Jueces 7 - Dios Iwene

Gedeon madianitas jojodönö ujuluwina jawa

¹ Jemi ikenama, Yerubaal ötjabökwe Gedeonbi, okobe deinö ju'wedö israel jojodötjö ölakwabikwawa jojodö Gedeonkwö ju̧kwadöbi yȩayi a̧la̧ibö, Jarod ojwese'dobe tji̧'yinobe, jobetjö tjabekwobö. Ja̧danö, tjöpöjojodö madianitas jojodö tjabakwemima, jobetjö u'dakwöchobe tjö̧jinobe, wabeko More mösa'o badeibösekonö.

² Ja̧danö, Isabenö Jo̧ma Gedeonnö yöawinobe, —Ökwökwö ju̧kwadö israel jojodötjö ölakwabikwawadöma, yelösöda ba̧jȩkwadö tjö̧jobe. Chedemi ba̧jȩkwadökwö kwölakwabikwawaduwitjö̧ma, israel jojodöma ötjö chujulu tjo̧mukwatökena, idöda tjujulu tjomukwatena, –Juluwadödobetjö̧ dujuluwajabe, –jö̧ba̧lö. Jejenö tjomukwatapji jö̧ba̧lö, ba̧jȩkwadönö öbibö kwölakwabikwawobö chöpöjöda.

³ Jo̧kwajabetjö̧, baikwö wetakwö, kwömöayedö ölakwabikwawadö tja̧ja̧kwonö, yöbawidönö, –Ökwödötjö yebabinö tjö̧bawadöma, kwejuduwibe kwȩwa̧jaduwobö jo̧be, —jö̧ba̧lö weinobe. Weökwe, weaja̧danö yöawinobe, yebabidö yebaböködötjö böjö 'da̧batö ujunakobetjö̧. Ja̧danö, yöawawö̧, ba̧jȩkwadö tjȩwa̧jinobe, diez milbedö Gedeonkwö tjö̧jibonö, veintidos milbedö tjȩwa̧jinobe.

⁴ Ikenama Isabenö Jo̧ma Gedeonnö yöawinobe, —Chedemi ina yelösöda tjö̧ba̧jȩkwachobe, jo̧kwajabetjö jobadönö öbibö kwi̧'yo, ojwiyo owawemibi, ötjöda omudawö chujunajawö̧nö ju'wedötjö böjö 'da̧batö chujunakobetjö̧. Bakwo̧nö, –Bitema ökwökwö i̧'yakwo̧, –yötawitjö̧ma, ökwökwö i̧'yobö ja̧kobe, ja̧danö, –Bitema 'yö̧kö̧, –yötawitjö̧ma, i̧'yobö jwiakobe, —jö̧ba̧lö yöawinobe Isabenö Jo̧ma Gedeonnö.

⁵ Yöawökwe, Gedeonma ölakwabikwawadönö öibinobe, ojwese'dotjö ojwiyo tjowobö, ja̧danö tjowobö weinobe. Isabenö Jo̧ma Gedeonnö yöawinobe, —Okobe deinö tjömamunö ojwiyo do̧batö, tjö̧mamunö a̧wi̧li̧dö tjowi̧danö owadönö, bakwachobe kwujunodönö, ja̧danö okobe deinö tju̧yu̧kijunö banö, bȩba̧chibö ojwese'dotjöda owadönö wainö jelekwöchobe kwujunodönö, —jö̧ba̧lö.

⁶ Ja̧danö, sule trecientosbedöda tjömamunö ojwiyo tjowinobe, okobe deinö ju'wedöma, tju̧yu̧kijunö ba̧nö, bȩbachibö tjowinobe.

⁷ Ikenama, Isabenö Jo̧ma Gedeonnö yöawinobe, —Bidö trecientosbedö tjömamunö owajadöda tjölakwabikwawonö, madianitas jojodötjö kwö̧jibaduwinö pjatatocha. Okobe deinö ju'wedönö tjȩwa̧jobö webidönö, —jö̧ba̧lö.

⁸ Jo̧kwajabetjö̧, jejenö weobetjö̧, trecientosbedöma öla̧kwabikwawadö tjichejebaja̧ kwakwawa jawabi, trompetabi e'ewö, Gedeonkwö tji̧'yinobe, ja̧danö okobe deinö ju'wedönö tjȩwa̧jobö weinobe Gedeonma. Ja̧danö, Gedeonbi, jo̧bakwö ju̧kwadö trecientosbedöbi mösa'onö tjö̧jinobe, ja̧danö mösa'o la'aka wabekonö madianitas jojodö tjö̧jinobe.

⁹ Ja̧danö, i̧ya̧da yö̧te, Isabenö Jo̧ma Gedeonnö yöawinobe, —Tjo̧wi, madianitas jojodö tjabobe mekibobö badekwachajabe, isabenö jobadönö kwujuluwobö chiyajobetjö̧.

¹⁰ Jo̧kwaijayonö, ina mekibobö yekabitjö̧ma, tjabobekwö 'ya̧wibi kwömöayo̧ Fura mikwo̧kwö,

¹¹ jobadö yötja̧lakwawi̧ kwa̧ja̧kwobö. Ja̧danö, yötja̧lakwawi̧ a̧ja̧kwö, kwujuluwachibanö kwa̧ja̧kwakwo̧ja, yebabökönö tjabobe mekibakobetjö̧, —jö̧ba̧lö. Yöawökwe, Gedeonma ömöayo̧ Furakwö tjöpöjojodötjö ölakwabikwawadö tjabemibe yöne i̧'yinobe.

¹² Jwiinö ba̧jȩkwadö madianitas jojodöbi, amalecitas jojodöbi, ju'wedö jawo̧ laebobekwötjö ichajadöbi tjö̧ba̧jekwinobe wabekonö, jwiinö tjö̧ba̧jȩkwobetjö̧ ma̧la̧ka̧yu tjö̧ba̧jekwi̧danö ichejekwinobe, ja̧danö tja̧jwi̧mu ka̧meyudöbi ba̧ja̧dakwawökenanö tjö̧jinobe, jwaibalawa ö'öbö so̧bi̧apu ba̧jȩkwi̧danö.

¹³ Ja̧danö, Gedeonma tjabemi ö'öbö ichibenama, bakwo̧ ömöledöso̧nö yöawobe a̧ja̧kwinobe, i̧'wi̧dinö edaja̧ yöawobe a̧ja̧kwinobe, baikwö: —Chi̧'wi̧dikwatö, ja̧danö chi̧'wi̧dinö cebadatjö otikwa panpja̧ mösa'otjö bölȩobekwö chedatö, ökwödö madianitas jojodö dabekwobekwö. Nijakwö bajalenö bölȩbö, sabana'wotjö otikweju töobekwö chedatö, ja̧danö 'diinö töobetjö̧, jwiinö töbö loobekwö chedatö, sabana'wotjö otikwejuma jwiinö nijakwö mebö bamatinö, —jö̧ba̧lö i̧'wi̧dinö yöawobe a̧ja̧kwinobe Gedeonma.

¹⁴ Ja̧danö, ömöledöso̧ atadi̧bi a̧ja̧kwinobe, baikwö: —Ja̧ kwedaja̧ma, baikwö labebö lotakwö, panpja kwedaja̧ma, israel jojo Joas itji̧ Gedeon itea kwölöte'o wanekwachobe, Diosma okobe deinö madianitas jojodönöbi, ju'wedö ölakwabikwawadönöbi ujuluwobö iyajobetjö̧, —jö̧ba̧lö labebö lobö yöawobe a̧ja̧kwinobe Gedeonma.

¹⁵ Jejenö a̧ja̧kwajo̧, Gedeonma bȩbachibö ösödinobe Diosnö, otiwanö pjabato̧ja jö̧ba̧lö. Ikenama, ömöledö israel jojodö tjabakwemibe ȩwa̧bijö, yöawinobe, —Tjo̧wita, a̧la̧ibaduwi. Isabenö Jo̧ma madianitas ölakwabikwawadönö dujuluwobö iyajabe, jo̧kwajabetjö̧ dölakwabikawajo, —jö̧ba̧lö.

¹⁶ Ja̧danö, ömöayedönö wapösokwa batjibanö 'da̧batö ujuninobe, ja̧danö okobe deinö ömöayedönö bakwo̧nökwena trompeta iyinobe, ja̧danö ju'wibi bakwo̧nökwena i̧sa̧yu iyinobe, ja̧danö i̧sa̧yu okwa dȩju̧wa'yubiya uba'yu̧ iyinobe. Ikenama, jejenö iyajo̧,

¹⁷ jobadönö weinobe, —Madianitas jojodö tjabobe tjösawö di̧'yakobe, ja̧danö jejenö tjösawö dö̧jenama, ötjö chi̧sȩbi̧ kwedaduwo, bakwa̧inö ja̧ti̧danö ökwödöbi ja̧köbaduwakobetjö̧.

¹⁸ Ötjöbi, ötjökwö yö̧ne ju̧kwadöbi trompeta pjudakobe, ja̧danö jejenö pjudenama, ökwödö tjabemi tjösawadöbi pjuköbaduwo, ja̧danö pjubadö, jwökeba̧laduwo, –Duluwo̧ Isabenö Jo̧ iminöbi, duluwo̧ Gedeon iminöbi dölakwabikwawo, —jö̧ba̧lö.

¹⁹ Jejenö webajo̧, Gedeonma, jo̧bakwö kwebachadö cienbedönö öbibö tjabakwemi ö'öböbe i̧'yinobe, yöte ja'ö teada̧lö eda̧ladö jamatö tjeda̧lena jenanö. Ja̧danö, trompeta pjubö, i̧sa̧yu 'datjebinobe, dȩju̧wa'yu otiwanö öwawobö.

²⁰ Jejenö wapösokwa jojodö bakobe trompeta pjubö, o̧yubiya 'datjebinobe, ja̧danö wajwitjobekwö tjömamunö dȩju̧wa'yu do̧tja̧lonö, tjöwaisobekwösamu trompeta do̧ba̧lö pjutjinobe, ja̧danö pjubajadö, labinö jwötjeba̧linobe, —Duluwo̧ Isabenö Jo̧ iminöbi, duluwo̧ Gedeon iminöbi, döpöjojodönö kwakwadakwawajo kwölöte'onö, —jö̧ba̧lö.

²¹ Okobe deinö Gedeon ömöayedöma, mebibökönö jenada tjö̧jamatinobe, jo̧kwaijayonö okobe deinö madianitas jojodöma jwöbeba̧liabö dötjibajotö jö̧ba̧lö ö'ötjakwawinobe.

²² Baikwö baledinobe, Gedeon ömöayedö trecientosbedö trompeta pjutjonö, Isabenö Jo̧ma weinobe, madianitas jojodö wajwibö yetjaibobö, ja̧danö tjömöledö tjömöledökwö tjölakwabikwawobö. Jo̧kwajabetjö̧ okobe deinö madianitas jojodöma, wajwibö idöda tjömöledökwöda kwölöte'ijunö tjölakwabikwawinobe, idöda tjömöledö ölakwabikwawa jojodönö kwabö lobö. Ja̧danö, madianitas jojodöma jobetjö dötjibajinobe, ju'wedöma Zerera comunidad jo̧bekwö dötjibajinobe, Bet Sitabe tjichibanö. Ödö döbibajö, Tabat comunidad yöneawinö tjichibinobe, Abel Mejola ö'öbö tjichibanö.

²³ Jejenö dötjibiawö̧, ju'wedö israel jojodönöbi jwötjinobe, pjabatö jobadönö lutjobö, ja̧danö Neftalisaso jojodötjöbi, Asersaso jojodötjöbi, Manassessaso jojodötjöbi, israel ölakwabikwawadö madianitas jojodönö lutjinobe.

²⁴ Ja̧danö ju'wibi Gedeonma yöbawadönö weinobe, Efrainsaso niji mösa'ijubenö yötjawobö, —Juluwanö Bet Barabe tjöbeba̧lö kwi̧'yaduwo Jordan ojwe lȩ'dakwobenö pebibö dötjibapji jö̧ba̧lö, —yötjawobö. Yötjawawö, okobe deinö Efrainsaso ölakwabikwawadöma yötjawaja̧danö tjöbeba̧lö tji̧'yinobe.

²⁵ Ja̧danö, ichibajadö, tjöbeba̧lö tjölakwabikwawinobe, ja̧danö ojwe pebibö tupakwö bajalenö madianitas jojodönö lubö, ölakwabikwawa jojodö tjuluwedö Oreb mikwo̧nöbi, Zeb mikwo̧nöbi do̧batö kwabö lotjinobe. Orebnö inawa nöawatjö kwabö lotjinobe, ja̧danö Zebnö laju ubasobu ja̧takwö otikwajutjö kwabö lotjinobe. Jejenö jobe jobadönö kwabö lotjinobetjö̧, babe tjimibiyanö ötjabobe, jawa inawama, Orebnö kwabö loinawa ötjabobe, ja̧danö ubasobu ja̧takwö otikwajuma, Zebnö kwabö loinaju jö̧ba̧lö ötjabobe. Ikenama, jobadönö kwabö lobajadö, tjebachajö, ojwe pebibö tjuubiya e'ewö tji̧'yinobe Gedeon ö̧jobekwö.