böjȩ jawa juna̧lo̧ woitjö̧ma, ¿okobe jwiinö böjȩ jawa ujuna̧li̧ma jo̧banö pjaatenaji̧? Pjaatokobe, ¿jö̧tö? Jau chömöledö, okobe jwiinö ujuna̧li̧ iyitjö̧böbi, yemidanö ja̧kwawa emobö jwiena.

²⁷ Jau chömöledö, ötjö jojo baibanö jeminökwema, Chabe'do Dios ujulunö chömöayedö ángelesdökwö yemidanö chichocha, ja̧danö jejenö chichenama, lȩbebö chichocha, jojodö ja̧tjaja̧ mikwa baibanö.

²⁸ Ja̧danö, isabenö yötawaduwakwö, ökwödö ötjökwö ju̧kwadö chöba̧ja̧di̧ waisachadötjö ju'wedö tjuju̧kwobe, wotjakwa̧ abönö ötjö jojo baibanö jeminökwe yöbawö webö chö̧jakwa̧ tjedakwedöma— jö̧ba̧lö yöawinobe Jesúsma.