Jueces 19 - Dios Iwene

Levisaso jojonö sulabenö baledina wene

¹ Ja̧danö, israel nijitjö inesö la'aka luwo̧ ina deayi, baikwö baledinobe. Efrainsaso niji mösa'ijutjö, jalemi comunidadtjö ödö, bakwo̧ Levisaso jojo ö̧jinobe. Ja̧danö, jo̧ba Levisaso jojoma, Judasaso niji comunidad Belen jojosujunö eminobe, ömöayujubi ilekwobi bajibanö.

² Ja̧danö, jobujuma jilekwenö kabatibö, jabe'do ejube jȩwa̧jinobe, Belen comunidadbe, ja̧danö jabe'dokwö jö̧jinobe, jawo̧dö ö'wejemubedö baledibanö.

³ Jemi ikenama, ö'wejemubedö jawo̧dö baledibaja̧ ikenama, jilekwe Levisaso jojoma Belenbe i̧'yinobe, ilekwonö dösölö̧jinö yöba̧lö, ejube tjejachajobö aebakobetjö̧. Ja̧danö, jobe i̧'yenama, ömöayo̧ bakwo̧nö öbibö, ja̧danö bu̧lu̧dö du̧ju̧tajanö öbibö, i̧'yinobe. Jejenö ichibioko, jabe'do ejunö tejatinobe jilekwenö, ja̧danö ichibiökwe, jabe'doma o̧'wo ösöwanö o̧jo̧li öjobekwö ichinobe, —Otiwanö kwichajabe, —jö̧ba̧lö.

⁴ Ja̧danö, ilekwo jabe'do jo̧ba öjaba jobe ö̧jobö a̧debiökwe, wapötakwa möle baledibanö ejunö ö̧jinobe. Ja̧danö, jobe ja̧nö, öjabakwö kwanöbi, ubasobu owöbi, öjaba ejunö abinobe Levisaso jojoma.

⁵ Ikenama, ö'wejemu jawa möle dewachenama, yȩayi a̧la̧jibajadö̧, tjȩwa̧jakwa̧ jawa tjotidinobe. Jo̧kwaijayonö ilekwo jabe'doma o̧jo̧linö yöa̧linobe, —Kwȩwa̧jakwa̧ abönö, kwujuluwachibanö kwakwawa kwukwo, ja̧danö kwajo̧, otiwanö kwȩwa̧jena, —jö̧ba̧lö.

⁶ Yöa̧lökwe, bamatö öjabakwö ukwinobe, ja̧danö jo̧bakwö owinobe. Ja̧danö öjabama jo̧banö aebinobe, —Ina kwȩwa̧joko, babe yötebi kwo̧'wo ösöwanö bada ö'wachö kwö̧jo, kwȩwa̧jakwa̧ abönö, —jö̧ba̧lö.

⁷ Ja̧danö ȩwa̧jobö a̧la̧ibenama, öjabama nöinö ina ȩwa̧jokobö aebinobe, ja̧danö aebiökwe, ja̧ ö'wejemu jawa yötebi ejunö abinobe.

⁸ Ja̧danö bakwamu jawa möle dewachenama, yȩayi a̧la̧ibinobe Levisaso jojoma, ȩwa̧jobö, ja̧danö a̧la̧ibiökwe, —Kwȩwa̧jakwa̧ abönö kwujuluwachibanö kwukwo, yi̧benakwöda kwȩwa̧jo, —aebinobe öjabama. Jo̧kwajabetjö̧, bamatö, öjabakwö kwanöbi, owöbi iteada̧linobe, yi̧benakwö baibenanö kabatö.

⁹ Ja̧danö yi̧benakwö Levisaso jojobi, ilekwobi, ömöayo̧bi tjȩwa̧jobö tja̧la̧ibenama, öjaba yöa̧linobe, —Edi, ida̧ökö yi̧bena baibobe, juluwanö yö̧te baibakobe. Jo̧kwajabetjö̧ babe yö̧te bada kwabaduwo, babe möle juluwanö 'dö̧ibakobetjö̧. Bada ja̧nö, kwo̧'wo ösöwanö kwö̧jibo, ja̧danö itekwayi yȩayi a̧la̧ibö kwȩwa̧jaduwo, —jö̧ba̧lö.

¹⁰ Jo̧kwaijayonö jenenö yöa̧lijayonö, yemidanö jobe abobö öpöjödinobe Levisaso jojoma. Jo̧kwajabetjö̧ a̧la̧ibö, du̧ju̧taja a̧jwi̧mu bu̧lu̧dö tjo̧ma'anö wanawa ökiya wanajadö, latjebinobe, tjȩwa̧jobö. Levisaso jojokwö, ilekwobi, ömöayo̧bi tjȩwa̧jinobe, ja̧danö ȩwa̧jö, Jebus comunidad ju'wi imi Jerusalen comunidad badeibö tjichibinobe.

¹¹ Jebus badeibö tjichibenama, ida̧ökö yi̧bena ji̧nobe, jo̧kwajabetjö Levisaso jojo ömöayo̧ma uluwo̧nö yöa̧linobe, —Bemi jebuseo jojodö tjitebo comunidad tedachajo, yö̧te jobe dabobö, —jö̧ba̧lö.

¹² Jo̧kwaijayonö yöa̧lökwe uluwo̧ atadinobe, —Jobadöma israel jojodöböködö, ja̧danö dömöledö israel jojodöböködö tjitebo tedachökakwedösa, jobe daboböma. Tupakwö di̧'yaduwo, Guibea comunidadbe dichibanö, —jö̧ba̧lö.

¹³ Ja̧danö, yöba̧lajo̧, ju'wibi yöa̧linobe, —Guibea comunidadbi, Rama comunidadbi israel jojodö tjuju̧kwemi comunidad, ja̧danö ödöokobe. Tupakwö di̧'yaduwo, Guibeabeö̧kö̧, Ramabeö̧kö̧ dichibobö, jobe dabakobetjö̧, —jö̧ba̧lö.

¹⁴ Jo̧kwajabetjö̧ Jebus comunidad baledö, tupakwö tjȩwa̧jinobe, ja̧danö jawo̧ meajena jenanö Benjamin niji comunidad Guibea yöneawinö tjichibinobe.

¹⁵ Jo̧kwajabetjö̧, yi̧ibobetjö̧, Guibea comunidad tebachö, jojodö ö'wachö tjö̧ba̧jemi ichibö tjö̧bamatinobe. Ja̧danö, jojodö tjöba a'o tjöbaledijayonö, bakwo̧bi a̧debinokobe, eju tebachö tjabobö.

¹⁶ Ja̧danö, yö̧te baibenama, bakwo̧ pöe jobe ichibinobe, batjotjö otidö ȩwa̧jö. Jo̧bama Efrainsaso niji mösa'iju jȩmi niji jojo, jo̧kwaijayonö Benjaminsaso niji comunidad Guibeanö ö̧jinobe.

¹⁷ Jo̧bama ichibö, jelobetjö ichajadö jojodö tjö̧bajemi ju̧kwadönö edenama, abebö a̧ja̧kwinobe, —Ökwödöma detjö kwichaduwaja̧da, ja̧danö dai kwi̧yaduwa? —jö̧ba̧lö.

¹⁸ Aebökwe, —Juda niji comunidad Belentjö dichajabe, ja̧danö Efrain niji mösa'iju jȩmi nijibe, comunidadtjö ödöobe di̧'yobe, ötjö chitebobe. Belen comunidadtjö chȩwa̧jabe, ja̧banö bemi jojodötjö bakwo̧bi ökwödönö a̧debokobe, eju tedachobö.

¹⁹ Ökwödöma okobe jwiinö dujuna̧lobe dö̧ji̧ jawama, cha̧jwi̧mu tju̧kwa isa'yebi dujuna̧la, ja̧danö du̧kwabi, ubasobubi dujuna̧la, ötjöbi, chilekwobi, chömöayo̧bi dukwobö, sule dabakwemida jwidobe, ju'wi okobe jwiinö dujuna̧lobe, —jö̧ba̧lö atadinobe Levisaso jojoma.

²⁰ Atadökwe, pöema yöa̧linobe, —Wene jwiinö kwö̧jaduwobö chösöda. Ja̧danö, ötjöma ökwödönö pjatatobö chösöda, ötjöda okobe jwiinö jwiköbaduwi̧ iyö pjatatobö chösöda. Ja̧danö bada comunidad ö'weje kwabaduwoko, chejube kwichaduwo, —jö̧ba̧lajo̧,

²¹ jobadönö öbibö teatinobe ejube. Ja̧danö, tebatajo̧, bu̧lu̧dönö tju̧kwa iyinobe, ja̧danö teatajawö̧nö ojwiyo iyinobe, tjömasapiya tjidichawobö. Ikenama kwanöbi tjukwinobe, ja̧danö owöbi tjowinobe.

Guibea jojodö sulabenö ja̧tjina wene

²² Ja̧danö, tjo̧'wo ösöwanö tjö̧jonö, comunidad jojodötjö ömadö sulabedöma eju tjösawinobe, ja̧danö jamatö 'do'dotjinobe. Ja̧danö eju luwo̧nö yötja̧linobe, —Kweju tjekatajökwenö labebi, jo̧banö 'da̧'da̧bö ja̧dakobetjö̧, —jö̧ba̧lö.

²³ Yötja̧lökwe, pöema ejutjö laebinobe, jobadökwö yöa̧lakwawobö, ja̧danö jobadönö yöa̧linobe, —Ja̧maökö chömöledö, sulabenö ja̧köbaduwa jejenöma. Jo̧bama chejube teachajabe, chiteada̧lo jö̧ta̧lökwe baibanö, sulabenö ja̧bökönaduwinö.

²⁴ Yöta̧laduwakwö, chitjiju ina iso̧kwö jö̧kujubi, ja̧danö jojo ilekwodanö ömöayujubi okwa tjö̧jobe, ja̧danö kwösödaduwitjö̧ma jobadönöda latebena, kwösödaduwi̧danö jobadönöda 'da̧'dabö ja̧köbaduwobö. Jo̧kwaijayonö jo̧ba jojonö yöka̧laduwaja̧danö ja̧bökönaduwi, sula, —jö̧ba̧lö yöa̧linobe.

²⁵ Jejenö yöa̧lijayonö, tja̧ja̧kwobö tjöpöjödinobe Guibea jojodöma, jo̧kwajabetjö̧ Levisaso jojoma ilekwodanö ömöayujunö do̧batö, a̧petukwö labebö iyinobe, ilekwonöda sulabenö 'da̧'da̧bö tjalewobö. Ja̧danö, labebö ujunajiawö̧, jobadöma yö̧te baledibanö jobujunö 'da̧'da̧böbi, ju'wibi sulabenö ja̧tjinobe, dewachenanö baibanö. Ikenama, dewachibenama, jobujunö junibö, tjȩwa̧jinobe.

²⁶ Ja̧danö, juluwo̧ ö̧jobekwö jȩwa̧bijinobe, ja̧danö apjude a'o ichibö me'dawachibö mejinobe, ja̧danö jobe jö̧bi̧nobe, möle baibenanö kabatö.

²⁷ Ja̧danö, yȩayi juluwo̧ labebö, ȩwa̧jobö apjude po̧ebenama, jobuju ilekwodanö ömöayujunö öbadekwajinobe, nijinö ba̧nö apjude a'o do̧balö bu̧junö.

²⁸ Badekwajo̧, —Ala̧ibi, tjo̧wi dewajo̧, —jö̧ba̧lö weinobe, jo̧kwaijayonö jatadinokobe, ida̧ökö ö'wö bajibajobetjö̧. Jo̧kwaiökwe, jiteba'o kabebö, ajwi bulu oma'anö öwaninobe, ja̧danö wanajo̧, ejube ȩwa̧jinobe.

²⁹ Ikenama ejube ichibajo̧, o̧do okwa teachenama, i̧sa̧pi̧ emibö jiteba'o pjei̧kwena ubulabinobe, a̧li̧nösamutjö dobolataja jawa baibanö, ja̧danö ubulabija tje'ewakwedönö weinobe, israel niji bakwemeachibanö jiteba'o e'ewö tji̧sȩbobö.

³⁰ Ja̧danö, okobe deinö jiteba'o ubulabina jawa edadöma, —Tajijö, bi̧ya baledi̧jaye la'akatjöda edinöködösa ditebotjö̧ma, da'dödö Egiptotjö latjebinemi baikwö bajalenö la'akatjöda bi̧yajaye edinöködösa. Otiwanö omukwatö, waisanö yöa̧lakwawa da̧ja̧kwaduwo, otiwanö ja̧dakwa̧ döwaisakobetjö̧, —jö̧ba̧lö yötja̧lakwawinobe.