Marcos 4 - Dios Iwene

Jesús wanedö yöawina, ödebiya ikwawa jojo ödebiya ikwina wene

¹ Ikenama Jesúsma yemidanö o̧pesobu ö'öbö ja̧nö yöbawijetö. Ba̧jekwadö ko̧ko̧kwö tjuju̧kwiökwe Jesúsma, okobe deinö otiwanö tja̧ja̧kwo jö̧ba̧lö, isowinö, o̧pesobu lo̧winö a̧jijetö, okobe deinö jojodö o̧pesobu ö'öbö tjuju̧kwonö.

² Jesúsma, isowinö a̧jö ju'wi jawabi ju'wi jawabi wanedö yöawakwawa yöbawijetö. Baikwö yöbawijetö:

³ —A̧ja̧kwaduwitjö. Wanedö yötawa. Bakwo̧ ödebiya ikwawa luwo̧ma ödebiya ikwö 'yi̧jetö.

⁴ Ja̧danö, batjonö ödebiya ikwö kweachemi ödebiyatjö ja'yube meijetö mananö, 'diamanö, jojodö ba̧kwȩlö̧jatebö kwebachajitjamanö. Ja̧ meaja̧ ödebiyama pji̧yu̧ omönanö mebibö kwibijadötö.

⁵ Ja̧danö, ju'wi ödebiyama inakoena, niji ja'yubeda jena meijetö. Ja̧ meaja̧ ödebiyama juluwanö pokwibijetö, ja'yubeda niji jo̧obetjö̧.

⁶ Ja̧ ödebiyatjö pokwaja̧ma, ja̧wo̧ idejatibobe kököbachibö woijetö, bö'diya okwanö dötewokobetjö̧.

⁷ Ja̧danö, ju'wi ödebiyama sȩa'wonö mebijetö, ja̧danö sȩi̧bi pokwobetjö̧. Jobema ja̧ meaja̧ ödebiyatjö pokwaja̧ma, sȩa'wo o̧tjachibijetö, wa̧jöbi wa̧jökönö.

⁸ Ja̧danö, ju'wi ödebiyama niji otiwena meijetö, otiwanö tjotidinena. Ja̧ ödebiyatjö pokwi̧ma otiwanö pokwijetö. Otiwanö wa̧jijetö. Ja̧danö, ja̧ pokwinatjö wa̧ji̧ma ödebiya libö pokwö yeawijetö. Ja̧danö, ju'wima ödebiya treintanö wa̧jijetö, bakwadetjö pokwina wa̧ji̧ma. Ja̧danö, ju'wima ödebiya sesentanö wa̧jijetö, bakwadetjö pokwina wa̧jima. Ja̧danö, ju'wima ödebiyama ciennö wa̧jijetö, bakwadetjö pokwina wa̧jima.

⁹ Ja̧danö, yötawi̧ a̧ja̧kwadöma tjöbeba̧löjö̧nö a̧ja̧kwaduwi— jö̧ba̧lijetö Jesúsma.

Jesús iteda öba̧ja̧di̧ waisachadönö yöawina wene: —Ju'wedö yötawi̧ wajwibö tja̧ja̧kwijayonö ökwödö kwöwaisachibaduwobö jo̧be— jö̧ba̧lö

¹⁰ Ikenama jojodö tjȩwa̧jabe okobe Jesúskwö ju̧kwibajadöma, a̧li̧nösamutjö du̧ju̧taja iteda öba̧ja̧di̧ waisachadöbi ju'wedö yöawawö̧bi abebö a̧ja̧kwijadötö Jesúsnöma: —Duluwo̧, wanedö yökawaja̧ma ¿dakwö jö̧ba̧lö yökawaja̧da?— abebö a̧ja̧kwijadötö.

¹¹ Jejenö abebö tja̧ja̧kwökwe jobadönö jö̧ba̧lijetö: —A̧ja̧kwaduwitjö. Diosma ökwödönöda wanedö yöawakwawa labebö loi̧ma kwöwaisachibaduwobö weobe, Dios La'aka Luwo̧ ö̧jobe tjuju̧kwena jawama. Ökwödönöda kwöwaisachibaduwobö weobe Diosma wanedö yöawakwawa labebö loi̧ma. Ju'wedöma, ötjönö öpöjödadöma, wanedö yöawakwawada yötawawö̧, labebö lobökönö.

¹² Jobadöma wajwibö tja̧ja̧kwobe. Jejenö Dios iwene ajayinö yöawinadanö badekwachibanö wajwibö tja̧ja̧kwobe. Ajayinö Dios iwenetjö baikwö laebijetö: Jobadöma ötjö chotidobe wajuwanö tjeda̧lijayonö ötjönöma wajwibadö. Ötjö yötawi̧ kabatökönö tja̧ja̧kwijayonö do̧tjatibokobe a̧ja̧kwadö. Otiwanö edö, a̧ja̧kwö tjöwaisachibitjö̧ma, sulabenö tjomukwati̧ kabatibö tjöbalewachena. Ja̧danö, tjomukwati̧ tjöbalewachitjö̧ma sulabe tjujuna̧li̧ söbebö lotena. Jejenö laebijetö ajayinö, Dios iwenetjö— jö̧ba̧lijetö Jesúsma.

Jesús wanedö yöawaja̧ öba̧ja̧di̧ waisachadönö labebö lobö yöawina wene

¹³ Ikenama Jesús jö̧ba̧lijetö iteda öba̧ja̧di̧ waisachadönö: —Wanedö yötawaja̧ma, ödebiya ikwawa luwo̧nö yötawaja̧ma ¿dakwö wajwiköbaduwaja̧jö, labebö loi̧ma?— jö̧ba̧lijetö—. Ja̧danö, ja̧ wanedö yötawaja̧ a̧ja̧kwö wajwiköbaduwitjö̧ma ¿dakwö kwöwaisachibaduwakwa̧da yemidanö ju'wijayenö wanedö yötawenama? Wajwiköbaduwena.

¹⁴ A̧ja̧kwaduwitjö kwöwaisachibaduwinö, wanedö yötawaja̧ labebö lotaduwakwö, baikwö: Bakwo̧ ödebiya ikwö 'yi̧nama, bakwo̧ Dios iwene yöbawö kweachi̧danö wanekwachobe. Jo̧ba ikwi̧ ödebiyama Dios iwenedanö wanekwachobe.

¹⁵ Ja̧danö, ödebiya meinama, jojodö tjomajadedanö wanekwachobe, Dios iwene a̧ja̧kwadöma. Ja̧danö, Dios iwene a̧ja̧kwadötjö ju'wedöma Dios iwene tja̧ja̧kwena, tjomajade 'dibadöma, ödebiya mana 'diamanö meinadanö ichejekwadö. Tja̧ja̧kwena, tjomajade 'diobetjö̧ Awetjama ichibö wechebö emibo̧, pji̧yu̧ mebibö tjukwinadanö, mana 'diamanö meaja̧. Ja̧danö, Awetja ichibö wechebö emibenama jobadö a̧ja̧kwadöma ¿dakwö do̧tjatibenada Dios iwenema? Do̧batiböködö— labebö lobö yöbawijetö Jesúsma—.

¹⁶ Ja̧danö, ju'wedöma ödebiya inakonö meinadanö ichejekwadö, niji ja'yubeda jena. Jobadöma Dios iwene a̧ja̧kwö jwiinö ösödadö.

¹⁷ Tjösödijayonö inakoena niji ja'yubeda jenadanö, bö'diya okwa dötewöködanö, tjomajade okwanö do̧batiböködö. Dios iwenetjö ja'yubeda, wame jawada tjomukwatobetjö̧ tjomajade okwanö do̧batiböködö. Jo̧kwaobetjö̧ ju'wi möle, wene baibena, ja̧danö Dios iwene tjösödobetjö̧ usula tjemawenama, juluwanö kabatibadö Diosnöma—labebö lobö yöbawijetö—.

¹⁸ Ja̧danö, ju'wedöma tjomajadema ödebiya sȩa'wonö meinadanö ichejekwadö. Jobadöma Dios iwene tja̧ja̧kwijayonö

¹⁹ böjȩ jawama ba̧wa̧lö̧jinö edadö, yelösöda. Ju'wi jaye okobe jwiinö edö tjujuna̧lo jö̧ba̧lö ba̧wa̧lö̧jawö̧. Ja̧ jaye okobe jwiinö ba̧wa̧lö̧jinö edö ödebiya sȩa'wonö meinadanö, lewachajinadanö ichejekwadö. Jejenö lewachajawö̧ma Dios iwenema do̧tjatokobetjö̧ kabatibadö— labebö lobö yöbawijetö.

²⁰ Jo̧kwaijayonö ju'wedöma ödebiya niji otiwanö tjotidinena meinadanö ichejekwadö, tjomajadema. Jobadöma Dios iwene a̧ja̧kwö tjomajade okwanö otiwanö do̧batibö ösödadö. Otiwanö tjo̧'wo̧ luwo̧ öda̧peachinö ju̧kwadö, Dios O̧'wo̧ Luwo̧ öba̧ja̧da̧lonö. Ja̧danö, otiwanö öda̧peachinö ju̧kwadöma otiwanö pokwina wa̧ji̧ ödebiyadanö ichejekwadö— labebö lobö yöbawijetö—. Ja̧danö wanedö yötawaduwakwö: Jobadöma tjo̧'wo̧ luwo̧ jawama i̧sebö, otiwanö omukwatö pjabatö ju̧kwadö. Ju'wedöma nöinö i̧sebö ju̧kwadö, tjo̧'wo̧ luwo̧ jawama, otiwanö omukwatö pjabatö ju̧kwadöma, treinta ödebiya yeawi̧danö ju̧kwadöma. Ja̧danö, ju'wedöma jobadötjö bajalekwönönö i̧sebö ju̧kwadö, tjo̧'wo̧ luwo̧ jawama otiwanö omukwatö pjabatö ju̧kwadöma, cincuenta ödebiya yeawi̧danö ju̧kwadöma. Ja̧danö, ju'wedöma yelösöda jobadötjö bajalekwönönö tjo̧'wo̧ luwo̧ jawama i̧sebö, otiwanö omukwatö pjabatö ju̧kwadöma, cien ödebiya yeawi̧danö ju̧kwadöma—jejenö yöbawijetö Jesúsma, wanedö yöawakwawa labebö loböma.

Jesús wanedö yöawina wene: —La̧pa̧la̧yu̧ dewinö dejatemi otiwanö öwawi̧danö ju'winö okobe jwiinö waiyi̧ jawa Dios wajuwanö i̧sebakobe— jö̧ba̧lö

²¹ Ikenama ju'wi wanedö yöawakwawa yöbawijetö: —Ju'wi wanedö yötawa. La̧pa̧la̧yu̧ nötediböma ¿isapjonö mu'dudö kwujuna̧lenaji̧, okwa baibanö? Ja̧danö nötediböma ¿kamapjo teebe kwujuna̧lenaji̧? Jejenömaökö. Mö junawa la̧pa̧la̧yu̧ junawötenö, otiwanö dewinö öwawakobetjö̧.

²² Ja̧ wanedö yötawi̧ma baikwö jö̧ba̧lö yötawobe: Okobe jwiinö waiyi̧ jawama ju'wi möle Diosma pjaatakobe waiyökö baibanö. Wajuwanö i̧sekwakobe, la̧pa̧la̧yu̧ dewinö dejatemi otiwanö öwawi̧danö. Jojodö babema wajwitji̧ jawama ju'wi möle Diosma tjöwaisachibinö pjaatakobe.

²³ Ökwödö kwa̧ja̧kwaduwi̧ma tjöbeba̧löjö̧nö a̧ja̧kwaduwi, kwomajadeduwinö do̧katibaduwinö— jö̧ba̧lö wanedö yöbawijetö.

²⁴ Ja̧danö, jö̧ba̧lijetö Jesúsma jobadönöma: —Kwa̧ja̧kwaduwi̧ma otiwanö omukwata̧laduwi. Ötjö yötawi̧ma otiwanö omukwata̧lö kwa̧ja̧kwaduwitjö̧ma Diosma kwöwaisachibaduwobö pjaatakwo̧. Ikenama ju'wi jawabi ju'wi jawabi kwöwaisachibaduwobö pjaatakwo̧ Diosma, ajayinö kwöwaisachibinaduwemitjö bajalekwönönö kwöwaisachibaduwinö baibanö.

²⁵ Bakwo̧ otiwanö waisinö a̧ja̧kwo jö̧ba̧lo̧ma, ju'wi jawabi ju'wi jawabi öwasachibobö pjaatakwo̧ Diosma. Jo̧kwaijayonö, waisinö a̧ja̧kwo jö̧ba̧lö̧kö̧nöma Diosma jo̧banö yelösöda öwaisachibökönö ji̧nö weakwo̧, a̧ja̧kwi̧ma omajadenö do̧atibökönö— jö̧ba̧lijetö Jesúsma.

Jesús wanedö yöawina wene: —Dios webö ö̧jena ju̧kwadö tjöba̧jekwakobe— jö̧ba̧lö

²⁶ Ja̧danö, Jesúsma jö̧ba̧lijetö: —Ju'wi wanedö yötawa, Dios La'aka Luwo̧ ö̧jena tjuju̧kwi̧ jawa wanedöma: Dios La'aka Luwo̧ ö̧jena tjuju̧kwi̧ma ödebiya niji okwatjö pokwi̧danö wanekwachobe. Bakwo̧ma ödebiya junö 'yi̧jetö.

²⁷ Ja̧danö, ja̧ ujuninatjö tupakwöma, junawa jojoma möle otidonö, yö̧te abonö ödebiyama a̧dekwanö niji okwatjö pokwobe. Jo̧ba junawa jojoma ¿dakwö öwaisobeda ödebiya niji okwatjö pokwoböma? Öwaisokobe. Edokobe, a̧dekwanö pokwobe ¿jö̧tö?

²⁸ A̧dekwanö niji okwatjö pokwobe. Ajayima pokwi̧. Jemi ikena ida̧ökö ö̧bubiya bo̧bö, ochobiya wa̧ji̧. Jemi ikena ida̧ökö yȩi̧.

²⁹ Jemi ikenama ida̧ökö yȩenama 'döbö 'ya̧jadö, ida̧ökö nöinö 'deawena baibobetjö̧. Jejenö jo̧be, Dios La'aka Luwo̧ ö̧jena tjuju̧kwi̧ma— jejenö Jesús wanedö yöbawijetö, Dios La'aka Luwo̧ ö̧jena wanedöma.

Jesús mostaza ödebiya jawa wanedö yöawina wene: —Dios La'aka Luwo̧ ö̧jena ju̧kwadöma otiwanö tjuju̧kwakwedö— jö̧ba̧lö

³⁰ Ja̧danö, Jesúsma jö̧ba̧lijetö: —Yemidanö yötawobö jö̧ta̧la, Dios La'aka Luwo̧ ö̧jena tjuju̧kwi̧ jawama. ¿Taji jawa ji̧danö wanekwachobeda Dios La'aka Luwo̧ ö̧jena tjuju̧kwi̧ma? Ju'wi jayenö wanedö yöawakwawa yötawaduwakwö. A̧ja̧kwaduwitjö:

³¹ Dios La'aka Luwo̧ ö̧jena tjuju̧kwi̧ma mostaza mikwi̧ okwa jawa odebiyadanö wanekwachobe. Böjȩnö ju̧kwi̧ma ja̧ jaye ödebiyama ju'wi ödebiyatjö o̧penönö pjei̧.

³² Pjeijayonö ja̧ ödebiyatjö towi jwiinö nöowi babibö da̧peachi̧. Jowima nöinö öjasabijubi ji̧, jelowitjö o̧penönö. Jowinöma pji̧yu̧bi o'o tiyuwena wa̧jadö, otiwanö öjiyakobetjö̧. Jejenö Dios La'aka Luwo̧ ö̧jena tjuju̧kwi̧ma. Tjuju̧kwi̧ma otiwanö tjuju̧kwakwedö— jö̧ba̧lö wanedö yöbawijetö Jesúsma, Dios La'aka Luwo̧ ö̧jena tjuju̧kwi̧ wanedöma.

Jesús iteda öba̧ja̧di̧ waisachadönöda wanedö yöawaja̧ labebö lobö yöawina wene

³³ Jesúsma ite ökömanö ichajadönö, ba̧jekwadö ba̧kwȩlö̧jatebö wanedö yöbawö ba̧ja̧diabijetö Dios iwenema. Ju'wi möle ju'wi jawa, ju'wi möle ju'wi jawa tjo̧'omanö ba̧ja̧diabijetö.

³⁴ Jobadö ba̧jekwadö ökömanö ichajadönö wanedö yöawakwawada yöbawiabijetö Jesúsma, yöbawöda, labebö lobökönö. Jo̧kwaijayonö iteda öba̧ja̧di̧ waisachadönöma, itekwödada babibö okobe jwiinö labebö lobö yöbawiabijetö.

Jesús jwa̧lȩ'epjobi balawa loi̧bi weina wene

³⁵ Ja̧danö, ja̧ möle yi̧bena baibobekwö Jesúsma jö̧ba̧lijetö öba̧ja̧di̧ waisachadönö: —O̧pesobu pebibö di̧'yo— jö̧ba̧lijetö.

³⁶ Jo̧kwaobetjö̧ Jesús öba̧ja̧di̧ waisachadöma, ju'wedö jojodönö junibö, Jesús a̧jibajowinö a̧jibö 'yi̧jadötö, Jesúskwö. Ju'wedöbi ju'wiowinö wainö 'yi̧jadötö Jesús i̧'yobema.

³⁷ Ikenama o̧pesobu ö'weje batjibena jwa̧lȩ'epjo jwiinö doibajijetö. O̧pesobu nöinö balawa loijetö isowibi wa'yekwacha̧linö.

³⁸ Jejenö baledonö Jesúsma isowi ökömakwöchobe isapjo pjabekwajo̧ aba̧lö a̧jijetö. Ja̧danö, öba̧ja̧di̧ waisachadöma Jesús aba̧lobekwö 'ya̧wibö jwöbeba̧lö jö̧ba̧lijadötö: —¡Ba̧ja̧dakwawa jojo, ökwödöma medaja! ¿Tajawedö kwaba̧la?— jö̧ba̧lijadötö.

³⁹ Jejenö jö̧tja̧lökwe, Jesúsma a̧laibö, jwa̧lȩ'epjobi o̧pesobubi labinö yöba̧lijetö: —Wi̧ babibö yöbachibi—jö̧ba̧lö. Jejenö jö̧a̧lemi jwa̧lȩ'epjoma yöachibijetö. Balawa loaja̧bi loökönö babibijetö.

⁴⁰ Ikenama Jesúsma jö̧ba̧lijetö öba̧ja̧di̧ waisachadönö: —¿Tajawedö yekabiduwa? ¿Inabi ötjönöma kwo̧'wo̧ kwöwana̧laduwököji̧?— abebö a̧ja̧kwijetö jobadönöma.

⁴¹ Jobadöma jwiinö yebaibö atadakwawa jwibijadötö. Idödada yöba̧lakwawijadötö: —¡Ayö! Bitema, isabenö ¿tida, jwa̧lȩ'epjobi balawa loi̧bi webo̧ma?—yöba̧lakwawijadötö.