Jueces 2 - Dios Iwene

Isabenö Jo̧ israel jojodönö yöawina jawa

¹ Ja̧danö, ju'wi möle Isabenö Jo̧ma angeldanö ichejekwo̧ Guilgaltjö i̧'yinobe Boquin comunidadbe, ja̧danö jobetjö israel jojodönö yöawinobe, baikwö: —Damötjö̧ ökwödö kwa'dödönö yöbawö chujunijatö, bemi canaan niji ökwödönö chiyobö, ja̧danö yötawinadanö ökwödönö Egiptotjö baikwö chichejebijatö, kwiteboduwi baibanö. Ja̧danö, niji ökwödönö iyö yöbawö chujunijatö, –Weti̧danö ja̧bö kwö̧jaduwitjö̧ma, ba̧kwelöjatebö yöbawö chujuninadanö pjatatakwo̧sa, –jö̧ba̧lö.

² Ja̧danö ökwödönö wetinama, baikwö wetijatö, la'akatjöda bemi niji ju̧kwadökwö dösölöjinö kwö̧jaduwakwa̧ wene yöbawö junökönaduwi, jö̧ba̧lö, ja̧danö tjösödawö̧nö iyawemi söbebö loköbaduwo jö̧ba̧lö wetijjatö. Jo̧kwaijayonö, jejenö wetijayonö, kwa̧ja̧kwinaduwokobe, ¿tajawedö sulabenö a̧ja̧kwökönö, wetöködanö ja̧köbinaduwa̧da chömöledö?

³ Wetina otiwanö kwa̧ja̧kwinaduwatjö̧ma, kwabönöduwitjö kwöpöjojodönö a'dewö loto jö̧ta̧lijatö, jo̧kwaijajayonö weti̧danö ja̧köbaduwokobetjö̧, baikwö yötawaduwakwö: Kwabönöduwitjö̧ kwöpöjojodönö a'dewö lotökakwo̧sa. Ja̧danö jobadöma ökwödönö wene baibobö jwötjebakwedö, ja̧danö jobadö tjösödawö̧ diosbedö tjomukwatawö̧ma, ökwödönö 'daliwadanö tjö̧jakwedö, sulabenö ja̧köbaduwakobetjö̧, —jö̧ba̧lö yöawinobe.

⁴ Jejenö angeldanö ichejekwö Isabenö Jo̧ yöawiawö̧, Israel jojodöma tjo̧'wo tjo̧achinobe, ja̧danö labinö tjubudekwinobe.

⁵ Ja̧danö jobetjö jejenö tjubudekwobetjö̧, jobe Boquin jö̧ba̧lö tjimididinobe, Budekwakwawobe jö̧ba̧lö, ja̧danö jobetjö Isabenö Jo̧nö iyawa juwö tjiyinobe.

Josue ö'wö baibaja̧ ikena israel jojodö sulabenö ja̧bö tjö̧jina wene

⁶ Damötjö̧ Josue israel jojodönö tjitebotenia niji 'da̧batö webajo̧, jojodö tjitebokwena nijibe 'ya̧nö, tjitebo baibanö tjemobö weinobe. Ja̧danö, weawö̧, okobe deinö tjitebokwena nijibe tji̧'yinobe, Dios iyi̧ niji emajadö, tjitebo baibanö jobe tjö̧jobö.

⁷ Ja̧danö, Josue ina 'yaa̧layi, israel jojodöma otiwanö Isabenö Jo̧nö ösödö tjö̧jinobe, wei̧ a̧ja̧kwö. Ja̧danö, ju'wibi Josue ö'wö baibaja̧ ikena, Josue ö̧jinena ju̧kwadö la'aka luwedö, Isabenö Jo̧ inesö otiwanö pjaatina edinadö ina 'yatja̧layi, otiwanö Isabenö Jo̧nö ösödö tjö̧jinobe.

⁸ Isabenö Jo̧ ömöayo̧ Josuema, ciento diez o̧biya juna̧lo̧, ö'wö baibinobe.

⁹ Ja̧danö, ö'wö babibajo̧nö iteda itebo nijinö tjo̧tji̧nobe, Efrain niji mösa'iju jȩmi, Gaas mösa'otjö u'dakwöchobe comununidad Timnat Jeresnö.

¹⁰ Ja̧danö, ju'wedö Josue ö̧jinena ju̧kwadö, Isabenö Jo̧ inesö otiwanö israel jojodönö pjaatina edinadöbi ö'wö batjibinobe. Jemi ikenama tji̧tji̧mu tupadanö jojodö Isabenö Jo̧nö wajwibadö tjö̧da̧peachinobe, iteda ujulu i̧sebö, israel jojodönö pjaatina edinöködöma.

¹¹ Ja̧danö jobadö israel jojodöma sulabenö Dios öpöjödi̧ jawa ja̧tji̧nobe, Isabenö Jo̧ öba a'otjö, ju'wedö tjösödawö̧ o̧'wo jawa Baal ötjabawö̧nö sulabenö tjösödinobe.

^12-13 Tja'dödö tjösödinökwe Isabenö Jo̧ Dios, otiwanö Egipto nijitjö labebö, tjitebobe tjichibobö otiwanö pjabatina Diosnö kabatibö, ju'wedö tjösödawö̧nöda tjösödinobe. Diosnö kabatibö, tjipjeanö ju̧kwadö tjösödawö̧nöda sulabenö bȩbachibö tjösödinobe, Baal ötjabökwe o̧'wo jawanöbi, Asterot ötjaboko jo̧'wo jawanöbi. Ja̧danö jejenö tjösödiökwe, jwiinö ödameakwinobe Isabenö Jo̧ma.

¹⁴ Israel jojodö Isabenö Jo̧nö kabatibö, ju'wedö tjösödawö̧nö sulabenö tjösödiökwe, Isabenö Jo̧ma jwiinö ödameakwinobe israel jojodönö, ja̧danö jobadönö iyö loinobe, tjöpöjojodö jobadönö tjujuluwobö. Jo̧kwajabetjö̧ ölakwabikwawö naukwabidö tjitea tjö̧naukwotö jö̧ba̧lö ichadö tjichenama, pjabatökönö tjö̧naukwobö weinobe, ja̧danö ju'wedö tjöpöjojodö tjujuluwobö tjichenabi, pjabatökönö israel jojodönö tjujuluwobö weinobe Isabenö Jo̧ma. Isabenö Jo̧ pjaatokobetjö̧, israel jojodöma tjöpöjojodö tjöba a'o tjö̧jobö jwiinobe.

¹⁵ Kabatökönö israel jojodö tjölakwabikwawobö latjebenama, israel jojodönö pjabatökönö, tjöpöjojodanö ja̧nö, tjöpöjojodö jobadönö tjujuluwobö weinobe Isabenö Jo̧ma. Jejenö baledinama, Isabenö Jo̧ damötjö̧ yöawinadanö baledinobe. Damötjö̧ Isabenö Jo̧ma israel jojodönö yöbawö ujuninobe, —Ötjönö kakatibaduwitjö̧ma, ökwödönö lȩbebö kwöpöjojodö ökwödönö tjujuluwobö wetocha, —jö̧ba̧lö, ja̧danö yöawinadanö baledobetjö̧, jwiinö tjo̧'wo tjo̧bekwö usula tjemawinobe israel jojodöma.

¹⁶ Ikenama, jejenö usula tjemawiökwe, Isabenö Jo̧ma la'aka luwedö israel jojodönö pjatjatakwedönö kabebö ujuninobe, ja̧danö kabebö ujuninawö̧ma israel jojodönö pjatjatinobe, tjöpöjojodö tjitea naukwabidö tjujulutjö tjö̧jibobö.

¹⁷ Jo̧kwaijayonö, jejenö otiwanö pjaatijayonö, kabebö ujunajawö̧ la'aka luwedö yötjawi̧ma tja̧ja̧kwinokobe otiwanöma, ina ju'wedö tjösödawö̧nö ösödö 'yi̧atjinobe israel jojodöma. Jilekwamuböködökwö sulabenö 'da̧'da̧bö ju̧ju̧ jö̧jidanö, israel jojodöma tjösödo jö̧tja̧lökwe Diosnö kabatibö, ju'wedö tjösödawö̧nö ösödö, jobadönö bȩba̧chibö ösödiatjinobe, sulabenö. Israel jojodötjö ajayinö ji̧nadö otiwanö Isabenö Jo̧nö ösödö, wei̧ a̧ja̧kwö tjö̧jinajayonö, tji̧tji̧mu tupadanö jojodöma juluwanö katja̧tibinobe, ja̧danö Dios wei̧ tja̧ja̧kwinokobe.

¹⁸ Sulabenö a̧ja̧kwökönö tjö̧jijayonö, Isabenö Jo̧ma ina lȩlöinö edinobe jobadönö. Tjöpöjojodö usula tjemawinö ja̧tjawö̧, nöinö usula emawö tjubudekwenama, Isabenö Jo̧ma lȩlöinö ediainobe israel jojodönö, ja̧danö pjaatakwo̧ la'aka luwo̧nö kabebö juniainobe, israel jojodönö pjabatö. Ja̧danö Isabenö Jo̧ pjaatakwo̧nö kabebö ujunenama, ba̧kwelöjatebö jo̧banö pjabatiainobe, tjöpöjojodötjö tjö̧jibanö otiwanö pjaatobö. Ja̧danö jo̧ba ujuninökwe ina 'yaba̧lo̧ ö̧jayi, Isabenö Jo̧ma ba̧kwelöjatebö jo̧banötjö̧ israel jojodönö pjabatiainobe, jobadönö lȩlöinö edobetjö̧.

¹⁹ Jo̧kwaijayonö jejenö otiwanö pjaatijayonö, Dios kabebö ujuninökwe ö'wö baibenama, israel jojodöma kabatökönö juluwanö tjebachajö sulabenö ja̧bö ji̧atjinobe. Tjabe'dodö sulabenö ja̧tjitjö̧ bajalekwönönö, jwiinö sulabenö ja̧biatjinobe israel jojodöma, ju'wedö tjösödawö̧nö tjösödobö isakwöbi, bȩba̧chibö ösödöbi. Jwaikwöda tjuu 'dibadö ja̧nö, sulabenö ja̧bö tjö̧ji̧ katjatiboböma tjöpöjodinobe, jwaikwöda sulabenö ja̧bö tjö̧jinobe israel jojodöma, Dios wei̧ a̧ja̧kwökönö.

²⁰ Jejenö sulabenö ja̧bö tjö̧jiökwe, Isabenö Jo̧ma jwiinö ödameakwinobe israel jojodönö, ja̧danö jobadönö yöawinobe baikwö: —Damötjö bidö israel tja'dödökwö isabenö ja̧dakwa̧ wene yöba̧lakwawö dujunijatö, jobadöbi, ötjöbi. Jo̧kwaijayonö, tja'dödö yöbawö tjö̧jinadanöma ja̧böködö bidö israel jojodöma, ja̧danö ötjö jobadönö weti̧ma a̧ja̧kwöködö.

²¹ Jo̧kwajabetjö̧, ina canaan nijinö ju̧kwadö, Josue ina 'yaa̧layi a'dewö loinököwö̧ma, a'dewö lotökakwo̧sa. Israel jojodö sulabenö a̧ja̧kwökönö tjö̧jobetjö̧, tjöba a'otjö a'dewö lotökakwo̧sa.

²² Jobadöma wainö israel jojodö tjö̧'da̧denö tjö̧jobö wetakwo̧sa, israel jojodö tja'dödö otiwanö ötjönö ösödö tjö̧jinadanö tjö̧jojobö tjö̧jokojobö jö̧ba̧lö. Tja'dödöma otiwanö ötjönö ösödö, weti̧ a̧ja̧kwö tjö̧jinobe, ja̧danö bidöbi tjö̧jinadanö tjö̧jojobö tjö̧jokojobö jö̧ba̧lö, ina tjitebonö cananeos jojodö tjö̧'da̧denö tjö̧jobö wetocha, —jö̧ba̧lö yöawinobe Isabenö Jo̧ma.

²³ Ajayinö Josue cananeo jojodönö ölakwabikwawenama, okobe deinö jobadönö ujuluwobö weinokobe Isabenö Jo̧ma, ju'wedönö ina jobe tjö̧jibobö weinobe, tupakwöda jö̧ba̧lö. Ja̧danö, jobadö ina jobe ju̧kwadönö yöawinobe, —A'dewö lotökakwo̧sa, israel jojodö otiwanö ötjönö ösödö tjö̧jojobö tjö̧jokojobö jö̧ba̧lö öwawakobetjö̧, —jö̧ba̧lö.