Jueces 3 - Dios Iwene

^1-2 Jobadö Josue ujuluwinököwö̧, Isabenö Jo̧ma a'dewö lobökönö jobe tjö̧jobö weinobe, israel jojodö dakwö ja̧bö tjö̧jojobö jö̧ba̧lö öwawakobetjö̧. Israel jojodö ajayinö Josuekwö canaan nijibe ichibinadöma, tjöpöjojodökwö ölakwabikwawa tjöwaisinobe, ja̧danö tji̧tji̧mu tupadanö jojodöbi cananeo jojodökwö ölakwabikwawö, ölakwabikwawa tjöwaisachibakobetjö̧, Isabenö Jo̧ma jobadö cananeo jojodö ina tjitebonö tjö̧jobö weinobe.

^3-4 Damötjö̧ Isabenö Jo̧ma Moisesnötjö̧ israel jojodönö weinobe, canaan niji ju̧kwadökwö pjabacha̧lökönö, jwaikwöda jobadönö söbebö lotjobö, ja̧danö otiwanö weina tja̧ja̧kwojobö tja̧ja̧kwokojobö jö̧ba̧lö öwawakobetjö̧, cananeo jojodö ina tjitebonö tjö̧jobö weinobe, jobadökwö tjölakwabikwawakobetjö̧. Jobadö ina tjitebonö ji̧nadöma bidö: Filisteo jojodötjö bakwamu la'aka luwedöbi, tjitebokwena ju̧kwadöbi, ja̧danö cananeos jojodöbi, Libano niji mösa'iju, Baal Hermon mösa'otjö Lebo Jamatbe ichibanö ju̧kwadö sidonio jojodöbi, heveo jojodöbi.

⁵ Jo̧kwaijayonö, wei̧ tja̧ja̧kwojobö jö̧ba̧lö jejenö weinajayonö, tja̧ja̧kwinokobe israel jojodöma. Jobadökwö ölakwabikwawö a'dewö lobökönö, tjö̧'da̧de tjö̧jinobe israel jojodöma. Jobadökwö tjölakwabikwawo jö̧tja̧lijayonö, israel jojodöma jobadö cananeo jojodöbi, hitita jojodöbi, amorreo jojodöbi, ferezeo jojodöbi, heveo jojodöbi, jebuseo jojodöbi tjö̧'da̧de tjö̧jinobe, jobadönö a'dewö lobökönö.

⁶ Ju'wibi, jobadökwö pjabacha̧lakwawöbi kwö̧jaduwoko jö̧ba̧lö weinajayonö, jobadö tji̧tji̧mu ya̧dönö tjeminobe, tjilekwamu batjibanö, ja̧danö tjitji̧mu ya̧dö jobadö tji̧lekwamu batjibanö wetjinobe, Dios weina a̧ja̧kwökönö. Ja̧danö jemi tupakwöbi, jobadö tjösödawö̧ o̧'wo jawanöbi sulabenö tjösödinobe.

⁷ Isabenö Jo̧ öba a'otjö isabenö jwiinö sulabenö ja̧tji̧nobe israel jojodöma, Tjuluwo̧ Isabenö Jo̧ Diosnö tjo̧'wo jwibibö, juwedö tjösödawö̧nöda tjösödinobe, Baal ötjabökwe o̧'wo jawanöbi, Asterot ötjaboko jo̧'wo jawanöbi.

⁸ Ja̧danö jejenö sulabenö ja̧tji̧ökwe, Isabenö Jo̧ma jwiinö ödameakwinobe israel jojodönö, ja̧danö jobadönö iyö loinobe, tjöpöjojo Aram Najarayin niji la'aka luwo̧ Cusan Risatayin mikwo̧ jobadönö suli̧ waedö ujuluwobö. Ja̧danö, jejenö iyö loiawö̧, israel jojodöma jelemutjö wapötakwa o̧bia baledibanö jo̧ba ömöayedö tjö̧jinobe, wei̧danö otidö.

⁹ Ikenama, usula emawö, Isabenö Jo̧nö tjubudekwenama, Isabenö Jo̧ma jobadönö pjaatinobe. Jobadönö pjaatakwo̧nö kabebö ujuninobe, la'aka tjuluwo̧ ja̧nö, jobadönö jwebebö pjaatobö. Caleb öjawo̧ Quenaz itji̧ Otoniel mikwo̧nö kabebö ujuninobe, israel jojodönö pjaatakwo̧ baibanö, ja̧danö Otonielma jobadönö pjaatinobe, Cusan Risatayin ujulutjö tjö̧jibobö.

¹⁰ Isabenö Jo̧ o̧'wo luwo̧ma Otonielkwö ichibinobe, ja̧danö pjaatinobe, otiwanö israel jojodönö jweebobö. Israel jojodönö öbibö, Cusan Risatayinkwö ölakwabikwawobö i̧'yinobe, ja̧danö Isabenö Jo̧ma pjaatinobe, jo̧banö tjujuluwobö, ja̧danö israel jojodö jo̧batjö tjö̧jibanö jo̧banö ujuluwinobe Otonielma.

¹¹ Ikenama, Otoniel ina 'yaa̧layi, israel jojodöma wene jwiinö tjö̧jinobe, cuarenta o̧bia baledibanö, Otoniel ö'wö baibenanö kabatö.

¹² Jemi ikenama, israel jojodöma yemidanö Isabenö Jo̧ öpöjödinö sulabenö ja̧tjinobe. Jo̧kwajabetjö̧, sulabenö ja̧tjiökwe, Isabenö Jo̧ma tjöpöjojo Moab niji la'aka luwo̧ Eglon mikwo̧nö ujuluwachibanö weinobe, israel jojodönö suli̧ waedö ujuluwobö.

¹³ Eglonma iteda ömöayedö Moab jojodönöbi, ju'wedö israel jojodö tjöpöjojodö amonita jojodönöbi, amalecita jojodönöbi ko̧ko̧dajo̧, israel jojodönö ujuluwobö i̧'yinobe, ja̧danö israel jojodönö ujuluwinobe. Ja̧danö, juluwajo̧, Jerico, ju'wi imi Öjiya Towi Jȩmi comunidadma, omudawö 'döebinobe, iteda ö̧jemi comunidad baibanö, jobe ja̧nö israel jojodönö weobö.

¹⁴ Ja̧danö, jejenö juluwajo̧, dieciocho o̧bia baledibanö, Eglonma israel jojodö la'aka tjuluwo̧ ja̧nö wei̧ tjotidobö weinobe.

¹⁵ Jemi ikenama, israel jojodöma yemidanö Isabenö Jo̧nö tjubudekwinobe, jobadönö pjaatobö. Jejenö tjubudekwiökwe, Isabenö Jo̧ma jelo̧ pjaatakwo̧nö kabebö ujuninobe, Benjaminsaso jojo Aod mikwo̧nö, wajwiobekwöchobe do̧balo̧nö kabebö ujuninobe, israel jojodö tjö̧jibinö pjaatobö. Israel jojodö tjimidajitjadanö yemidanö Eglonnö tjimidobö baibenama, Aodnö wetjinobe, la'aka luwo̧nö iyawa jo̧ba e'ewö iyobö.

¹⁶ Ja̧danö, iyawa e'ewö i̧'yakwa̧ abönö, kwölöte'o otidinobe, metro ja'ö jenanö ödöa'o, bakwachobekwödanö sȩöte kwölöte'oma. Ja̧danö, jejenö otidajo̧, ö̧kamijido̧ okwa i̧se'bonö tojö unu'yinobe.

^17-19 Jemi ikenama, jejenö tojö nu'yajo̧, Aodma israel jojodö Moab niji la'aka luwo̧ Eglonnö tjiyi̧ e'ewö i̧'yinobe, israel jojodö tjiminö iyobö. Ja̧danö, Eglonnö iyajo̧, ju'wedö e'ewadökwö jobetjö ȩwa̧jinobe, ödöokobe, sule Guilgal comunidadtjö inawiyatjö otikwa o̧'wo jawa tjö̧jemi ichibenanö kabatö. Ja̧danö, ju'wedö e'ewadö tupakwö tjȩwa̧jobö weonö, Aodma jo̧dawa'ye tjeachajinobe, Eglonnö yöa̧lakwawobö. Ichibö, —La'aka chuluwo̧, ökwönö jelo̧ yöawi̧ ökwönö yötawobö jo̧be, ju'wedö tja̧ja̧kwokonö yöawakwawama, jo̧kwajabetjö̧ sule ökwönöda yötawobö jo̧be, ju'wedö tja̧ja̧kwökönö, —jö̧ba̧lö. Yöawökwe, —'Wiinö babibaduwi, —jö̧ba̧lö, Eglonma okobe deinö ömöayedö öjelö latjebobö weinobe, ja̧danö weawö̧, latjebinobe. Jo̧ba Eglonma jwiinö nöbo̧ o̧tewo̧ ö̧jinobe,

²⁰ ja̧danö eju mö tiyuwȩko̧nö ö̧bonö, Aodma jo̧ba ö̧jobekwö ichibinobe, tja̧ja̧kwokonö yötawakwö jö̧ba̧lö. Ö̧jobekwö ichibö, Aodma yöawinobe, —Chuluwo̧, Dios ökwönö yöawi̧ yötawakwö, —jö̧ba̧lö. Yöawökwe, Eglonma iteakatjö a̧la̧ibinobe, a̧ja̧kwobö.

²¹ Ja̧danö, Aodma wajwiobekwöchobesamunö, kwölöte'o öwaisobekwöchobekwö i̧se'botjö do̧atinobe, ja̧danö do̧batajo̧, doinobe Eglon ukwa'wonö, okwa söibinö.

²² 'Diinö doökwe, okobe jwiinö kwölöte'o söbibö a̧jibinobe, do̧atakwawemibi o̧te okwa a̧jibanö, ja̧danö jejenö doökwe, Eglon ide'obi laebinobe.

²³ Ikenama, Eglonnö kwabö lobajo̧, Aodma ö̧jȩko̧tjö labebö, apjudebiya ipje'datinobe, ja̧danö ȩwa̧jinobe.

²⁴ Aod ȩwa̧jaja̧ okobe, Eglon ömöayedö tjuluwo̧ öjobekwö tjȩwa̧bijinobe mösȩko̧be, jo̧kwaijayonö tjöbadekwajinokobe tjuluwo̧nö juluwanöma. Apjude 'diiawö̧, ja̧danö tjide'o 'dö̧ekwiawö̧, —Aaa, duluwo̧ Eglonma okwasȩko̧tjö yo'oena, —jö̧ba̧lö tjiteada̧linobe.

²⁵ Jo̧kwaijayonö lekwe tjiteada̧lonö, apjude po̧bebö laebiököwö̧, tjo̧'wo tjo̧tjekwinobe, wene baibajena jö̧ba̧lö. Jo̧kwajabetjö̧ bajaliyanö llavesapi̧ emö, apjude po̧tjebinobe, ja̧danö po̧bebajadö, tjuluwo̧nö tjöbadekwajinobe, nijinö ba̧nö ö'wö babibajo̧nö.

²⁶ Jobadö Eglon laebobö tjiteada̧lonö, Aodma jobetjö döibajinobe, inawiyatjö otikwa o̧'wo jawa tjö̧jemi ichibanö, ja̧danö jobetjö tupakwö döibajinobe, Efrain niji mösa'iju jȩmi comunidad Seiratbe ichibanö.

²⁷ Ja̧danö, jobe Efrain niji mösa'ijube ichibajo̧, Aodma trompeta pjuinobe, —Dios pjaatonö döpöjojodönö dölakwabikwawajo, —jö̧ba̧lö. Ja̧danö jejenö pjuiawö̧, israel jojodöma jo̧bakwö ölakwabikwawö tji̧'yinobe. Tjabönö öbibö i̧'yonö, israel jojodöma mösa'ijutjö yutubajö tjölakwabikwawobö tji̧'yinobe.

²⁸ Ja̧danö, Aodma ju'wedönö weinobe, —Ötjökwö ichaduwi, Isabenö Jo̧ma döpöjojodö moabita jojodönö dujuluwobö iyajobetjö̧, —jö̧ba̧lö. Weawö̧, jo̧bakwö tji̧'yinobe, ja̧danö Jordan ojwe peikwemi tjötjeba̧linobe, moabita jojodö jobetjö dötjibapji jö̧ba̧lö, ja̧danö moabita jojodötjö bakwo̧bi ojwe peiboböma wetjinokobe.

²⁹ Ja̧ möle moabita jojodö ölakwabikwawa jojodönö diez milbedönö jenanö kwabawö lotjinobe, bakwo̧bi ö̧jibökönö. Okobe deinö jobadö kwabö lotjinawö̧ma, juluwadö ölakwabikwawa waisadönö kwabö lotjinobe.

³⁰ Ja̧danö, jejenö baledobetjö̧, ja̧ möle israel jojodöma Moab niji ju̧kwadönö tjujuluwinobe, ja̧danö ja'yubenö lekwe ochenta o̧bia baledibanö israel jojodöma tjitebonö wene jwiinö tjö̧jinobe.

³¹ Ja̧danö Aod ö'wö baibaja̧ ikena, Diosma jelo̧nö ujuninobe israel jojodönö pjaatobö, Anat itji̧ Samgar mikwo̧nö. Jo̧ba Samgarma ö̧sö̧'a pa̧kayadö kwetjachobö kwababa̧lö weakwö̧'a kwebatö, jö̧'anöda filisteo jojodötjö seiscientobedönö kwabawö loinobe. Jo̧ba Samgarbi israel jojodö tjö̧jibanö pjaatinobe.