Mateo 15 - Dios Iwene

Jesús tjömamu dichawakwawa jawa yöawina wene

¹ Jemi ikenama, ju'wedö fariseo jojodötjöbi, Moisés iwȩyudina jawa ba̧ja̧dadötjöbi Jerusaléntjö Jesús ö̧jobekwö tjichinobe, ja̧danö Jesúsnö abebö tja̧ja̧kwinobe:

² —Kwöba̧ja̧di̧ waisachadöma, ¿tajawedö da'dödömine wetjinadanöma ja̧böködöda? Da'dödöminema, dukwakwa̧ abönö otiwanö dömamiju didichawobö wetjinobe, jo̧kwaijayonö ja̧ tjidichawobö wetjinadanöma dichawöködö kwöba̧ja̧di̧ waisachadöma, tjukwakwa̧ abönöma— jö̧ba̧lö abebö tja̧ja̧kwökwe,

³ Jesúsma atadinobe: —¿Ökwödöja? ¿Tajawedö Dios wei̧ junibö, ökwödötjö wetji̧da ja̧bö kwö̧jaduwobeda?

⁴ Dios weinama baikwö laebobe: Kwabe'doduwinöbi, kwojo'doduwinöbi otiwanö omukwatö kwö̧jaduwo, jö̧ba̧lö. Ja̧danö, ju'wibi laebobe baikwö: Ökwödötjö bakwo̧ iteda abe'donöbi, iteda ojo'donöbi öpöjödö sulabenö yöa̧litjö̧ma, jo̧ba sulabenö yöba̧lo̧nö kwabö lotjobö jo̧be, jö̧ba̧lö laebobe Dios weinama, ¿jö̧tö?

⁵ Jau, Dios weinobe, tjabe'donöbi, tjojo'donöbi otiwanö omukwatö tjö̧jobö, ja̧danö ja̧ wei̧ma öwaetjöda i̧sebobe, tjabe'donöbi tjojo'donöbi otiwanö omukwatö, jobadönö tjite'ada̧lobö jo̧be jö̧ba̧lö, ¿jö̧tö? Jo̧kwaijayonö jejenö laebijayonö, ökwödöma ja̧ weina tjujunibobö webadöja baikwö: Tjabe'donö ja̧danö tjojo'donö te'ada̧lökönö, jobadönö tjiyo jö̧tja̧laja̧ma Diosnöda tjiyitjö̧ma, otiwena. Tjabe'donöbi tjojo'donöbi tjiyo jö̧tja̧laja̧ma Diosnö tjiyobetjö̧, wene jwiinö Dios tjite'ada̧lobö weina tjujunibena jö̧ba̧lö sulabenö webadöja.

⁶ Jejenö ökwödöma webö, Dios öwaetjöda weina junibö, ökwödö weköbaduwi̧da ja̧tjobö webadöja sulabenö.

⁷ Ökwödö dötölatajanö omukwatadönö badekwachobe Dios yöawi̧ yöbawo̧ Isaías damötjö iwȩyudinama:

⁸ Bidöma, Diosnö ösödadösa, jö̧ba̧lö yötja̧lijayonö, tjomajadenö otiwanö omukwatöködö ötjönöma.

⁹ Bidöma, Diosnö ösödadösa. Dios wei̧ ba̧ja̧dadösa, jö̧ba̧lö yötja̧lobe. Jo̧kwaijayonö jejenö yötja̧lijayonö, omöna, böjȩ jojodö tjomukwati̧da tjöba̧ja̧dobe, Dios wei̧ ba̧ja̧dadösa jö̧ba̧lö. Jo̧kwajabetjö̧ Diosnö ösödadösa jö̧ba̧lö yötja̧li̧ma mikwawokobe. Isabenö otiwanö tjomukwatokobe ötjönöma, jö̧ba̧lö laebobe Isaías iwȩyudinama— jö̧ba̧lö atadinobe Jesúsma.

Jojodönö suli̧ waedi̧ jawa Jesús yöawina wene

¹⁰ Jemi ikenama Jesúsma jojodönö jwöinobe, ö̧jobekwö tjichobö, ja̧danö ichajadönö yöawinobe: —Chömöledö, yötawi̧ a̧ja̧kwaduwi, kwöwaisachibaduwakobetjö̧.

¹¹ Isabenö yötawaduwakwö, jojodö tjaa okwa teachi̧ jawa tjukwi̧ma, suli̧ waedökö ji̧. Sule tjaatjö laebi̧ jawa, yötja̧li̧ jawada, suli̧ ja̧i̧— jö̧ba̧lö yöawinobe.

¹² Jemi ikenama Jesús öba̧ja̧di̧ waisachadöma ichö jo̧banö yötja̧linobe: —Ja̧ yökawiawö̧, fariseo jojodöma tjöpöjödajabe— jö̧ba̧lö.

^13-14 Jejenö yötja̧lökwe Jesúsma atadinobe: —Jobadö tjöpöjödi̧ma kwo̧'wo̧ tjo̧kekwaduwa. Jobadöma mölejȩbe jo̧ Chabe'do ujuninököwö̧. Ja̧danö baikwö wanedö yötawa: Okobe jwiinö Chabe'do batjonö ujuninökö jawama, 'yebö lotjakobe. Jo̧kwajabetjö̧ tjöpöjödi̧ma kwomukwataduwa chömöledö. Jobadöma, Jojodönö otiwanö öbibadösa, jö̧ba̧lö yötja̧lijayonö, otiwanöma öbiböködö. Jobadöma tjöbajale tjewawadö ja̧nö, ju'wedö tjöbajale tjewawadönö ötjibobe. Ja̧danö, kwöwaisaduwa chömöledö, bakwo̧ öbajale tjewawo̧ma jelo̧ öbajale tjewawo̧nö öibitjö̧ma, laju okwa bakobe metjakwedö— jö̧ba̧lö yöawinobe.

¹⁵ Ikenama Pedroma Jesúsnö aebinobe: —Jo̧da yöka̧laja̧ma, labebö lobö yökawo ökwödönö— jö̧ba̧lö.

¹⁶ Aebökwe, Jesúsma yöa̧linobe: —¿Ökwödöbi ju'wedö wajwitji̧danö ina wajwibadö kwö̧jaduwiji̧?

¹⁷ ¿Kwakwawa tjukwi̧ wajwiköbaduwiji̧? Okobe jwiinö tjaanö a̧jibima, tjukwa'wo okwa a̧jibi̧, ja̧danö jemi ikenama yo'obö lotji̧, ¿jö̧tö?

¹⁸ Jo̧kwaijayonö jejenömaökö tjaatjö laebi̧ yötja̧li̧ma. Tjaatjö laebi̧ma, tjomajadetjö laebi̧, ja̧danö ja̧da suli̧ ja̧i̧ma.

¹⁹ Jau chömöledö, okobe jwiinö sulabenö tjomukwati̧ma, tjomajadetjö laebi̧, jojodönö kwabö lotjobö tjomukwati̧bi, tji̧lȩkwa̧muböködökwö sulabenö ja̧awa ja̧danö ju'wibi sulabenö 'da̧'da̧akwawa ja̧awa ja̧tjobö tjomukwati̧bi, tjönaukwobö tjomukwati̧bi, omöna yötja̧lobö tjomukwati̧bi, jojodönö sulabenö yötja̧lobö tjomukwati̧bi.

²⁰ Ja̧ jawama isabenö suli̧ ja̧i̧ chömöledö, jo̧kwaijayonö tjömamiju dichawökönö kwakwawa tjukwi̧ma suli̧ ja̧ökö ji̧— jö̧ba̧lö yöawinobe Jesúsma.

Cananea jojosujunö Jesús pjaatina wene

²¹ Jesúsma jobetjö labebö, judío jojodöböködö tjitebo pjeanö kweachinobe, Tiro comunidadbi, Sidón comunidadbi ö'öbö niji.

²² Jobe kweachonö, bakwuju judío jojobökuju, cananea jojosuju jobe jö̧juma, Jesús ö̧jobekwö ichö jo̧banö jwöjinobe: —David itji̧ tupadanö jojo, lȩlö̧jinö edö pjakatobö ateba. Chitjijuma jo̧'wo̧ luwo̧nö sulabo̧ ö̧joko nöinö usula emawuju— jö̧ba̧lö jwöbeba̧lö ajebinobe.

²³ Jejenö jwöjeba̧lijayonö, Jesúsma atadinokobe. Ikenama, jwöjiawö̧, Jesús öba̧ja̧di̧ waisachadö öpöjödachibö Jesúsnö atjebinobe: —Jobujunö jȩwa̧jobö webijö. Ökwödö dökömanö aliawinö luba̧libö labinö jwöbeba̧luju— jö̧ba̧lö.

²⁴ Jesúsma jobujunö yöa̧linobe: —Israel jojosujubökujuja ökwöma, ja̧danö ötjöma Israel jojodöböködönö pjatatoböma weökökwesa. Israel jojodötjö o̧bȩja̧dö le'dewadödanöbedönöda pjatatobö Dios weökwesa— jö̧ba̧lö.

²⁵ Yöa̧loko, ichö Jesús öba a'o bȩbachibö ajebinobe: —Chuluwo̧, pjabatitjö— jö̧ba̧lö.

²⁶ Yöja̧lökwe Jesúsma atadö wanedö yöa̧linobe: —Tjemu tju̧kwa kwakwawama, a̧wi̧li̧dönö iyö lotjoböma otiwökö— jö̧ba̧lö, Israel jojodö jawama Israel jojodöböködönö chiyoko jö̧ba̧lö.

²⁷ Yöa̧loko, jatadinobe: —Isabenö yöka̧lobe chuluwo̧, jo̧kwaijayonö ju'wibi a̧wi̧li̧döma tjuluwedö tju̧kwa kwakwawatjö mesasötetjö tjoduwaja̧ma kwadö— jö̧ba̧lö jatadinobe.

²⁸ Yöja̧lökwe, Jesúsma jobujunö yöa̧linobe: —Jojosuju, isabenö otiwanö kwo̧'wo̧ wana̧lujuja. Akebaja̧danö isabenö baledakobe— jö̧ba̧lö. Ja̧danö, jejenö yöa̧lenama, jitjijuma juluwanö otiwanö bajibinobe.

Jesús cuatro mil tupakwö jojodönö kwakwawa iyina wene

²⁹ Jesúsma jobetjö labebajo̧, Galilea o̧pesobu ö'öbönö kweachinobe, ja̧danö mö'ösa'o nöchajo̧, öbamatinobe.

³⁰ Ba̧jekwadö jojodöma jo̧ba ö̧jobekwö tjichinobe, ja̧danö ba̧jekwadö ö'wöchadönö tjichejebinobe, kwebachöködönöbi, tjöbajale tjewawadönöbi, 'delacha̧ladönöbi, yöba̧löködönöbi, ja̧danö Jesús öba a'o tjujuniökwe, Jesúsma okobe deinö jobadönö otidö loinobe.

³¹ Jojodö tjöbajale jalaka baibanö yöba̧löködö yötja̧lobe tja̧ja̧kwinobe, ja̧danö 'delacha̧ladö otiwanö babibajadönö tjedinobe, ja̧danö kwebachöködö kwetjachobe tjedinobe, ja̧danö tjöbajale tjewawadö otiwanö tjedobe tjedinobe. Jejenö edö, Israel jojodö tjuluwo̧ Diosnö tjösödinobe, otiwanö pjabato̧ja jö̧ba̧lö.

³² Ikenama Jesúsma iteda öba̧ja̧di̧ waisachadönö jwöinobe, ja̧danö jobadönö yöa̧linobe: —Bidö jojodönö cho̧'wo̧ tjo̧achobe, ida̧ökö wa̧pötakwa möle baledibanö ötjökwö tjö̧jajabe, ja̧danö kwakwawa tjukwoböma jwibadö. Tjȩwa̧jobö wetoböma chöpöjöda, tjȩwa̧jemi ja'ö a̧wi̧chi̧tjö 'dö̧bachibö metjapji jö̧ba̧lö— yöa̧linobe.

³³ Yöa̧lawö̧, Jesús öba̧ja̧di̧ waisachadö tjatadinobe: —Duluwo̧, jojodö tjuju̧kwokobe dö̧jobe baima, ja̧danö yelösöda ba̧jekwadö bidöma, jo̧kwajabetjö̧ ¿dakwö kwakwawa demobö, Duluwo̧?— jö̧ba̧lö.

³⁴ Yötja̧lökwe, Jesúsma abebö a̧ja̧kwinobe: —¿Dokwa ba̧jekwaö̧pji̧ya panma kwujuna̧laduwobeda?— jö̧ba̧lö. Abebö a̧ja̧kwawö̧: —Sule jelemutjö döpja̧latajada, ja̧danö ja'yubeda ba̧i̧ pjebadöda— jö̧ba̧lö tjatadinobe.

³⁵ Ikenama Jesúsma jojodönö weinobe, nijinö tjöbamatobö,

³⁶ ja̧danö jelemutjö döpja̧lataja pan ö̧pjiyabi, ba̧i̧bi emibö, Diosnö aebinobe, Otiwanö iyo̧ja, jö̧ba̧lö. Ikenama abebajo̧, 'delawö iteda öba̧ja̧di̧ waisachadönö iyinobe, jojodönö tjiyabobö.

³⁷ Okobe deinö jojodöma tjomeawachibanö tjukwinobe, ja̧danö tjukwaja̧ ikenama, ji̧baja̧ jelemutjö döyulataja su̧'bȩyubiya tjoko̧ko̧dinobe Jesús öba̧ja̧di̧ waisachadöma.

³⁸ Okobe deinö kwajadötjö ömadöma, cuatro mil tjukwinobe, ja̧danö ya̧dötjöbi, tjemutjöbi ba̧jekwadö tjukwinobe.

³⁹ Ikenama Jesúsma jojodönö weinobe tjȩwa̧jobö, ja̧danö webajo̧, isowinö a̧jibö, Magdala nijibe i̧'yinobe.