Jueces 16 - Dios Iwene

Sanson Gaza comunidad apjude emina jawa

¹ Ju'wi möle, Sansonma filisteo jojodö tjitebo comunidad Gazabe i̧'yinobe, ja̧danö jobe bakwuju jilekwamuböködökwö 'da̧'da̧bakwawö ju̧junö edinobe, ja̧danö edajo̧, jeju teachinobe, jobujukwö ö̧jobö.

² Jejenö ichibiawö̧, Gaza comunidad jojodöma tja̧ja̧kwinobe, —Sansonma ditebo comunidadbe ichajabe, —jö̧ba̧lö. A̧ja̧kwajadö, ko̧ko̧kwö tjiteada̧linobe Gaza comunidad ömadöma, yȩayi a̧la̧ibenama, jo̧banö kwabö lotjobö. Tjomukwatinobe, —Yȩayi dewachenama, comunidadtjö laebobö a̧la̧ibakobe Sansonma, ja̧danö laebobö jö̧a̧lenada jo̧banö kwabö lodakwedösa, —jö̧ba̧lö, jo̧kwajabetjö̧ mebibökönö, yö̧te baledibanö 'wi̧inö tjiteada̧linobe comunidad apjudetjö.

³ Jo̧kwaijayonö, yö̧te baledibanö camapjonö ö̧binokobe Sansonma. Yö̧te ja'ö a̧la̧ibinobe, ja̧danö a̧la̧ibajo̧ comunidad apjudebe i̧'yinobe, laebobö. Ichibajo̧, apude okwi'o nöa'o bakwachobesa'obi, jelekwöchobesa'obi nijitjö 'yeinobe, ja̧danö okobe jwiinö kabebö e'ewinobe öböbe'onö, apjudebi, okwi'ijubi, towisa'o apjude tumatakwa'obi. Jejenö Gaza comunidad apjude kabebö emibö i̧'yinobe Sansonma, ja̧danö jobetjö ödö e'ewinobe, Hebron comunidad badeibö mösa'obe ichibenanö kabatö. Ja̧danö jobe ichibajo̧, mösa'o wa̧pekwa'onö ödinobe, Gaza comunidad apjudema.

Sanson Dalila mikwujunö ösödina jawa

⁴ Jemi ikenama, Sansonma ile niebinobe bakwuju Dalila mikwujunö, filisteo jojodö tjitebo wabeko Sorec wabekonö ju̧ju̧nö.

⁵ Jejenö ösödiawö̧, filisteo jojodötjö inesö la'aka luwedöma Dalilanö yötja̧lakwawobö tji̧'yinobe, ja̧danö ichibajadö yötja̧linobe, —Sansonma ökwönö ösödobetjö̧, waisanö döyötö ja̧köbo, Sanson inesö ujulu jawa ökwönö yöawakobetjö̧, ujuluma detjö ichojobö jö̧ba̧lö. Jejenö ökwödö filisteo jojodö otiwanö jo̧banö dujuluwakwa̧ kwöwaisachibobö ja̧köbo, jo̧banö juluwö, otiwanö dunu'yakobetjö̧, döibajobö jwiinö. Jejenö pjakatitjö̧ma, otiwanö ökwönö dimidakwedösa, ökwödö inesö la'aka luwo̧kwena, bakwo̧nökwena mil cien plata ö̧pibiya dimidakwedösa, —jö̧ba̧lö Dalila pjajatobö atjebinobe.

⁶ Jejenö atjeboko jösödinobe Dalilama, jo̧kwajabetjö̧ Sansonnö abebö ja̧ja̧kwinobe, —Sanson, inesö kwujulu labebö loköbobö atebakwö, detjö ichojobö jö̧ba̧lö. Bakwo̧ ökwönö unu'yobö jö̧a̧litjö̧ma, dakwö ja̧enada, isabenö ökwönö ujuluwoböma? yökawobö atebakwö, —jö̧ba̧lö ajebinobe.

⁷ Ajebökwe, Sanson atadinobe, —Jojodö ötjönö 'böpösopja 'yayopja ina kököachokopjanö jelemutjö dopjolatajanö tjunu'yitjö̧ma, chujulu jwiena. Jejenö tjunu'yitjö̧ma, chime'dawena, ju'wedö jojodö tjujuluwi̧danö chujuluwena, —jö̧ba̧lö atadinobe.

^8-9 Atadoko, luwedönö yöjawinobe, ja̧danö yöjawawö̧ jelemutjö dopjolataja 'böpö jawa opjiya tjichejebinobe, 'yayopja ina kököachokopjiyama. Ja̧danö, Dalilama filisteo jojodötjö ju'wedönö tejatinobe jeju okwasȩko̧nö tju̧ju̧kwawobö, Sanson ujulu jwiena jo̧banö metji̧bobö. Ikenama, Sanson a̧ba̧lonö, 'böpösopjanö junu'yinobe Sansonnö. Ikenama, nu'yu kabataju, Sansonnö wiludö jwöjeba̧linobe, —¡Sanson, filisteo jojodö ökwönö metjibobe! —jö̧ba̧lö. Ja̧danö, chujulu jwiena jö̧ba̧lö yöa̧linajayonö, Sansonma wilubö 'döbekwö loinobe isopjiyama. Isopja ubö 'dai̧danö, juluwanö 'döbekwö loinobe Sansonma, ja̧danö ina tjöwaisachibinokobe Sanson ujulu jawa, detjö ichojobö jö̧ba̧lö.

¹⁰ Jemi ikenama Dalilama Sansonnö yöja̧linobe, —Sulabenö obö, omöna yöka̧lijatö ötjönö Sanson, jweinö yöka̧lobö atebakwö, dakwö ja̧tjenada, dökibobö jwiinö ökwönö tjunu'yoböma? —jö̧ba̧lö.

¹¹ Ajebökwe, —A̧la̧chi'bo 'yaya'bo, la'akatjöda tjotidinökö'bonö tjunu'yitjö̧ma, chujulu jwibo̧ batibena, ju'wedö jojodödanö, —jö̧ba̧lö atadinobe.

¹² Yöa̧loko, Dalilama a̧la̧chi'bo 'yaya'bo emibö Sansonnö junu'yinobe, ja̧danö ömadö okwasȩko̧nö tju̧ju̧kwawonö, yemidanö Sansonnö wiludö jwöjeba̧linobe, —¡Sanson, filisteo jojodö ökwönö metjibobe! —jö̧ba̧lö. Ja̧danö wilubö, ja'yuwopja juluwanö 'döbekwö lotji̧danö, Sansonma a̧la̧chi'bo juluwanö 'döbekwö loinobe.

¹³ Jejenö baledioko, Dalilama Sansonnö yöja̧linobe, —Sanson, yemidanö sulabenö ötjönö obö omöna yöka̧lajabe. Otiwanö jweinö yökawotjö, ökwönö otiwanö nu'yawama, di̧ya̧da? —jö̧ba̧lö. Ajebökwe, atadinobe, —Chöwö'yema jelemutjö dötölatajanö di̧tatakwawobe, ja̧danö ja̧ jelemutjö dötölataja di̧atakwawa jawakwö, kamijido̧ 'dö̧akwawa jawakwö pjabacha̧lö 'dö̧köbitjö̧ma, ja̧danö 'dö̧baju isö'inö bȩköbitjö̧ma, chujulu jwibo̧ batibena, ju'wedö jojodödanö, —jö̧ba̧lö.

¹⁴ Yöawioko, aba̧lonö Dalilama Sanson öwö'ye jelemutjö dötölataja di̧atakwawa jawakwö, kamiji̧do̧ 'dö̧akwawa jawakwö 'dö̧jinobe, ja̧danö 'dö̧baju isö'inö bȩjinobe. Jemi ikenama Sansonnö wiludö jwöjeba̧linobe, —¡Sanson, filisteo jojodö ökwönö metjibobe! —jö̧ba̧lö. Ja̧danö, wilubö, isö'ibi, 'dö̧awakabi, kamiji̧do̧sa'wobi öwö'yekwö labebö e'ewibinobe.

¹⁵ Jejenö baledioko, Sansonnö yöja̧linobe, —Ökwöma ile 'di̧tebakwö jö̧ba̧lö yöka̧lijayonö, omöna. Isabenö ötjönö ile 'di̧kebitjö̧ma, ötjönö omöna yöka̧loko jö̧ka̧lajena, jo̧kwaijayonö ida̧ökö wapötakwanö baibanö ötjönö obö omöna yöka̧lajabe. Ile 'di̧tebakwö yöka̧lijayonö, ina jweinö yöba̧lö̧kö̧ja, inesö kwujulu detjö ichojobö —jö̧ba̧lö.

¹⁶ Kabatökönö mölekwena jejenö jö̧ba̧lö yöja̧linobe, isabenö ile 'di̧kebitjö̧ma yökawena jö̧ba̧lö. Kabatökönö ajeba̧linobe, —Nöinö ajeba̧litjö̧ ö'wö batibena, —jö̧ba̧lö öpöjödachibinö jö̧a̧lenanö.

¹⁷ Ja̧danö bajaliyanö jweinö yöawinobe Sansonma Dalilanö, —Ötjöma Dios wei̧ chotidobö 'da̧batö ujuninökwesa, nazareo jojo batibanö. Chojo'do metu'wo jö̧jinemi baikwö bajalenö, nazareo jojo batibanö 'da̧batö ujuninökwesa, ja̧danö jejenö 'da̧batö ujuninökwechobetjö̧, chöwö'ye la'akatjöda 'witjekwökökwesa, nazareobedö tjöwö'ye 'witjobö jwiobetjö̧. Jo̧kwajabetjö̧, chöwö'ye jwobö lotjitjö̧ma, isabenö chujulu jwiamachena, ja̧danö sule ju'wedö jojodö tjujuluwi̧danöda chujuluwena, —jö̧ba̧lö yöawinobe.

¹⁸ Jejenö yöawoko, Dalilama jöwaisachibinobe, babe bajaliyanö jweinö yöawajabe jö̧ba̧lö, jo̧kwajabetjö̧ yemidanö filisteo jojodötjö inesö la'aka luwedönö jwöjinobe, —Yemidanö baikwö ichaduwi, babema isabenö okobe jwiinö ujulu jawa yöawajobetjö̧, detjö ichojobö jö̧ba̧lö. —Yöjawawö̧, tjichinobe, ja̧danö tjimidakwa̧ yötjawinadanö balada tjichejebinobe.

¹⁹ Ja̧danö, Dalilama wejinobe, jisȩ'bonö Sanson uu wanebö abibobö, ja̧danö abibaja̧ ikena bakwo̧nö jwöjinobe, ichö Sanson öwö'ye jwobö loobö. Jejenö usula emawinö ja̧ji̧nobe Dalilama, ja̧danö Sanson inesö ujulu laebinobe.

²⁰ Jemi ikenama jwobö kaatenama, yemidanö Sansonnö jwöjeba̧linobe, —¡Sanson, filisteo jojodö ökwönö metjibobe! —jö̧ba̧lö. Ja̧danö wiluenama, wajwiinobe Sansonma, Isabenö Jo̧ jo̧ba ö̧jelö laebaja̧ma, ja̧danö omukwatinobe, —Ajayinö a̧la̧ibö a̧la̧chi'bo 'döbekwö lotinadanö, yemidanö wene jwiinö latebocha, —jö̧ba̧lö, jo̧kwaijayonö waekwinobe.

²¹ Ja̧danö, ujulu jwiiawö̧, filisteo jojodöma Sansonnö do̧tja̧tinobe, ja̧danö do̧batajadö, öbajalebiya kelebö lotjinobe. Ja̧danö, Gaza comunidadbe tje'ewinobe Sansonnö, broncetjö otikwa ka̧lenasonö jo̧banö yö̧tjebinobe, jadanö ka̧lena ba̧kwawejunö tjödinobe. Jobe ka̧lena ba̧kwawejunö ja̧nö, jo̧banö wetjinobe, trigoso̧pja otikwawa inawa jalatö otidobö, trigoso̧pja otidö.

²² Ja̧danö, jobe ka̧lena ö̧jonö, öwö'ye yemidanö ödöachinö jamatö pokwinobe.

Sanson ö'wö baibina wene

²³ Jemi ikenama, ja'yubenö lekwajabetjö, filisteo jojodötjö luwedöma tjo̧ko̧ko̧kwinobe, bakobe ba'ali junö, tjösödökwe Dagon ötjabökwe o̧'wo jawanö iyawa tjiyobö. Dagonnö ösödö, —Dösödökwe Dagonda döpöjojo Sansonnö dujuluwobö pjabatinama, —jö̧ba̧lö tjo̧'wo ösöwanö yötja̧linobe.

²⁴ Ja̧danö, ju'wedö jojodöbi Sansonnö tjedenama, jobadöbi tjösödökwe Dagonnö tjösödinobe, —Ajayinö Sanson ökwödötjö ba̧jȩkwadönö kwabö loinajayonö, ja̧danö nöinö döbatjiju suli̧ öwaedinajayonö, dösödökwe Dagonma otiwanö pjaatinobe, jo̧ba döpöjojonö otiwanö dujuluwobö, —jö̧ba̧lö yötja̧linobe.

²⁵ Ba'ali junö, nöinö owa̧lö, filisteo jojodöma ja'yubenö 'dukwachawö̧ batjibinobe, ja̧danö 'dukwachawö̧ jwötjinobe, —Sansonnö kwichejebaduwo, jo̧banö edö, odakobetjö̧, —jö̧ba̧lö. Jo̧kwajabetjö̧ Sansonnö tjichejebinobe ka̧lena ba̧kwawejutjö, ja̧danö ösödakwaweju ja'ö okwi'iju dö'olataja ö'wejenö öjamatobö wetjinobe. Ja̧danö, jobe edökönö ja̧onö, Sansonnö otjinobe filisteo jojodöma.

²⁶ Bakwo̧ möayo̧ma, Sanson ömamu do̧ba̧lö öibinobe, Sansonma öbajale kelebö lotjinökwe ö̧jobetjö̧, ja̧danö Sansonma jo̧banö aebinobe, —O̧do okwi'iju inesö do'olataja okwi'iju matobö i̧sebitjö, jobe wanebö chö'wachakobetjö̧, —jö̧ba̧lö, ja̧danö aebi̧danö maobö pjaatinobe.

²⁷ Jeju okwa ba̧jȩkwadö filisteo jojodö tjö̧jinobe, ömadöbi, ya̧döbi. Okobe deinö filisteo jojodötjö luwedöma jobe tjö̧jinobe, ja̧danö ju'wibi o̧do wame, tres mil jenanö jojodömi tjeda̧linobe, ömadöbi ya̧döbi. Sanson o̧do ja'ö edökönö ja̧onö, okobe deinö jobadöma eda̧lö otjinobe Sansonnö.

²⁸ Ja̧danö, Sansonma Isabenö Jo̧nö aebinobe, —Chuluwo̧ Isabenö Jo̧ Dios, yemidanö ötjönö kwomukwatibobö atebakwö, sule bakwötanöda chujuluwachibanö pjakatobö atebakwö. Jau chuluwo̧, bidö filisteo jojodöma sulabenö chöbajalebiya kelebö lotjinobe, ja̧danö jejenö ja̧tji̧tjö̧, balekwa mikwa babe jobadönö chujuluwinö pjakatobö atebakwö, —jö̧ba̧lö aebinobe.

²⁹ Ja̧danö, abebajo̧, Sansonma o̧do okwi'iju, ö'weje inesö okwi'iju do'olataja do̧a̧tinobe, öwaisobekwöchobesamunö bakwa'o, wajwiobekwöchobesamunö bakwa'o.

³⁰ Ja̧danö, —Bidö filisteo jojodökwö bakobe ö'wö batibobö webitjö, —jö̧ba̧lö Diosnö aebinobe, ja̧danö abebajo̧ 'diinö jiinobe, okobe jwiinö ujulunö. Ja̧danö, ö'weje okwi'iju 'dainobe, ja̧danö okobe jwiinö o̧do meinobe, filisteo jojodötjö luwedönöbi, ju'wedö jobe ju̧kwadö filisteo jojodönöbi. Jejenö ba̧jȩkwadönö kwabö loinobe Sansonma, ina 'ya̧alayi kwabawö loinawö̧tjö bajalekwönönö, ja̧ mölȩ ba̧jȩkwadönö kwabö loinobe Sansonma, bakobe jobadökwö ö'wö baibenama.

³¹ Jemi ikenama, Sanson öjawo̧döbi, ju'wedö ömöledöbi iteba'o emö tjichinobe, ja̧danö iteba'o emö tje'ewinobe, iteba'o tjo̧tjo̧bö. Ja̧danö, Zora comunidadbi, Estaol comunidadbi ö'wejenö, abe'do Manoanö tjödinedo̧nö tjödinobe Sansonnö. Ö'wö baibakwa̧ abönö, Sansonma veinte o̧biya baledibanö israel jojodönö pjabatö ö̧jinobe.