Jueces 13 - Dios Iwene

Sanson mikwo̧nö jemakwa̧ Dios yöawina jawa

¹ Israel jojodöma yemidanö Isabenö Jo̧ öpöjödi̧ jawa sulabenö ja̧bö tjö̧jinobe, ja̧danö sulabenö ja̧bö tjö̧jiökwe, Isabenö Jo̧ma jobadönö iyö loinobe, tjöpöjojodö filisteo jojodöma cuarenta o̧biya baledibanö israel jojodönö tjujuluwobö.

² Zora comunidadtjö bakwo̧ ö̧jinobe, Dansaso jojo Manoa mikwo̧ma, ja̧danö Manoa ilekwoma metu'wo babibökuju, jitji̧mu debuju jö̧jinobe.

³ Ja̧danö, ju'wi möle Isabenö Jo̧ma, angeldanö ichejekwö öwawachinobe Manoa ilekwonö, ja̧danö jobujunö yöawinobe, —Metu'wo babibökuju kwitji̧mu deköbelö, isabenö metu'wo kwö̧jakwujuja, ja̧danö kwitji̧nö kwemakwujuja.

^4-5 Kwitji̧ma kwemaja̧ möletjö ö'wö baibenanö kabatö Dios wei̧ otidobö 'da̧batö junawo̧ ö̧jakobe, jo̧kwajabetjö̧ baikwö wetakwö: Jo̧bajayedö jwaikwöda yȩekwi̧ ji̧ jawatjöbi, 'dukwachinö owawatjöbi 'da̧bachibö tjö̧jobö jo̧betjö̧, ökwöbi metu'wö kwö̧jonö ja̧ jawatjö̧ 'da̧bachibö kwö̧jobö jo̧be. Jo̧kwajabetjö̧ teada̧lönö kwö̧jo, ubasobu o̧'do̧bubi, ju'wi 'dukwachinö owawabi kwowapji jö̧ba̧lö, ja̧danö teada̧lönö kwö̧jo, ja'yubebi yȩekwi̧ ji̧ jawa kwukwapji jö̧ba̧lö. Ja̧danö kwitji̧nö kwemajelö tupakwö, la'akatjöda öwö'ye 'witjobö jwiakobe, Dios wei̧ ja̧otö jö̧ba̧lö 'da̧batö junawökwe ö̧jakobetjö̧. Jo̧ba kwitji̧ kwemakwo̧da jamatö pjaatakwo̧ ömöledö israel jojodönö, filisteo jojodö tjujulutjö tjö̧jibakobetjö̧, —jö̧ba̧lö yöawinobe Isabenö Jo̧ma.

⁶ Yöawoko, jojosujuma jilekwe Manoa ö̧jobekwö 'ya̧wibö yöjawinobe, —Dios ömöyaedötjö bakwo̧ ichö yöawajabeta. Jo̧ba ichejekwi̧ma Dios weökwe angeldanö ichejekwo̧nö chedatö, yetaibanö juluwo̧nö. Jo̧kwaijayonö jo̧banö abebö cha̧ja̧kwökötö, detjö ichajobö jö̧ba̧lö, ja̧danö imi yöawökötö.

⁷ Jo̧kwaijayonö yöawi̧ma baikwö yöawatö, –Metu'wo babibaju, kwitji̧nö kwemakwujuja, Dios wei̧ otidobö 'da̧batö junawökwenö, jo̧kwajabetjö̧ ubasobu o̧'do̧bubi, ju'wi 'dukwachinö owawabi owökönui, ja̧danö yȩekwi̧ ji̧ kwakwawa jawa kwökönui, —jö̧ba̧lö yöjawinobe jilekwenö.

⁸ Yöjawökwe, Manoama Isabenö Jo̧nö aebinobe: —Chuluwo̧ Isabenö Jo̧, ökwönö ateba, kwömöayo̧ weköbajökwenö yemidanö dö̧jobekwö weköbobö, ichö chilekwo jemakwo̧nö otiwanö diteada̧lakwa̧ jawa ökwödönö ö̧ba̧jadobö, —jö̧ba̧lö aebinobe.

⁹ Aebökwe, Isabenö Jo̧ma a̧ja̧kwinobe, ja̧danö yemidanö angeldanö ichejekwö ichinobe. Manoa ilekwo batjonö jö̧bonö, yemidanö öwawachinobe jöba a'o, jo̧kwaijayonö öwawachenama jilekwe deinobe.

¹⁰ Jo̧kwajabetjö juluwanö ö'öbakwawö jilekwenö yöjawinobe, —Mada ötjönö yöbawö ichinama, yemidanö chöba a'o öwawachajabe, juluwanö ichi, —jö̧ba̧lö.

¹¹ Yöjawökwe, ilekwokwö i̧'yinobe Manoama, ja̧danö öba a'o ichibö abebö a̧ja̧kwinobe, —Ökwöma belö bisu chilekwonö yöbawinaköbiji̧? —jö̧ba̧lö. Aebökwe, —Jau, ötjödasa, —atadinobe.

¹² Atadökwe, Manoama abebö a̧ja̧kwinobe, —Kwatjö̧ma yökawinadanö jitji̧nö jemenama, jo̧banö weawama di̧ya, otiwanö ja̧bö ö̧jobö? Ja̧danö otidakwa̧ma, di̧ya? —aebökwe,

¹³ angeldanö ichejekwo̧ Isabenö Jo̧ma atadinobe, —Okobe jwiinö kwilekwonö wetinama, teada̧lönö a̧ja̧kwö jö̧jobö jo̧be.

¹⁴ Ja'yubebi uba waji̧ jawatjö jukwobö jwiobe. Ubasobu o̧'do̧bubi, ju'wi 'dukwachinö owawabi jowobö jwiobe. Ja̧danö yȩekwi̧ ji̧ jawa ja'yubebi jukwobö jwiobe. Okobe jwiinö wetina jawa, teada̧lönö ja̧bö jö̧jobö jo̧be, wainö ja̧ja̧pji jö̧ba̧lö, —atadinobe.

^15-16 Manoama wajwiinobe, yöbawo̧ma angeldanö ichejekwö Isabenö Jo̧ Diosda, jö̧ba̧lö, ja̧danö aebinobe, —Juluwanö kwȩwa̧jokobö adebakwö, ja'yubenö kwiteada̧lobö adebakwö, ja̧danö chivoso̧ ja'yuwo̧nö kwabö todakobe, kwȩwa̧ja̧kwa̧ abönö kwukwobö, —jö̧ba̧lö. Aebökwe, angeldanö ichejekwo̧ Isabenö Jo̧ma atadinobe, —Jau, akebaduwi̧danö chiteada̧locha, jo̧kwaijayonö kwakwawa chukwökakwo̧sa. Jo̧kwaijayonö kwösöditjö̧ma, kwabö juwö Isabenö Jo̧nö kwiyaduwena, jwiinö ubinö iyawama, —jö̧ba̧lö.

¹⁷ Jemi ikenama Manoama jo̧banö abebö a̧ja̧kwinobe, —Ökwöma dakwö kwimikwa? Kwimi döwaisobö jö̧da̧lobe, yökawaja̧danö chilekwo jitji̧nö jemenama, jweinö yökawaja̧ jawa yöda̧lakobetjö̧. Jau, kwimi yöda̧lobö jö̧da̧lobe, jweinö yökawaja̧ a̧ja̧kwibö, jojodö otiwanö ökwönö tjomukwatakobetjö̧, —jö̧ba̧lö.

¹⁸ Aebökwe, angeldanö ichejekwo̧ Isabenö Jo̧ma atadinobe, —Chimi abebö kwa̧ja̧kwaduwobö jwiobe. Chimima inesö otiwi̧ imi, ja̧danö kwa̧ja̧kwaduwobö jwii̧, —jö̧ba̧lö atadinobe.

¹⁹ Atadökwe, Manoama chivoso̧nöbi, harinaso̧pjabi emibö, inabanö öwaninobe, ja̧danö wanajo̧, juwö iyinobe Isabenö Jo̧nö. Ja̧danö, Manoabi ilekwobi tjȩda̧lonö, Isabenö Jo̧ma iteda ujulu i̧sȩbinobe tjöba a'otjö, tjöbajale jalaka baibanö.

²⁰ Manoa iyaja̧ ubi̧ ökwöla mölȩjȩbe kaamenama, angeldanö ichejekwo̧ Isabenö Jo̧ma, ökwölanö kaekwajinobe mölȩjebe, tjöba a'otjö debi baibanö. Ja̧danö, jejenö balediawö̧, Manoabi ilekwobi yetjaibanö tjöba nijakwö metji̧nobe.

²¹ Jejenö tjöba a'otjö deinö baibinobe Isabenö Jo̧ma, yemidanö öwawachökönö. Ja̧danö bajaliyanö Manoama öwaisachibinobe, —Dedajökwema, jojomaö̧kö̧, angeldanö ichejekwo̧ Isabenö Jo̧da, —jö̧ba̧lö.

²² Ja̧danö waisachibajo̧, Manoama ilekwonö yöa̧linobe, —¡Ayö, ökwödöwe! Isabenö ö'wö badibakwedösa, Diosnöda dedajobetjö̧, —jö̧ba̧lö.

²³ Yöa̧loko, ilekwoma jatadinobe, —Chedemi isabenö ökwödönö kwabö loobö omukwatatjö̧ma, diyaja̧ ösödoko jö̧a̧lajena Isabenö Jo̧ma, ja̧danö iteda ujulu ökwödönö i̧sȩboko jö̧a̧lajena, ja̧danö tupakwö otiwanö baledakwa̧ jawa yöawoko jö̧a̧lajena, chedemi ökwödönö kwabö loökena, —jö̧ba̧lö jatadinobe.

²⁴ Ja̧danö, Dios yöawaja̧danö, Manoa ilekwoma jitji̧nö jeminobe, ja̧danö jitji̧nö tjimidinobe Sanson jö̧ba̧lö. Ja̧danö, Sansonma otiwanö ö̧da̧peachinobe, ja̧danö Isabenö Jo̧ma otiwanö pjaatinobe Sansonnö.

²⁵ Jobadöma, Majane Dan comunidadnö tjö̧jinobe, Zora comunidadbi, Estaol comunidadbi ö'weje. Ja̧danö jobe Sanson ö̧jonö, Isabenö Jo̧ o̧'wo luwo̧ma, jamatö Sansonnö ujuluwachibanö pjaatinobe, ömöledö israel jojodönö tjö̧jibinö pjaatakobetjö̧.