Jueces 17 - Dios Iwene

Micaias o̧'wo jawa ujuna̧lina jawa

¹ Efrainsaso nijinö mösa'iju jȩmi bakwo̧ Micaias mikwo̧ ö̧jinobe.

² Ju'wi möle Micaiasma ojo'donö yöawinobe, —Chojo'do, belö bakwo̧ kwitea plata ö̧pi̧biya önaukwinobe, mil cien ö̧pibiya önaukwinobe, ja̧danö jejenö balediakwö, naukwinanö Dios lȩeböbö akebijatö, jö̧tö? Jau chojo'do, naukwinanö Dios lȩebobö akebina cha̧ja̧kwijatö, ja̧danö baikwö yötawakwö, ötjödasa ja̧ plata naukwinama, ja̧danö ina chujuna̧lobe, bi̧ya̧, —jö̧ba̧lö yöawinobe. Yöawoko, ojo'doma jatadinobe, —Otiwanö yökawajabe chitji̧, Isabenö Jo̧nö ateba ökwönö pjaatobö, jweinö yökawajabetjö̧, —jö̧ba̧lö.

³ Micaiasma ojo'donö tjeatinobe önaukwina plata ö̧pi̧biyama, ja̧danö tjeatajioko, ojo'doma yöja̧linobe, —Bi̧ya platatjö 'da̧batö chujunocha, Isabenö Jo̧ itea baibanö, bi̧ya̧tjö o̧'wo jawa tjotidobö, platatjö otikwo̧nö, bite chitji̧ma otiwanö o̧'wo jawa ujuna̧lakobetjö̧, —jö̧ba̧lö yöja̧linobe.

⁴ Ja̧danö, Micaias ojo'donö plata tjeatajenama, jobujuma doscientos ö̧pibiya emibö jiyinobe, platatjö otikwa waiso̧nö, o̧'wo jawa otidobö. Ikenama, otidaja̧ o̧'wo jawama, Micaiasma ejunö ujuninobe, o̧'wo jawanö ösödobö.

⁵ Micaiasma ösödakwawa jawa junawemi ujuna̧linobe ejutjö, jobetjö ösödawö̧nö bȩbachibö ösödobö, ja̧danö jobe platatjö otikwa o̧'wo̧ jawa jobe ujuninobe. Ja̧danö, ju'wibi ju'wi o̧'wo jawa pjebadönö otidö jobe ujuninobe, ja̧danö ju'wibi Diostjö jojodötjö tjö̧'dade pjabato̧ 'duawajiado̧ otidinobe. Ja̧danö, jejenö otidajo̧, itji̧mutjö bakwo̧nö 'da̧batö ujuninobe Micaiasma, Micaiastjö Diostjö ö'weje pjabato̧ otidobö.

⁶ Ja̧ möle inesö la'aka luwo̧ deinobe israel nijinö, israel jojodö ja̧bö tjö̧ji̧ webo̧ma, ja̧danö Micaiasbi, ju'wedö israel jojodöbi idöda tjomukwati̧danö ja̧bö tjö̧jinobe, idöda bejenö otiwa jö̧ba̧lö tjomukwati̧danö.

⁷ Ja̧danö, Judasaso niji Belen comunidadtjö bakwo̧ ö̧jinobe, möayo̧ Levisaso jojo.

⁸ Jo̧bama Belen comunidadtjö laebinobe, jelobe kwebachö, tupakwö otidö ö̧jakwemi isakwö. Ja̧danö, kweachonö, Efrainsaso niji mösa'iju jȩmi kweachinobe, ja̧danö Micaias ejube ichibinobe.

⁹ Jejenö ichibiökwe, Micaiasma jo̧banö abebö a̧ja̧kwinobe detjö ichajobö jö̧ba̧lö, ja̧danö aebökwe atadinobe, —Ötjöma Levisaso jojosa, ja̧danö Juda niji comunidad Belentjö chichabe. Ötjöma isakwö kwebacho̧sa, tupakwö otidö chö̧ja̧kwemi chöbadekwajobö, jobe ja̧nö chotidakobetjö̧, —jö̧ba̧lö.

¹⁰ Atadökwe, Micaiasma abebö yöa̧linobe, —Ötjökwö kwöjo, Diostjö ötjötjö dö̧'da̧de pjabato̧ bakibanö. Jau, chabe'dodanö babibö, dö̧'da̧de pjabato̧ kwotidobö chösöda, ja̧danö jejenö otidö kwö̧jitjö̧ma, otiwanö chimidakwo̧sa, o̧bakwena plata ö̧pi̧biya domulataja jawa ö̧pi̧biya chimidocha, ja̧danö kwö̧ka̧mijido̧ chiyocha, ja̧danö kwu̧kwa kwukwobö chiyocha, —jö̧ba̧lö aebinobe.

¹¹ Aebökwe, ösödinobe Levisaso jojoma, ja̧danö jemi tupakwö Micaiaskwö ö̧jinobe. Ja̧danö, Micaiasma ile niebinobe Levisaso jojonö, iteda itji̧munö ile niebi̧danö.

¹² Jejenö laebobe jo̧ba Levisaso jojo Micaias ejutjö tjö̧'da̧de pjabato̧ baibina jawa. Micaiasma jo̧banö 'da̧batö ujuninobe, tjö̧'da̧de pjabato̧ baibanö, ja̧danö tjö̧'da̧de pjabato̧ otidö, Micaias ejunö ö̧jinobe.

¹³ Ja̧danö, jejenö otidö ö̧jiökwe, Micaiasma yöa̧linobe, —Babema bite Levisaso jojo dö̧'da̧de pjabato̧ otidö ö̧jobetjö̧, chöwaisa, Isabenö Jo̧ma isabenö otiwanö pjaatakobe ötjönö, Levisaso jojoda Diostjö ötjötjö dö̧'da̧de pjabato̧ otidö ö̧jobetjö̧, —jö̧ba̧lö yöa̧linobe Micaiasma.