Jueces 20 - Dios Iwene

Ju'wedö israel jojodöma Guibea jojodö sulabenö ja̧binadönö lȩtjȩbobö tjomukwatina jawa

¹ Ja̧danö, okobe deinö israel jojodöma tjo̧ko̧kokwinobe, u'dakwö Dan comunidadtjö, a̧li̧kwö Berseba comunidad baibanö jojodöbi, Galaad niji jojodöbi, okobe deinö Mizpa comunidadnö Dios öba a'otjö bakobe tjo̧ko̧kokwinokobe.

^2-3 Sule Benjaminsaso jojodöda ju'wedökwö tjo̧ko̧kokwinokobe. Ju'wedö tjo̧ko̧ko̧kwobe tja̧ja̧kwijayonö, tji̧'yinokobe. Ja̧danö, israel jojodötjö la'aka luwedö, bakwasokwena luwedöma, Dios ömöledö israel jojodö ko̧ko̧kwadö tjöba a'o tjö̧jamatinobe. Ja̧danö okobe deinö jobe ko̧ko̧kwadöma, cuatrociento milbedö tjö̧jinobe, ömadö ölakwabikwawa waisadöma. Ja̧danö, israel jojodö ko̧ko̧kwadöma, abebö tja̧ja̧kwinobe, —Inesö sulabenö ja̧awa baledinama, dakwö baledinada? Yöbawidönö, —jö̧ba̧lö.

⁴ Abebö tja̧ja̧kwiökwe, Levisaso jojo, Guibea jojodö kwabö lotjinoko jilekwema atadö yöawinobe: —Chömöledö, ötjöma Benjaminsaso jojodö tjitebo comunidad Guibeabe chichibijatö, ötjöbi, chilekwodanö chömöayujubi, jobe yö̧te dabobö.

⁵ Ja̧danö, jejenö chichibiawö̧, Guibea comunidad jojodöma ötjönö metjibotö jöba̧lö tjichinobe, ja̧danö yö̧te ja'ö o̧do tjötjösawinobe. Jobadöma ötjönö kwabö lotjobö jö̧tja̧linobe, ja̧danö ju'wibi chilekwonö sulabenö 'da̧'da̧tjinobe, ja̧tjö ö'wö bajibanö.

⁶ Ja̧danö, jejenö baledi̧tjö̧, ötjöma chilekwo jiteba'o chubulabijatö, ja̧danö bulabijo̧, jiteba'o jawa israel niji ba̧kwemeachibanö tje'ewobö wetijatö, jobadö inesö sulabenö ja̧tjina wene yöbawö, isabenö ditebo israeltjö jwiinö taba lö̧ji̧ jawa sulabenö ja̧tjinobetjö̧.

⁷ Jo̧kwajabetjö̧, baledina wene waisachibajadö, ökwödö israel jojodöma omukwatö yöka̧lakwawaduwo, ja̧danö waisanö yöba̧lakwawajadö, otiwanö ja̧dakwa̧ yökawaduwo, —jö̧ba̧lö yöa̧linobe Levisaso jojoma.

⁸ Jejenö yöa̧liawö̧, okobe deinö bakobe jamatö yötja̧linobe, —Isabenö Guibea jojodönö lȩdebobö jo̧be. Ökwödöma dejubiyabe dȩwa̧jökakwedösa, ökwödötjö bakwo̧bi ejube ȩwa̧jökakwo̧, jobadönö lȩdebenanö kabatö.

⁹ Isabenö Guibea jojodönö dölakwabikwawobö jo̧be, jo̧kwajabetjö̧ inawiya pjei̧ öwiya jabö dedakobe, ökwödötjö didö abönö Guibea jojodönö tjölakwabikwawobö Dios weojobö jö̧ba̧lö.

¹⁰ Ja̧danö dölakwabikwawonö kwakwawa jwidapji jö̧ba̧lö, ökwödötjö ju'wedönö 'da̧batö dujunakobe, dölakwabikwawonö du̧kwa tjichejebobö. Ömadö cienbedötjö, domulatajabedönö 'da̧batö dujunakobe, ja̧danö milbedötjö cienbedönö 'da̧batö dujunakobe, ju'wedö Guibea jojodönö lȩbebö tjölakwabikwawonö du̧kwa tjichejebobö. Jau, Benjaminsaso comunidad Guibea jojodöma inesö suli̧ jawa sulabenö ja̧tjinobe, okobe deinö ökwödö israel jojodönö taba lö̧ji̧ jawa baibanö, jo̧kwajabetjö̧ balekwa mikwa jobadönö lȩbebö dölakwabikwawobö jo̧be, —jö̧ba̧lö yötja̧linobe israel jojodöma.

¹¹ Jejenö jö̧ba̧lö, okobe deinö israel jojodöma bakobe omukwatö tjo̧ko̧kokwinobe, Guibea jojodönö lȩbebö tjölakwabikwawobö.

¹² Ja̧danö, jejenö yöba̧lajadö, israel jojodöma yöbawadönö wetjinobe, Benjamin niji ba̧kwemeachibanö kwebachö yötja̧wobö, —Isabenö inesö suli̧ jawa kwö̧'da̧deduwitjö baledinobe, ökwödötjö ju'wedöma jwiinö sulabenö ja̧tjinobetjö̧.

¹³ Jo̧kwajabetjö̧ ökwödöma jobadö ökwödötjö inesö sulabenö ja̧badö Guibea comunidadnö ju̧kwadönö do̧batö, kwiyaduwodönö, sulabenö ja̧tjina lȩbebö, jobadönö kwabö lodakobetjö̧. Jobadö inesö sulabenö ja̧tjinama okobe deinö ökwödö israel jojodönö samobe, jo̧kwajabetjö̧ jobadönö kwabö lodobö jo̧be, sulabenö ja̧tjina sami̧ma, ditebo israeltjö söbebö lodakobetjö̧, —jö̧ba̧lö yöbawadö ju'wedö Benjaminsaso jojodönö yötjawobö wetjinobe. Jo̧kwaijayonö, Benjaminsaso jojodöma tjömöledö jelesokwena jojodö yötja̧li̧ tja̧ja̧kwinokobe.

¹⁴ Ja̧danö, ju'wibi, a̧ja̧kwökönö, Guibea jojodönö tjötjeba̧linobe, sulabenö ja̧binadönö lȩtjebapji jö̧ba̧lö. Benjaminsaso jojodöma tjitebo comunidadkwenatjö labebö, Guibea comunidadbe tji̧'yinobe, Guibea comunidad jojodönö pjabatö, ju'wedö israel jojodökwö tjölakwabikwawakobetjö̧.

¹⁵ Ja̧ möle, Benjaminsaso jojodötjö ömadö veintiseis milbedö ölakwabikwawadö jojodö Guibea jojodönö pjabatö tji̧'yinobe, ja̧danö ju'wibi Guibea jojodötjö setecientos ölakwabikwawadö tjö̧jinobe.

¹⁶ Ja̧danö, okobe deinö jobadötjö, wajwitjobekwöchobe tjömamunö do̧baladö setecientos ölakwabikwawadö tjö̧jinobe, jwiinö inawa wökwebö ikwawa waisadöma. Jobadöma jwiinö wökwebö ikwawa waisinadö, pjei̧ jawa tjikwenabi, waekwökönö tjikwinobe, jwiinö ikwawa waisadö tjö̧jobetjö̧.

¹⁷ Ja̧danö, ju'wedö israel jojodötjö, cuatrocientos milbedö ölakwabikwawa jojodö tjö̧jinobe, kwölete'onö ölakwabikwawadöma.

Ju'wedö israel jojodö Benjaminsaso jojodökwö tjölakwabikwawina wene

¹⁸ Ja̧danö, tjölakwabikwawakwa̧ abönö, ju'wedö israel jojodöma Betel comunidadbe tji̧'yinobe, Dios oba a'o ichibö, abebö tja̧ja̧kwobö. Ja̧danö, Diosnö abebö tja̧ja̧kwinobe, —Ökwödö israel jojodötjö, diso jojodö abönö Benjamin jojodökwö tjölakabikwawobö jo̧beda? Diso jojodö abönö tjölakwabikwawobö weköbobeda? —jö̧ba̧lö. Atjebökwe, Isabenö Jo̧ma atadinobe, —Judasaso jojodöda abönö ölakwabikwawö tji̧'yobö jo̧be, —jö̧ba̧lö.

¹⁹ Yöawiawö̧, ikena möle yȩayi, israel jojodöma Guibea comunidad yöneawinö 'ya̧nö, tjabakwemi tjujuninobe.

²⁰ Ja̧danö, Israel jojodöma Guibea comunidad badeibö isa'banö tjöjamatinobe, Benjamin jojodökwö tjölakwabikwawobö.

²¹ Ja̧danö, Benjaminsaso jojodöma Guibea comunidadtjö labebö, ju'wedö israel jojodökwö tjölakwabikwawinobe, ja̧danö ba̧jȩkwadö israel jojodönö kwabawö lotjinobe ja̧ möle, veintidos mil ölakwabikwawadönö kwabö lotjinobe Benjaminsaso jojodöma.

^22-23 Jejenö balediawö̧, yemidanö Betelbe tji̧'yinobe, Isabenö Jo̧nö abebö tja̧ja̧kwobö. Jobadötjö ba̧jȩkwadönö Benjamin jojodö kwabö lotjiawö̧, möle baledibanö tjubudekwinobe, ja̧danö budekwajadö, yö̧te baibenama Isabenö Jo̧nö abebö tja̧ja̧kwinobe, —Duluwo̧, yemidanö dömöledö Benjaminsaso jojodönö mebibö, dölakwabikwawobö jo̧beji̧? —jö̧ba̧lö. Atjebökwe, —Jau, yemidanö jobadönö kwölakwabikwawaduwo, —jö̧ba̧lö atadinobe Isabenö Jo̧ma. Jo̧kwajabetjö̧, jejenö weawö̧, tjujuluwachibinobe, ja̧danö ajayi möle isa'banö tjölakwabikwawobö tjöjamatinadanö, yemidanö jobeda tjölakwabikwawobö tjö̧jamatinobe.

²⁴ Ja̧danö, ikena möle yemidanö Benjaminsaso jojodökwö tjölakwabikwawobö tji̧'yenama,

²⁵ Benjaminsaso jojodöma yemidanö Guibea comunidadtjö labebö, jobadökwö tjölakwabikwawinobe, ja̧danö ju'wedö israel jojodötjö ölakwabikwawadönö dieciocho milbedönö kwabawö lotjinobe Benjaminsaso jojodöma.

²⁶ Jejenö balediawö̧, yemidanö Betel comunidadbe tjebachajö tji̧'yinobe israel jojodöma, ja̧danö jobe Isabenö Jo̧ öba a'o ba̧nö, tju̧kwa ö̧töchö tjubudekwinobe, yö̧te baibenanö kabatö. Ikenama jwiinö ubinö iyawabi, Isabenö Jo̧ Dioskwö ösökwö ja̧kwawa iyawabi kwabö juwö Diosnö tjiyinobe.

^27-28 Ja̧ möle Isabenö Jo̧ iteapjo, israel jojodönö wei̧ wȩyukwaba inawiya a̧ja̧pjoma Betel comunidadnö ji̧nobe, ja̧danö Diostjö jojodötjö tjö̧'da̧de pjabato̧ Fines mikwo̧ma japjo öba a'o, tjö̧'da̧de pjabatö ö̧jinobe. Jo̧ba Finesma Eleazar mikwo̧ itji̧, ja̧danö Eleazarma Aaron itji̧. Ja̧danö, Fines japjo öba a'o tjö̧'da̧de pjabatö otidobetjö̧, israel jojodöma jobetjöda Isabenö Jo̧nö abebö tja̧ja̧kwinobe, —Duluwo̧ Isabenö Jo̧, ina bakwötanö dömöledö Benjaminsaso jojodökwö dölakwabikwawobö weköbobeji̧? Tjo̧wita jö̧ba̧lö ölakwabikwawö kadatibobö weköbobeji̧? Weköbobö adebaduwakwö, —jö̧ba̧lö. Abebö tja̧ja̧kwökwe, —Yemidanö jobadönö kwölakwabikwawaduwobö 'ya̧duwi, isabenö itekwayi möle jobadönö kwujuluwaduwobö chiyakobetjö̧, —jö̧ba̧lö atadinobe Isabenö Jo̧ma.

²⁹ Weawö̧, yemidanö Guibeabe tji̧'yinobe, tjölakwabikwawobö. Ja̧danö, ja̧ möle ju'wedönö Guibea comunidad ö'öbö tju̧ju̧kwawobö wetjinobe, Benjamin jojodö latjebaja̧ okobe comunidad tebachö tjujuluwobö.

³⁰ Ja̧danö ju'wedö ölakwabikwawadöma yemidanö Guibea comunidad badeibö isa'banö tjölakwabikwawobö tjöjamatinobe, ajayinö tjöjamatinadanö.

³¹ Ja̧danö, Benjaminsaso jojodö comunidadtjö labebö, ju'wedö israel jojodökwö tjölakwabikwawenama, Benjaminsaso jojodö tjöba a'otjö tjökömakwö tjetjachibinobe, Benjaminsaso jojodönö comunidadtjö ödökwönönö ötjibobö. Jamatö tjölakwabikwawenama, yemidanö israel jojodötjö ju'wedönö kwabö lotjinobe Benjaminsaso jojodöma, ajayinö kwabö lotjinadanö. Mana jalamatjö ju'wedönö kwabö lotjinobe, Guibeabe ya̧kwawama manatjöbi, Betelbe ya̧kwawamatjöbi, mejetjöbi. Israel jojodötjö treinta ölakwabikwawadönö jenanö kwabö lotjinobe Benjaminsaso jojodöma, ja̧danö ju'wedöma tjöba a'otjö dötjibajobedanö tji̧sȩbinobe.

³² Jejenö tji̧sȩbiawö̧, Benjaminsaso jojodöma tjomukwatinobe, —Ajayinö bidönö a'dewö lobö dujuluwinadanö, yemidanö dujuluwobe, —jö̧ba̧lö. Jo̧kwaijayonö ju'wedö israel jojodö ajayinö omukwatö tjujunina wajwitjinobe, —Tjöba a'o dödibajobedanö i̧sȩbö, jalama manabe 'ya̧nö, comunidadtjö ödökwönönö batjibanö ödibodönö, —jö̧ba̧lö omukwatö tjujunina wajwitjinobe.

³³ Ajayinö Guibea comunidad badeibö isa'banö jamatinadöma, tjö̧jinelö labebö, tjökömakwö dötjibajobedanö tji̧'yinobe, Baal Tamar ötjabobe tjichibenanö kabatö. Ja̧danö jobe ichibajadö, yemidanö tjölakwabikwawobö tjöjamatinobe. Jejenö tjökömakwö 'ya̧nö, Benjaminsaso jojodönö ötjibonö, ajayinö ju̧kwawinadöma tjuju̧kwawinelö Guibea comunidadtjö jawo̧ meajobekwötjö labebö comunidad tjujuluwobö metji̧binobe.

³⁴ Jobadö mebibadöma bidö: Ja̧ möle tjölakwabikwawakwa̧ abönö, okobe deinö israel jojodö ölakwabikwawadötjö, diez milbedö juluwadönö omudawö tjujuninobe, comunidad ö'öbö tju̧ju̧kwawobö, ja̧danö jobadö ju̧kwawajadöma tju̧ju̧kwawajelö labebö Guibea comunidad metji̧binobe. Benjaminsaso jojodö comunidadtjö labebajadöma wajwitjinobe tjökömakwö baledi̧ma, ja̧danö labinö tjölakwabikwawinobe. Ja̧danö tjökömakwö baledi̧ wajwibö, tjomukwatinokobe juluwanö ju'wedö israel jojodö jobadönö söbebö lotjakwa̧ma.

³⁵ Isabenö Jo̧ma israel jojodönö pjaatinobe, ja̧ möle Benjaminsaso jojodönö tjujuluwobö, ja̧danö ja̧ möle Benjaminsaso jojodötjö veinticinco mil cienbedö ölakwabikwawa jojodönö kwabawö lotjinobe.

^36-39 Ja̧ möle Benjaminsaso jojodönö tjujuluwinama, baikwö baledinobe. Tjölakwabikwawakwa̧ abönö, badeibö tjölakwabikwawakwedöma tju̧ju̧kwawakwedönö wetjinobe, tjuju̧kwawajelö labebö comunidad tjujuluwenama, comunidad tjujuwobö, imiupjo kaamobe edö, tjo̧wita, babe jalachibö dölakwabikwawo jö̧ba̧lö tjöwaisakobetjö̧. Ja̧danö comunidad badeibö ölakwabikwawadöma ajayinö Benjaminsaso jojodö tjöba a'otjö tjökömakwö tji̧'yinobe, 'da̧batö tjujunajawö̧nö tjo̧'wo tjöwanalobetjö̧, —Isabenö wedaja̧danö comunidad mebibö tjujuluwakwedö, —jö̧ba̧lö. Ja̧danö, ajayinö wetjaja̧danö, ju̧kwawajadöma a̧la̧ibö tju̧ju̧kwawajelö ö'öbakwawö Guibea comunidad metjibinobe, ja̧danö okobe deinö comunidadnö ju̧kwadönö kwabawö lotjinobe. Ikenama, ajayinö yötja̧lakwawinadanö, comunidad tjujuwinobe, imiyupjo nöa'wo kaamobö, tjömöledö edö, jalachibö Benjaminsaso jojodönö metjibakobetjö̧. Ja̧ baledi̧ wajwibö, ajayinö treintabedönö kwabö lotjenama, Benjaminsaso jojodöma tjomukwatinobe, —Ajayinö ölakwabikwawö dujuluwinadanö, yemidanö dujuluwobe, —jö̧ba̧lö. Jo̧kwaijayonö bajaliyanö tjöwaisachibinobe, —Isabenö ökwödönöda tjujuluwakwedö, —jö̧ba̧lö.

⁴⁰ Tjökömakwö Guibea comunidadtjö imiyu'wo nöa'wo jamatö kaamenama, Benjaminsaso jojodöma jalachibö tjedinobe, —Okobe jwiinö Guibea comundadajama, ubinö imiyu'wo baibanö mölejȩbe kaamobe, —jö̧ba̧lö.

⁴¹ Ja̧danö ju'wedö israel jojodöma jalachibö metji̧benama, Benjaminsaso jojodöma waisachibö yetjaibinobe, —¡Ökwödöwe! Isabenö söbebö lotjakwawö̧sa, —jö̧ba̧lö.

⁴² Ja̧danö, jalachibö jojodö deobekwö dötjibajinobe Benjaminsaso jojodöma, jo̧kwaijayonö waekwinobe. Comunidad juwö lobajadöma comunidadtjö labebö jobadönö kwabawö lobö metjibinobe, jo̧kwajabetjö̧ döibakwawa jwiinö ju'wedö israel jojodö tjö̧'da̧de tjöjinobe Benjaminsaso jojodöma.

⁴³ Ja̧danö tjötjösawö, jobadönö kwabawö lobö, Benjaminsaso jojodönö lutjinobe, Guibea comunidadtjö jawo̧ laebobekwö tjichibanö.

⁴⁴ Jejenö dieciocho milbedö Benjaminsasotjö juluwadö ölakwabikwawa jojodönö kwabawö lotjinobe.

⁴⁵ Ja̧danö Benjaminsaso jojodö jalachibö, Rimon ötjabawa inawabe dötjibajenama, jobadönö lubö mana jalamatjö cinco milbedönö kwabawö lotjinobe, ja̧danö ji̧badönö tupakwö lutjinobe, Guidonbe tjichibanö, ja̧danö dos milbedönö kwabö lotjinobe.

⁴⁶ Jejenö ja̧ möle Benjaminsaso jojodötjö veinticinco milbedö ölakwabikwawa jojodönö kwabawö lotjinobe, okobe deinö ölakwabikwawa jawa juluwadönö.

⁴⁷ Jo̧kwaijayonö ju'wedö debö tji̧'yonö, Benjamin jojodötjö seiscientos ömadöma tjö̧jibinobe. Jobadöma jalachibö jojodö deobekwö dötjibajinobe, Rimon ötjabawa inawabe. Ja̧danö, jobe ichibajadö, jobe tjö̧jinobe jawo̧dö ö'wejemubedö baledibanö.

⁴⁸ Ja̧danö, Benjaminsaso jojodötjö ölakwabikwawa jojodönö juluwajadö, ju'wedö israel jojodöma Benjaminsaso niji comunidadkwenabe tji̧'yinobe, ja̧danö okobe deinö Benjaminsaso comunidadtenia ju̧kwadönö kwabawö lotjinobe. Ju'wibi, okobe deinö tja̧jwi̧munöbi kwabawö lotjinobe, ja̧danö okobe jwiinö ju'wi jaye tjujuna̧li̧bi söbebö lotjinobe. Ja̧danö, okobe jwiinö Benjamin niji comunidadteniama, ökwölanö juwö lotjinobe.