Mateo 1 - Dios Iwene

Jesús a'dödönö Mateo iwȩyudina wene

¹ Baikwö laebobe Jesucristo a'dödöminenö yöawa'yema. Jo̧ba Jesucristoma Davidmine itji̧ tupadanö jojo, ja̧danö Davidma Abraham itji̧ tupadanö jojoinobe. Baikwö laebobe Jesucristo a'dödöminenö yöawa'yema:

² Abrahamma Isaac mikwo̧ abe'doinobe, ja̧danö Isaacma Jacob mikwo̧ abe'doinobe, ja̧danö Jacobma Judá mikwo̧bi, Judá ö̧ja̧wo̧döbi tjabe'doinobe.

³ Judáma Tamar mikwuju ji̧tji̧mu Fares mikwo̧bi, Zara mikwo̧bi tjabe'doinobe, ja̧danö Faresma Esrom mikwo̧ abe'doinobe, ja̧danö Jezrónma Aram mikwo̧ abe'doinobe.

⁴ Aramma Aminadab mikwo̧ abe'doinobe, ja̧danö Aminadabma Naasón mikwo̧ abe'doinobe, ja̧danö Naasónma Salmón mikwo̧ abe'doinobe.

⁵ Salmónma Rajab mikwuju jitji̧ Booz mikwo̧ abe'doinobe, ja̧danö Boozma Rut mikwuju jitji̧ Obed mikwo̧ abe'doinobe. Obedma Isaí mikwo̧ abe'doinobe,

⁶ ja̧danö Isaíma la'aka luwo̧ David mikwo̧ abe'doinobe. Davidma Uríasmine wobö ujunibinoko jitji̧ Salomón mikwo̧ abe'doinobe.

⁷ Salomónma Roboán mikwo̧ abe'doinobe, ja̧danö Roboánma Abias mikwo̧ abe'doinobe, ja̧danö Abiasma Asá mikwo̧ abe'doinobe.

⁸ Asáma Josafat mikwo̧ abe'doinobe, ja̧danö Josafatma Jorán mikwo̧ abe'doinobe, ja̧danö Joránma Uzías mikwo̧ abe'doinobe.

⁹ Uzíasma Jotán mikwo̧ abe'doinobe, ja̧danö Jotánma Acaz mikwo̧ abe'doinobe, ja̧danö Acazma Ezequíasma mikwo̧ abe'doinobe.

¹⁰ Ezequíasma Manasés mikwo̧ abe'doinobe, ja̧danö Manasésma Amón mikwo̧ abe'doinobe, ja̧danö Amónma Josías mikwo̧ abe'doinobe.

¹¹ Josíasma Jeconías mikwo̧bi, Jeconías ö̧ja̧wo̧döbi tjabe'doinobe. Jobadö tjö̧jinenama, Babilonia jojodöma Israel jojodönö kwakwabö tjujuluwinobe, ja̧danö tjujuluwajawö̧nö Israel nijitjö latjebinobe, ja̧danö Babilonia nijibe öbibö tjȩwa̧jinobe.

¹² Babilonia jojodö Israel jojodönö tjitebotjö latjebaja̧ ikena ji̧nadö Jesús a'dödöma bidö: Jeconíasma Salatiel mikwo̧ abe'doinobe, ja̧danö Salatielma Zorobabel mikwo̧ abe'doinobe.

¹³ Zorobabelma Abiud mikwo̧ abe'doinobe, ja̧danö Abiudma Eliaquín mikwo̧ abe'doinobe, ja̧danö Eliaquínma Azor mikwo̧ abe'doinobe.

¹⁴ Azorma Sadoc mikwo̧ abe'doinobe, ja̧danö Sadocma Aquín mikwo̧ abe'doinobe, ja̧danö Aquínma Eliud mikwo̧ abe'doinobe.

¹⁵ Eliudma Eleazar mikwo̧ abe'doinobe, ja̧danö Eleazarma Matán mikwo̧ abe'doinobe, ja̧danö Matánma Jacob abe'doinobe.

¹⁶ Jacobma José mikwo̧ abe'doinobe, ja̧danö Joséma María mikwujunö eminobe, ilekwo bajibanö. Jobuju Maríama jitji̧ Jesúsnö jeminobe, ja̧danö Jesúsma, Cristo jö̧ba̧lö ötjabökwe, Dios weakwo̧ jö̧a̧linökwe jö̧ba̧lö.

¹⁷ Jejenö laebobe Jesús a'dödönö yöawa'yema. Abrahamtjö jamatö, David mikwo̧ ö̧jenanö baibanö Jesús a'dödö a̧li̧nösamutjö ö'wejemu jojodö tjö̧jinobe, ja̧danö Davidtjö jamatö Israel jojodö tjitebotjö labebö Babiloniabe tji̧'yenanö baibanö Jesús a'dödö a̧li̧nösamutjö ö'wejemu jojodö tjö̧jinobe, ja̧danö tjitebotjö labebö Babiloniabe tji̧'yinemi baikwö Jesúsnö jemena baibanöma, Jesús a'dödö a̧li̧nösamutjö ö'wejemu jojodö tjö̧jinobe.

Jesúsnö jemina wene

¹⁸ Baikwö laebobe Jesucristonö jemina wenema: Maríama yöbawö juninuju, tupakwö Josénö chemakwujusa, jö̧ba̧lö. Jo̧kwaijayonö jo̧banö ina jemapji, ja̧danö iso̧nö ina jö̧kuju jö̧jayi, Dios O̧'wo̧ Luwo̧ ujulunö metu'wo jö̧jinobe.

¹⁹ Jemakwo̧ José mikwo̧ma Dios wei̧ a̧ja̧kwö ö̧jinobe, ja̧danö metu'wo jö̧jiökwe emökönö Maríanö kaatibobö omukwatinobe. Jo̧kwaijayonö, kaatibobö omukwatinajayonö, Maríama sulabenö ja̧buju, katatibajö jö̧ba̧lö jojodö tjöba a'otjö yöawobö öpöjödinobe, jobujunö taba lö̧japji jö̧ba̧lö. Jo̧kwajabetjö̧ sulabenö ja̧jaja̧ yöbawökönö kaatibobö omukwatinobe.

²⁰ Jobekwö omukwatö ö̧jonö, Duluwo̧ weökwe ángelma jo̧banö yöawinobe, i̧'wi̧dinö: —David itji̧ tupadanö jojo José, yebabökönuwi. Maríanö kwemo, kwilekwo bajibanö. Jelo̧nö ja̧bö metu'woma jö̧kuju. Dios O̧'wo̧ Luwo̧ ujulunöda metu'wo ju̧ju.

²¹ Maríama jitji̧ iso̧nö jemakobe, ja̧danö jemakwo̧nö Jesús jö̧ba̧lö kwimidonö, iteda ömöledönö tjusulatjö tjö̧jibanö ja̧akwo̧obetjö̧— jö̧ba̧lö yöawinobe Dios weökwe ángelma.

²² Jejenö baledi̧ma baledinobe, Duluwo̧ yöawinadanö baledakobetjö̧. Dios yöawi̧ yöbawo̧ma ja̧ Duluwo̧ yöawina damötjö iwȩyudinobe, baikwö:

²³ Yötawaduwakwö, ina iso̧nö ja̧bökujuma, metu'wo jö̧jakobe, ja̧danö jitji̧nö jemakobe, ja̧danö jo̧banö Emanuel jö̧ba̧lö ötjabikobe, Diosma ökwödökwö jo̧, jö̧ba̧lö laebobe Dios iwene.

²⁴ José wiluenama, Duluwo̧ weajökwe ángel yöawaja̧danö ja̧inobe, ja̧danö Maríanö eminobe, ilekwo bajibanö.

²⁵ Jo̧kwaijayonö, jobujunö emijayonö, jobujunö ja̧inokobe, jitji̧nö jemenanö kabatö. Ja̧danö, jitji̧nö jemenama, Joséma jo̧banö Jesús jö̧ba̧lö imidinobe.