Jueces 6 - Dios Iwene

Madianitas jojodö israel jojodönö tjujuluwina jawa

¹ Ja̧danö, israel jojodöma yemidanö Isabenö Jo̧ öpöjödi̧ jawa sulabenö ja̧tjinobe, ja̧danö sulabenö ja̧tjiökwe, Isabenö Jo̧ma jobadönö iyö loinobe, tjöpöjojodö madianitas jojodö jobadönö tjujuluwobö. Ja̧danö, jelemutjö dötölataja o̧bia baledibanö, madianitas jojodöma israel jojodönö tjujuluwinobe, tjuluwedö ja̧nö.

² Jwiinö usula tjemawinö ja̧tjinobe madianitas jojodöma israel jojodönö, döbibajö tju̧ju̧kwawenanö kabatö. Sulabenö ja̧tjiawö̧, israel jojodöma mösa'ijubebi, inawa ötölabebi, jelobe tjöeba̧lakwawabebi döbibajö tju̧ju̧kwawinobe, jobadötjö tjö̧jibobö.

³ Isabenö usula tjemawinö ja̧tjinobe, ba̧kwelöjatebö israel jojodö batjo tjotidenama, wa̧ji̧ emajitja möle baibakwa̧ abönö madianitas jojodöbi, amalecitas jojodöbi, ju'wedö jawo̧ laebobekwö ju̧kwadöbi tjönaukwobö tjichinobe.

⁴ Ichibö, jobadöma tjabakwemi israel nijinö juniatjinobe, ja̧danö jobe ja̧nö, israel jojodö tjitea emö okobe jwiinö tjöbatjiju söbebö lobiatjinobe, Gaza comunidad ö'öbö nijibe ichibanö. Okobe jwiinö israel nijinö ji̧ batjo jawa jwienanö baibanö jejenö ja̧biatjinobe, ja̧danö ju'wibi okobe deinö tjajwi̧munöbi emiatjinobe, obejadönöbi, pakayadönöbi, bu̧lö̧dönöbi.

⁵ Isabenö ba̧jekwadö suli̧ waedö ichibiatjinobe tjajwi̧mukwöbi, tjejubiakwöbi ichibö. Ma̧la̧ka̧yö̧ tjö̧ba̧jekwi̧danö, jwiinö ba̧jȩkwadö suli̧ waedö tjichinobe, jojodönöbi, tjajwimu camellodönöbi tjö̧ba̧ja̧dökenanö ba̧jȩkwadö tjichinobe. Ja̧danö ichibö, okobe jwiinö israel jojodö tjitebo niji suli̧ tjöwaedinobe.

⁶ Jejenö balediawö̧, jwiinö jwibadö tjö̧jinobe israel jojodöma, usula tjemawinö, bajaliyanö Isabenö Jo̧nö pjaatobö tjubudekwenanö kabatö.

⁷ Madianitas jojodö sulabenö ja̧tja̧wö̧ Isabenö Jo̧nö tjubudekwinobe,

⁸ ja̧danö jejenö tjubudekwiökwe, Isabenö Jo̧ma iteda yöawi̧ yöbawo̧nö weinobe, israel jojodönö yöawobö: —Baikwö yöawobe Isabenö Jo̧, israel jojodö tjuluwo̧ Diosma, –Ökwödötjö ajayinö ji̧nadöma Egipto jojodö tjömöayedö tjö̧jinobe Egipto nijinö. Jo̧kwaijayonö, usula emawö, ju'wedö tjömöayedö tjö̧jinelö, jobadönö labebö ötibijatö ökwödötjö ajayinö ji̧nadönö.

⁹ Jau, Egipto jojodö tjujulutjö tjö̧jibanö pjatatijatö, ja̧danö okobe deinö ju'wedö kwa'dödönö sulabenö ja̧badötjö tjö̧jibanö pjatatijatö, ja̧danö ju'wibi tjöpöjojodö ajayinö bemi nijinö ji̧nadönö tjöba a'otjö a'dewö lotijatö. Jejenö bemi niji, ajayinö kwöpöjojodö tjö̧jinemi ökwödö israel jojodönöda chiyijatö, kwiteboduwi baibanö.

¹⁰ Ja̧danö, ökwödönö kwiteboduwi baibanö chiyenama, ökwödönö wetijatö, Ötjöma kwuluwo̧duwi Isabenö Jo̧ Diossa, ötjönöda kwösödaduwo. Amoritas jojodö tjiteboinemi nijinö kwö̧jaduwijayonö, jobadö tjösödawö̧ diosbedö jö̧tja̧lawö̧nö ja'yubebi kwösödaduwoko, jö̧ba̧lö wetijatö. Jo̧kwaijayonö, jejenö jweinö wetinajayonö, ökwödöma wetina a̧ja̧kwöködöja, jo̧kwajabetjö̧ ökwödönö pjatatoböma jwiobe –jö̧ba̧lö yöawobe Isabenö Jo̧ma, —jö̧balö yöawinobe Isabenö Jo̧ yöawi̧ yöbawo̧ma israel jojodönö.

Isabenö Jo̧ Gedeonkwö yöa̧lakwawina jawa

¹¹ Ja̧danö, ju'wi möle, Isabenö Jo̧ma, angeldanö ichejekwö öwawachinobe, ja̧danö Ofra comunidadtjö encina towi teebe öbamatinobe. Jowima, Manasessaso jojodötjö Abiezersaso jojo Joas itea towi. Jowi pjeanö, laju ubasobu ja̧takwö otikwaju ji̧nobe, ja̧danö jaju okwa, Joas itji̧ Gedeonma ju̧kwawö trigo sula'wo chabö loinobe, madianitas jojodöma edö tjönaukwapji jö̧ba̧lö.

¹² Jo̧ba Gedeonnö angeldanö öwawachinobe Isabenö Jo̧ma, ja̧danö Gedeonnö yöawinobe, —Baikwö yötawakwö ökwö ölakwabikwawa juluwo̧nö, Isabenö Jo̧ma isabenö ökwökwö ja̧nö pjaatobe, —jö̧ba̧lö.

¹³ Yöawökwe, Gedeonma atadinobe, —Chuluwo̧, dakwö –Isabenö Jo̧ma ökwökwö ö̧jobe, –jö̧ba̧lö yökawobö? Isabenö ökwödökwö ö̧jitjö̧ma, tajawedö babe sulabenö baledi̧ baledobeda? Da'dödö yötjawina da̧ja̧kwijatö, –Isabenö Jo̧ma ökwödönö Egipto nijitjö ichejebinobe, –jö̧ba̧lö, ja̧danö isabenö ökwödökwö ö̧jitjö̧ma, tajawedö inesö ujulu i̧sȩbina yötjawi̧danö baledokobeda? Isabenö Jo̧ma pjabatökönö, ökwödönö kabatibö loinobe, ja̧danö ökwödönö iyö loinobe, madianitas jojodö ökwödönö tjujuluwobö, dakwö ötjökwö ö̧jobe jö̧ba̧lö yökawobö, ökwödökwö deena ichejekwa, —jö̧ba̧lö atadinobe.

¹⁴ Atadökwe, Isabenö Jo̧ma Gedeon ö̧jobekwö edö yöawinobe, —Ötjöda ökwönö 'da̧batö wetakwö, israel jojodö madianitas jojodö tjujulutjö tjö̧jibanö pjakatobö. Kwujulu baibanö jejenö iyö wetakwö, jo̧kwajabetjö̧ tjö̧jibanö ölakwabikwawö 'ya̧wi, —jö̧ba̧lö.

¹⁵ Weökwe, Gedeonma atadinobe, —Ötjöma luwo̧bö̧kö̧sa, israel jojodö tjö̧jibanö pjatatobö. Okobe deinö Manasesessaso jojodötjö, baikwönönösasobedösa, ökwödö chabe'dö ömöledöma, ja̧danö okobe deinö chömöledötjö baikwönönöbo̧sa ötjöma, luwo̧bö̧kö̧sa, —jö̧ba̧lö.

¹⁶ Atadökwe, Isabenö Jo̧ma Gedeonnö yöawinobe, —Ötjödasa ökwönö pjatatakwo̧ma, jo̧kwajabetjö̧ ökwönö pjatatobetjö̧, wayökakobe jobadönö kwujuluwobö. Jau, jojo bakwo̧nöda tjujuluwi̧danö, madianitas jojodö tjö̧ba̧jȩkwijayonö, wayökakobe jobadönö kwujuluwoböma, —jö̧ba̧lö.

¹⁷ Yöawökwe, Gedeonma yöa̧linobe, —Chuluwo̧, isabenö ötjönö ösödö, pjakatobö jö̧ka̧litjö̧ma, kwösödi̧ i̧sȩkwi̧ jawa kwi̧sebobö atebakwö, –Isabenö Jo̧da ötjönö webo̧ma, –jö̧ba̧lö öwawinö chöwaisachibakobetjö̧.

¹⁸ Jo̧kwajabetjö̧, ȩwa̧jökönö, benada kwiteada̧lobö atebakwö, ȩwa̧bijö iyawa chiyakwa̧ kwöba a'o chujunenanö kabatö, —jö̧ba̧lö. Aebökwe, —Jau, chiteada̧locha, chȩwa̧jökö, yemidanö tjekachajenanö kabatö, —jö̧ba̧lö.

¹⁹ Gedeonma juluwanö ejube ȩwa̧jö, chivo ja'yuwo̧nö kwabö toinobe, ja̧danö trigoso̧pja̧ domulataja jawa kilo jenanö emibö, ye'yeachi̧ jwii̧ jawa pan öpji̧ya otidinobe. Ikenama, otidajo̧, itebiya wi̧lȩyu̧nö anajo̧, ja̧danö isobu toajobu pa̧laka'do̧nö tobajo̧, okobe jwiinö e'ewö i̧'yinobe Isabenö Jo̧ towi teebe ö̧bobekwö, jo̧banö iyobö.

²⁰ Ichibiökwe, angeldanö ichejekwo̧ Diosma jo̧banö weinobe, —Itebiyabi, pan öpji̧ya̧bi biwa inabanö wani, ikenama wanajo̧, ja̧ jawa wamenö isobu tobebi, —jö̧ba̧lö. Weökwe, weaja̧danö ja̧inobe Gedeonma.

²¹ Ikenama angeldanö ichejekwo̧ Isabenö Jo̧ma otokwa'o debatö, itebiyabi, öpji̧ya̧bi doebinobe, ja̧danö doebemi, inabatjö ökwöla nötekwajinobe, ja̧danö okobe jwiinö itebiyabi, öpji̧yabi jwiinö ubibinobe, ja̧danö angeldanö ichejekwo̧ Isabenö Jo̧ma omönanö Gedeon ö̧jelö debi baibinobe.

²² Jejenö balediökwe, Gedeonma öwaisachibinobe, —Angeldanö ichejekwo̧ Isabenö Jo̧nöda chedajabeta, —jö̧ba̧lö, ja̧danö öwaisachibajo̧, yöa̧linobe, —Isabenö Jo̧ Dios, ötjöwe, angeldanö ichejekwo̧ Isabenö Jo̧nöda chedajobetjö̧, ötjöwe, debö chi̧'yena, —jö̧ba̧lö.

²³ Jo̧kwaijayonö Isabenö Jo̧ma Gedeonnö yöawinobe, —Wene jwiköba, yebabökönui, ötjönö kwedajayonö, woköbökakwo̧ja, —jö̧ba̧lö.

²⁴ Jemi ikenama, Gedeonma jobetjö Isabenö Jo̧nö iyawemi jobetjö otidinobe, ja̧danö otidajo̧, iyawemi imi imidinobe, —Isabenö Jo̧ma dösölö̧jinö edo̧, —jö̧ba̧lö. Ja̧ iyawemi Gedeon otidinemima, ina jobe Abiezersaso jojodö tjitebo Ofra comunidadnö bo̧be.

²⁵ Ja̧danö, ja̧ yö̧te Isabenö Jo̧ma Gedeonnö weinobe, —Kwabe'do ajwi pakayaso̧ i̧so̧nö kwemo, ja̧danö jelo̧ ajwi pakayaso̧ i̧so̧nöbi, jelemutjö dötölataja o̧biya juna̧lo̧nö kwemo, ja̧danö emajo̧, kwabe'do itea Baalnö iyawemi pjolö loköbo, ja̧danö ju'wibi, jemi ö'öbö towisa'o, tjösödoko Aseranö ösödakwawa'obi jubö loköbo.

²⁶ Ikenama, ötjö kwuluwo̧ Isabenö Jo̧ Diosnö iyawemi kwotido, bi'o mösa'o wa̧pekwa'onö otiwanö kwotido jö̧ka̧li̧danö kwotido. Ja̧danö, Aseranö ösödakwa'o towisa'o imi baibanö paköbo, ja̧danö kwabe'do ajwi jelemutjö dötölataja o̧biya juna̧lo̧ do̧katajökwenö kwabö, ötjönö iyawa baibanö ja̧ Aseranö ösödakwa'otjö paköbaja̧ iminö juwö kwiyotjö, —jö̧ba̧lö weinobe.

²⁷ Weökwe, Gedeonma ömöayedötjö domulatajabedönö öbibö, Isabenö Jo̧ weaja̧danö ja̧inobe. Jo̧kwaijayonö, möle öwawenama ja̧inokobe, ömöledönöbi, ju'wedö itebo comunidad jojodönöbi yeabobetjö̧. Tjedapji jö̧ba̧lö, yö̧teda Dios weaja̧danö ja̧inobe.

²⁸ Ikena möle yȩayi jojodö wilubö tjedenama, Baalnö iyawemi pjolö loawemi tjöbadekwainobe, ja̧danö Aseranö ösödakwawa'o jubö loawobe tjöbadekwajinobe, ja̧danö ju'wibi, otidaja̧ Diosnö iyawemi, pakayaso̧ Diosnö kwabö juwö iyawajemi tjöbadekwajinobe.

²⁹ Badekwajadö, yötja̧lakwawinobe, —Tajijö, ti ja̧aja̧da? —jö̧ba̧lö. Ja̧danö, abebö a̧ja̧kwö tjisakwinobe, ti ja̧ajobö jö̧ba̧lö tjöwaisachibobö. Abebö a̧ja̧kwawö̧, ju'wedö yötja̧winobe, —Joas itji̧ Gedeonda ja̧ajabeta, —jö̧ba̧lö.

³⁰ Yötjawawö̧, comunidad jojodöma Joasnö yötja̧linobe, —Kwitji̧nö baikwö labebinö, jo̧banö kwabö lodakobetjö̧. Dösödökwe Baalnö iyawemibi, ö'öbösa'o dösödoko Aseranö ösödakwawa'obi söbebö loajobetjö̧, jo̧banö kwabö lodobö jo̧be, —jö̧ba̧lö.

³¹ Jo̧kwaijayonö, Kwitji̧nö labebi jö̧ba̧lö yöba̧ladönö atadinobe, —Ja̧maökö. Kwedaduwemi, ökwödöda Baalnö tjöbeba̧lö teada̧ladö kwö̧ja̧duwiji̧? Ökwödöda Baalnö söbebö lotjapji jö̧ba̧lö tjökeba̧laduwobö kwomukwataduwiji̧? Isabenö yötawaduwakwö, okobe deinö Baalnö tjöbeba̧ladönö kwabö lotjakwawö̧, itekwai möle dewachakwa̧ abönö, okobe deinö debö tji̧'yakwedö. Baalma isabenö diosbo̧ ö̧jitjö̧ma, iteda ujulu ujuna̧lena, jo̧bada öpöjojonö ölakwabikwawobö jȩna. Tjöeba̧lo jö̧ba̧lo̧ma Baalda, ökwödö jawamaökö, —jö̧ba̧lö atadinobe.

³² Ja̧danö, jejenö, —Tjöeba̧lo jö̧ba̧lo̧ma Baalda, —jö̧ba̧lö yöa̧lobetjö̧, jemi tupakwö Gedeonnö tjimidinobe, Yerubaal jö̧ba̧lö, —Iteda iyawemi söbebö loiökwe, tjöeba̧lo jö̧ba̧lo̧ma Baalda, —jö̧ba̧lö.

³³ Jemi ikenama, ja'yubenö lekwajabetjö, madianitas jojodöbi, amalecitas jojodöbi, ju'wedö jawo̧ laebobekwö ju̧kwadöbi bakobe tjichinobe, ja̧danö Jordan ojwe pebibö, Jezrel wabekonö tjabakwemi tjujuninobe.

³⁴ Jejenö tjichibiökwe, Isabenö Jo̧ o̧'wo luwo̧ma Gedeonkwö ichibinobe, ja̧danö Gedeonma trompeta pjuinobe, Dios pjaatonö döpöjojodönö dölakwabikwawo, jö̧ba̧lö.

³⁵ Pjuiawö̧, Gedeon ömöledösaso Abiezer jojodöma ö̧jobekwö tjichinobe, ja̧danö ju'wibi Gedeonma yöbawadönö weinobe, yöbawadö okobe jwiinö ömöledösaso Manases niji ba̧kwemeachibanö ölakwabikwawadönö jwötjobö, ichö tjölakwabikwawakobetjö̧. Ja̧danö ju'wibi Asersaso jojodönöbi, Zabulonsaso jojodönöbi, Neftalisaso jojodönöbi yötjawobö weinobe, jobadöbi ichö tjölakwabikwawobö.

Isabenö Jo̧ Gedeonnö i̧sȩbina jawa, isabenö ötjöda wetakwö, jö̧ba̧lö

³⁶ Ikenama Gedeonma Diosnö aebinobe, —Chuluwo̧, isabenö ötjönötjö̧ chömöledö israel jojodö tjö̧jibanö pjakatakwojobö jö̧ba̧lö, baikwö kwi̧sȩbobö atebakwö:

³⁷ Makö yö̧te trigo chabö loaweju nijinö obeja i̧sȩdo̧ pjabebö chödocha. Ja̧danö, yȩayi dewachena, ö'öbö niji kököonö, sule i̧sȩdo̧da si̧li̧'idö tji'olitjö 'yoliwitjö̧ma, chöwaisachibakwo̧sa, –Isabenö yöka̧linadanö ötjönötjö̧ israel jojodö tjö̧jibanö pjakatakwo̧ja, —jö̧ba̧lö.

³⁸ Ja̧danö, aebaja̧danö baledinobe. Yȩayi a̧la̧ibenama, ö'öbönö kököijayonö, jwiinö 'yoliwinobe i̧sȩdo̧ma, ja̧danö i̧sȩdo̧ 'yuatenama, deja'do̧ bakwa'do su̧'bȩ baibanö 'yuatinobe.

³⁹ Jejenö balediökwe, Gedeonma yemidanö Diosnö aebinobe, —Chuluwo̧, yemidanö kwi̧sȩbobö atebijayonö, kwödameakwokobö atebakwö. Yemidanö kwi̧sȩbobö atebakwö, isabenö pjakatakwa̧ öwaetjöda öwawinö chöwaisachibobö. Yemidanö i̧sȩdo̧ pjabebö chödocha, ja̧danö babe yö̧te, i̧sȩdo̧ kököonö, ö'öbö nijida si̧li̧'idö tji'olitjö 'yoliwobö atebakwö. Jejenö kwi̧sȩbitjö̧ma, öwaetjöda öwawinö chöwaisakwo̧sa, isabenö pjakatakwo̧ja, —jö̧ba̧lö.

⁴⁰ Aebökwe, aebaja̧danö yemidanö baledobö weinobe Diosma. Sule i̧sȩdo̧da kököinobe, ja̧danö okobe jwiinö ö'öbö nijima, si̧li̧'idö tji'olitjö 'yoliwinobe.