Jueces 8 - Dios Iwene

¹ Ja̧danö, Gedeon ö̧jobekwö ichibö, Efrainsaso jojodöma dameakwö yötja̧linobe Gedeonnö: —Ajayinö madianitas jojodönö kwölakwabikwawobö jö̧ka̧lenama, tajawedö ökwödönö jwököbinököda? Ökwödönöbi jwököbinatjö̧bö, pjabatö ökwödöbi dölakwabikwawakobetjö̧, —jö̧ba̧lö dameakwö labinö yötja̧linobe Gedeonnö.

² Yötja̧lökwe, Gedeonma atadinobe, —¡Kwödameakwaduwobö jwia chömöledö! Ökwödö kwujuluwaduwaja̧ma, ökwödö dujuluwaja̧tjö bajalekwönönö kwujuluwaduwajabe. Jau, ökwödö Abiezersaso jojodöma, sule jamatö dölakwabikwawatö, ja̧danö ökwödöma dölakwabikwawatjö bajalekwönönö kwölakwabikwawaduwajabe, döpöjojodönö kwujuluwaduwinö. Yötawaduwakwö, dölakwabikwawaja̧ ikena jamatö kwölakwabikwawaduwajayonö, yayonö dujuluwaja̧tjö bajalekwönönö kwujuluwaduwajabe.

³ Edaduwi, Diosma ökwödönö pjaatajabe, madianitas jojodötjö inesö juluwadö Orebnöbi, Zebnöbi kwujuluwaduwoböma ¿jö̧tö? Ötjöma kwujuluwaduwajaye chujuluwaji̧? Ja̧maökö, ökwödöda chujuluwaja̧tjö bajalekwönönö kwujuluwaduwajabe chömöledö, kwödameakwaduwoböma jwiobe, —jö̧ba̧lö atadinobe Gedeonma. Ja̧danö, jejenö atadawö̧, tjödameakwaja̧ma katjatakwawinobe Efrainsaso jojodöma.

Gedeon madianitas jojodötjö inesö la'aka luwedönö ujuluwina jawa

⁴ Jemi ikenama, Gedeonma madianitas jojodönö lubö ichibinobe Jordan ojwebe, ja̧danö ömöayedö trescientosbedökwö peibibinobe, tupakwö bajalenö madianitas jojodönö lutjobö. Ida̧ökö jwiinö a̧wi̧chi̧löjijayonö, ja̧danö tjime'dawijayonö, jwaikwöda tjöpöjojodönö lubö tji̧'yinobe.

⁵ Ja̧danö, Sucot comunidadbe ichibö, Gedeonma Sucot jojodönö aebinobe, —Pan öpji̧ya chömöayedönö kwiyaduwobö atebaduwakwö. Madianitas jojodötjö inesö la'aka luwedö Zebanöbi, Zalmunanöbi ludobe, ja̧danö chömöayedö tjime'dawachibobe, —jö̧ba̧lö.

⁶ Aebawö̧, Sucot comunidad luwedö tjatadinobe, —Diyökö, ina Zebanöbi, Zalmunanöbi kwujuluwokobe, jö̧tö? Ina jobadönö kwujuluwokobema, tajawedö kwömöayedönö pan diyobö, diyökö, —jö̧ba̧lö tjatadinobe.

⁷ Tjatadökwe, Gedeonma yöa̧linobe, —Kwöpöjödaduwobetjö̧ lȩtebakwawö̧ja. Isabenö Jo̧ma Zebanöbi, Zalmunanöbi do̧tatobö pjaatakobe, ja̧danö jemi ikenama, ökwödönö lȩbebö kwakwadocha. Tebo jawa sȩakanöbi, ju'wi sȩi̧ jawanöbi sȩaso chotidocha, ja̧danö otidajo̧ ökwödönö ba̧ja̧dö kwakwadocha, –Isabenö Gedeonnö pjadato jö̧da̧linobe, –jö̧ba̧lö kwöwaisachibaduwenanö baibanö, —jö̧ba̧lö yöa̧linobe Gedeonma.

⁸ Ikenama, Gedeonma jemi tupakwö madianitas jojodönö lubö i̧'yinobe, Peniel comunidadbe ichibanö, ja̧danö Sucot jojodönö aebaja̧danö Peniel jojojodönöbi pan tjiyobö aebinobe, ja̧danö aebawö̧, Sucot jojodö tjatadaja̧danö, bakwainö sulabenö tjatadinobe.

⁹ Jo̧kwajabetjö̧ sulabenö tjatadiökwe, Gedeonma jobadönö yöawinobe, —Kwatjö̧ma, inesö la'aka luwedönö juluwajo̧, tjebachajö bika kwiteboduwi comunidad jawa tjöekwakama, pjolö lotocha, —jö̧ba̧lö.

¹⁰ Inesö la'aka luwedö Zebabi, Zalmunabi Carcor comunidadnö tjö̧jinobe, tjömöayedötjö ji̧bajadökö, quince milbedökwö. Ajayinö yelösöda ba̧jȩkwadö tjö̧möayedö jawo̧ laebobekwötjö ichadökwö tjö̧jinobe, ciento treinta y cinco milbedökwö, jo̧kwaijayonö jobadötjö ciento veinte milbedö ölakwabikwawadö ida̧ökö debö tji̧'yajobetjö̧, quince milbedökwöda tjö̧jinobe.

¹¹ Ja̧danö, Gedeonma tea iyadö 'ya̧jita manabenö jobadönö luinobe. Jawo̧ laebobekwö 'ya̧nö, Noba comunidadbi, Yogbea comunidadbi tjöbaledinobe, ja̧danö baledajadö, madianitas jojodö tjö̧jobekwö tjichibinobe. Madianitas jojodöma wene jwia, ida̧ökö dö̧jibinö dödibajabe jö̧ba̧lö tjomukwatonö, juluwanö ichibö metji̧binobe.

¹² Metjibiawö̧, la'aka luwedö Zebabi, Zalmunabi tupakwö dötjibajinobe, jo̧kwaijayonö jobadönö lubö, jobadö inesö la'aka luwedönö do̧tjatinobe, ja̧danö okobe deinö tjö̧möayedö yebabinö tjipjelekwachibanö tjujuluwinobe.

¹³ Ikenama, jobadönö do̧batajo̧, Gedeonma tjölakwabikwawajelö ȩwa̧jinobe, Jeres 'da̧ba̧labenö.

¹⁴ Ja̧danö, Sucot comunidad yöne ichibö, Sucot jojodötjö bakwo̧ möayo̧nö do̧atinobe, ja̧danö do̧batajo̧, abebö a̧ja̧kwinobe, Sucot comunidad la'aka luwedö didöda jö̧ba̧lö öwaisachibakobetjö̧. Abebö a̧ja̧kwökwe, möayo̧ma okobe deinö Sucot comunidad luwedö tjimibiya yöawinobe, setenta y siete luwedö tjimibiyama.

¹⁵ Ikenama, tjimibiya yöawajökwe, Sucot comunidadbe i̧'yinobe, ja̧danö comunidad jojodönö yöawinobe: —Bidönö edaduwi. Belö pan atebenama, ökwödöma atadö oköbaduwijatö, –Zebanöbi Zalmunanöbi ina kwujuluwokobema, tajawedö kwömöayedö me'dawachibadönö pan diyobö, –jö̧ba̧lö oköbaduwijatö. Edaduwi, jejenö jö̧ka̧linaduwawö̧nö juluwajo̧, do̧tatajabe, —jö̧ba̧lö yöawinobe.

¹⁶ Ja̧danö, yöbawajo̧, Sucot comunidad la'aka luwedönö do̧atinobe, ja̧danö tebo jawa sȩi̧ ökiyabi, ju'wi sȩi̧ jawabi emibö, jobadönö lȩbebö kwakwainobe.

¹⁷ Ja̧danö ju'wibi, Peniel comunidadbe 'ya̧nö, tjöekwaka pjolö loinobe, ja̧danö Peniel comunidad ömadönö kwabawö loinobe.

¹⁸ Ikenama, Gedeonma Zebanöbi, Zalmunanöbi abebö a̧ja̧kwinobe, —Tabor mösa'otjö kwabö loköbinaduwawö̧ma, didöjayedönö kwabö loköbinaduwa̧da? —jö̧ba̧lö. Aebawö̧, tjatadinobe, —Okobe deinö jobadöma ökwö kwichejekwi̧danö, inesö la'aka luwo̧ i̧tji̧mudanö ichejekwadönö kwabö lodijatö, —jö̧ba̧lö.

¹⁹ Tjatadökwe, Gedeonma yöa̧linobe, —Jobadö kwabö loköbinaduwawö̧ma, yöne chöjawo̧dö, chojo'do jitji̧munöda kwabö loköbinaduwobe. Isabenö wene isabenö yötawaduwakwö, jobadönö kwabö loköbinaduwökötjö̧ma, ökwödönö kwabö lotoko jö̧ta̧lajena, jo̧kwaijayonö kwabö loköbinaduwobetjö̧, balekwa mikwa kwabö lotakwawö̧ja, —jö̧ba̧lö.

²⁰ Ja̧danö, yöbalajö̧, Gedeonma iteda itji̧ abönö pöe Jeter mikwo̧nö weinobe, —Jobadönö kwabö lobi, —jö̧ba̧lö. Jo̧kwaijayonö, weijayonö, Jeterma yeabinobe, ina möayo̧ ö̧jobetjö̧, ja̧danö kwölöte'o do̧a̧linokobe, jobadönö kwabö looböma.

²¹ Ikenama Zebabi, Zalmunabi Gedeonnö yötja̧linobe, —Möayo̧nö weköboko ökwödönö kwabö looböma, ökwödönö kwabö loawama, möayo̧ jawamaökö, damö jawada. Ökwöda ökwödönö kwabö loköbo, —jö̧ba̧lö. Yötja̧lökwe, Gedeonma a̧la̧ibö, jobadönö kwabö loinobe, ja̧danö tjitjeaja̧, tja̧jwi̧mu camello̧dö tjulume'anö tjönawi̧ jawa orotjö otikwa jawama, Gedeonma do̧batö eminobe.

²² Jemi ikenama, israel jojodöma Gedeonnö atjebinobe, —Ökwöda inesö la'aka duluwo̧ kwö̧jobö dösöda, ja̧danö woköbaja̧ ikena kwitji̧da duluwo̧ ö̧jo̧bö, ja̧danö jo̧ba ikena kwö̧'nö duluwo̧ ö̧jobö. Jau Gedeon, ökwöma madianitas jojodötjö dö̧jibinö pjakatajobetjö̧, duluwo̧ kwö̧jobö dösöda, —jö̧ba̧lö atjebinobe.

²³ Atjebökwe, Gedeonma öpöjödinobe, —Ötjöbi, chitji̧bi inesö la'aka kwuluwo̧duwi dö̧jobö jwiobe chömöledö, Isabenö Jo̧ Diosda kwuluwo̧duwi ö̧jobö jo̧be chömöledö, —jö̧ba̧lö.

²⁴ Israel jojodö tjujuluwajawö̧ma madianitas jojodöbi, ju'wedöbi ismaelitas jojodö tjö̧jinobe, ja̧danö ju'wedö ismaelitas jojodö tjö̧nidanö, orotjö otikwa sasiyu tjö̧ninobe. Ja̧danö, israel jojodö jobadönö tjujuluwenama, okobe jwiinö tjiteaja̧ma tjeminobe, tjitea baibanö. Ja̧danö, Gedeonma jojodönö aebinobe, —Ökwödönö ateba, okobe deinö kwemaduwaja̧ orotjö otikwa sasiyu ötjönö kwiyaduwobö, sasiyuda —jö̧ba̧lö.

²⁵ Aebawö̧, —Jau, do̧'wo ösöwanö diyakwö, —jö̧ba̧lö tjatadinobe. Ja̧danö, nijinö sabana'wo pjabebö, okobe deinö bakwo̧nökwena tjemaja̧ sasiyubiya tjödinobe, Gedeon itea baibanö.

²⁶ Jemi ikenama tjiyaja̧ oro tjöninobe, dokwa nöinö ömökojobö jö̧ba̧lö, ja̧danö Gedeon aebaja̧danö tjiyaja̧ oroma, diecinueve kilo jenanö ömökinobe. Ja̧danö ju'wibi nöinö oro tjeminobe ja̧ möle, madianitas jojodötjö luwedö tjöni̧ jawabi, tja̧jwi̧mu kameyudönö tjulume'anö tjö̧ni̧ jawabi, ja̧danö juwibi inesö nöinö mikwawi̧ luwedö 'dutjawi̧ ka̧miji̧do̧bi tjeminobe.

²⁷ Ja̧danö, tjiyaja̧ orotjö, Gedeonma Diostjö jojodötjö la'aka pjabato̧ 'duawado̧, omukosa̧do̧danö ichejekwi̧ nönawa jawa orotjö otidinobe, itebo comunidad Ofranö önobö. Ja̧danö, ja̧ otidaja̧tjö wene baibinobe. Israel jojodöma ja̧ otidaja̧ jawa bȩbachibö tjösödinobe, Dios tjösödobö weöködanö. Jo̧kwajabetjö̧ ja̧ Gedeon otidaja̧ma, israel jojodönö 'daliwadanö ji̧nobe, jweinö Diosnöda tjösödo jö̧tja̧li̧tjö 'da̧bachibö, otidaja̧ sulabenö tjösödakobetjö̧.

²⁸ Jobekwö laebobe madianitas jojodönö tjujuluwina jawa. Ja̧danö, jemi ikenama, madianitas jojodöma tjujuluwinokobe, israel jojodönö tjölakwabikwawobö. Ja̧danö, Gedeon ina ö̧jayi, israel jojodöma cuarenta o̧bia baledibanö wene jwiinö tjitebonö tjö̧jinobe.

²⁹ Ja̧danö, madianitas jojodönö ujuluwaja̧ ikenama, Gedeonma iteda itebo comunidadbe ȩwa̧jinobe, jobe ö̧jobö.

³⁰ Ja̧danö, Gedeonma ilekwamu ba̧jȩkwadönö ujuna̧linobe, ja̧danö itji̧mu ömadönö setentabedönö 'ya̧ebinobe.

³¹ Ja̧danö, bakwuju ömöayujudanö ilekwonö ujuna̧linobe Siquen comunidadtjö, ja̧danö jobujubi jitji̧nö jeminobe, ja̧danö Gedeonma jo̧banö Abimelec jö̧ba̧lö imidinobe.

³² Ikenama, jwiinö pöe babibajo̧, Gedeonma ö'wö baibinobe, ja̧danö wobajo̧nö tjödinobe, Abiezersaso jojodö tjitebo comunidad Ofratjö, iteda abe'do Joasnö tjödinedo̧ iledo̧nö.

³³ Ja̧danö, Gedeon ö'wö baibenama, israel jojodöma juluwanö Diosnö katjatibinobe, ja̧danö yemidanö Baal ötjabökwenö tjösödinobe. Diosnö kabatibö, Baal Berit ötjabökwenö tjösödinobe, duluwo̧ dios jö̧ba̧lö.

³⁴ Tjuluwo̧ Isabenö Jo̧ Diosma okobe deinö tjöpöjojodö ö'öbötenia ju̧kwadötjö tjö̧jibanö pjaatijayonö, jo̧banö tjomukwatinokobe.

³⁵ Ja̧danö ju'wibi Yerubaal ötjabökwe Gedeonma otiwanö jobadönö pjaatinajayonö, jo̧ba itji̧mu tupadanö jojodönö dösölö̧jinö ösödö tjö̧jinokobe. Jwiinö otiwanö pjaatijayonö, ömöledönö sulabenö tjöpödinobe.