Jueces 15 - Dios Iwene

Sanson filisteo jojodökwö ölakwabikwawina jawa

¹ Jemi ikenama, ja'yubenö lekwajabetjö, trigo waji̧ emajitja möle baibena, Sansonma ilekwonö edö i̧'yinobe Timnat comunidadbe. Jobe 'ya̧nö, chivo ja'yuwo̧nö öbibö i̧'yinobe, ilekwonö iyobö. Ja̧danö, ilekwo jejube ichibö, ilekwo jabȩko̧ teachobö jö̧a̧linobe, ilekwokwö ö̧jobö, jo̧kwaijayonö teachobö jö̧a̧liökwe, jabe'doma weinokobe.

² Tebatökönö, Sansonnö yöa̧linobe, —Dameakwö lakebinenama, chomukwatijatö, –Isabenö Sansonma chitjijunö öpöjödö kaatibajabe, –jö̧ba̧lö, jo̧kwajabetjö̧ ja̧ mölȩ kwömöledöso̧binanö wetijatö, jo̧bada ilekwo bajibanö. Jo̧kwaijayonö, jöjawujunö edi, jobujuma jöpöotjö bajalekwönönö otiwuju, jobujunöda kwemo, —jö̧ba̧lö yöa̧linobe.

³ Jejenö yöa̧lökwe, ödameakwinobe Sansonma, ja̧danö öpöjödö yöa̧linobe, —Ja̧maökö. Jejenö ja̧köbi̧tjö̧, balekwa mikwa filisteo jojodönö sulabenö ja̧tocha, ja̧danö ja̧ ja̧takwa̧ma, ötjö jawamaökö, ökwödö filisteo jojodö jawada, chilekwonö jȩlo̧ ilekwo bajibanö weköbinobetjö̧, —jö̧ba̧lö.

⁴ Ja̧danö, yöba̧lajo̧, Samsonma labebö yo̧lo̧ko̧dönö trecientobedönö do̧atinobe. Ikenama, do̧batajo̧, du̧ju̧tajakwena unu'yinobe tjöwali'bonö, ja̧danö tjöwali'bo bajalenönö dȩju̧wayubiya di̧atinobe.

⁵ Ikenama, di̧batajo̧ dȩju̧wayubiya önötedinobe, ja̧danö nötedajo̧, yo̧lo̧kodönö webö loinobe, filisteo jojodö trigo tjöbatiju ö'wejenö tjöbaledobö, tjöbatjiju ubinö. Jejenö ja̧bö, okobe jwiinö tjöbatjiju jawa juwö loinobe, ida̧ökö 'wibö di̧tja̧taja̧ trigo jawabi, ina 'witjökö jawa trigobi, uba batjijubi, olivo towibiyabi.

⁶ Jejenö balediawö, filisteo jojodöma abebö tja̧ja̧kwinobe, —Ti juwö loaja̧da? —jö̧ba̧lö. Abebö tja̧ja̧kwawö̧, ju'wedö yötjawinobe, —Sansonta, Timnat jojo o̧jo̧li Sansonda juwö̧ loajabe. Jau, öjaba ilekwonö jelo̧ ilekwo bajibanö weiniökwe, Sansonma dameakwö döbatjiju juwö loajabe, —jö̧ba̧lö yötjawinobe. Jejenö yötja̧wawö̧, filisteo jojodöma balekwa mikwa Sanson ilekwonöbi, jabe'donöbi ökwölanö juwö lotjinobe.

⁷ Jejenö ja̧tjiökwe, Samsonma jobadönö ödameakwinobe, ja̧danö dameakwö yöa̧linobe, —Jobadönö juwö loköbaduwi̧tjö, isabenö balekwa mikwa ökwödönöbi kwabö lotakwawö̧ja, ja̧danö katatökakwo̧sa, balekwa mikwa ökwödönö kwabö lötenanö baibanö, —jö̧ba̧lö.

⁸ Ja̧danö, yöba̧lajo̧, Sansonma filisteo jojodönö meibinobe, ja̧danö ba̧jȩkwadönö kwabawö loinobe. Ikenama, kwabawö lobajo̧, Sansonma Etam inaba ötjabawabe i̧'yinobe, ja̧danö jobe inawa ötölanö ö̧jinobe.

⁹ Tjömöledönö kwabö loiawö̧, ju'wedö filisteo jojodöma israel jojodökwö tjölakwabikwawobö tjichinobe, Judasaso nijibe, ja̧danö ichibajadö, tjabakwemi tjujuninobe Leji comunidad ö'öbönö. Ikenama, Lehi comunidad jojodönö ölakwabikwawö tjichiawö̧,

¹⁰ Juda jojodöma abebö tja̧ja̧kwinobe, —Tajawedö ökwödönö ölakwabikwawö kwichaduwaja̧da? —jö̧ba̧lö. Abebö tja̧ja̧kwawö̧, —Sansonnö do̧datobö dichajabe. Jo̧bama ökwödö filisteo jojodötjö ju'wedönö kwabawö loinobetjö̧, balekwa mikwa ölakwabikwawö dichajabe, —jö̧ba̧lö.

¹¹ Tjatadawö̧, Judasaso jojodötjö tres milbedö ömadöma Sanson ö̧jobekwö tji̧'yinobe, Etam inabatjö inawa ötöla ö̧jobekwö. Ja̧danö, ichibajadö, Sansonnö yötja̧linobe, —Filisteo jojodö duluwedö tjö̧ji̧ wajwiköbiji̧? Tajawedö ökwödönö suli̧ kwöwaedinö sulabenö ja̧köbaja̧da? Jobadönö sulabenö ja̧bö, ökwödönö wene jwökebajabe, tajawedö jejenö ökwödönö suli̧ kwöwaedaja̧da? Sula, —jö̧ba̧lö. Yötja̧lökwe, Sansonma atadinobe, —Ötjöma sule jobadö ötjönö ja̧tjinadanö, balekwa mikwa jobadönö ja̧tajabe, —jö̧ba̧lö.

¹² Yöa̧lawö̧, yötja̧linobe, —Ökwödöma ökwönö do̧batö, dunu'yobö dichajabe, do̧batajadö filisteo jojodönö diyobö, jobadöma ökwödönö kwabö lotjapji jö̧ba̧lö. —Yötja̧lökwe, —Ökwödöma kwabö lobökönö, sule nu'yöda kwunu'yaduwitjö̧ma, kwunu'yaduwobö wetawocha. Jo̧kwajabetjö̧ yöbawö junaduwitjö, –Isabenö kwabö lobökönö, sule nu'yöda dunu'yakwedösa, –jö̧ba̧lö. Jejenö yöbawö kwujunaduwitjö̧ma, kwunu'yaduwobö wetocha, —jö̧ba̧lö.

¹³ Yöa̧lawö̧, —Ökwödöma isabenö ökwönö kwabö lodökakwedösa, sule nu'yajadö, filisteo jojodönö diyakwedösa, —yötja̧linobe. Ikenama, yöba̧lajadö, a̧la̧chi'bo do'bolataja 'yayio'bijunö tjunu'yinobe Sansonnö, ja̧danö nu'yajadö, Etam inaba ö̧jinelö öbibö latjebinobe, filisteo jojodö tju̧ju̧kwobekwö.

¹⁴ Sansonnö öbibö tjichejebinobe Lehi comunidadbe, filisteo jojodö tju̧ju̧kwobekwö. Ja̧danö, tjichejebiawö̧, filisteo jojodöma jwöbeba̧lö tjichinobe Sanson ö̧jobekwö. Jejenö tjichiökwe, Isabenö Jo̧ o̧'wo luwo̧ma juluwanö Sansonkwö ichibinobe, ujuluwachibanö, ja̧danö Sansonma juluwanö kaa'bodanö 'döbekwö loinobe a̧la̧chi'bo tjunu'yaja̧'boma. 'Yaya'bojayonö, ökwölanö ubaja'bo ichejekwinö 'döbekwö loinobe, ömamijutjö meinö.

¹⁵ Jobe ipjeanö Sansonma bulo ibekasa'wo jawa iwe'iju jawa edinobe, ina 'dii̧ iwe'oma, ja̧danö do̧batö, filisteo jojodönö meibinobe, ja̧danö ja̧ iwe'onö filisteo jojodönö milbedö ömadö ölakwabikwawadönö kwabawö loinobe.

¹⁶ Ikenama, kwabö lobajo̧, Sanson yöa̧linobe, —Bulo ibeka iwe'onö ba̧jekwadönö kwabawö lotajabe, tjiteba'ijuma jelobebi jelobebi mö japopo batjibanö, bulo ibekasa'wo iwe'ijunö milbedönö kwabawö lotajabe, —jö̧ba̧lö yöa̧linobe.

¹⁷ Ikenama, yöba̧lajo̧, bulo ibekasa'wo iwe'o ikwö loinobe. Jadanö, jejenö jobetjö baledinobetjö̧, ja'o mösa'o ötjabinobe, bulo ibekasa'wo iwe'iju mösa'o jö̧ba̧lö.

¹⁸ Jejenö filisteo jojodökwö ölakwabikwawajo̧, jwiinö ojwiyo o̧ti̧löjachibinobe Sansonma, ja̧danö o̧ti̧löjachibiökwe, Isabenö Jo̧nö aebinobe, —Chuluwo̧, otiwanö pjakatajabe, ötjö kwömöayo̧ filisteo jojodönö jwiinö chujuluwobö. Jo̧kwaijayonö, babema ojwiyo o̧ti̧tjö ö'wö batibena ichejekwa. Jejenö o̧ti̧löjachibökwe ö'wö batibitjö̧ma, ajayinö filisteo jojodönö chujuluwajayonö, bajaleapo jobadöda ötjönö tjujuluwena. Jejenö ö'wö batibobö weköbakwa̧ji̧? Ötjönö pjakatökenaji̧? —jö̧ba̧lö aebinobe.

¹⁹ Aebökwe, Diosma jobe Lehi nijitjö, niji 'dabö solachajibobö weinobe, ja̧danö ojwese'do jobetjö döobö weinobe. Ja̧danö, ojwiyo owö ujuluwachibinobe Sansonma. Ja̧danö, jejenö Diosnö aebökwe ojwese'do döobö weinobetjö̧, je'do Enacore jö̧ba̧lö midö ötjabinobe, Diosnö aebinemi ojwese'do jö̧ba̧lö, ja̧danö je'do ina Lehi nijitjö döbö jo̧be babebi.

²⁰ Ja̧danö, veinte o̧biya baledibanö, filisteo jojodö israel jojodönö tjujuluwonö, Sansonma israel jojodönö pjabatö ö̧jinobe, filisteo jojodötjö tjö̧jibobö.