Jueces 21 - Dios Iwene

Israel jojodö Benjaminsaso jojodönö pjatjatobö tjomukwatina jawa

¹ Ajayinö, Mizpatjö israel jojodö tjo̧ko̧ko̧kwinenama, ju'wedö israel jojodöma Dios öba a'otjö yöbawö tjujuninobe, —Benjaminsaso jojodö sulabenö ja̧tjobetjö̧, ökwödötjö bakwo̧bi wedökakwedösa, ditji̧mu ya̧dö Benjaminsaso jojodö tji̧lekwamu batjibanö, —jö̧ba̧lö.

² Ja̧danö, Benjaminsaso jojodönö söbebö lotjaja̧ ikenama, okobe deinö israel jojodöma yemidanö Betel comunidadbe tji̧'yinobe, Dios öba a'o yemidanö tjö̧jobö. Ja̧danö, jobe ba̧nö, möle baledibanö Dios öba a'o tjo̧'wo tjoachö tjubudekwinobe, Benjaminsaso jojodönö omukwatö.

³ Budekwabinö, Diosnö abebö yötja̧linobe, —Ökwödö israel jojodö duluwo̧ Isabenö Jo̧ Dios, babema ökwödö israel jojodötjö bakwaso deinö baibajabe. Ökwödö israel jojodöwe, tajawedö jejenö baledajö, jwiinö o̧'wo tjo̧achadösa, ökwödötjö bakwaso debi baibajobetjö̧, —jö̧ba̧lö budekwabinö atjebinobe.

⁴ Jemi ikena möle, israel jojodöma yȩayi a̧la̧ibö, jobe Diosnö iyawemi tjotidinobe, ja̧danö otidajadö, jwiinö ubinö iyawabi, Dioskwö ösökwö ja̧kwawa iyawabi jobetjö kwabö juwö tjiyinobe.

⁵ Ajayinö wene baibinenama, israel jojodöma yöbawö tjujuninobe, —Okobe deinö israel jojodöma bakobe Isabenö Jo̧ öba a'o Mizpa comunidadbe dichibobö jo̧be, wene baibaja̧ otidö lodobö. Ja̧danö, jejenö isabenö do̧ko̧kokwobö jo̧betjö̧, jelesotjö, ja̧danö ju'wi comunidadtjö ichö tjo̧ko̧kokwobö tjöpöjöditjö̧ma, jobadö öpöjödadönö kwabö lodakwedösa, —jö̧ba̧lö.

⁶ Ja̧danö, Benjamin jojodö debö tji̧'yaja̧ okobe, ju'wedö israel jojodöma jobadönö tjo̧'wo tjo̧achinobe, —Ökwödö israel jojodö dömöledötjö bakwaso jojodö deinö batjibajabe, —jö̧ba̧lö.

⁷ Ja̧danö, o̧'wo tjo̧achö yötja̧lakwawinobe, —Benjaminsaso jojodötjö ömadö o̧bukwedöda tjö̧jibinajayonö, tji̧lekwamu deinö tjö̧jobe, ja̧danö ditji̧mu ya̧dönö tjilekwamu batjibanö wedobö jwibadösa, Isabenö Jo̧ öba a'otjö wedökakwedösa jö̧ba̧lö yöbawö dujuninobetjö̧. Jejenöobema, dakwö ja̧dakwa̧da, Benjaminsaso jojodötjö ina 'yaba̧ladönö pjadatobö, bakobenö okobe deinö Benjaminsaso jojodö debö tji̧'yapji jö̧ba̧lö, —yötja̧lakwawinobe.

^8-9 Ja̧danö, ajayinö, —Ichöködönö kwabö lodakwawö̧, —jö̧ba̧lö yöbawö tjujunina jawa omukwatö, abebö tja̧ja̧kwinobe, —Okobe deinö israel jojodö bakwasokwena jojodötjö, jelesotjö ju'wi comunidad jojodö deobeji̧? Baikwö tjicho jö̧tja̧linajayonö, ju'wi comunidad jojodö tjichinökiji̧? —jö̧ba̧lö yötja̧lakwawinobe. Yöba̧lakwawajadö, okobe deinö jobe ko̧ko̧kwadö ölakwabikwawa jojodönö tjö̧ba̧jadinobe, demi jojodö detjojobö jö̧ba̧lö, ja̧danö Jabes Galaad comunidadtjö bakwo̧bi deinobe. Jo̧kwajabetjö̧, tjöwaisachibinobe, —Okobe deinö tjichobö ji̧najayonö, Jabes de Galaad jojodöma ichinöködötö, —jö̧ba̧lö.

¹⁰ Ikenama, jejenö waisachibajadö̧, jobe ko̧ko̧kwadöma ölakwabikwawa jojodötjö doce milbedönö wetjinobe Jabes de Galaad jojodönö kwabawö lotjobö, ja̧danö jobadönö webö yötja̧linobe, —Jabes de Galaad jojodönö kwabö loköbaduwo, ya̧dönöbi, tjemunöbi.

¹¹ Baikwö ja̧köbaduwo, okobe deinö ömadönöbi, ya̧dö iso̧kwö jinadönöbi, jwaikwöda kwabawö loköbaduwo, bakwo̧bi ö̧jibökönö. Sule ya̧dö ina iso̧kwö jö̧ködönöda kwabö loköbaduwoko, —jö̧ba̧lö wetjinobe.

¹² Wetjawö̧, Jordan ojwe pebibö, wetjaja̧danö ja̧tjinobe. Ja̧danö Jabes de Galaad jojodötjö, cuatro cientosbedö ya̧dö möayedönö tjöbadekwajinobe, ina iso̧kwö jö̧ködönöma. Ja̧danö, jobadönö badekwajadö, Canaan nijibe tje'ewinobe jobadönö, ju'wedö tjö̧jobekwö Silo comunidadbe.

¹³ Ikenama israel jojodö ko̧ko̧kwadöma yötjawi̧ wetjinobe Benjaminsaso jojodönö, Rimon inawa ötabawanö ju̧kwadönö. Jobadönö yötjawinobe, —Tjo̧wita, babe ökwödökwö ölakwabikwawöma kadatibajabe, —jö̧ba̧lö.

¹⁴ Yötjawawö̧, Benjaminsaso jojodöma jobetjö tjȩwa̧jinobe, tjitebo nijibe, ja̧danö ju'wedö israel jojodöma, möayedö Jabes de Galaad jojodötjö tjö̧jibinö tjichejebajawö̧nö wetjinobe, Benjaminsaso jojodö tjilekwamu batjibobö. Jo̧kwaijayonö, tjö̧ba̧jekwachinokobe, sule cuatrocientosbedö ya̧dö tjö̧jinobetjö̧, ja̧danö Benjaminsaso jojodöma seiscientosbedö ömadö tjö̧jinobetjö̧.

¹⁵ Jejenö tjö̧ba̧jekwachiököwö̧, ju'wedö israel jojodöma tjo̧'wo tjo̧achinobe Benjaminsaso jojodönö, sule o̧bukwedönöda tjö̧jibinö Isabenö Jo̧ jobadönö söbebö loinobetjö̧, bakwaso jwiinö debö tji̧'yo jö̧tja̧li̧nö.

¹⁶ Jo̧kwajabetjö̧ israel jojodötjö luwedöma yötja̧lakwawinobe, —¿Dakwö ja̧bö pjadatakwa̧da Benjaminsaso jojodötjö ina tjilekwamunö debadönöma, jobadöbi tjilekwamunö tjujuna̧lakobetjö̧? Benjaminsaso jojodötjö ya̧döma deobe yelösöda, tjemobö.

¹⁷ Jo̧kwaijayonö Benjaminsaso jojodö bakobenö debö tji̧'yapji jö̧ba̧lö, jobadö ömadöma tji̧tji̧kwobö jo̧be, tji̧tji̧munö 'yatjebökötjö̧ma, ökwödö israel jojodö bakwasokwena jojodötjö, bakwasoma deinö batjibena.

¹⁸ Jo̧kwaijayonö tji̧tji̧munö 'yatjebobö ji̧jayonö, ökwödöma jobadö tjilekwamu batjibanö ditji̧mu ya̧dönö wedobö jwibadösa. Jau, ida̧ökö Dios öba a'otjö yöbawö dujunijatö, –Bakwo̧ iteda itjijunö Benjaminsaso jojo ilekwo bajibanö weitjö̧ma, Dios lȩebakwo̧ jo̧banöma, –jö̧ba̧lö. Jo̧kwajabetjö jejenö yöbawö dujuninobema, dakwö ja̧bö pjadatakwa̧da? —jö̧ba̧lö yötja̧lakwawinobe.

¹⁹ O̧ba bakwabakwena, israel jojodöma Silo comunidadtjö, Isabenö Jo̧ öba a'otjö ba'ali juniatjinobe. Jobe ba'ali junawemima, Betel comunidadtjö u'dakwöobe, ja̧danö Beteltjö Siquen comunidadbe ya̧kwawamatjö jawo̧ laebobekwöbe, ja̧danö Lebona comunidadtjö a̧li̧kwöobe. Ja̧danö, Benjaminsaso jojodönö pjatjatakwa̧ omukwatö, ja̧ ba'ali tjomukwatinobe, —Juluwanö ja̧ ba'ali dujunakobe, —jö̧ba̧lö.

²⁰ Omukwatajadö, Benjaminsaso jojodönö ina tjilekwamu debadönö wetjinobe, —Ja̧ ba'ali Silo comunidadtjö tjujunobö baibenama, jobe ö'öbö batjijube 'ya̧nö kwu̧ju̧kwawaduwo.

²¹ Ja̧danö, jobe ju̧kwawö kweda̧laduwo, Silo comunidad möayedö comunidadtjö labebö, baile dötjenanö baibanö. Ja̧danö, baile döbö latjebenama, ökwödöma a̧la̧ibö bakwo̧nökwena möayuju bakwujunö do̧kataduwo, kwilekwokwena kwemadwobö. Jejenö jobadö Silo comunidad möayedönö do̧batajadö, kwilekwamuduwinö öbibö, kwiteboduwi Benjamin nijibe kwȩwa̧jaduwo.

²² Ja̧danö, bakwo̧ itjijuö̧kö̧, bakwo̧ öjawujuö̧kö̧ kwemiökwe, bakwo̧ öpöjödö, ökwödönö lȩekwa aebobö ichibitjö̧ma, baikwö datadakwedösa jo̧banö, –Dösölö̧jinö Benjaminsaso jojodönö ösödö kwomukwataduwo, kwömöledösujunö tjemobö öpöjödökönö. Jau, kwömöledösujunö tjö̧naukwaja̧ma, ökwödö israel jojodö jawada, belö dölakwabikwawenama tjilekwamu tjö̧jibökönö kwabö lodinobetjö̧. Ja̧danö, kwömöledösujunö Benjaminsaso jojo ilekwo bajibijayonö, wene jwiobe, ökwöda ilekwo bajibobö weköbokobetjö̧. Jau, ökwöda Benjaminsaso jojo ilekwo bajibanö kwömöledösujunö weköbinatjö̧ma, wene kwujuna̧lo jö̧ka̧lena, kwömöledösujunö weköboko jö̧ka̧lidanö weköbobetjö. Jo̧kwaijayonö ökwöda weköbokonö, naukwöda emobetjö̧, wene jwiköbobe, Benjaminsaso jojo kwömöledösujunö emijayonö, –jö̧ba̧lö lȩekwa abebo̧nö datadakobe, ökwödönö wene baibapji jö̧ba̧lö, —wetjinobe Benjaminsaso jojodönö.

²³ Wetjawö̧, wetjaja̧danö ja̧tjinobe. Baile döbadötjö Benjaminsaso jojodöma bakwo̧kwena ilekwokwena do̧batibö eminobe. Ikenama do̧batö emajadö, tjitebo nijibe öbibö tjȩwa̧jinobe. Ja̧danö, israel jojodö söbebö lotjina comunidadbiyama, yemidanö tjotidinobe, ja̧danö yemidanö jobe tjö̧jinobe.

²⁴ Ja̧danö, jemi ikenama, ju'wedö israel jojodöbi jobetjö labebö, bakwasokwena, tjömöledökwena tjitebokwenabe tjȩwa̧jinobe.

²⁵ Ja̧ möle inesö la'aka luwo̧ deinobe israel nijitjö, ja̧danö okobe deinö israel jojodöma bakwo̧nökwena iteda omukwati̧danö ja̧bö tjö̧jinobe.