Jueces 9 - Dios Iwene

Abimelec la'aka luwo̧ ö̧jina wene

¹ Ja̧danö, Gedeon ö'wö baibaja̧ ikenama, itji̧ Abimelecma iteda ojo'do jömöledöbi, jömöledösaso jojodöbi tjö̧jobekwö i̧'yinobe, Siquen comunidadbe. Ichibö, jobadönö yöa̧linobe baikwö:

² —Kwöwaisaduwa, ötjöma yöne kwömöledöso̧sa, chojo'do ökwödötjö jojosujujobetjö̧, jö̧tö? Ja̧danö, ditebo jojodöma Gedeon itji̧mutjö bakwo̧ la'aka luwo̧ ö̧jobö tjösöda, jö̧tö? Jo̧kwajabetjö̧, Siquen comunidad luwedönö yöka̧laduwobö ateba baikwö: –Okobe deinö Gedeon itji̧mu luwedö tjö̧joböma otiwökena, sule bakwo̧da, dömöledöso̧da la'aka duluwo̧ ö̧jobö otiwena, jö̧tö? –jö̧ba̧lö yöka̧laduwobö atebaduwakwö, ötjö yöne kwömöledöso̧nö luwo̧ batibanö tjujunakobetjö̧, —jö̧ba̧lö aebinobe.

³ Aebawö̧, yötja̧lobö aebaja̧danö yötja̧linobe Siquen comunidad luwedönö, ja̧danö a̧ja̧kwö, tjösödinobe, —Isabenö dömöledöso̧da inesö la'aka luwo̧ ö̧jobö dösöda, —jö̧ba̧lö.

⁴ Jo̧kwajabetjö̧, Abimelecnö pjabatö, tjösödökwe Baal Beritnö ösödakwawejutjö plata öpi̧ya̧ setenta ö̧pi̧ya emö Abimelecnö tjiyinobe. Ja̧danö, tjiyökwe, Abimelecma tjiyaja̧ baladanö ju'wedö sulabedö mikwawöködönö imidinobe, jo̧ba ömöayedö batjibanö i̧'yitenia jo̧bakwö pjabatö tji̧'yobö.

⁵ Ja̧danö, ömöayedönö öbibö, Ofra comunidadbe i̧'yinobe, abe'do Gedeon ejube, ja̧danö ichibajo̧, okobe deinö yö̧ne ömöledö Gedeon itji̧munö kwabawö loinobe. Inaba nöabatjö, okobe deinö jobadönö kwabawö loinobe, bakwawatjö. Okobe deinö Gedeon itji̧mutjö, sule bakwo̧da, bajaliya jojo Jotan mikwo̧da ö̧jibinobe. Ju'wedönö kwabö lotjijayonö, Jotanma u̧ju̧kwawinobe, ja̧danö jobadötjö̧ ö̧jibinobe.

⁶ Ikenama, okobe deinö Siquen comunidad la'aka luwedöbi, Bet Milo comunidad luwedöbi, ko̧ko̧kwö, inesö nöowi Encina towibe tji̧'yinobe, Siquen comunidad ö'öbö towibema, ja̧danö jobetjö̧ Abimelecnö 'da̧batö tjujuninobe, inesö la'aka tjuluwo̧ baibanö ö̧jobö.

Jotan wanedö yöawina wene

⁷ Ja̧ baledaja̧ yötjawi̧ a̧ja̧kwinobe Jotanma, ja̧danö a̧ja̧kwajo̧, Siquen comunidad badeibösa'o Guerizin mösa'obe i̧'yinobe, jobetjö Siquen comunidad jojodönö yöa̧lobö. Ja̧danö, ichibö labinö jwöbö yöawinobe baikwö: —Ökwödö Siquen comunidad luwedönö yötawa, ja̧danö yötawi̧ kwa̧ja̧kwaduwobö jo̧be, yötawi̧ kwaja̧kwaduwiökwe, Diosma ökwödönöbi a̧ja̧kwakobetjö̧.

⁸ Baledina jawa baikwö wanedö yötawa: Ju'wi möle towibiyama omukwatö tjujuninobe, bakwowi inesö la'aka towi baibanö 'da̧batö tjujunobö. Ja̧danö, ajayinö Olivo towi atjebinobe, –Ökwö Olivo towida la'aka luwesowi kwö̧jobö dösöda, –jö̧ba̧lö.

⁹ —Yötja̧lökwe, Olivo towima atadinobe, –Ja̧maökö, ötjöma otiwobu o̧tesobu otikwasowisa, ja̧danö ja̧ o̧tema diosbedönöbi, jojodönöbi otiwanö tjomukwatobö pjaatobu. Ja̧ o̧te otikwa katatenaji̧, ökwödö towibiyatjö inesö la'aka towi chö̧joböma? Katatökö, –jö̧ba̧lö.

¹⁰ —Yöala̧wö, towibiyama Higo towi atjebinobe, –Ökwö Higo towida inesö luwesowi kwö̧jobö dösöda, –jö̧ba̧lö.

¹¹ Yötja̧lökwe, Higo towi atadinobe, –Ja̧maökö, ötjöma jojodö tjösödi̧ o̧ti̧ wa̧ji̧ma wa̧jowisa, ja̧ chö̧wa̧ji̧ katatibenaji̧, ökwödö towibiyatjö inesö la'aka towi chö̧joböma? Katatibökö, –jö̧ba̧lö.

¹² —Yöa̧lawö, towibiyama ubasa'ba atjebinobe, –Ökwö ubasa'bada duluwesa'ba baibanö kwöjobö dösöda, –jö̧ba̧lö.

¹³ Yötja̧lökwe, Ubasa'bama atadinobe, –Ja̧maökö, ötjöma ubasobu o̧'do̧bu jawa wa̧ja'basa, ja̧danö ja̧ ubasobu owö, diosbedöbi, jojodöbi tjo̧'wo ösöwachibanö tjowobe. Ja̧ uba chöwa̧ji̧ katatibenaji̧, inesö luwesa'ba batibanö chö̧joböma? Katatibökö, –jö̧ba̧lö.

¹⁴ —Ikenama, bajaleapo okobe jwiinö towibiyama sȩaka isaka atjebinobe, –Ökwö Sȩakada inesö luwesaka kwö̧jobö dösöda, –jö̧ba̧lö.

¹⁵ Yötja̧lökwe, Sȩakama atadinobe, –Jau, otiwa. Isabenö luwesaka chö̧jobö kwösödaduwitjö̧ma, chiteebe ichibö, chiteebe isadanö kwö'wachaduwo, ökwödönö chiteada̧lakobetjö̧. Jo̧kwaijayonö, isabenö luwesaka chö̧jobö kwösödaduwökötjö̧ma, ökwöla ötjö Sȩakatjö labebö, ökwödö towibiya ubakobe, okobe jwiinö libano niji inesö cedro towibiyabi ubakobe, –jö̧ba̧lö atadinobe.

¹⁶ —Ja̧danö, ja̧ wanedö yötawaja̧danö yötawaduwakwö. Kwöwaisaduwa, chabe'do Gedeonma otiwanö pjaatinobe ökwödö israel jojodönö, ja̧danö jejenö pjaatiawö̧, jo̧banöbi ömöledönöbi dösölö̧jinö ösödö kwö̧jaduwobö jo̧be, jö̧tö? Ja̧danö, dösölö̧jinö kwösödaduwo jö̧ka̧laduwi̧danö ja̧nö, otiwanö omukwatö Gedeon itji̧ Abimelec kwuluwo̧duwi baibanö kwujuninaduwatjö̧ma, otiwo jö̧a̧linena, otiwanö kwuluwo̧duwi Abimeleckwö wene jwiinö kwö̧jaduwo jö̧ka̧linaduwena.

^17-19 Jau, Gedeon otiwanö pjaatina omukwatö, kwö̧jaduwo jö̧ka̧laduwi̧danö Gedeonnöbi, ömöledönöbi dösölö̧jinö ösödö kwö̧jinaduwatjö̧ma, kwo̧'wo ösöwanö Abimelec ömöayedö kwö̧jaduwena, –Duluwo̧ma otiwo̧, –jö̧ba̧lö. Ja̧danö ju'wibi Abimelecma ökwödökwö o̧'wo ösöwanö ö̧jena, –Chömöayedö Siquen jojodöma otiwadö, –jö̧ba̧lö. —Jau, isabenö Gedeonnö otiwanö omukwatö kwösödaduwo jö̧ka̧linaduwobe, isabenö ökwödönö pjaatinobetjö̧. Ökwödö madianitas jojodötjö kwö̧jibaduwobö ölakwabikwawinobetjö̧, debö i̧'yo jö̧a̧linobe chabe'doma, jo̧kwaijayonö yayonö inesö labi̧ jawa baledö, kwö̧jibaduwinö pjaatinobe, jö̧tö? Ja̧danö jejenö pjaatiawö̧, otiwanö jo̧banöbi, ömöledönöbi kwösödaduwo jö̧ka̧laduwobe jö̧tö? Ja̧danö, isabenö otiwanö omukwatö, chabe'donö ösödö ja̧nö Abimelecnö kwuluwo̧duwi baibanö kwujuninaduwatjö̧ma, otiwanö kwö̧ja̧duwo jö̧ka̧laduwena. Jo̧kwaijayonö dösölöjinö ösödöködöja ökwödöma. Ökwödöma chabe'do ömöledönö öpöjödö, itji̧mu setentabedönö inawa bakwawatjö kwabö loköbaduwajabetija, ja̧danö kwabö lobajadö, chabe'do ömöayuju jitji̧ Abimelecnö kwuluwo̧duwi baibanö kwujunaduwajabe. Abimelecma kwömöledöso̧obetjö̧, jo̧banöda kwujunaduwajabe, ökwödö Siquen luwedötjö inesö la'aka luwo̧ baibanö, –Dömöledöso̧nöda dösöda, –jö̧ba̧lö.

²⁰ —Jo̧kwajabetjö̧, jejenö sulabenö ja̧köbinaduwobetjö̧, baikwö wanedö yötawa: Abimelectjö ökwöla laebobö jo̧be, Siquen luwedönöbi, Bet Milo luwedönöbi ubinö, ja̧danö ökwöla Siquen luwedötjöbi, Bet Milo luwedötjöbi laebobö jo̧be, Abimelecnö ubinö, —jö̧ba̧lö labinö yöa̧linobe Jotanma, Siquen jojodönö.

²¹ Ikenama, yöba̧lajo̧, Jotanma jobetjö döibajinobe, Beer comunidadbe, ja̧danö jobe öjinobe, öpöe Abimelecnö yeabobetjö̧.

Abimelec Siquen jojodökwö ölakwabikwawina wene

²² Ja̧danö, israel jojodötjö la'aka luwo̧ babibajo̧, wapötakwa o̧biya baledibanö la'aka luwo̧ öjinobe Abimelecma.

^23-24 Ja̧danö, Diosma weinobe, o̧'wo luwo̧ sulabo̧ Abimelecbi, Siquen la'aka luwedöbi tjö̧'da̧de ichibö jobadönö suli̧ öwaedobö, Abimeleckwö Siquen luwedökwö wene ja̧kobetjö̧. Gedeon itji̧mu setentabedönö sulabenö kwabö lotjiökwe, balekwa mikwa jejenö jobadönö lȩbebö weinobe Diosma. Abimelec iteda yöne ömöledönö kwabö loinobetjö̧, balekwa mikwa jo̧banö lȩebobö ji̧nobe, ja̧danö Siquen luwedö kwabö loobö pjatjatinobetjö̧, jobadönöbi lȩebobö ji̧nobe. Ja̧danö, o̧'wo luwo̧ sulabo̧ tjö̧'da̧de ö̧jiawö̧, Siquen luwedöma Abimelec wei̧ katjatibinobe, öpöjojodö batjibanö.

²⁵ Abimelecnö öpöjödö, naukwabidö jobe pjeanö ji̧ mösa'ijube tji̧'yobö wetjinobe, wa̧pekwa'o ju̧kwawö, jobe baledadönö mebibö tjönaukwakobetjö̧. Ja̧danö okobe deinö jobe baledadönö mebibö tjönaukwinobe. Ja̧danö ju'wedöma Abimelecnö yötjawinobe, —Siquen jojodöma tjitebo pjeanö baledadönö tjönaukwobetö, —jö̧ba̧lö.

²⁶ Ja̧danö, bakwo̧ Ebed itji̧ Gaal mikwo̧ma ju'wedö ömöledökwö Siquen comunidadbe ja̧nö i̧'yinobe, ja̧danö ja'yubenö lekwajabetjö Siquen luwedöma jo̧banö tjösödinobe, —Bite Gaalnö da̧ja̧kwobö jö̧da̧lökwe, —jö̧ba̧lö.

²⁷ Ja̧danö, uba batjo̧ waji̧ tjemobö baibenama, waji̧ emö latjebinobe, ja̧danö ubasobu o̧'do̧bu otidajadö, o̧'wo jawa tjösödökwe ösödakwawejutjö ko̧ko̧kwö ba'ali tjujuninobe. Jobe kwanöbi, owa̧löbi ja̧nö, Abimelecnö sulabenö obö yötja̧lakwawinobe,

²⁸ ja̧danö Gaalma yöa̧linobe, —Ökwödö Siquen comunidad jojodöma, tajawedö Abimelec ömöayedö dö̧jobö? Jo̧ba Abimelecma ditebo jojobö̧kö̧, jo̧bama Gedeon itji̧, jö̧tö? Ja̧danö jo̧ba ömöayo̧ ditebotjö webo̧ma Zebul mikwo̧, jö̧tö? Jobadöma ditebo comunidad ajayinö ji̧na Siquen abe'do Jamor itji̧mu tupadanö jojodöböködö, tajawedö jobadö wetji̧ da̧ja̧kwobö. Ökwödöma sule ditebo ajayinö ji̧na ömöledö tjömöayedöda dö̧jobö jö̧ba̧ladösa, ite Abimelec ömöayedö dö̧joböma jwiobe.

²⁹ Ötjöma kwuluwo̧duwi chö̧jitjö̧ma, Abimelecnö a'dewö loto jö̧ta̧lena. Jo̧banö yötawena, isabenö ökwödönö weköbobö kwösöditjö̧ma, kwömöayedö ölakwabikwawa jojodönö ko̧ko̧dö, kwujuluwobö ichi, dölakwabikwawakobetjö̧, —jö̧ba̧lö yöa̧linobe Gaalma.

³⁰ Siquen comunidad la'aka luwo̧ baibanö Abimelec ujuninökwe Zebul mikwo̧ma ja̧ Gaal yöa̧laja̧ a̧ja̧kwinobe, ja̧danö a̧ja̧kwö, ödameakwinobe.

³¹ Jo̧kwajabetjö̧ dameakwö, yöbawadönö weinobe, jojodö wajwitjonö Abimelecnö yötjawobö baikwö: —Gaal mikwo̧ma ömöledökwö baikwö Siquenbe ichinobe, ja̧danö jojodö ökwönö katjatibobö sulabenö yöba̧ladö.

³² Jo̧kwajabetjö̧ baikwö ja̧köbobö atebakwö, kwömöayedö ölakwabikwawa jojodönö ko̧ko̧dö, yö̧te kwichaduwo, ja̧danö ichibajadö, batjonö kwu̧ju̧kwawaduwo, jojodönö mekibaduwobö.

³³ Ja̧danö, yȩayi dewachenama, juluwanö comunidad mekibaduwo, ja̧danö Gaalbi ömöledöbi tjölakwabikwawobö latjebenama, ökwöda kwösödi̧danö jobadönö kwujuluwobö ja̧kobe, —jö̧ba̧lö Abimelecnö yötjawobö weinobe Zebulma.

³⁴ Yötja̧lökwe, Abimelecbi, ömöayedö ölakwabikwawa jojodöbi yö̧te tji̧'yinobe. Ja̧danö, ömöayedönö ö'wejemu jawasaso baibanö 'da̧batö ujuninobe Abimelecma, ja̧danö okobe deinö Siquen ö'öbö tju̧ju̧kwawinobe.

³⁵ Ja̧danö, yȩayi Gaalma a̧la̧ibö, comunidad apjudebe i̧'yinobe, ja̧danö jobe ö̧jonö, Abimelecbi, ölakwabikwawa jojodöbi tja̧la̧ibinobe, comunidad metji̧bobö.

³⁶ Jobadönö edö, Gaalma yöa̧linobe Zebulnö, —Edi, jojodöma mösa'ijutjö̧ yututjajobe baikwö, —jö̧ba̧lö. Yöa̧lökwe, Zebul atadinobe, —Omöna, jojodömaökö. Kwedi̧ma sule towi isadanemi kwedobe, jojodömaökö, —jö̧ba̧lö.

³⁷ Ikenama yemidanö edö, Gaal yöa̧linobe, —Isabenö jojodö möemitjö baikwö tjichobe cheda, ja̧danö ju'wibi bakwaso Encina towi nöowi, tupakwö baledakwa̧ yöbawadö tjitea towi ötjabowitjö baikwö tjichobe cheda, —jö̧ba̧lö.

³⁸ Jejenö yöa̧lökwe, Zebulma Gaalnö obö weinobe, —Ökwöda Abimelecnö yöba̧linaja, –Tajawedö Abimelec ömöayedö dö̧jobö, –jö̧ba̧lö, jö̧tö? Ina yebabökönö kwö̧jiji̧? Bidö ölakwabikwawa jojodönöda oköbinobe, juluwöködö jö̧ba̧lö, jo̧kwajabetjö̧ babe jobadökwö kwölakwabikwawobö baibajabe. Jau Gaal, jobadönö, –Chölakwabikwawakwo̧sa, –jö̧ba̧lö yöka̧linadanö, babe badekwachinö jobadönö ölakwabikwawö labebi, —jö̧ba̧lö weinobe Zebulma, Gaalnö.

³⁹ Weökwe, Gaalma Siquen comunidad luwedönöbi, ju'wedö ölakwabikwawa jojodönöbi öbibö laebinobe, ja̧danö Abimeleckwö tjölakwabikwawinobe.

⁴⁰ Ja̧danö Abimelecma Gaalnö ujuluwinobe, ja̧danö Gaalbi ömöayedöbi Abimelec öba a'otjö dötjibajinobe. Abimelecbi, ömöayedöbi jobadönö lutjinobe, comunidad apjudebe tjichibanö, ja̧danö ba̧jȩkwadö jobadönö kwabawö lotjinobe, comunidad tetjachakwa̧ abönö.

⁴¹ Ikenama, jobadönö juluwajo̧, Abimelecma itebo comunidad Arumabe ȩwa̧jinobe. Ja̧danö, Zebulma Gaalnöbi, ömöledönöbi a'dewö loinobe, —Bemi tupakwö Siquen comunidadnö kwö̧jaduwobö jwiobe, —jö̧ba̧lö.

⁴² Jemi ikena möle, Siquen comunidad jojodöma yemidanö tjölakwabikwawobö latjebinobe, ja̧danö Abimelecnö yötjawinobe, latjebakwa̧ jawama.

⁴³ Yötjawiökwe, Abimelecma ömöayedönö öbibö i̧'yinobe, ja̧danö wapösokwa baibanö ömöayedönö 'da̧batö junajo̧, okobe deinö tju̧ju̧kwawobö weinobe, comunidad jojodö latjebena metji̧bobö. Ja̧danö, jojodö comunidadtjö latjebobe tjedenama, a̧la̧ibö mebibö kwabö lotjinobe.

⁴⁴ Baikwö laebobe tjölakwabikwawina jawama: Abimelecma bakwaso öbibö, comunidad apjudebe ö'öbakwawö tjöbeba̧lö i̧'yinobe, labebajadö tetjachapji jö̧ba̧lö, ja̧danö ju'wedö dosolataja jojodöma mejenö ju̧kwadönö mebibö, kwabawö lotjinobe.

⁴⁵ Ja̧ möle baledibanö, Abimelecma Siquen comunidad ujuluwobö ölakwabikwawinobe, ja̧danö ujuluwinobe. Juluwajo̧, okobe deinö Siquen jojodönö kwabawö loinobe, ja̧danö okobe jwiinö comunidad pjolö loinobe. Ikenama, pjolö lobajo̧, comunidad ba̧kwemeachibanö niji suli̧ öwaedotö jö̧ba̧lö sayu ikwinobe.

⁴⁶ Siquen comunidad ö'öbö, isaka möaka tjöekwaka ji̧nobe, jemi jojodö tjösödökwe El Berit ötjabökwenö ösödakwawakama, ja̧danö jakanö ju̧kwadö luwedöma, baledi̧ jawa a̧ja̧kwö, tjöekwaka okwa tetjachinobe, jobe tjötjekwobö.

⁴⁷ Luwedö bakobe tetja̧chaja̧ jawa yötjawiökwe,

⁴⁸ Abimelecma ömöayedö ölakwabikwawa jojodönö öbibö i̧'yinobe, Zalmon mösa'obe, ja̧danö o̧tomo'anö imi jubö painobe, ja̧danö di̧batibö, öböbe'onö öwaninobe, e'ewobö. Ja̧danö ömöayedö ölakwabikwawa jojodönö weinobe, —Babe chi̧sȩbaja̧danö, ökwödöbi juluwanö ja̧baduwi, —jö̧ba̧lö.

⁴⁹ Weawö̧, okobe deinö bakwo̧nökwena imi jubö, Abimelec ökömanö e'ewö tji̧'yinobe, tjöekwakabe. Ikenama, tjöekwaka ö'öbönö imi junajadö, ökwöla nötedö isakabi, okwa ju̧kwadönöbi tjujuwinobe. Jejenö okobe deinö Siquen comunidad ö'öbösaka ju̧kwadöma debö tji̧'yinobe, ömadöbi, ya̧döbi milbedö jenanö.

⁵⁰ Ikenama Abimelecma Tebes comunidadbe i̧'yinobe, ja̧ comunidad jojodönöbi ujuluwobö. Comunidad tjösawö tjölakwabikwawinobe, ja̧danö tjujuluwinobe.

⁵¹ Jo̧kwaijayonö, comunidad okwa mösaka 'diinö tjöekwaka ji̧nobe, ja̧danö comunidad luwedöbi, okobe deinö ju'wedö comunidad jojodö ömadöbi ya̧döbi jaka okwa tebachibö tjipe'datjinobe. Ja̧danö, pje'datajadö, isaka mö tjönöchinobe.

⁵² Ja̧danö, Abimelecma ömöayedönö öbibö i̧'yinobe, tjöekwakabi tjujuluwobö, ja̧danö apjude 'yö̧ne ichibinobe, ökwöla nötedö isaka ujuwotanö.

⁵³ Jo̧kwaijayonö, jejenö ichibioko, isaka okwa ju̧kwadötjö bakwuju jojosujuma, inawa harinaso̧pja̧ otikwawa Abimelecnö mötjö jabö jikwinobe, Abimelec uu 'daebinö.

⁵⁴ Jejenö balediökwe, Juluwanö ö'wö batibakwo̧sa jö̧ba̧lö, ömöayo̧ itea ölakwabikwawa jawa kwebato̧nö weinobe, —Juluwanö kwölöte'o do̧batö, kwabö lobitjö, biwa jikwawatjö debö chi̧'yapji. Jau, jejenö kwabö loköbobö wetakwö, jojodö ötjönö, –Jojosujuda kwabö lojinökwe, –jö̧ba̧lö otjapji jö̧ba̧lö. —Ja̧danö, weökwe, Abimelec ömöayo̧ma weaja̧danö Abimelecnö kwabö loinobe kwölöte'onö.

⁵⁵ Jemi ikenama, tjuluwo̧bajo̧ ö'wö baibaja̧ edö, okobe deinö israel jojodötjö Abimelec ömöayedöbajadöma, tjejukwena tjȩwa̧jinobe.

⁵⁶ Jobekwö laebobe Dios Abimelecnö lȩebina jawama. Abimelecma iteda abe'do Gedeonnö sulabenö omukwatö, abe'do itji̧mu setentabedönö kwabö loinobe, ja̧danö jejenö sulabenö ja̧iökwe, balekwa mikwa Diosma jo̧banö lȩebinobe.

⁵⁷ Ju'wibi Diosma Siquen comunidad jojodö sulabenö ja̧tji̧na lȩebinobe, sulabenö ja̧tjina tjebachajö bakwainö jobadönöbi baledobö lȩebinobe. Ja̧ Abimelecnöbi, Siquen jojodönöbi baledinama, Gedeon itji̧ Jotan yöawinadanö baledinobe, —Bejenö ökwödönö baledobö jo̧be, —jö̧ba̧lö wanedö yöawinadanö