Jueces 11 - Dios Iwene

Jefte Galaad niji jojodötjö la'aka tjuluwo̧ baibina jawa

¹ Galaad niji jojodötjö bakwo̧ jwiinö ölakwabikwawa jawa juluwo̧ ö̧jinobe, Jefte mikwo̧ma. Jefte abe'doma Galaad mikwo̧, jo̧kwaijayonö ojo'doma Galaad ilekwobökuju, jilekwamuböködökwö 'da̧'da̧bakwawö ju̧ju̧.

² Galaad ilekwobi jitji̧mu ömadönö jeminobe, ja̧danö jobadö tjö̧da̧peachenama, Jeftenö öpöjödö a'dewö lotjinobe, —Ökwöma dojo'dö jitji̧bö̧kö̧ja, jeluju jitji̧ja. Jo̧kwajabetjö dabe'do ö'wö baibenama, iteatjö kwemobö wedökakwedösa, dabe'do ilekwobökuju jitji̧köbobetjö̧, —jö̧ba̧lö.

³ Jejenö a'dewö lotjiökwe, Jeftema tjö̧jelö döibajinobe, Tob nijibe, jobe ö̧jobö. Ja̧danö, Tob nijinö ö̧jonö, ju'wedö mikwawöködö sulabedöma ö̧jobekwö tjichinobe, ömöayedö batjibanö, ja̧danö Jeftema jobadönö öbibö labebiainobe, ju'wedökwö ölakwabikwawö tjitea idöda tjitea baibanö 'dötjebobö.

⁴ Ja̧danö, lekwe möle jejenö Tob nijinö ö̧jajabema, Amonitas jojodöma israel jojodökwö tjölakwabikwawinobe.

⁵ Ja̧danö, amonitas jojodö ölakwabikwawö tjichenama, Galaad niji luwedöma Jefte pjaatobö tjomukwatinobe, ja̧danö Tob nijibe tji̧'yinobe, jobetjö Jeftenö tjichejebobö.

⁶ Tob nijibe ichibö atjebinobe Jeftenö, —Jefte, ökwödönö pjakatobö adebaduwakwö, ökwödötjö ölakwabikwawa jojodö tjuluwo̧ bakibobö dösöda, ökwö ökibonö, otiwanö amonitas jojodönö dölakwabikwawakobetjö̧, —jö̧ba̧lö atjebinobe.

⁷ Jejenö atjebökwe, Jeftema atadinobe, —Ökwödödatija ajayinö ötjönö öpöjödö a'dewö lobinadöma. Ökwödöma chabe'do ejutjö latebinö a'dewö lobinadöja. Jo̧kwajabetjö̧, babe ökwödö wene kwujuna̧laduwenama, tajawedö ötjö pjatatobö akebaduwobeda? Ötjönö kwöpöjödinaduwobema, tajawedö ökwödönö pjatatobö? Pjatatobö jwiena, —jö̧ba̧lö atadö abebö a̧ja̧kwinobe Jeftema.

⁸ Atadawö̧, Galaad niji luwedöma Jeftenö yötja̧linobe, —Yöka̧laja̧danö jo̧be, jo̧kwaijayonö ajayinö ökwönö döpöjödinajayönö, domukwati̧ balewachinö babe duluwo̧ bakibobö dösöda. Jau Jefte, ölakwabikwawadö tjuluwo̧ ja̧nö, ökwödönö öbibö, otiwanö amonitas jojodönö dölakwabikwawobö pjakatobö adebakwö, ja̧danö jejenö pjakatitjö̧ma, okobe deinö ökwödö Galaad niji ju̧kwadötjö inesö la'aka duluwo̧ bakibanö dujunakobe, —jö̧ba̧lö yötja̧linobe.

⁹ Yötja̧lökwe, Jeftema atadinobe, —Yöka̧laduwaja̧danö, ökwödökwö ȩwa̧jö, amonitas jojodökwö kwölakwabikwawaduwobö öbibö pjatatitjö̧ma, ja̧danö Isabenö Jo̧ Dios jobadönö chujuluwobö pjaatitjö̧ma, isabenö kwuluwo̧duwi batibanö kwujunaduwakwa̧ji̧? —abebö a̧ja̧kwawö̧,

¹⁰ —Jau, isabenö duluwo̧ bakibanö dujunakwedösa. Isabenö Jo̧ma yöda̧laja̧ a̧ja̧kwajabe, ja̧danö yöda̧laja̧danö ja̧bökönö, la'aka duluwo̧ bakibanö dujunökötjö̧ma, isabenö ökwödönö lȩebobö ja̧kobe. Babe adebaja̧danö pjakatitjö̧ma, isabenö weköbakwa̧ a̧ja̧kwö dö̧jakwedösa —jö̧ba̧lö tjatadinobe Galaad niji luwedöma.

¹¹ Jo̧kwajabetjö̧ Jeftema Galaad niji luwedökwö ȩwa̧jinobe, ja̧danö jojodöma Jeftenö la'aka tjuluwo̧ baibanö tjujuninobe, ja̧danö ju'wibi ölakwabikwawa jojodötjö la'aka luwo̧ baibanö tjujuninobe Jeftenö. Ja̧danö, jobe Mizpa comunidadtjö, Isabenö Jo̧ öba a'otjö ja̧bö ö̧jakwa̧ jawa yöbawö ujuninobe Jeftema.

Jefte amonitas jojodökwö yöa̧lakwawina jawa

¹² Jemi ikenama Jeftema yöbawadönö weinobe, Jefte iminö amonitas jojodötjö la'aka luwo̧nö yötja̧lobö, baikwö: —Tajawedö ötjönö kwödameakwobeda? Ökwökwö ötjökwö wene dujuna̧li̧ma di̧yada, baikwö chitebobe ichö kwölakwabikwawoböma? —jö̧ba̧lö Jefte yöa̧li̧ yötjawökwe,

¹³ amonitas jojodötjö la'aka luwo̧ma Jefte weajawö̧ yöbawadönö atadinobe, —Wene dujuna̧li̧ma baikwö yötawakwö: Damötjö̧ israel jojodö Egipto nijitjö baikwö tjichenama, chitebo niji tjö̧naukwinobetjö̧, wene dujuna̧lobe. Jau, Arnon ojwebi, Jaboc ojwebi ö'weje niji Jordan ojwebe ichibanö nijima, ötjöda chitebo nijiobe, jo̧kwaijayonö damötjö̧ israel jojodö tjö̧naukwinobe. Jo̧kwajabetjö̧ babe tjö̧naukwina niji tjekatitjö̧ma, wene jwiena, dölakwabikwawobö jwiena, —jö̧ba̧lö yöawi̧ Jeftenö yötjawobö weinobe.

¹⁴ Yötjawökwe, yemidanö yöbawadönö weinobe Jeftema, amonitas jojodötjö la'aka luwo̧nö yötjawobö.

¹⁵ Ichibö Jefte iminö yötjawinobe: —Duluwo̧ Jeftema baikwö yöawobe: Israel jojodöma moabitas jojodö tjitebotjöbi, amonitas jojodö tjitebotjöbi tjeminokobe, la'akatjöda.

¹⁶ Israel jojodö Egipto nijitjö latjebenama, jojodö deobenö tji̧'yinobe, jwaibalawa Mar Rojo ötjabawabe tji̧'yinobe, ja̧danö jobetjö Cades comunidadbe kwetjachinobe, Edom niji ö'öböbe.

¹⁷ Cadesbe ichibajadö, israel jojodöma yöbawadönö wetjinobe Edom niji la'aka luwo̧nö atjebobö, itebo niji ö'wejenö kwetjachobö, jo̧kwaijayonö atjebaja̧ a̧ja̧kwobö öpöjödinobe Edom la'aka luwo̧ma. Ju'wibi Moab niji la'aka luwo̧nö atjebinobe, itebo niji ö'wejenö tjöbaledobö, jo̧kwaijayonö jo̧babi öpöjödinobe. Jo̧kwajabetjö, jejenö tjöpöjödiawö̧, ja'yubenö lekwajabetjö Cadestjöda tjö̧jinobe israel jojodöma.

¹⁸ Ikenama, Edom nijibi, Moab nijibi söpödibö jojodö deobe kwetjachinobe israel jojodöma, Moab nijitjö jawo̧ laebobekwö tjichibanö, ja̧danö Arnon ojwe bakwachödökwö tjö̧jinobe. Jödö Arnon ojwema Moab niji ö'öbösödö, ja̧danö bakwachödö o̧peda tjö̧jinobe, Moab niji tebachökönö.

¹⁹ —Jemi ikenama israel jojodöma yöbawadönö wetjinobe, amoreos jojodötjö la'aka luwo̧, Hesbon comunidad la'aka luwo̧ Sijon mikwonö atjebobö, –Kwitebo niji pedibobö adebakwö, ditebo canaan nijibe dichibobö, –jö̧ba̧lö.

²⁰ Jo̧kwaijayonö atjebökwe öpöjödinobe Sijonma, –Chitebobenö petjibitjö̧ma tjönaukwena, –jö̧ba̧lö. Ja̧danö, jejenö omukwatö, Sijonma okobe deinö ömöayedönö o̧ko̧kodinobe, ja̧danö ko̧ko̧dajo̧, Yahaza comunidadtjö tjabakwemi tjujuninobe, ja̧danö jemi ikenama israel jojodönö mebibö ölakwabikwawinobe.

²¹ Jo̧kwaijayonö ökwödö israel jojodö dösödökwe Isabenö Jo̧ Diosma pjaatinobe, israel jojodö Sijonnö tjujuluwobö, ja̧danö Sijonnöbi, okobe deinö ömöayedönöbi tjujuluwinobe. Jemi ikenama, juluwajadö, tjujuluwajawö̧ amorreo jojodö tjiteboineminö tjö̧jinobe israel jojodöma, ajayinö amorreo jojodö tjö̧jinemi nijinö.

²² Arnon ojwetjö Jaboc ojwebe ichibanö niji, jojodö deobetjö Jordan ojwebe ichibanö niji, ajayinö amorreo jojodö tjiteboinemi tjeminobe israel jojodöma, tjitebo baibanö, ja̧danö emajadö jobe tjö̧jinobe.

²³ —Ja̧danö, baikwö yötawakwö, ökwödö israel jojodö dösödökwe Isabenö Jo̧ Diosda amorreo jojodönö juluwinama. Ökwödö jo̧ba ömöledö israel jojodönöda pjabatö, jobadönö ujuluwinobe, ja̧danö juluwajo̧, tjiteboinemima ökwödönö iyinobe. Kwedaduwemi, jejenö ökwödö israel jojodönöda jejenö iyinobema, ökwödö amonitas jojodö kwemaduwobö jȩnaji̧?

²⁴ Ja̧maökö, baikwö yötawa: Ökwödöma kwösödaduwökwe Quemosnö ösödadöja, ja̧danö kwösödaduwökwe Quemosma ökwödönö niji iyitjö̧ma, iyaja̧ nijinö kwö̧jaduwobö jwienaji̧? Jȩna, ja̧danö baikwö yötawakwö: Okobe jwiinö dösödökwe Isabenö Jo̧ Dios iyaja̧ nijinö ökwödö israel jojodö dö̧jobö jo̧be. Jau, ökwödönö pjabatö, ajayi bemi nijinö ji̧nadönö ujuluwinobe dösödökwe Diosma, jo̧kwajabetjö̧ isabenö iyina nijinö dö̧jobö jo̧be.

²⁵ —Ja̧danö ju'wibi yötawakwö, damötjö ji̧na Moab niji la'aka luwo̧bina Balac mikwo̧nö kwomukwato. Jo̧ba jwiinö juluwo̧ la'aka luwo̧binama, israel jojodökwö ölakwabikwawinaji̧? Juluwo̧ ö̧jijayonö la'akatjöda israel jojodökwö ölakwabikwawinokobe jo̧bama, jö̧tö? Kwedemi jo̧ba ujulutjö bajalekwönönö kwujuluwenaji̧?

²⁶ —Isabenö yötawakwö, ida̧ökö trecientos o̧biya baledibanö bemi nijinö dö̧jajabe, Hesbon comunidadnöbi, Aroer comunidadnöbi, ö'öbö pjei̧ comunidadtenianöbi, Arnon ojwe ö'öbö comunidadnöbi. Isabenö bemi niji ökwödö amonitas jojodö kwiteboduwi ji̧tjö̧ma, damötjö kwemaduwobö ji̧nena. Jo̧kwaijayonö damötjö kweminaduwokobema, öwaetjöda öwawobe, babe ökwödötjö 'dökebaduwoböma jwiobe, jö̧ba̧lö.

²⁷ Jau, ökwödönö sulabenö ja̧dijökötö, babe ökwödönö kwödameakwaduwoböma. Ökwödöda ökwödönö ölakwabikwawö sulabenö ja̧badöja, sulabenö ja̧dököjayonö sulabenö ökwödönö ölakwabikwawadöja. Isabenö Jo̧ Diosda inesö lȩekwa luwo̧ma, ja̧danö jo̧bada yöawakwo̧, ökwödötjö didö jweinö tjomukwatojobö jö̧ba̧lö, ökwödö israel jojodöö̧kö̧, ökwödö amonitas jojodöö̧kö̧, —jö̧ba̧lö yöawi̧ weinobe Jeftema, amonitas jojodötjö la'aka luwo̧nö.

²⁸ Jo̧kwaijayonö jweinö yöawijayonö, amonitas jojodötjö la'aka luwo̧ma Jefte yöawaja̧ a̧ja̧kwinokobe, jwaikwöda tjölakwabikwawobö omukwatinobe.

Jefte amonitas jojodönö ujuluwina jawa

²⁹ Ja̧danö, Isabenö Jo̧ o̧'wo luwo̧ma Jeftenö pjabatö ichibinobe, ja̧danö Jeftema okobe jwiinö Galaad nijibenöbi, Manasesaso nijibenöbi öbaledinobe, israel jojodötjö ölakwabikwawadönö ko̧ko̧dö. Ja̧danö, Galaad niji comunidad Mizpatjö ko̧ko̧dajo̧, tupakwö amonitas jojodökwö tjölakwabikwawobö öibinobe.

³⁰ Ja̧danö, tjölakwabikwawakwa̧ abönö, Jeftama isabenö ja̧akwa̧ wene yöbawö ujuninobe baikwö: —Chuluwo̧ Isabenö Jo̧, isabenö amonitas jojodönö chujuluwobö pjakatitjö̧ma,

³¹ isabenö chujuna̧litjö kwabö juwö chiyakwo̧sa. Amonitas jojodönö juluwajo̧, wene jwiinö chejube chichibobö pjakatitjö̧ma, cheju apjudetjö ajayinö labebo̧nö kwabö juwö chiyakwo̧sa, ökwö kwitea baibanö, ja̧danö jwiinö ubinö iyawa baibanö, kwabö juwö chiyakwo̧sa, —jö̧ba̧lö yöbawö ujuninobe.

³² Ikenama, yöbawö junajo̧, Jeftema israel jojodönö öbibö i̧'yinobe amonitas jojodö tjö̧jobekwö, jobadökwö ölakwabikwawobö. Ja̧danö, Isabenö Jo̧ma isabenö pjaatinobe, amonitas jojodönö ujuluwobö.

³³ Jwiinö amonitas jojodönö ujuluwinobe Jeftema, Aroer comunidadtjö jamatö, Minit comunidadbe ichibanö, ja̧danö Abel Queramin comunidadbe ichibanö. Amonitas jojodö tjitebo comunidadtjö, veinte comunidadbiya jojodönö ujuluwinobe, jwiinö amonitas jojodönö ululuwinobe, israel jojodö tjöba a'otjö amonitas jojodö tjujulu jwitjenanö baibanö.

³⁴ Jemi ikenama, amonitas jojodönö juluwajo̧, Jeftema ejube ȩwa̧jinobe, Mizpa comunidadbe. Ja̧danö, ichibö, eju apjudetjö labebujunö edinobe, itjiju jo̧dawujunö. Ju'wedö ijti̧mu deinobe, sule jo̧dawujuda jö̧jinobe. Ja̧danö jabe'do wene jwiinö ichibioko, jo̧'wo̧ ösöwanö baile döbö, la̧tiayu̧danö chabö, jabe'donö edö lajebinobe.

³⁵ Itjiju lajebobe edö, Jeftema jwiinö o̧'wo tjo̧achö öka̧miji̧do̧ kȩ'ekwö loinobe, ja̧danö itjijunö yöa̧linobe, —Ayö, chitjijuwe! Jwiinö cho̧'wo tjo̧achobö ja̧köbajabe chitjiju, abönö chejutjö lakebajobetjö̧. Jau chitjiju, jejenö lakebajobetjö̧ nöinö wene chujuna̧lobe babema, Isabenö Jo̧nö isabenö chiyakwa̧ jawa yöbawö chujuninobetjö̧. Ja̧danö, ida̧ökö Isabenö Jo̧nö yöbawö chujuninobema, yöbawö chujuninadanö ja̧bökönö, yötawina katatibobö jwiobe, chitijuwe, —jö̧ba̧lö budekwö itjijunö yöawinobe Jeftema.

³⁶ Yöawoko, jabe'donö jatadinobe Jefte itjijuma, —Chabe'do, ida̧ökö Isabenö Jo̧nö isabenö kwiyakwa̧ jawa yöbawö kwujuninobema, jwaikwöda yöbawö kwujuninadanö ötjönö ja̧köbobö jo̧be. Jau chabe'do, Isabenö Jo̧ma akebinadanö pjaatinobe, döpöjojodö amonitas jojodönö kwujuluwobö, jo̧kwajabetjö̧ yöbawö kwujuninadanö ja̧köbobö jo̧be.

³⁷ Jo̧kwaijayonö ja'yubenö kwiteada̧lobö atebakwö chabe'do, yöbawö kwujuninadanö ja̧köbakwa̧ abönöma. Jawo̧dö du̧ju̧tajanö kwiteada̧lobö atebakwö, chömöledö ya̧dö möayedökwö chubudekwonö. Jau chabe'do, la'akatjöda chilekwenö emökuju batibajabe, jo̧kwajabetjö̧ ja̧ jawa budekwö, chömöledökwö mösa'iju jȩmi kwebachö chubudekwabobö jö̧ta̧la, —jö̧ba̧lö jatadinobe Jefte itjijuma.

³⁸ Ajebökwe, —Jau, jawo̧dö du̧ju̧taja baledibanö kwömöledökwö kwebachaji, —jö̧ba̧lö weinobe. Jo̧kwajabetjö̧, jömöledökwö budekwabinö kwebachö jö̧jinobe mösa'iju jȩmima, la'akatjöda jilekwenö jemökakobetjö̧,

^39-40 ja̧danö jawo̧dö du̧ju̧taja baledibajenama, jabe'do ö̧jobekwö jȩwa̧bijinobe. Ja̧danö, ajayinö yöbawö ujuninadanö, Jeftema itjijunö kwabö juwö iyinobe Diosnö. Ja̧danö, Jefte itjijuma la'akatjöda iso̧kwö jö̧jinokobe. Ja̧danö, ja̧ baledina omukwatö, o̧ba bakwabakwena israel jojodötjö ya̧dö ina tjilekwamunö emöködöma tjubudekwobe, Jefte itjijunö omukwatö. O̧ba bakwabakwena, ö'wejemu jawa möle baledibanö kwebachö tjubudekwobe, Galaad niji jojo Jefte itjijunö omukwatö.