Jueces 10 - Dios Iwene

Tola mikwo̧ israel jojodönö pjaatina jawa

¹ Ja̧danö, Abimelec ö'wö baibaja̧ ikenama, Tola mikwo̧ma israel jojodönö pjaatinobe, tjöpöjojodötjö tjö̧jibobö. Jo̧ba Tolama, Fuva mikwo̧ itji̧, ja̧danö Dodo mikwo̧ ö̧'dö̧. Tolama Isacarsaso jojoinobe, jo̧kwaijayonö, Efrainsaso niji mösa'iju jȩmi comunidad Samirnö ö̧jinobe,

² ja̧danö veintitres o̧biya baledibanö israel jojodönö pjaatinobe. Ikenama, Tolama ö'wö baibinobe, ja̧danö ö'wö babibajo̧nö tjo̧tji̧nobe, Samir comunidadtjö.

Yair mikwo̧ israel jojodönö pjaatina jawa

³ Ja̧danö, Tola ö'wö baibaja̧ ikenama, Galaad niji jojo Yair mikwo̧ israel jojodönö pjaatinobe, veintidos o̧biya baledibanö.

⁴ Jo̧ba Yairma itji̧mu ömadö treintabedönö ujuna̧linobe, ja̧danö jobadöma tjabe'donö pjatjatinobe, israel jojodö tjuluwedö ja̧nö. Jobadö treintabedö Yair itji̧muma, bakwo̧nökwena tjajwikwena bulo oma'anö kwetjachinobe, ja̧danö bakwo̧nökwena Galaad niji comunidadkwena la'aka luwedö tjö̧jinobe. Ja̧ treinta comunidadbiya wetjinemima, babe mölȩ baibanö Yair comunidadbiya jö̧ba̧lö ötjabobe, Yair itji̧mu jobe ja̧nö wetjinobetjö̧.

⁵ Ja̧danö, Yair ö'wö baibenama, Camon comunidadnö jo̧banö tjo̧tji̧nobe.

Amonita jojodö israel jojodönö tjujuluwina wene

⁶ Ja̧danö, israel jojodöma yemidanö Isabenö Jo̧ öpöjödi̧ jawa sulabenö ja̧tji̧nobe. Yemidanö Baal ötjabökwe o̧'wo jawanöbi, Asterot ötjaboko jo̧'wo jawanöbi sulabenö tjösödinobe. Ju'wibi, jelobetenia jojodö tjösödawö̧ o̧'wo jawanöbi sulabenö tjösödinobe israel jojodöma, Arar niji jojodö tjösödawö̧nöbi, Sidon niji jojodö tjösödawö̧nöbi, Moab niji jojodö tjösödawö̧nöbi, amonitas jojodö tjösödawö̧nöbi, filisteo jojodö tjösödawö̧nöbi. Idöda tjösödo jö̧tja̧lökwe Isabenö Jo̧nö ösödökönö, jo̧banö kabatibö ju'wedötenia tjösödawö̧ o̧'wo jawanöda sulabenö tjösödinobe israel jojodöma.

⁷ Ja̧danö, jejenö sulabenö ja̧tji̧ökwe, Isabenö Jo̧ma ödameakwachibinobe israel jojodönö, ja̧danö jobadönö iyö loinobe, filisteo jojodöbi, amonitas jojodöbi jobadönö tjujuluwobö.

⁸ Jo̧kwajabetjö̧ ja̧ o̧ba filisteo jojodöbi amonitas jojodöbi jamatö israel jojodönö tjujuluwinobe, ja̧danö usula tjemawinö ja̧tji̧nobe. Ali̧nösamu jelemutjö wa̧pötakwa o̧biya baledibanö, amorreo jojodö ajayinö tjö̧jinemi Galaad nijinö ju̧kwadö, Jordan ojwetjö jawo̧ laebobekwö ju̧kwadö israel jojodönö usula tjemawinö ja̧tjinobe tjöpöjojodöma.

⁹ Ja̧danö, ju'wibi amonitas jojodöma Jordan ojwe pebibö, Judasaso jojodökwöbi, Benjaminsaso jojodökwöbi, Efrainsaso jojodökwöbi tjölakwabikwawinobe, israel jojodö jwiinö usula tjemawinö.

¹⁰ Jejenö balediawö̧, israel jojodöma Isabenö Jo̧nö tjubudekwinobe: —Duluwo̧ Isabenö Jo̧, kwöba a'otjö sulabenö kwöpöjödinö ja̧dajabe. Jau duluwo̧, ökwö, dösödo jö̧da̧lökwe Diosnö kabatibö, ju'wedö tjösödawö̧ Baal ötjabawö̧nöda sulabenö dösödajabe, —jö̧ba̧lö tjubudekwinobe Diosnö.

¹¹ Jejenö tjubudekwiökwe, Isabenö Jo̧ma israel jojodönö atadinobe: —Kwöwaisaduwa, ötjöma otiwanö ökwödönö pjabatinasa, egipcio jojodötjöbi, amorreo jojodötjöbi, amonitas jojodötjöbi, filisteo jojodötjöbi,

¹² sidonios jojodötjöbi, amalecitas jojodötjöbi, madianitas jojodötjöbi kwö̧jibaduwobö, jö̧tö? Jau, jobadö usula kwemawaduwinö ja̧tjenama, kwubudekwinaduwobe, kwö̧jibaduwinö pjatatobö, ja̧danö akebinaduwadanö otiwanö kwö̧jibaduwinö pjabatiachijatö, jö̧tö?

¹³ Jo̧kwaijayonö, ba̧kwelöjatebö jejenö ökwödönö pjabatiachinajayonö, yayonö ötjönö kabatibö ju'wedö tjösödawö̧nöda ösödajibö ja̧döja. Jo̧kwajabetjö baikwö yötawaduwakwö, Tjo̧wita, kwö̧jibaduwinö pjatatökö.

¹⁴ Ökwödöma ju'wedönöda omudawö kwujunaduwajabe, kwuluwedö diosbedö tjö̧jobö, jo̧kwajabetjö̧ babe usula kwemawaduwenama, jobadö omudawö kwujunaduwajawö̧nöda akebaduwo, kwö̧jibaduwinö pjatjatobö. Jau, jobadö omudawö kwujunaduwajawö̧da pjatatobö jo̧be, ötjö kakatibinaduwökwema pjatatobö jwiobe, —jö̧ba̧lö atadinobe Diosma.

¹⁵ Atadiawö̧, israel jojodöma Isabenö Jo̧nö yötja̧linobe, —Duluwo̧, isabenö sulabenö ja̧dajabe, ja̧danö isabenö ökwödönö lȩkebobö jo̧be, ökwöda lȩkebobö kwomukwati̧danö. Jo̧kwaijayonö, adebakwö, babe döpöjojodötjö dö̧jibinö pjakatobö, —jö̧ba̧lö.

¹⁶ Ja̧danö, israel jojodöma ju'wedö tjösödawö̧ o̧'wo jawa tjujuna̧lawö̧nö tjö̧'da̧detjö ikwö lotjinobe, ja̧danö jobadönö kabatibö, tjebachajö Isabenö Jo̧nö tjösödinobe. Ja̧danö, Isabenö Jo̧ma israel jojodö usula tjemawi̧ edö, jobadönö o̧'wo tjo̧achinobe, Tjo̧wita, jobadönö pjatatocha, jö̧ba̧lö.

¹⁷ Jemi ikenama, amonitas jojodöma tjo̧ko̧kokwinobe, israel jojodökwö tjölakwabikwawobö, ja̧danö ko̧ko̧kwajadö, tjabakwemi tjujuninobe Galaad nijinö. Ja̧danö israel jojodöbi amonitas jojodökwö tjölakwabikwawobö tjo̧ko̧kokwinobe, ja̧danö israel jojodöma Mizpa comunidadtjö tjabakwemi tjujuninobe, jobetjö labebö tjölakwabikwawobö.

¹⁸ Ja̧danö ko̧ko̧kwajadö, israel jojodötjö Galaad niji ölakwabikwawa jojodö tjuluwedöma yötja̧lakwawinobe, —Tinö 'da̧batö dujunakwa̧da, duluwo̧ ja̧nö dölakwabikwawonö öibakwo̧ma? Jo̧ba döpöjojodönö dölakwabikwawobö öibakwo̧da okobe deinö ökwödö israel jojodötjö Galaad niji ju̧kwadö la'aka duluwo̧ ö̧jakwo̧, —jö̧ba̧lö yötja̧lakwawinobe.