Jueces 4 - Dios Iwene

¹ Ja̧danö, Aod ö'wö baibaja̧ ikenama, israel jojodöma yemidanö Isabenö Jo̧ öpöjödi̧ jawa sulabenö ja̧tjinobe.

² Jejenö sulabenö ja̧tji̧ökwe, Isabenö Jo̧ma jobadönö iyö loinobe, tjöpöjojodö cananeo jojodötjö la'aka luwo̧ Jabin mikwo̧ jobadönö suli̧ waedö ujuluwobö. Jo̧ba Jabinma, Jazor comunidadnö ja̧nö, ömöayedönö weinobe. Ja̧danö, Jabin ömöayedö ölakwabikwawa jojodö tjuluwo̧ma Sisara mikwo̧ ö̧jinobe, ja̧danö Sisarama Jaroset Goyim comunidadnö ö̧jinobe.

³ Jabin ömöayedö ölakwabikwawa jojodöma isabenö juluwadö tjö̧jinobe, novecientos 'dii jawatjö otikwa ölakwabikwawa kolukiya tjujuna̧lobetjö̧, ja̧danö israel jojodönö juluwajadö, veinte o̧bia baledibanö israel jojodönö webö tjö̧jinobe, usula tjemawinö. Jejenö veinte o̧bia baledibanö usula emawajadö, israel jojodöma bajaliyanö Isabenö Jo̧nö tjubudekwinobe, jobadönö pjaatobö.

⁴ Ja̧ möle, Lapidot ilekwo Debora mikwuju israel jojodönö jwebebö jö̧jinobe. Jobuju Debora mikwujuma Dios yöawi̧ yöbawuju jö̧jinobe,

⁵ ja̧danö Efrain niji mösa'iju jȩmi nijinö, jitea öjiya towi teebe ba̧nö, israel jojodönö yöbawö jö̧jinobe. Ja̧ öjiya towima, Rama comunidadbi, Betel comunidadbi ö'wejenö jinobe, ja̧danö israel jojodöma jobe jöba a'o ichibiatjinobe, wene baibena Debora lȩekwa yöjawobö.

⁶ Ja̧danö, ju'wi möle bakwo̧ Neftalisaso comunidad Cedes jojo Barac mikwo̧nö jwöjinobe, jö̧jobekwö ichobö, ja̧danö ichibioko, jo̧banö yöjawinobe: —Barac, israel jojodö tjuluwo̧ Isabenö Jo̧ Diosma ökwönö weobe, –Neftalisaso jojodötjöbi, Zabulonsaso jojodötjöbi ölakwabikwawadö diez milbedönö ko̧ko̧di, ja̧danö ko̧ko̧dajo̧, jobadönö öbibö 'ya̧wi, Tabor mösa'obe.

⁷ Ja̧danö, jobe Tabor mösa'onö kwiteada̧laduwonö, ötjö Diosma la'aka luwo̧ Jabin ömöayedö ölakwabikwawa jojodö tjuluwo̧ Sisaranö ötibocha, kolukiyanö ölakwabikwawadökwöbi, ju'wedö ömöayedö ölakwabikwawadökwöbi Quison ojwebe ichobö, jobetjö jobadökwö kwölakwabikwawaduwakobetjö̧. Ja̧danö, jejenö kwölakwabikwawaduwenama, ötjö Diosma jo̧banö kwujuluwobö pjatatocha, –jö̧ba̧lö Dios wei̧ yötawakwö, —jö̧ba̧lö yöjawinobe Deborama Baracnö.

⁸ Jejenö yöjawökwe, Baracma atadinobe, —Jau Debora, ötjökwö kwichitjö̧ma, yöka̧laja̧danö chi̧'yocha, jo̧kwaijayonö kwichökötjö̧ma, chi̧'yökena, —jö̧ba̧lö.

⁹ Atadoko, Deborama yöjawinobe, —Jau, ökwökwö chichocha, jo̧kwaijayonö jejenö ötjö detinö kwi̧'yobö kwöpöjödobetjö̧, baikwö yötawakwö: Ökwöda wetaja̧danö kwi̧'yatjö̧ma, ökwödada döpöjojo Sisaranö kwabö loköbo jö̧ka̧lajena, jojodö otiwanö tjo̧mukwatökwe bakibanö. Jo̧kwaijayonö ötjöbi chichobö ökibobetjö̧, Isabenö Jo̧ma weakobe, jojosujuda Sisaranö kwabö lojobö, —jö̧ba̧lö yöjawinobe Deborama. Ja̧danö, yöbawaju, a̧la̧ibö Barackwö ji̧'yinobe, Cedes comunidadbe.

¹⁰ Ja̧danö, Cedesbe ichibajadö, Baracma Zabulonsaso jojodönöbi, Neftalisaso jojodönöbi jwöinobe, jobadötjö ölakwabikwawadö ö̧jobekwö tjichobö. Ja̧danö ichibajadö diez milbedönö öbibö, Tabor mösa'obe i̧'yinobe Baracma, ja̧danö jo̧bakwö Deborabi ji̧'yinobe.

¹¹ Ja̧ möle quenita jojo Heberma, ju'wedö ömöledö Moises öjaba Hobab mikwo̧ itji̧mu tupadanö jojodötjö 'da̧bachibö ö̧jinobe. Jobadötjö 'da̧bachibö ja̧nö, eju sabana'wotjö otikweju Cedes comunidad yöneawino ujuninobe, Zanayinnö jo̧wi encina towi pjeanö.

¹² Barac ölakwabikwawa jojodönö öbibö Tabor mösa'obe i̧'yiökwe, Sisarama i̧'yaja̧ wene yötjawi̧ a̧ja̧kwinobe,

¹³ ja̧danö a̧ja̧kwajo̧, okobe deinö ömöayedönö o̧ko̧kodinobe, novecientos 'dii jawatjö otikwa kolukiyanö ölakwabikwawadönöbi, ju'wedö ölakwabikwawadönöbi, ja̧danö jobadönö ko̧ko̧dajo̧, Jaroset Goyimtjö labebö, Tabor mösa'o ö'öbö lö̧dö Quison ojwebe öbibö i̧'yinobe, Barackwö ölakwabikwawobö.

¹⁴ Jejenö ichibioko, Deborama Baracnö yöjawinobe, —Tjo̧wi, babe möle Isabenö Jo̧ma ökwönö iyajabe, döpöjojo Sisaranö kwujuluwobö. Isabenö Jo̧ma kwabönö 'ya̧nö jobadönö ölakwabikwawobe, jo̧kwajabetjö̧ bi'o mösa'otjö yutubajö mekibaduwo, —jö̧ba̧lö. Yöjawökwe, Baracma ju'wedö diez milbedö ölakwabikwawa jojodönö öbibö, jobe Tabor mösa'otjö yutubajö i̧'yinobe, Sisarakwö tjölakwabikwawobö.

¹⁵ Ja̧danö, tjölakwabikwawenama, Isabenö Jo̧ma tjabönö ölakwabikwawinobe, Sisarabi, kolukiyanö ölakwabikwawadöbi, ju'wedö ölakwabikwawadöbi Barac öba a'otjö yebabinö dötjibajenanö. Ja̧danö, Sisarama iteaka kolukatjö mebibö ö'öbakwawö döibajinobe.

¹⁶ Sisara jejenö döibajonö, Baracbi, ömöayedöbi ju'wedö Sisara ömöayedönö lubö kwabawö lotjinobe, kolukiyanö ölakabikwawadönöbi, ju'wedönöbi. Jaroset Goyim comunidadbe tjichibenanö kabatö jobadönö lutjinobe, ja̧danö okobe deinö Sisara ömöayedönö kwabawö lotjinobe, bakwo̧bi ö̧jibökönö.

¹⁷ Ja̧danö, jejenö Sisara ömöayedönö lubö kwabawö lotjonö, Sisarama jo̧dawa'ye ö'öakwawinobe, quenita jojo Heber ilekwo Jael mikwuju jejube ichibenanö kabatö. Jael jilekwe Heberma la'aka luwo̧ Jabin ömöledöso̧danö ö̧jinobe, jo̧kwajabetjö̧ jobekwö döibajinobe Sisarama, jobe wene jwiinö ö̧jibobö.

¹⁸ Ja̧danö, jejenö jejube ichibioko, Jaelma jeju sabana'wotjö otikwejutjö labebö, Sisaranö yöja̧linobe, —Chuluwo̧, yebabökönui, cheju okwa wene jwiinö tebachi, tjöbadekwapji jö̧ba̧lö pjatatocha, —jö̧ba̧lö. Yöja̧lökwe, jeju okwa teachinobe Sisarama, ja̧danö jeju okwa ju̧kwawö tebachajo̧nö jumuchebinobe Jaelma, sabana'wonö.

¹⁹ Ja̧danö, Sisarama Jaelnö aebinobe, —Ojwiyo o̧ti̧löjabökwesa, ojwiyo chowobö atebakwö, —jö̧ba̧lö. Aeboko, lechesa'wo po̧bebö, lecheda owobö jiyinobe, ja̧danö iyaju, yemidanö sabana'wonö jumuchebinobe.

²⁰ Ja̧danö Sisarama Jaelnö aebinobe, —Apjudenö ja̧nö kwiteada̧lo, ja̧danö bakwo̧ ichibö, –Jelo̧ kwejunö ö̧jobeji̧? –jö̧ba̧lö aebitjö̧ma, –deobe, –jö̧ba̧lö kwatado, —jö̧ba̧lö aebinobe. Ikenama, abebajo̧, me'dawachibajo̧ abibinobe.

²¹ Jo̧kwaijayonö, me'dawachibajo̧ bö̧ti̧ söinö abibaja̧ ikenama, wainö ja̧jinobe Jaelma. Sabana'wotjö otikweju di̧a̧takwawa ö̧'i̧ya̧bi, martiyubi do̧bataju, tjo'omanö abibajo̧ ö̧jobekwö 'ya̧wibö, uunö ölakiyu möakwöchobenö nijakwö bajalenö bȩjebi̧nobe. 'Diinö bȩjebinobe, uunöbi, nijinöbi ö̧sö'a okwa söibanö. Jejenö Jaelma Sisaranö kwabö lojinobe.

²² Jemi ikenama, Baracma Sisaranö isakwö, Jael jeju badeibö öbaledenama, Jaelma Baracnö edö lajebinobe, ja̧danö jo̧banö yöja̧linobe, —Tebachi, kwisakwökwenö chi̧sȩbakwö, —jö̧ba̧lö. Yöja̧lökwe, teachinobe, ja̧danö kwabö lojajökwe Sisaranö jobe nijinö bȩjeba̧jökwenö öbadekwajinobe, sabana'wotjö otikweju di̧a̧takwawa ö̧'i̧ya̧nö bȩjebajökwe, ida̧ökö ö'wö babibajo̧nö.

²³ Jejenö ja̧ möle cananeo jojodö la'aka tjuluwo̧ Jabinnö tjujuluwobö pjaatinobe Diosma israel jojodönö.

²⁴ Ja̧danö ja̧ möle jamatö, ajayitjö bajalekwönönö tjujuluwinobe israel jojodöma, ja̧danö Jabinma tjöba a'otjö ajayitjö bajalekwönönö ime'dawachibinobe, bajaliyanö jo̧ba cananeo jojodö la'aka tjuluwo̧ Jabinnö jwiinö söbebö lotjenanö baibanö.