Jueces 5 - Dios Iwene

Sisaranö tjujuluwobö pjaatiawö̧, Diosnö ösödö lo̧tjina jawa

¹ Ja̧danö, jejenö Sisaranö tjujuluwobö Dios pjaatiawö̧, Deborabi, Baracbi Diosnö ösödö lo̧tjinobe, baikwö:

² Israel jojodötjö luwedöma otiwanö tjömöledönö ötjibinobe, tjöpöjojodönö tjujuluwobö, ja̧danö ju'wedö israel jojodöma tjuluwedö ötjibi̧danö tjölakwabikwawobö tjösödinobe, jo̧kwajabetjö̧ Isabenö Jo̧nö dösödo.

³ Ökwödö inesö la'aka luwedö a̧ja̧kwaduwi, ja̧danö ökwödö ju'wedö la'aka luwedöbi omukwatö kwa̧ja̧kwaduwo, Isabenö Jo̧nö ösödö lo̧tonö. Jau, ökwödö israel jojodö dösödökwe Isabenö Jo̧ Diosnö ösödö lo̧tonö, a̧ja̧kwö kwomukwataduwo.

⁴ Chuluwo̧ Isabenö Jo̧, ökwöma Seir mösa'otjö kwölakwabikwawobö lakebijatö, ja̧danö jejenö Edom nijitjö lakebenama, niji tjö̧awinobe, ja̧danö mölejȩ meobedanö, nöinö ojwiyo o̧binobe.

⁵ Damötjö̧ Sinai mösa'otjö iteda ujulu i̧sebinama Isabenö Jo̧ Diosda, ja̧danö jo̧ba ökwödö israel jojodö dösödökwe Isabenö Jo̧ Dios öba a'otjö, mösa'ijuma tjö̧awinobe, duluwo̧ma jwiinö juluwo̧obetjö̧.

⁶ Samgar mikwo̧bi, Jael mikwujubi tjö̧jenama, jwiinö labinobe, jojodö mana jalamanö kwetjachökenanö baibanö. Jwiinö labiawö̧, kwebachadöma ja'yuwama mananöda ju̧kwawöda kwetjachinobe.

⁷ Jwiinö labobetjö̧, jojodöma pjei̧ comunidadnö tjö̧jinokobe, Deborama tjuluwuju bajibenanö kabatö, tjojo'dodanö ja̧nö, tjuluwuju babibö, jobadönö pjajatenanö kabatö.

⁸ Israel jojodö Diosnö kabatibö, yabayedö tjösödawö̧nö tjösödenama, döpöjojodöma metji̧binobe, comunidad apjudebe ichibanö tjölakwabikwawinobe. Jejenö baledenama, otokwötebi, tjöekwapibi jwiinobe ditebotjöma, cuarenta mil jojodö tjö̧'da̧detjöbi, bakwötebi, bakwapibi jwiinobe.

⁹ Isabenö cho̧'wo ösöwanö chomukwatobe babe ökwödö israel jojodö duluwedönöma, jobadöbi ju'wedöbi tjo̧'wo ösöwanö tjölakwabikwawobö tjichinobe, inesö labijayonö, yayonö tjo̧'wo ösöwanö tjichinobe, döpöjojodötjö dö̧jibobö. Jobadönö omukwatö, cho̧'wo ösöwanö chösödobe Isabenö Jo̧nö, isabenö duluwo̧ Diosnö dösödaduwo.

¹⁰ Okobe deinö ja̧ baledaja̧ wene yöbawö lo̧köbaduwo, ökwödö nöinö juna̧ladö sabana'wo otiwa'wo wa̧nibö, dewadö bu̧lu̧dö tjoma'anö kwebachadöbi, jo̧kwadabedö tjömasapiyanö kwebachadöbi, okobe deinö ösödinö lo̧köbaduwo.

¹¹ Ojwe se'dotjö ko̧ko̧kwadö lo̧tji̧ a̧ja̧kwaduwi, jobadöma Isabenö Jo̧ otiwanö pjaatina jawa lo̧tjobe, iteda ömöledö israel jojodö pjei̧ comunidadnö ju̧kwadö tjujuluwobö pjaatina jawama. Isabenö Jo̧ ömöledö israel jojodöma, ditebo comunidad apjudebe kwebachö, ökwödönö jwötjinobe,

¹² —¡Wilubi Debora wilubi! ¡Wilubaju lo̧awa lo̧bi! ¡A̧la̧ibi Barac, kwujuluwajawö̧nö juluwajo̧ jelobe öbibi, ökwö Abinoan itji̧ Barac! —jö̧ba̧lö jwötjeabinobe.

¹³ Jemi ikenama, otiwadö Isabenö Jo̧ ömöledö israel jojodötjö ji̧badöma, tjuluwo̧ Isabenö Jo̧ wei̧danö tjölakwabikwawotö jö̧ba̧lö, ökwödö tjuluwedökwö tjichinobe, döpöjojodö juluwadönö dujuluwobö.

¹⁴ Efrainsaso jojodö tjitebo, damötjö̧ amalecita jojodö tjö̧jinelö otiwanö tjichinobe, ökwödö Benjaminsaso jojodö kwökömanöduwi tjichinobe. Maquir itji̧mu tupadanö jojodötjö ölakwabikwawa jojodö tjuluwedö tjichinobe, ja̧danö Zabulonsasotjö inesö ölakwabikwawa jawa la'aka luwedö tjichinobe, otiwanö.

¹⁵ Isacarsaso jojodötjö luwedöma Deborakwö tjichinobe, ja̧danö tjuluwo̧ Baracnö kabatibökönö, jwaikwöda jo̧bakwö ö'öbakwawö wabekobe yututjajinobe, tjöpöjojodönö tjölakwabikwawobö. Jo̧kwaijayonö Rubensaso jojodöma lekwe ichökönö tjö̧jinobe, tjichojobö tjichokojobö jö̧ba̧lö omukwatö.

¹⁶ Ökwödö Rubensaso jojodöma, tajawedö lekwe obejadönö teada̧lakwawelö kwiteada̧laduwada? Obejadönö jwötjakwa̧ kwa̧ja̧kwaduwobö kwiteada̧laduwaji̧? Isabenö lekwe omukwata̧lö tjiteada̧linobe Rubensaso jojodöma, tjichojobö tjichokojobö jö̧ba̧lö.

¹⁷ Galaad nijinö ju̧kwadöbi Jordan ojwetjö bakwachödö tjö̧jibinobe, ja̧danö Dansaso jojodöma ichökönö, isowi lȩna tjö̧jibinobe. Asersaso jojodöma jwaibalawa ö'öbönö tjö̧jibinobe, ichökönö tjolanö tjö̧jibinobe.

¹⁸ Jo̧kwaijayonö jobadö tjichököjayonö, Zabulonsaso jojodöbi, Neftalisaso jojodöbi otiwanö tjölakwabikwawinobe, debö tji̧'yo jö̧tja̧lijayonö, yayonö jwaikwöda tjölakwabikwawinobe.

¹⁹ Döpöjojodö cananeo jojodötjö la'aka luwedöma, ichö ökwödönö tjujuluwotö jö̧ba̧lö tjölakwabikwawinobe, Meguido ojwese'do o'obö Tanactjö ökwödökwö tjölakwabikwawinobe, jo̧kwaijayonö tjujuluwinokobe, ja̧danö ditea plata jawa tjeminokobe.

²⁰ Mölejebetjö si̧li̧'idöda tjölakwabikwawinobe ichejekwa, tjö̧lajelö Sisarakwö tjölakwabikwawinobedanö jino̧be.

²¹ Quison ojwe, damötjö li̧nödö Quison ojwema, buluwanö jobadönö okwatibö isuwedinobe. Isabenö cho̧'wo ujuluwachibobö jo̧be, chujuluwachibanö tupakwö chölakwabikwawobö.

²² Sisara ömöayedö tja̧jwi̧mu kabayudö ö'ötjakwawi̧ma labinö ökwöinobe, tja̧jwi̧mu juluwadö ö'ötjakwawi̧ma labinö ökwöinobe.

²³ Meroz comunidad jojodö pjabatöma tjichinokobe, ja̧danö tjichiökökwe Isabenö Jo̧ ömöayo̧ angel yöawinobe, Dios lȩebakwawö̧ Meroz jojodönö, Isabenö Jo̧nö pjabatö tjichokobetjö̧, juluwadö cananeo jojodönö kwakwabakwawö tjichokobetjö.

²⁴ Jo̧kwaijayonö isabenö otiwanö Dios pjaatakwuju Jael mikwujunö, ceneo jojo Heber ilekwonö, okobe deinö ju'wedö sabana'wotjö otikwejunö ju̧kwadö ya̧dötjö bajalekwönönö pjaatakwuju Jaelnöma, otiwanö ökwödönö pjajatobetjö̧.

²⁵ Sisara ojwiyo jiyobö aebioko, leche jiyinobe, otiwa'do̧ luwedö tjowa'do̧nö lechesa'be owobö jiyinobe.

²⁶ Ikenama Jaelma sabana'wotjö otikweju di̧a̧takwawa ö̧'i̧ya̧ do̧jatinobe, ja̧danö jöwaisobekwö jömamunö martiyubi do̧jatinobe. Do̧bataju Sisaranö 'diinö bȩjȩbinobe, uu 'dajebinobe, ja̧danö ölakiyusakanö tibatö bȩjebinobe.

²⁷ Bȩjebökwe, jenada jömasapiya a'o meinobe Sisarama, jömasapiya a'o mebajo̧, jenada ö'wö baibinobe.

²⁸ Sisara ojo'doma jitji̧ ȩwa̧jakwa̧ jiteada̧linobe, lekwe ichiokoko, ventanasa'dotjö ichibakwa̧ jiteada̧linobe, —Chitji̧ iteaka kolukama, tajawedö lekwe ichokobejö, tajawedö lekwe ajwimu kabayudö koluka töbadö ö'ötjakwawi̧ ökwöobe cha̧ja̧kwokobejö? —jö̧ba̧lö.

²⁹ Jömöayedö waisadöbi, isujudabi atada̧lakwawö tjomukwatinobe baikwö,

³⁰ —Lekwe ȩwa̧jökönö tjö̧ji̧ma, tjöpöjojodö tjiteaja̧ma tjemobetjö̧ lekwamachibobe, tjitea tjemaja̧ 'da̧batö tjujunobetjö̧ lekwe ichöködö. Tjujuluwajawö̧ ya̧dötjö bakwo̧kwena ömöayuju bakwujuena, du̧ju̧tajaena tjemobetjö̧, lekwemachibena. Ja̧danö Sisarama kamiji̧do̧ otiwa̧do̧, inesö otiwanö otikwa̧do̧ dödo̧lataja 'dutawakwa̧do ichejebobö emobetjö̧, lekwe ichökö, —jö̧ba̧lö jomukwatinobe Sisara ojo'doma, jitji̧ lekwe ichiokoko.

³¹ Döpöjojo Sisaranö baledinadanö, okobe deinö chuluwo̧ Isabenö Jo̧ öpöjojodö debö tji̧'yobö chösöda, jo̧kwaijayonö Isabenö Jo̧nö ösödadöma möle jawo̧ ujulunö kaekwaji̧danö tjujuluwachibobö chösöda, jö̧ba̧lö lo̧tjinobe Deborabi, Baracbi, Diosnö ösödö. Ja̧danö jemi ikenama cuarenta o̧bia baledibanö israel jojodöma wene jwiinö tjitebonö tjö̧jinobe.