Jueces 14 - Dios Iwene

Sanson filisteo jojosujunö emina jawa

¹ Ja̧danö, ju'wi möle Sansonma Timnat comunidadbe i̧'yinobe, ja̧danö 'ya̧jo̧, bakwuju filisteo jojodötjö möayujunö edö ösödinobe.

² Jo̧kwajabetjö̧, ejube ȩwa̧jenama, abe'donöbi ojo'donöbi yöa̧linobe, —Bakwuju filisteo jojosujunö chedijatö, Timnat comunidadtjö. Jobujunö chemobö chösöda, jo̧kwajabetjö̧ chilekwo bajibanö chemobö pjabataduwi, —jö̧ba̧lö aebinobe.

³ Aebawö̧, abe'dobi ojo'dobi tjatadinobe, —Ökwödö dömöledötjö bakwujunö kwemakwuju dejobeji̧? Ja̧danö dömöledösaso jojodötjö dejitjö̧ma, jeleso israel jojodötjö bakwuju kwemakwuju dejobeji̧? Isabenö israel jojosuju kwemakwuju jö̧jena, jobujunöda kwemobö. Jau Sanson, tajawedö idö tjötade bajalesa̧do̧ 'wibekwöködö filisteo jojodö tjitijunö kwemobö, otiwökena, —jö̧ba̧lö. Jo̧kwaijayonö tjatadökwe, öpöjödinobe Sansonma, ja̧danö weinobe, —Yayonö jobujunöda chemobö chösöda, jobujuma edö chösödoko, —jö̧ba̧lö.

⁴ Ja̧ baledi̧ma Sanson abe'dobi, ojo'dobi wajwitjinobe, ja̧ baledi̧nötjö Isabenö Jo̧ otidakwa̧ma. Ja̧ möle filisteo jojodöma israel jojodö tjuluwedö tjö̧jinobe, ja̧danö Isabenö Jo̧ma omukwatö ujuninobe, ja̧ baledi̧tjö Sanson filisteo jojodönö ujuluwakwa̧ jawa otidobö, jo̧kwaijayonö Isabenö Jo̧ omukwati̧ wajwitjinobe.

⁵ Ikenama, jejenö yöba̧lakwawajadö, Sansonbi, abe'dobi, ojo'dobi Timnat comunidadbe tji̧'yinobe, ja̧danö Sanson Timnat comunidad ö'öbösayu uba batjo ö'öbö ichibenama, didiba juluwo̧ma Sansonnö meibinobe.

⁶ Jejenö Sansonnö meibenama, Isabenö Jo̧ o̧'wo luwo̧ma juluwanö Sansonkwö ichibinobe, ujuluwachibanö, ja̧danö didiba meibiökwe, Sansonma ömamunöda do̧batö 'yadebö loinobe didibanö. Didiba jwiinö ujuluwijayonö, jojodö chivo ja'yuwo̧ iteba'o 'yadebö lotji̧danö, didibanö 'yadebö loinobe. Jo̧kwaijayonö jejenö didibanö kwabö loajayonö, abe'donöbi, ojo'donöbi yöawinokobe Sansonma.

⁷ Ikenama, Timnat comunidadbe ichibajo̧, Sansonma ösödoko filisteo jojosuju möayujunö yöa̧lakwawinobe, ja̧danö jwiinö jobujunö ösödinobe Sansonma, —Bisunö chemobö jö̧ta̧la, —jö̧ba̧lö.

⁸ Jemi ikenama, jobujunö emakwa̧ möle badekwachenama, Sansonma yemidanö Timnat comunidadbe i̧'yinobe, ilekwo bajibanö emobö. Ja̧danö, comunidad yöne ichibö, didibanö kwabö loinemi edö i̧'yinobe, dakwö baledinojobö jö̧ba̧lö edobö. Ja̧danö ichibö edenama, didiba omuko okwa a̧ji̧ wayo̧ tjö̧bebiya edinobe, ja̧danö iwe'iju okwa wa̧yo̧ öbadekwajinobe.

⁹ Badekwajo̧, ömamunö ko'dö eminobe wa̧yo̧ma, ja̧danö kweachonö, neinobe. Ja̧danö, abe'dobi ojo'dobi tjöba a'o ichibajo̧, jobadönöbi iyinobe, netjobö. Jo̧kwaijayonö, jobadönö yöawinokobe, —Wayo̧ma didiba iwe'ijutjö chemajabe, —jö̧ba̧lö.

¹⁰ Sanson abe'doma filisteo jojosujunö emakwa̧ jawa otidobö i̧'yinobe, ja̧danö Sansonma jobe ba'ali ujuninobe, jemi ju̧kwadö ichö tjukwobö. Jemi ju̧kwadö tjilekwamunö tjemakwedö ömadöma, jejenö ba'ali juniatjinobe, jo̧kwajabetjö̧ juniatji̧danö Sansonbi ba'ali ujuninobe.

¹¹ Ja̧danö, Sanson ichibö ba'ali ujuniawö̧, ilekwo jömöledöma ömadö treintabedönö tja̧debinobe, Sanson ömöledö batjibanö jo̧bakwö ba'ali tjujunobö.

¹² Ja̧danö, tja̧debawö̧ treintabedönö yöa̧linobe Sansonma, baikwö: —Ju'wi yöa̧lakwawa jawa abebö cha̧ja̧kwobö jö̧ta̧la ökwödönö, labebö loawa kwöwaisaduwojobö jö̧ba̧lö. Jelemutjö dötölataja möle ba'ali dujunakobe, ja̧danö ba'ali 'dö̧ibakwa̧ abönö, labebö loawa waisachibö atadö yökawaduwitjö̧ma, ötjöma ökwödö treintabedönö bakwo̧nökwena kamijido̧ otiwa̧do̧ chiyocha, wamesa̧do̧ linotjö otikwa̧do̧bi, ju'wi kamijido̧bi.

¹³ Jo̧kwaijayonö labebö loawa wajwiköbaduwitjö̧ma, ökwödöda bakwo̧nökwena ötjönö kamiji̧do̧ kwiyaduwobö ja̧kobe, linotjö otikwa̧do̧ wamesa̧do̧bi, ju'wi kamijido̧bi, —jö̧ba̧lö yöa̧linobe Sansonma. Yöa̧lawö̧, —Jau, otiwa, yöa̧lakwawa abebö a̧ja̧kwi, da̧jakwobö, —jö̧ba̧lö tjatadinobe.

¹⁴ Tjatadökwe didiba jawa wanedö yöawinobe, baikwö: —Inesö itebiya kwo̧tjö, kwakwawa laebinobe, ja̧danö inesö juluwo̧tjö, o̧ti̧ jawa laebinobe, —jö̧ba̧lö yöa̧linobe, labebö loawa tjöwaisojobö jö̧ba̧lö. Ja̧danö, yöa̧lawö̧, wapötakwa möle baledibanö tjomukwatinobe, jo̧kwaijayonö labebö loawa wajwitjinobe.

¹⁵ Ja̧danö, wapötakwa möle baledibanö omukwatajadö, ö'wejemu jawa möle Sanson ilekwonö wetjinobe, —Kwilekwenö waisanö yöba̧lö öbibö döyötö abebö kwa̧ja̧kwo, labebö loawa kwöwaisobö, ja̧danö waisachibaju, ökwödönö yökawo, ökwönö kwabö lodapji jö̧ba̧lö. Jau, ökwödönö ba'ali dujunobö kwa̧debinama, ditea jwibadö badibobö sulabenö kwa̧debinobe ichejekwa, ja̧danö labebö loawa yökawökötjö̧ma, ökwönöbi, yöne kwömöledönöbi kwabö lodakobe, o̧do okwa kwö̧jaduwonö, kwabe'do eju ökwölanö juwö lodakobe, —jö̧ba̧lö wetjinobe.

¹⁶ Wetjoko, ilekwoma jilekwe Sanson öba a'o budekwö ajebinobe, —Chilekwe, ötjö kwilekwonö öpöjödo̧ja, –Ile 'di̧tebakwö, –yöka̧lijayonö, omöna. Jau, chömöledönö yöa̧lakwawa jawa abebö kwa̧ja̧kwajayonö, ötjö kwilekwonö labebö lobö yökawokobe. Isabenö ötjönö ile 'di̧kebitjö̧ma, labebö lobö yökawo jö̧ka̧lena ötjö kwilekwonö, —jö̧ba̧lö budekwö ajebinobe. Ajebökwe, Sanson atadinobe, —Ja̧maökö chilekwo, ökwönö chöpöjödökö. Jo̧kwaijayonö chabe'donöbi, chojo'donöbi labebö lotokobe yöa̧lakwawama, ja̧danö jobadönö yötawökötjö̧ma, tajawedö ökwönö yötawobö? Labebö lobö yötawoböma jwiobe chilekwo, —jö̧ba̧lö atadinobe.

¹⁷ Ja̧danö, ba'ali tjujunena baledibanö, Sanson ilekwoma jilekwe öba a'otjö budekwiajinobe, —Labebö lobö yökawotjö, —jö̧ba̧lö. Ja̧danö, lekwe budekwö ajeba̧liökwe, bajaliyanö bajaleapo möle jelemutjö dötölataja mölema, labebö loawa yöawinobe ilekwonö. Ja̧danö, yöawioko, tupakwö jömöledönö labebö loawa yöjawinobe.

¹⁸ Ja̧danö, yöjawawö̧, jelemutjö dötölataja möle yö̧te baibakwa̧ abönö, Timnat comunidad ömadöma Sanson öba a'o ichibö yötja̧linobe labebö loawama, baikwö: —Wayo̧tjö bajalekwönönö o̧ti̧ma, ¿Di̧yada? Ja̧danö didibatjö bajalekwönönö juluwo̧ma, ¿Diteda? —jö̧ba̧lö labebö loawa yötjawinobe. Yötjawökwe, Sansonma dameakwö yöa̧linobe, —Ökwödöma sulabenö ja̧köbaduwajabe. Wanedö yötawa, ötjö chajwi pakayasuju ökwödö kwöbatjoduwi jotidobö weköbaduwajabe ichejekwa, chilekwonö abebö ja̧ja̧kwobö sulabenö wekachinaduwobetjö̧. Jau, chilekwonö abebö ja̧ja̧kwobö weköbaduwökötjö̧ma, kwöwaisachibaduwoko jö̧ka̧linaduwobe, —jö̧ba̧lö dameakwö yöa̧linobe Sansonma.

¹⁹ Ikenama Isabenö Jo̧ o̧'wo luwo̧ma juluwanö Sansonnö ujuluwachibanö ichibinobe, ja̧danö Sansonma Ascalon comunidadbe i̧'yinobe. Jobe ichibajo̧, Ascalon comunidad ömadö filisteo jojodötjö treintabedönö kwabawö loinobe Sansonma, ja̧danö kwabö lobajo̧, tjiteajama 'döbebö eminobe. Ikenama, emajo̧, tjiteaja̧ kamijido̧ e'ewö ȩwa̧bijinobe Timnat comunidadbe, ja̧danö yöa̧lakwawa labebö lobinadönö iyinobe, —Chiyocha, —jö̧ba̧lö yöa̧lina badekwachinö. Ikenama, jwiinö dameakwö, ilekwonö le'dedibö ȩwa̧jinobe Sansonma, iteda abe'do ejube.

²⁰ Ja̧danö, jejenö le'dedibö ȩwa̧jiökwe, Sanson öjabama itjijunö weinobe, ba'ali junadötjö bakwo̧ ilekwo bajibanö, ajayinö ba'ali junö, —Sanson ömöledösa, —jö̧ba̧lö ba'ali junadötjö bakwo̧nö.